Category: جرائم و حادثات

گھوٹکی (باغی ٹی وی نامہ نگار مشتاق علی لغاری) گھوٹکی کی شاہی بازار میں ہلچل اُس وقت مچ گئی جب ڈیوٹی انچارج سردار شاہ نے ایک اوباش نوجوان کو نازیبا حرکات کرتے ہوئے موقع پر ہی پکڑ لیا۔ عینی شاہدین نے بتایا کہ نوجوان بازار میں گھومتے ہوئے خواتین اور راہگیروں کو تنگ کر رہا تھا، جس پر دکانداروں نے فوری طور پر پولیس کو اطلاع دی۔ سردار شاہ نے فوراً کارروائی کرتے ہوئے نوجوان کو قابو کیا اور پولیس کی اضافی نفری طلب کی۔

پولیس نے گرفتار نوجوان کی شناخت خالد جویو کے نام سے کی، جو ڈہرکی کا رہائشی ہے۔ موقع پر گرفتار ہونے کے باوجود نوجوان نے ابتدائی طور پر اپنا نام اور شناخت بتانے سے انکار کیا اور پولیس کے ساتھ بدتمیزی کا مظاہرہ کیا۔ تاہم بعد ازاں منظرعام پر آنے والی ویڈیو میں وہ اپنا نام اور شناختی کارڈ دکھا کر پولیس پر دباؤ ڈالنے کی کوشش کرتا نظر آیا تاکہ اسے چھوڑ دیا جائے۔

پولیس حکام نے نوجوان کے رویے کو غیر مناسب قرار دیتے ہوئے اسے فوری طور پر اے سیکشن تھانہ گھوٹکی منتقل کر دیا، جہاں اس کے خلاف مزید تفتیش اور قانونی کارروائی شروع کر دی گئی۔ حکام نے کہا کہ ایسے عناصر کے خلاف زیرو ٹالرنس پالیسی کے تحت کارروائیاں جاری رہیں گی تاکہ بازاروں میں امن و امان قائم رکھا جا سکے اور شہریوں کو مکمل تحفظ فراہم کیا جا سکے۔

میرپور ماتھیلو (باغی ٹی وی، نامہ نگار مشتاق علی لغاری)گھوٹکی پولیس نے بروقت کارروائی کرتے ہوئے اغواء کی ایک بڑی کوشش ناکام بنا دی۔ ایس ایس پی گھوٹکی محمد انور کھیتران کی خصوصی ہدایات پر جرائم پیشہ عناصر کے خلاف آپریشنز میں تیزی لائی گئی ہے، جس کے تحت پولیس نے سول انٹیلی جنس ایجنسی کی مدد سے شہری کو کبائر گروہ کے ممکنہ اغواء سے بچا لیا۔

تفصیلات کے مطابق ایس ایچ او تھانہ میرپور ماتھیلو بدر الدین برڑو اور ان کی ٹیم نے خفیہ اطلاع پر لنک روڈ محمد پور سے تحصیل و ضلع مردان کے رہائشی سید نبی ولد غلام نبی کو بروقت ریسکیو کر لیا۔ پولیس کے مطابق یہ شخص ایک جعلی نسوانی آواز اور فون پر "شادی کے جھانسے” میں آ کر کچے علاقے جا رہا تھا جہاں اسے اغواء کیے جانے کا منصوبہ تھا۔

متاثرہ شخص سید نبی نے پولیس کو بتایا کہ اسے گزشتہ کئی دنوں سے نامعلوم نمبروں سے ایک لڑکی کے نام پر کالز موصول ہو رہی تھیں جو شادی کی خواہش ظاہر کرتی تھی۔ دوستی بننے کے بعد وہ آج اسی سے ملنے جا رہا تھا، مگر یہ سب اغواء کی منظم سازش نکلا۔

سید نبی نے اپنی زندگی بچانے پر ایس ایس پی گھوٹکی اور پوری پولیس ٹیم کا تہہ دل سے شکریہ ادا کیا۔ اس کامیاب کارروائی پر ایس ایس پی گھوٹکی نے پولیس پارٹی کو شاباشی اور تعریف کا پیغام بھی جاری کیا۔

میرپورماتھیلو (باغی ٹی وی، نامہ نگار مشتاق علی لغاری)ایس ایس پی گھوٹکی محمد انور کھیتران کی ہدایت پر ضلع بھر میں جرائم پیشہ عناصر کے خلاف کارروائیاں تیز کر دی گئی ہیں۔ ڈکیت گروہوں کے گرد گھیرا مزید تنگ کیا جا رہا ہے اور پولیس نے متعدد اہم کامیابیاں حاصل کی ہیں۔

تھانہ میرپور ماتھیلو پولیس نے دورانِ گشت خفیہ اطلاع پر کارروائی کرتے ہوئے ایک اہم اشتہاری ملزم نظیر احمد ولد شمیر موچی سکنہ نانگ واہ کچہ ایریا کو پولیس مقابلے کے دوران زخمی حالت میں اسلحہ سمیت گرفتار کر لیا۔ پولیس کے مطابق گرفتار ملزم کے ساتھی فائرنگ کرتے ہوئے موقع سے فرار ہونے میں کامیاب ہو گئے۔

