Category: جرائم و حادثات

اوچ شریف (باغی ٹی وی نامہ نگار حبیب خان)اوچ شریف کے نواحی علاقے چوک بھٹہ کوٹلہ موسیٰ خان روڈ پر ایک خوفناک حادثہ پیش آیا، جس میں 25 سالہ عمران ولد خادم حسین سکنہ کوٹلہ سلطان احمدپور موقع پر جاں بحق ہو گیا۔

تفصیلات کے مطابق، عمران اپنی CD 70 موٹرسائیکل پر جا رہا تھا کہ سامنے سے آنے والے ٹریکٹر کے پیچھے لگے ہل سے ٹکرانے کے بعد حادثہ پیش آیا۔ عینی شاہدین کے مطابق، عمران نے جب ٹریکٹر کو اوور ٹیک کرنے کی کوشش کی تو موٹر سائیکل بے قابو ہو گئی اور سیدھا ہل سے ٹکرا گئی، جس کے نتیجے میں اسے شدید ہیڈ انجری آئی اور وہ موقع پر دم توڑ گیا۔

حادثے کے بعد علاقے میں افسوس اور غم کی فضا قائم ہو گئی، اور لواحقین نے ڈیڈ باڈی کو شفٹ کرنے سے انکار کر دیا۔ اطلاع ملتے ہی مقامی پولیس اور ریسکیو ٹیمیں جائے حادثہ پہنچ گئیں۔

اوچ شریف (باغی ٹی وی نامہ نگار حبیب خان)اوچ شریف شہر میں غیر قانونی لاؤڈ اسپیکروں کا استعمال تیزی سے بڑھ رہا ہے، جس سے شہریوں کی زندگی مشکلات کا شکار ہے۔ شہر کے مختلف علاقوں میں سبزی فروش، ریڑھی بان، پھیری فروش اور فقیروں نے میگا فون اور اسپیکر کے ذریعے شور مچایا ہوا ہے، جس سے شہری اذیت میں مبتلا ہیں۔

مرکزی چوک الشمس، ٹینکی چوک، حسینی چوک، صدر بازار اور گلی محلوں میں صبح سے شام تک اونچی آواز میں اشیاء فروخت کی ریکارڈنگز چلائی جاتی ہیں۔ یہ صورتحال نہ صرف ایمپلی فائر ایکٹ کی صریح خلاف ورزی ہے بلکہ شہریوں کی نجی زندگی اور سکون بھی متاثر ہو رہا ہے۔

شہریوں کا کہنا ہے کہ مریض، طلباء اور بزرگ سب سے زیادہ متاثر ہو رہے ہیں، گھروں میں بزرگ اور بیمار آرام نہیں کر سکتے، اور بچوں کی تعلیم میں خلل پڑ رہا ہے۔
شہر کے اکثر علاقوں میں کباڑیہ، فروٹ فروش، آئس کریم فروش اور بھکاری مافیا نے لاؤڈ اسپیکروں کا استعمال معمول بنا رکھا ہے۔

عوامی و سماجی تنظیموں کے نمائندگان نے بتایا کہ پولیس اور ضلعی انتظامیہ کی خاموشی اس غیر قانونی عمل کی حوصلہ افزائی کے مترادف ہے۔
شہریوں نے ڈپٹی کمشنر بہاولپور، اسسٹنٹ کمشنر احمد پور شرقیہ، اور ڈی پی او بہاولپور سے مطالبہ کیا ہے کہ ایمپلی فائر ایکٹ پر سختی سے عمل درآمد کرایا جائے، تاکہ شہر کے باسی سکون سے زندگی گزار سکیں۔

اوچ شریف (باغی ٹی وی نامہ نگار حبیب خان)بینظیر انکم سپورٹ پروگرام میں مستحق خواتین کی رقوم میں مبینہ کرپشن اور ناجائز کٹوتیوں کے انکشافات کے باوجود متعلقہ اداروں کی خاموشی نے عوامی حلقوں میں شدید غم و غصہ پیدا کر دیا ہے۔ذرائع کے مطابق گذشتہ رپورٹس کے باوجود ایف آئی اے، انٹی کرپشن اور ضلعی انتظامیہ نے ابھی تک کسی باقاعدہ انکوائری یا کارروائی کا آغاز نہیں کیا۔

