Category: جرائم و حادثات

ڈیر ہ اسماعیل خان،باغی ٹی وی (نامہ نگاراحمدنوازمغل) راکھ شاہ کوٹ میں قتل مقاتلے کی دشمنی کے شاخسانے کے باعث 19سالہ نوجوان قتل ،دوسرے واقعہ میں جبار والا میں3سالہ بیٹے کے پانی میں ڈوبنے کے واقعہ پر شوہر نے اپنی ناراض بیوی پر اپنے بیٹے کو پانی میں ڈبو کر قتل کرنے کی دعویٰ دائرکر دیا،جائیداد میں حصہ مانگنے کے شبہ پر خاوند نے دوسری بیوی کیساتھ ملکر نقشبند ٹائون میں اپنی پہلی بیوی کو زہر دیکر قتل کردیا۔

تفصیلات کے مطابق تھانہ بند کورائی میں 67سالہ عبدالستار اعوان ولد اللہ ڈیوایا سکنہ چاہ بیلی والا نے 302-109/34ppcکے تحت رپورٹ درج کرائی ہے کہ مجھے اطلاع ملی کہ راکھ شاہ کوٹ میں میرا 19سالہ نواسا ہارون اعوان ولد منظور حسین اور سید اشفاق شاہ ولد شاہ حسن سکنہ بندکورائی اراضی اشفاق سے اپنے بورنگ کی طرف جا رہے تھے کہ اس دوران ملزمان عصمت اللہ عرف بلا ، ثناء اللہ ولد عبداللہ سکنائے اعوان مسلح بااسلحہ آئے اور آتے ہی اپنے اپنے اسلحہ سے میرے نواسے محمد ہارون پر فائرنگ کر دی جس سے میرا نواسا موقع پر جاں بحق ہوگیا، ہماری آپس میں قتل مقاتلے کی دشمنی چلی آرہی ہے، تھانہ بندکورائی میں عبدالستار اعوان نے بتایا کہ عبداللہ ولد کالواور شوکت ولد اللہ ڈیوایا کی ایماء پر ملزمان نے میرے نواسے کو قتل کیا ہے،

دوسرے واقعہ میں تھانہ صدر میں شورکورٹ کے رہائشی جاوید ڈبری ولد شاہجہان نے قتل کی دفعہ کے تحت رپورٹ درج کرائی ہے کہ میری بیوی ملزمہ نادیہ بی بی دختر گل محمد سکنہ جبار والا ڈیرہ 7/8ماہ سے ناراض ہو کر اپنے میکے جبار والا میں رہائش پذیر تھی اور میرا 3سالہ بیٹا سہیل بھی اس کے ساتھ تھا ، جوکہ اب ڈوب کر فوت ہو چکا ہے، میں کمسن بچے محمد سہیل کو پانی میں ڈبو کر قتل کرنے پر اپنی ملزمہ بیوری کے خلاف دعویدار ہوں ،

تیسرے واقعہ میں تھانہ کینٹ میں ژوب بلوچستان کے رہائشی طیب اعوان ولد اسلم اعوان نے قتل کی دفعہ کے تحت رپورٹ درج کرائی ہے کہ مجھے اطلاع ملی کہ سول ہسپتال ڈیرہ میں میری ہمشیرہ 29سالہ سائرہ اسلم زوجہ رحمت اللہ گنڈہ پور سکنہ نقشبند ٹائون مردہ حالت میں موجود ہے، جس پر میں فوری طور پر ہسپتال پہنچا مجھے یقین ہے کہ میری ہمشیرہ کو ملزم اس کے خاوند رحمت اللہ گنڈہ پور اور اس کی دوسری بیوی نے زہر دیکر قتل کیا ہے وجہ یہ ہے کہ میرا بہنوئی میری بہن سائرہ اسلم سے اکثر اوقات لڑتا جھگڑتا تھا اور جائیداد میں سے حصہ مانگنے کی زبردستی کرتا تھا۔