گرفتاری کے بعد ملزم سے ایک پسٹل برآمد کیا گیا ہے جبکہ اس کا کریمنل ریکارڈ بھی سامنے آگیا ہے، جس کے مطابق
1️⃣ مقدمہ نمبر 252/2025 — دفعہ 324، 353 تھانہ میرپور ماتھیلو
2️⃣ مقدمہ نمبر 253/2025 — دفعہ 24 سندھ آرمز ایکٹ تھانہ میرپور ماتھیلو

پولیس کے مطابق زخمی ڈاکو کا ریکارڈ ضلع گھوٹکی سمیت دیگر اضلاع سے بھی حاصل کیا جا رہا ہے، تاکہ اس کے ماضی کے جرائم کی مکمل تفصیل سامنے آسکے۔

ایس ایس پی گھوٹکی محمد انور کھیتران نے بہادری سے کارروائی کرنے پر پولیس پارٹی کی کارکردگی کو سراہتے ہوئے شاباشی کا پیغام دیا ہے۔

سکھر (باغی ٹی وی، نامہ نگار مشتاق علی لغاری)سکھر میں اسٹریٹ کرائم، چوری، ڈکیتی، قتل و غارت اور لوٹ مار نے سنگین صورت اختیار کرلی ہے، جرائم پیشہ عناصر کے نرغے میں آئے شہری خود کو بالکل غیر محفوظ محسوس کرنے لگے ہیں۔ شہر میں بڑھتے ہوئے جرائم نے یہ ثابت کر دیا ہے کہ عوام کو مکمل طور پر مجرموں کے رحم و کرم پر چھوڑ دیا گیا ہے۔

علی حسن قریشی اور پولیس اہلکار جہانزیب جتوئی کے قاتل آج تک گرفت سے باہر ہیں جبکہ طالب علم صدام لاشاری کے دردناک قتل کے باوجود قانون حرکت میں نہ آسکا۔ صورتحال اس قدر سنگین ہو چکی ہے کہ شہریوں کی جان و مال محفوظ نہیں رہی۔

روہڑی کے دبر علاقے میں ارسلان دایو سے اسلحے کے زور پر موٹر سائیکل اور نقدی چھین لی گئی، جبکہ تعلقہ اسپتال روہڑی سے رسول بخش جکھرانی کی موٹر سائیکل بھی چوری کرلی گئی۔ جامع مسجد پنوعاقل سے عبداللہ میرانی کی موٹر سائیکل چوری ہوئی اور دادلوؑ پنوعاقل میں ہادی بخش دھاریجو اور جمیل دھاریجو کی موٹر سائیکلز گھر میں گھس کر اٹھا لی گئیں۔

مختیارکار دفتر پنوعاقل کے قریب محمد نواز کلوڑ کی موٹر سائیکل گھر کے باہر سے غائب ہوگئی جبکہ پنوعاقل کینٹ تھانے کی حدود میں ساجن گوٹھ پولیس پکٹ کے سامنے سلطان پور کے صحافی ایاز سمائر کے بھتیجے سے 30 ہزار روپے اور قیمتی موبائل فون چھین کر ملزمان بآسانی فرار ہوگئے۔

حرا ہسپتال سکھر میں علاج کے لیے آئے احمد پتافی کی GLI گاڑی (AJX-466) بھی چوری ہوگئی۔ اسی طرح سکھر کے نوجوان صحافی علی شاہ سے مدرسہ انوار مصطفیٰ کے سامنے موٹر سائیکل اور آئی فون چھین لیا گیا۔

پنوعاقل بائجی تھانے کی حدود میں گاؤں محراب جسکانی سے صادق جسکانی کے گھر سے دو موٹر سائیکلیں اور ڈی اے پی کھاد کی بوری چوری ہوئی، جبکہ تھانہ سی سیکشن کے علاقے میں ذوہیب لیبارٹری کے قریب بلڈ بینک ہسپتال کے باہر الہی بخش ولد شبیر احمد مہر کی موٹر سائیکل نمبر KJJ-8447 (ماڈل 2016) چوری کرلی گئی۔

تھانہ سی سیکشن کی حدود پاکستان گلی میں دو نامعلوم مسلح ملزمان نے محمد متین ولد محمد علی میمن سے اسلحے کے زور پر موٹر سائیکل چھین لی۔ اسی تھانے کی حدود میں ریلوے کوارٹر نزد ایوب گیٹ روڈ سے نیوز رپورٹر رزاق احمد ولد ممتاز راجپوت کی یونیک موٹر سائیکل SNA-5994 (ماڈل 2021) گھر کے قریب سے چوری ہوگئی۔

سکھر میں بڑھتے ہوئے سنگین جرائم کے باوجود ایس ایس پی سکھر کی خاموشی اور بے عملی نے شہریوں کو شدید اضطراب میں مبتلا کر دیا ہے۔

سوال یہ ہے کہ آخر کب تک شہری قاتلوں، چوروں اور ڈاکوؤں کے رحم و کرم پر چھوڑے جائیں گے؟
سکھر کے عوام مزید ظلم، ناانصافی اور پولیس کی مسلسل ناکامی برداشت کرنے کے لیے تیار نہیں۔