مقامی شہریوں اور سماجی کارکنوں کا کہنا ہے کہ اس معاملے میں ملوث فرانچائزی اسحاق مزاور اور بی آئی ایس پی کے اسسٹنٹ ڈائریکٹر عامر شہزاد کلاچی کے خلاف الزامات کے باوجود تحقیقات کا آغاز نہیں ہوا، اور بدعنوانی کا سلسلہ بدستور جاری ہے۔
مستحق خواتین سے ہر قسط میں 1000 سے 1500 روپے تک غیر قانونی کٹوتیاں کی جا رہی ہیں۔ خواتین کا کہنا ہے کہ وہ اپنی حق کی رقم لینے جاتی ہیں تو سسٹم بند یا اکاؤنٹ بلاک کا بہانہ بنایا جاتا ہے، لیکن اصل میں ان کی رقوم سے کئی جیبیں بھری جا رہی ہیں۔

سماجی تنظیموں نے الزام لگایا کہ بعض بااثر عناصر اس اسکینڈل کو دبانے کے لیے دباؤ ڈال رہے ہیں۔ دوسری جانب ضلعی انتظامیہ اور ایف آئی اے ذرائع اس معاملے پر خاموش ہیں، جس سے شکوک و شبہات مزید بڑھ گئے ہیں۔

عوامی نمائندوں اور سول سوسائٹی نے چیئرپرسن بنظیر انکم سپورٹ پروگرام محترمہ روبینہ خالد اور وزیر اعلیٰ پنجاب سے فوری ایکشن لینے کا مطالبہ کیا تاکہ مستحق خواتین کے حقوق محفوظ رہیں اور کرپشن میں ملوث عناصر کو نشان عبرت بنایا جا سکے۔
سماجی مبصرین کا کہنا ہے کہ اگر اس میں شفاف تحقیقات نہ ہوئیں تو یہ مالی بدعنوانی کے ساتھ عوامی اعتماد کے قتل کے مترادف ہوگا۔

اوچ شریف (باغی ٹی وی نامہ نگار حبیب خان)اوچ شریف شہر اور اس کے گردونواح میں سیوریج کے گندے پانی سے سبزیاں اگانے کا خطرناک سلسلہ جاری ہے، جس سے شہریوں کی صحت شدید خطرے میں پڑ گئی ہے۔ شہر کے مختلف علاقوں میں پالک، مولی، گاجر، ساگ، بند گوبھی، پھول گوبھی، شلجم، آلو اور میتھی جیسی سبزیوں کی کاشت میں صاف پانی کی بجائے گندے سیوریج پانی کا استعمال کیا جا رہا ہے۔

شہریوں کا کہنا ہے کہ گندے پانی کی سبزیاں عموماً وہی قیمت پر مارکیٹ میں فروخت ہوتی ہیں جیسے صاف پانی سے اگائی گئی سبزیاں، جس سے مجبوراً انہیں خطرناک سبزیاں کھانی پڑ رہی ہیں۔

ماہرین صحت کے مطابق، گندے پانی سے اگائی گئی سبزیوں میں جراثیم اور بیکٹیریا کی مقدار عام سبزیوں کی نسبت کئی گنا زیادہ ہوتی ہے، جس سے آنتوں کی بیماریاں، دست اور دیگر مہلک امراض کا خطرہ بڑھ جاتا ہے، خاص طور پر بچوں، بوڑھوں اور کمزور افراد میں۔

ذرائع کا کہنا ہے کہ متعدد بار شہریوں نے پنجاب فوڈ اتھارٹی سے شکایات درج کروائی ہیں، لیکن حکام روٹین کارروائیوں میں مصروف نظر آتے ہیں اور ایسے کاشتکاروں کے خلاف مؤثر قدم نہیں اٹھاتے۔ ضلعی انتظامیہ بھی اس مسئلے پر مکمل خاموش ہے۔

شہریوں نے مطالبہ کیا ہے کہ ضلعی انتظامیہ اور پنجاب فوڈ اتھارٹی فوری کارروائی کریں اور سبزیوں کے معیار کی جانچ کے لیے مستقل بنیادوں پر مانیٹرنگ ٹیمیں تشکیل دی جائیں تاکہ عوام کی صحت کو لاحق خطرات سے بچایا جا سکے۔

