Category: جرائم و حادثات

قصور (باغی ٹی وی، ڈسٹرکٹ رپورٹر طارق نوید سندھو) رائیونڈ روڈ چونگی نمبر 6 کے قریب تیز رفتار ڈمپر بے قابو ہو کر سڑک کنارے کھڑی فیملی پر چڑھ گیا، جس کے نتیجے میں 10 سالہ معیز شدید زخمی ہوا۔ بچے کو فوری طور پر ہسپتال منتقل کیا گیا مگر وہ زخموں کی تاب نہ لاتے ہوئے دم توڑ گیا۔

حادثے کے بعد علاقہ مکینوں میں شدید غم و غصہ پھیل گیا اور مشتعل افراد نے ڈمپر کو آگ لگا دی، جس سے وہ مکمل طور پر جل کر خاکستر ہوگیا۔ ڈرائیور موقع سے فرار ہونے میں کامیاب ہوگیا۔

آگ اور ہنگامہ آرائی کے باعث ٹریفک معطل رہی اور روڈ پر شدید رکاوٹ پیدا ہوئی۔ پولیس نے صورتحال پر قابو پانے کے لیے موقع پر پہنچ کر شواہد اکٹھے کرلیے اور قانونی کارروائی شروع کر دی ہے۔

قصور(باغی ٹی وی،ڈسٹرکٹ رپورٹرطارق نویدسندھو) گگڑ چوک کے پٹرول پمپ پر چھ مسلح ڈاکوؤں نے واردات کرتے ہوئے 17 لاکھ روپے لوٹ لیے۔ واردات کے دوران مزاحمت پر 26 سالہ ملازم ساجد کے سر پر گولی مار کر اسے شدید زخمی کر دیا گیا۔

پولیس کے مطابق ڈاکو گزشتہ روز پٹرول پمپ پر پہنچے، عملے کو یرغمال بنایا اور کیش باکس سے نقدی جمع کرنے کے بعد فرار ہوگئے۔ زخمی ملازم کو فوری طور پر بلھے شاہ ہسپتال منتقل کیا گیا جہاں اس کا علاج جاری ہے۔

تھانہ تھہ شیخم پولیس نے مقدمہ درج کرکے ڈاکوؤں کی تلاش شروع کر دی ہے، جبکہ جائے وقوعہ سے شواہد اکٹھے کیے جا رہے ہیں۔

قصور (باغی ٹی وی،ڈسٹرکٹ رپورٹرطارق نوید)ڈی پی او محمد عیسیٰ خاں کی ہدایت پر تھانہ بی ڈویژن پولیس نے مختلف علاقوں میں سرچ آپریشن کرتے ہوئے منشیات فروشی، موٹر سائیکل چوری اور رابری جیسے سنگین جرائم میں ملوث 10 ملزمان کو گرفتار کرلیا۔

پولیس کے مطابق کارروائی کے دوران 5 بدنام زمانہ منشیات فروشوں سےساڑھے 4 کلوگرام چرس،آدھا کلوگرام افیون اور 20 لیٹر زہریلی شراب
برآمد کی گئی۔گرفتار منشیات فروشوں کی شناخت سرفراز عرف لاجی مسیح، اشفاق، افضل، اقبال اور عارف کے ناموں سے ہوئی ہے۔

اسی دوران ایک اور مقام پر کیے گئے سرچ آپریشن میں 3 موٹر سائیکل چور ملزمان شہزاد، عابد اور الیاس کو حراست میں لے لیا گیا۔ پولیس نے ان کے قبضے سے لاکھوں روپے مالیت کی 3 چوری شدہ موٹر سائیکلیں برآمد کیں۔

علاوہ ازیں رابری کے سنگین مقدمات میں مطلوب 2 خطرناک اشتہاری مجرم سرفراز اور احسن کو بھی گرفتار کیا گیا۔ پولیس کے مطابق تمام ملزمان سے تفتیش کا عمل جاری ہے اور مزید انکشافات متوقع ہیں۔

قصور ( باغی ٹی وی،ڈسٹرکٹ رپورٹرطارق نویدسندھو)قصور کے علاقے میں ایک دل دہلا دینے والا اور افسوسناک واقعہ پیش آیا، جہاں بیٹے نے اپنی والدہ کو صرف اس وجہ سے قتل کر دیا کہ اس نے دوسری شادی کر لی تھی۔ پولیس کے مطابق مقتولہ صوبیہ بی بی نے حال ہی میں دوسری شادی کی تھی، جس پر اس کے بیٹے ذیشان کو شدید رنج اور غصہ تھا۔

رنجش اس حد تک بڑھی کہ ذیشان نے اپنی ماں کو قتل کرنے کا منصوبہ بنا لیا۔ گزشتہ روز ملزم نے صوبیہ بی بی کو کیلوں کی فصل میں بلا کر کلہاڑی کے پے در پے وار کیے جس کے نتیجے میں وہ موقع پر ہی جاں بحق ہوگئیں۔

واقعے کی اطلاع پر تھانہ صدر قصور پولیس فوری جائے وقوعہ پر پہنچ گئی، لاش کو قبضے میں لے کر پوسٹ مارٹم کے لیے روانہ کیا اور قانونی کارروائی شروع کر دی۔

پولیس نے ملزم ذیشان کو گرفتار کرلیا ہے جبکہ قتل کے محرکات اور مزید پہلوؤں پر تحقیقات جاری ہیں۔