سیالکوٹ،باغی ٹی وی (سٹی رپورٹر شاہد ریاض)ڈسکہ تھانہ سٹی کے علاقہ میں شہریوں نے دو مسلح ڈاکو پکڑ لیئے
تفصیل ے مطابق شہری بینک سے رقم لیکر گھر کی جانب جا رہا تھا کہ موٹرسائیکل پرسوارمسلح ڈاکوئوں نے روک کر لاکھوں روپے نقدی چھین لی۔

شہریوں نے موقع پر ڈاکوئوں کو گھیر لیا،ڈاکوئوں نے شہریوں پر اندھا دھند فائرنگ کر دی، ڈاکو کی فائرنگ سے اسکا ساتھی ڈاکو شدید زخمی ہو گیا،

ایک ڈاکو فائرنگ کرتے ہوئے فرار ہو گیا،پولیس نے موقع پہنچ کر زخمی ڈاکو کوحراست میں لیکر سول ہسپتال منتقل کر دیا،ڈاکوئوں کی فائرنگ سے علاقہ میں خوف و ہراس پھیل گیا۔

اوچ شریف ،باغی ٹی وی (نامہ نگارحبیب خان) موٹر وے ایم 5 بیٹ پر اوور لوڈ گاڑیوں کے خلاف کاروائی ، گاڑیوں کو جرمانے ، منظور شدہ لوڈ سے زائد لوڈ کرنے والی گاڑیوں کو مختلف انٹر چینجر سے اتار دیا گیا ، حادثات کی روک تھام اور موٹر ویز کو نقصان سے بچاو کے لئے اوورلوڈنگ گاڑیوں کے خلاف کارروائی جاری رہے گی ۔ ڈی ایس پی موٹر وے فیض اللہ خان جتوئی

تفصیل کے مطابق ڈی ایس پی موٹر وے ایم 5 بیٹ 25 فیض اللہ خان جتوئی کی قیادت میں موٹروے پولیس نے اوچ شریف کے قریب اوورلوڈنگ گاڑیوں کے خلاف کارروائی کرتے ہوئے ڈرائیورز کو بھاری جرمانے کئے اور منظور شدہ لوڈ سے زائد لوڈنگ گاڑیوں کو موٹر وے سے اتاردیا گیا ، ڈی ایس پی موٹر وے فیض اللہ خان جتوئی نے میڈیا سے گفتگو کرتے ہوئے بتایا کہ نیشنل ہائی ویز اینڈ موٹر ویز پولیس کی جانب سے اس حوالہ سے تشہیری مہم بھی چلائی گئی کہ اوور لوڈ نگ گاڑیوں کے خلاف سخت کارروائی عمل میں لائی جائے گی ،

انہوں نے کہا شاہراہوں پر اکثر حادثات کی وجہ اوور لوڈ گاڑیاں ہوتی ہیں ۔ ایسے افراد اپنی زندگیوں کے ساتھ ساتھ موٹر ویز پر سفر کرنے والے دیگر افراد کو نقصان پہنچاتے ہیں ۔ منظور شدہ لوڈ سے زائد لوڈ وہیکلز سے پاکستان کے قیمتی اثاثہ موٹر ویز کو بھی نقصان پہنچتا ہے ۔

انہوں نے کہا کہ آئی جی موٹر وے کے احکامات کی روشنی میں اوورلوڈ گاڑیوں کے خلاف کارروائی جاری رہے گی ، ڈی ایس پی فیض اللہ خان جتوئی نے میڈیا کے توسط سے ٹرانسپورٹرز سے اپیل کی ہے کہ بھاری جرمانوں اور وقت کے ضیاع سے بچنے کے لئے مقررہ شدہ لوڈ کے مطابق ہی سامان لوڈ کریں بصورتِ دیگر بھاری جرمانوں کے ساتھ موٹر ویز پر بھی سفر نہیں کرنے دیا جائے گا ،