اوچ شریف (باغی ٹی وی نامہ نگار حبیب خان)وزیر اعلیٰ پنجاب مریم نواز شریف کے عوام دوست وژن اور آئی جی پنجاب ڈاکٹر عثمان انور کی ہدایات کے تحت ڈی پی او بہاولپور محمد حسن اقبال نے ضلع بھر میں پولیس کو حقیقی معنوں میں عوام کی خدمت گاہ بنا دیا ہے۔ شہری مسائل کے فوری اور شفاف حل کے لیے کھلی کچہریوں کا سلسلہ مسلسل جاری ہے تاکہ پولیس اور عوام کے درمیان اعتماد کی مضبوط فضا قائم ہو۔

اسی سلسلے میں تھانہ اوچ شریف میں کھلی کچہری کا انعقاد کیا گیا، جس کی براہِ راست نگرانی ڈی پی او محمد حسن اقبال نے کی۔ کچہری میں شہریوں کی بڑی تعداد نے شرکت کی اور مختلف نوعیت کی شکایات پیش کیں۔

ڈی پی او نے شہریوں کے مسائل سنے اور متعدد شکایات پر فوری احکامات جاری کیے۔ انہوں نے افسران کو ہدایت کی کہ ہر شہری کے ساتھ عزت و احترام کا برتاؤ کیا جائے، اور انصاف میں تاخیر یا کوتاہی کسی صورت برداشت نہیں ہوگی۔

ڈی پی او نے کہا:”وزیر اعلیٰ پنجاب کے وژن کے مطابق پولیس عوام کی خدمت کے لیے ہے۔ ہر تھانہ شہریوں کے لیے کھلا ہونا چاہیے۔ میرٹ، شفافیت اور انصاف پولیس کا طرۂ امتیاز ہونا چاہیے۔ عوام کو دروازے پر انصاف دینا ہمارا فرض ہے۔”

اس موقع پر ایس ڈی پی او سرکل احمد پور شرقیہ محمود اکبر، ایس ایچ او تھانہ اوچ شریف فیصل امین اور دیگر افسران بھی موجود تھے۔
عوامی و سماجی حلقوں نے ڈی پی او محمد حسن اقبال کی عوام دوست پالیسیوں کو سراہتے ہوئے کہا کہ ان کی قیادت میں بہاولپور پولیس ایک مثالی فورس کے طور پر سامنے آئی ہے۔ اقدامات سے شہریوں کو پولیس پر دوبارہ اعتماد حاصل ہوا اور عوامی ریلیف میں نمایاں بہتری آئی ہے۔

عوام نے کہا کہ ڈی پی او کی زیرِ نگرانی کھلی کچہریاں حقیقی معنوں میں "انصاف عوام کی دہلیز پر” کے تصور کو عملی شکل دے رہی ہیں۔

اوچ شریف (باغی ٹی وی نامہ نگار حبیب خان)ڈسٹرکٹ پولیس آفیسر محمد حسن اقبال کی ہدایات پر تھانہ صدر احمدپور شرقیہ پولیس کی بڑی کارروائی — چوری کی متعدد وارداتوں میں ملوث ملزم گرفتار، ملزم کے قبضہ سے دو قیمتی موبائل فون اور ایک لاکھ روپے سے زائد نقد رقم برآمد کر لی گئی۔

کارروائی سرکل پولیس آفیسر محمود اکبر کی نگرانی اور ایس ایچ او سراج تبسم کی سربراہی میں کی گئی۔پولیس نے خفیہ معلومات، انٹیلی جنس ذرائع اور جدید ٹیکنالوجی کی مدد سے ملزم کو گرفتار کیا۔

ایس ایچ او سراج تبسم کے مطابق گرفتار ملزم سے مزید تفتیش جاری ہے اور جلد اس کے دیگر ساتھی بھی گرفتار کیے جائیں گے۔
برآمد شدہ سامان قانونی کارروائی کے بعد اصل مالکان کے حوالے کیا جا رہا ہے۔