Category: جرائم و حادثات

اوکاڑہ (نامہ نگار ملک ظفر) اوکاڑہ میں کرایہ دار رمضان نے معمولی جھگڑے کے بعد مالک مکان رحمت علی کو مقدمے میں پھنسانے کے لیے ایمرجنسی نمبر 15 پر جھوٹی ڈکیتی کی کال کر دی، جس پر پولیس تھانہ اے ڈویژن فوری کارروائی کے لیے موقع پر پہنچی۔

پولیس ترجمان کے مطابق، عزیز پارک اوکاڑہ میں رہائش پذیر رمضان نے کال کی کہ ڈاکوؤں نے دکان میں زبردستی گھس کر واردات کی ہے۔ تاہم، موقع پر جانے پر کسی بھی شکایت کی تصدیق نہ ہوئی، جس پر پولیس نے سی سی ٹی وی کیمروں کی مدد سے تحقیقات کی۔

ملزم رمضان اپنے عمل سے پولیس کو چکما نہیں دے سکا اور اسے گرفتار کر لیا گیا۔ پولیس کا کہنا ہے کہ کرایہ دار نے معمولی جھگڑے کی بنیاد پر ایمرجنسی سروس کا غلط استعمال کیا اور قیمتی وقت ضائع کیا۔ گرفتار ملزم کے خلاف مقدمہ درج کر لیا گیا ہے۔

اوکاڑہ (باغی ٹی وی نامہ نگار ملک ظفر)سول ڈیفنس آفیسر جاوید اختر کھچی کی سربراہی میں غیر قانونی ایل پی جی شاپس اور پٹرول ایجنسیوں کے خلاف بڑی کارروائی عمل میں لائی گئی۔ کارروائی کے دوران 15 دکانوں اور ایجنسیوں کو سیل کر دیا گیا جبکہ 7 مقدمات درج اور متعدد دکانداروں پر جرمانے عائد کیے گئے۔

تفصیلات کے مطابق، تحصیل دیپالپور اور رینالہ خورد میں سول ڈیفنس کی ٹیموں نے چھاپے مار کر غیر قانونی طور پر چلنے والی ایل پی جی شاپس اور پٹرول ایجنسیوں کو بند کیا۔ رینالہ خورد میں 4 مقدمات اور دیپالپور میں 3 ایف آئی آرز درج کروائی گئیں۔

سول ڈیفنس آفیسر جاوید اختر کھچی نے کہا کہ حکومتِ پنجاب کی ہدایات کے برخلاف ایل پی جی یا پٹرول کا غیر قانونی کاروبار کرنے والوں کے ساتھ آہنی ہاتھوں سے نمٹا جائے گا۔ انہوں نے واضح کیا کہ عوام کی جانوں سے کھیلنے والے عناصر کے خلاف تمام ممکنہ قانونی کارروائیاں جاری رہیں گی تاکہ شہریوں کی جان و مال کا تحفظ یقینی بنایا جا سکے۔

اوکاڑہ (باغی ٹی وی نامہ نگار ملک ظفر)ڈپٹی کمشنر احمد عثمان جاوید کی ہدایت پر ڈی آر ٹی اے کی جانب سے سموگ پالیسی پر عمل درآمد یقینی بنانے کے لیے ٹرانسپورٹرز کے خلاف کارروائیاں کی گئیں۔

حکومتِ پنجاب کی ہدایت پر سیکرٹری ریجنل ٹرانسپورٹ اتھارٹی اقصیٰ ریاض کی نگرانی میں تشکیل دی گئی ٹیموں نے مختلف مقامات پر کارروائیاں کرتے ہوئے دھواں چھوڑنے والی، بغیر فٹنس سرٹیفکیٹ اور ماحولیاتی اصولوں کی خلاف ورزی کرنے والی گاڑیوں کے خلاف سخت اقدامات کیے۔

کارروائیوں کے دوران 5 گاڑیاں بند جبکہ متعدد ٹرانسپورٹرز پر جرمانے عائد کیے گئے۔سیکرٹری ڈی آر ٹی اے اقصیٰ ریاض نے کہا کہ سموگ کے خاتمے کے لیے حکومتی احکامات پر سختی سے عمل کیا جا رہا ہے، اور فضائی آلودگی پھیلانے والی یا غیر معیاری گاڑیوں کو سڑکوں پر نہیں آنے دیا جائے گا۔

انہوں نے تمام ٹرانسپورٹرز کو ہدایت کی کہ وہ اپنی گاڑیوں کی بروقت فٹنس کروائیں اور ماحولیاتی قوانین کی مکمل پابندی کریں تاکہ عوام کو سموگ کے مضر اثرات سے محفوظ رکھا جا سکے۔