اس موقع پر ایڈمن آفیسر محمد اسماعیل و دیگر موٹر وے پولیس آفیسرز بھی موجود تھے

سرگودھا ،باغی ٹی وی(نامہ نگار ملک شاہنواز جالپ )دو ڈمپرز ڈرائیورکے درمیان توتکرار،کنڈیکٹر گر کر جاں بحق
تفصیل کے مطابق سرگودھا کی تحصیل کوٹ مومن کے علاقہ سیال موڑ تھانہ لکسیاں کی حدود میں لکسیاں ٹول پلازہ کے نزدیک سکول کے سامنے حادثہ پیش آیا جس میں ڈمپر کنڈیکٹر کی موت ہو گئی

ذرائع کے مطابق دو ڈمپر ڈرائیوروں کے درمیان تلخ کلامی ہوئی اور تلخ کلامی میں ڈمپر سے ڈمپر کنڈیکٹر نیچے گر گیا جس سے وہ موقع پرجان بحق ہو گیا،حادثہ پیش آے ہی ایک ڈمپر فرار اور اور دوسرا ڈمپر تھانہ لکسیاں میں بند کر دیا گیا جبکہ دونوں ڈمپروں کے ڈرائیور فرار ہو گئے تلاش جاری

تھانہ لکسیاں کی پولیس پٹرولنگ پولیس ٹریفک پولیس اور سپیشل برانچ موقع پر پہنچ کر حادثے کا جائزہ لیا اور تفتیش جاری کر دی مکمل تفصیلات کیلئے تفتیش جاری ہے

اوچ شریف ,باغی ٹی وی (نامہ نگارحبیب خان ) محکمہ تعلیم کی ” خطرناک ” ڈکلئیر شدہ عمارتوں میں معصوم بچے پڑھنے پر مجبور، خستہ حال، بوسیدہ اور بھوت بنگلوں میں عوام کے لخت جگروں پر موت کے ساۓ منڈلانے لگے، تعمیر و مرمت کے لئے ملنے والے حکومتی فنڈز ” ڈکار ” لیے گئے، طلبہ والدین میں شدید تشویش کی لہر، وزیراعلیٰ پنجاب فوری نوٹس لیں، شہری

تفصیلات کے مطابق جنوبی پنجاب کے شہر اوچ شریف اور گردونواح میں درجن بھر سے زائد ایسے تعلیمی ادارے ہیں جن کی عمارتیں کئی سال پرانی، انتہائی خستہ حال اور بھوت بنگلہ کی شکل اختیار کیے ہوئے ہیں۔ جبکہ درجنوں سے زائد ایسے سکولز بھی ہیں جن کی عمارتوں کے اکثریتی پورشن خستہ حال اور بارش آنے پر چھتیں ٹپکتی ہیں۔ بچوں کے والدین نے میڈیا سے گفتگو کرتے ہوئے کہا کہ بچوں کو سکولوں میں بھیجنے پر بہت خوف آتا ہے ، لیکن مجبوراً ان سکولوں میں تعلیم حاصل کر رہے ہیں ان سکولوں کی عمارتوں کو خطرناک قرار دیے جانے کے باوجود کئی سال گزر گئے ہیں لیکن تاحال حالت کو بہتر نہ بنایا جا سکا ہے۔

ذرائع کے مطابق گورنمنٹ پرائمری سکول عریبک بوائز سکول ٹھٹہ وارن، گورنمنٹ پرائمری سکول امیر آباد ، گورنمنٹ گرلز پرائمری اسکول قادر آباد، گورنمنٹ پرائمری سکول موہانہ، گورنمنٹ بوائز پرائمری سکول بستی عبدالرحمن سمیت دیگر درجن بھر اسکولز انتہائی خطرناک اور مخدوش حالت میں موجود پاۓ جاتے ہیں جو کہ کسی بھی وقت ناگہانی حادثے کا باعث بن سکتے ہیں،ذرائع نے یہ بھی انکشاف کیا ہے کہ مذکورہ عمارات انتہائی خستہ حال ہونے پر انتظامیہ نے انہیں خطرناک ” ڈکلئیر ” تو قرار دے رکھا ہے

