Category: جرائم و حادثات

اوچ شریف، باغی ٹی وی ( نامہ نگار حبیب خان) عباسیہ لنک کینال نہر پنجند نہر سمیت دیگر نہر کناروں سے سرکاری قیمتی درختوں کا صفایا شروع محکمہ جنگلات کے افسران کی مبینہ ملی بھگت اور ساز باز سے درختوں کی کٹائی سے سرکاری خزانہ کو چونا لگانے کا انکشاف، ٹمبر مافیا راتوں رات کروڑوں میں کھیلنے لگا، ہریالی کا خاتمہ اور ماحولیاتی آلودگی میں اضافہ، علاقہ مکینوں میں تشویش کی لہر،

تفصیلات کے مطابق جنوبی پنجاب کی سب تحصیل اوچ شریف میں ٹمبر مافیا نے مبینہ با اثر شخصیات کی چھتری تلے اور محکمہ جنگلات کے کرپٹ آفیسران کی ملی بھگت سے سڑکوں ،نہروں اور سرکاری اراضی سے انتہائی قیمتی درختوں کی کٹائی کرکے سرعام بیچنے کا مکروہ اور قبیح دھندہ شروع کر رکھا ہے ،جس سے سرکاری درختوں کا صفایا ہو رہا ہے ،

ٹمبر مافیا کی کاروائیوں سے کسی سرکاری ادارے کے درخت محفوظ نہیں ہیں، گذشتہ بیس سالوں میں کیکر ،شیشم، سفیدے سمیت دیگر قیمتی درختوں کو صفحہ ہستی سے مٹا کر قومی خزانے کو بے دردی سے لوٹنے بارے انکشاف ہوا ہے،

ذرائع کے مطابق ٹمبر مافیاکو تیار کرنے اور سر پرستی میں محکمہ جنگلات کے آفیسران و اہلکاروں کے علاوہ محکمہ پولیس کی کالی بھیڑوں کا بھی اہم کردار بتایا جاتا ہے، جو جائے وقوعہ سے لے کر ملک بھر کی بڑی بڑی لکڑ منڈیوں ملتان ، فیصل آباد اور کراچی سمیت دیگر بڑے بڑے لکڑی ڈپوﺅں تک پہنچنے میں مرکزی کردار ادا کر رہے ہیں۔

رات کی تاریکی میں درخت چوری کی وارداتوں میں مقامی پولیس کے بعض اہلکاروں سے ملی بھگت کر کے ٹرکوں کے ذریعے بھجوایاجاتا ہے، اگر کوئی بندہ لکڑی چوروں کو پکڑوا بھی لیتا ہے تو جنگلات آفیسران فوراََ پہنچ کر معمولی جرمانہ کی رسید جاری کرکے لکڑی سپر داری کروا کے چلتے بنتے ہیں،

گذشتہ شب عباسیہ لنک کینال ککس موڑ پر ٹمبر مافیا درختوں کا صفایا کر رہے تھے کہ مقامی لوگوں کے آنے کی اطلاع ٹمبر مافیا کو موصول ہوئی تو ٹمبر مافیا درختوں کو چھوڑ کر جائے وقوعہ سے رفوچکر ہو گئے ،

اس سلسلے میں مقامی شہریوں محمدآصف، محمدفاروق، محمدزاہد، ظہور و دیگرز نے ڈپٹی کمشنر بہاول پور وفاقی وزیر ماحولیات اور محکمہ جنگلات سمیت دیگر متعلقہ اداروں سے مطالبہ کیا ہے کہ گذشتہ پانچ سالوں میں تعینات کئے گئے محکمہ جنگلات کے کرپٹ آفیسران واہلکاران اور ٹمبر مافیا کے خلاف تحقیقات کرنے اور ان کے نام اثاثہ جات کو چیک کیا جائے، کیونکہ معمولی تنخواہوں والے ملازمین مبینہ طور پر کروڑوں اربوں روپے کے مالک کیسے بن گئے ہیں

اوچ شریف،باغی ٹی وی ( نامہ نگارحبیب خان ) سردموسم ،مضرصحت قلفیوں اور آئس سے بچے مختلف خطرناک بیماریوں میں مبتلا ہونے لگے ،گلے اور چھاتی کے امراض میں اضافہ،بیماربچوں سے ہسپتال بھر گئے ،،پنجاب فوڈ اتھارٹی کے ارباب اختیار کی طوطاچشمی ، معصوم بچوں کے والدین پریشان

تفصیلات کے مطابق موسم سرما کے آخری ایام میں اوچ شریف شہر اور گردونواح میں مختلف چوکوں، چوراہوں، مضافاتی علاقوں کے سکولوں کے گیٹ اورسڑکوں کے اطراف میں قلفیاں اور آئسکریم فروخت کرنے والے افراد دیدہ دلیری سے مضرصحت قلفیوں کی فروخت شروع کردی ہے اکثر علاقوں میں آئسکریم فروش تشہیر کے لئے لاؤڈ سپیکر استعمال کر تے دکھائی دیتے ہیں۔

آئسکریم فروش مضر صحت کیمیکل ملا رنگ استعمال کرکے چھوٹے چھوٹے معصوم بچوں میں بیماریاں بانٹنے کا کام کر رہے ہیں جس کے نتیجہ میں کمسن بچے مختلف مہلک امراض جن میں نزلہ و زکام ،سانس اور گلے کی بیماریاں اور نمونیا کا شکار ہو کر ہسپتالوں کا رخ کر رہے ہیں رہی سہی کسر جعلی جوس اور ملٹی نیشنل کمپنیوں کے ناموں سے ملتے جلتے ناموں پر بننے والے جعلی دو نمبر جوسسز آئس کریم اور قلفیوں نے پوری کر رکھی ہے۔

گلی محلوں سمیت بڑی بڑی دکانوں پر سپلائی کرکے راتوں رات کروڑ پتی بننے کے خواب دیکھ رہے ہیں جن کے استعمال سے بچوں سمیت، عورتیں، نوجوان لڑکیاں اور بوڑھوں میں مختلف بیماریاں پھیل رہی ہیں جبکہ پنجاب فوڈ اتھارٹی کے ذمہ داران نے اپنی آنکھوں پر پٹی باندھ رکھی ہے اور سادہ لوح افراد کو آئسکریم قلفی اور جوس فروشوں کے رحم و کرم پر چھوڑ دیا ہے۔شہریوں نے ڈی جی پنجاب فوڈ اتھارٹی سے نوٹس لینے کا مطالبہ کیاہے