لیکن اس کے باوجود ان سکولز کے تعمیر و مرمت کا کوئی کام شروع نہ ہوسکا ہے، اور اب صورتحال یہ ہے کہ سکولز میں بچے خوف کے ساتھ تعلیم کے لیے جاتے ہیں، اور ان سکولز کا وزٹ کرنے پر ایسا محسوس ہوتا ہے کہ جیسے یہ سکول حکومت اور محکمہ تعلیم کے حکام کی نظروں سے اوجھل ہیں مقامی لوگوں کا کہنا ہے کہ انہیں بہت سی مشکلات کا سامنا کرنا پڑتا ہے، محکمہ تعلیم کو سکولوں کی تعمیرومرمت کی مد میں سالانہ بڑی رقم ملنے کے باوجود تعلیمی اداروں کی حالت ابتر ہیں، اساتذہ اور طلبہ کے لیے صورتحال پریشان کن ہے۔

اساتذہ نے کہا کہ وہ خستہ حال سکولوں کی تعمیرومرمت کے لیے محکمہ کے حکام کو آگاہ کرچکے ہیں لیکن وہ کچھ نہیں کرتے۔ سکولوں کے طلبہ اور ان کے والدین نے انتظامیہ سمیت نگران وزیر اعلیٰ پنجاب سے اپیل کرتے ہوے کہا کہ خدارا ان خطرناک قرار دی گئی اسکولز عمارتوں کو فی الفور ہنگامی بنیادوں پر تعمیر کرایا جاے کیونکہ مہنگائی کے دور میں پرائیویٹ اسکول کے اخراجات ناقابل برداشت ہیں ، جبکہ مفت تعلیم کی وجہ سے ہمارے بچے موت کے سائے تلے تعلیم حاصل کرنے پر مجبور ہیں

ڈیرہ غازیخان،باغی ٹی وی( نیوز رپورٹر شاہد خان )پل غازی گھاٹ،پل ڈاٹ کے نزدیک جان لیوا حادثات میں اضافہ ہوا ہے – امتیاز چنگوانی
تفصیل کے مطابق ڈسٹرکٹ ٹریفک پولیس آفیسر ڈیرہ غازی خان امتیاز احمد خان چنگوانی نے صحافیوں سے گفتگو کرتے ہوئے کہا ہے کہ حال ہی میں پل غازی گھاٹ،پل ڈاٹ کے نزدیک جان لیوا حادثات میں اضافہ ہوا ہے،

پل غازی گھاٹ پر ڈبل سے سنگل روڈ ہونے والے پوائنٹ پر 50 سے زائد جان لیوا حادثات ہو چکے ہیں اسی طرح پل ڈاٹ سے گدائی تک شکستہ زیر تعمیر سڑک کی ناہمواری کی وجہ سے آئے روز حادثات معمول بن چکے ہیں ان حادثات سے بچاؤ کے لئے ہم نے محکمہ این ایچ اے کو غازی گھاٹ کے دونوں سنگل روڈ داخل پوائنٹس پر سولر لائٹس اور سپیڈ بریکر بنانے کے لئے لکھ دیا ہے تاکہ ان دونوں پوائنٹس پر حادثات کو کنٹرول کیا جا سکے،اسی طرح این ایچ اے کو گدائی روڈ تا پل ڈاٹ سڑک کی تعمیر جلد مکمل کروانے کے لئے ہدایت کی گئی ہے

ڈسٹرکٹ ٹریفک آفیسر امتیاز احمد خان چنگوانی نے کہا ہے کہ حادثات سے بچنے کے لئے ٹریفک قوانین پر عملدرآمد یقینی بنائیں اور سموگ اور فوگ میں رات کے اوقات حادثات سے بچنے کےلئے موٹر سائیکل، گاڑیوں پر پیلی لائٹ کا استعمال کریں دھند کے اوقات میں غیر ضروری سفر سے گریز کریں موٹر سائیکل ڈرائیونگ کے دوران ہیلمٹ کا استعمال یقینی بنائیں۔