اوکاڑہ(باغی ٹی وی،نامہ نگارملک ظفر)پنجاب فوڈ اتھارٹی نے بڑی کارروائی کرتے ہوئے ون فور ایل کے قریب 25 من مردہ مرغیوں کی کھیپ پکڑ لی۔ حکام کے مطابق ملزمان مردہ مرغیوں کو مشین میں کریش کرکے مختلف فوڈ پوائنٹس پر فروخت کر رہے تھے۔
فوڈ اتھارٹی کی ٹیم نے موقع پر ہی مردہ مرغیوں کا گوشت تلف کر دیا جبکہ ملزمان کے زیر استعمال کریش مشین اور لوڈڈ رکشہ بھی قبضے میں لے لیا گیا ہے۔ حکام نے ملزمان کے خلاف قانونی کارروائی کا آغاز کر دیا ہے۔
خیبرپختونخوا کے ضلع ہری پور میں ڈکیتی کے دوران نانی کے قتل میں ملوث 20 سالہ نواسی اور اس کے ساتھی کو پولیس نے گرفتار کر لیا۔
ملزمان سے 36 لاکھ روپے مالیت کا سونا اور نقدی بھی برآمد کر لی گئی۔ایس پی انویسٹی گیشن جمیل الرحمٰن کے مطابق معمر خاتون کے قتل میں نواسی نے اپنے ساتھی رضوان کے ہمراہ واردات کی۔ دورانِ ڈکیتی مقتولہ نے رضوان کو پہچان لیا تھا جس پر اسے قتل کر دیا گیا۔پولیس کے مطابق ملزم رضوان کے قبضے سے لوٹا گیا سونا، نقدی، اسلحہ، موٹرسائیکل اور نشہ آور انجیکشن بھی برآمد ہوئے۔
تحقیقات میں یہ انکشاف بھی ہوا کہ ملزمہ نے ڈکیتی سے چند روز قبل گھر کے پالتو کتے کو زہر دے کر مار دیا تھا تاکہ واردات کے دوران مزاحمت نہ ہو سکے۔
توشہ خانہ ٹو کیس، اڈیالہ جیل میں کل کی سماعت ملتوی
موریطانیہ، تارکین وطن کی کشتی ڈوب گئی، 69 ہلاک، 100 لاپتہ
ایرانی صدر کا شہباز شریف سے رابطہ، سیلاب متاثرین کیلئے مدد کی پیشکش
اوکاڑہ (نامہ نگار ملک ظفر) سول ڈیفنس آفیسر چوہدری وقار اکبر کی زیرِ نگرانی محکمہ کے اہلکار اور رضا کار سیلابی صورتحال میں عوام کی جان و مال کے تحفظ کے لیے سرگرم عمل ہیں۔ سول ڈیفنس کی ٹیموں نے دریائے ستلج سے ملحقہ نواحی علاقوں کنڈ بہڑ، ماڑی پتن، گوگیرہ، لکھن اور جندراکہ میں امدادی کارروائیوں میں حصہ لیتے ہوئے لوگوں کو محفوظ مقامات پر منتقل کیا۔
رپورٹ کے مطابق سیلابی ریلوں کے باعث درجنوں خاندانوں کو اپنے گھروں سے نکلنا پڑا جنہیں سول ڈیفنس کے رضا کاروں نے محفوظ مقامات تک پہنچایا۔ اس دوران ریسکیو آپریشن میں عوامی تعاون بھی دیکھنے میں آیا۔
اس موقع پر سول ڈیفنس آفیسر چوہدری وقار اکبر نے کہا کہ عوام الناس کو اونچے درجے کے سیلاب سے بچانے کے لیے انخلائی آپریشن جاری ہے۔ ان کا کہنا تھا کہ محکمہ سول ڈیفنس کے اہلکار اور رضا کار پیشہ ورانہ خدمات سر انجام دیتے ہوئے عوامی ریلیف کے لیے بڑھ چڑھ کر سرگرمیوں میں حصہ لے رہے ہیں۔
واربرٹن (نامہ نگار) سٹی پریس کلب رجسٹرڈ واربرٹن کے فنانس سیکرٹری رانا اسد تیمور کے چھوٹے بھائی رانا صہیب کو شیخوپورہ میں بےدردی سے قتل کردیا گیا۔ مقتول کی نعش گھر پہنچنے پر کہرام مچ گیا اور علاقہ سوگوار ہو گیا۔ پولیس نے مقدمہ درج کر کے ملزمان کی تلاش شروع کر دی ہے۔
تفصیلات کے مطابق واربرٹن مکہ کالونی کے رہائشی رانا زاہد محمود شاد کا 30 سالہ بیٹا رانا صہیب کا شیخوپورہ شرقپور روڈ کے رہائشی یاور الطاف ورک کے ساتھ لین دین کا تنازع چل رہا تھا۔ گزشتہ شب رانا صہیب موٹر سائیکل پر شیخوپورہ گیا لیکن واپس نہ آیا۔ اہل خانہ کی تلاش پر رانا طارق خاقان، رانا اسد تیمور اور وقار احمد یاور ورک کے ڈیرے پر پہنچے تو وہاں رانا صہیب کی خون میں لت پت نعش پڑی ہوئی تھی جبکہ یاور ورک اور دو نامعلوم افراد موقع سے فرار ہوگئے۔
پولیس نے رانا اسد تیمور کی مدعیت میں مقدمہ درج کرکے نعش پوسٹمارٹم کے بعد ورثاء کے حوالے کر دی۔ مقتول رانا صہیب کی نماز جنازہ واربرٹن میں ادا کی گئی جس میں معززین علاقہ، عزیز و اقارب اور سینکڑوں افراد نے شرکت کی۔
عوام نے اس اندوہناک قتل پر شدید افسوس کا اظہار کرتے ہوئے مطالبہ کیا ہے کہ ملزمان کو جلد از جلد گرفتار کر کے کیفر کردار تک پہنچایا جائے۔
ڈیرہ غازیخان(باغی ٹی وی رپورٹ)مظفر، دریائے چناب میں اونچے درجے کا سیلاب، انتظامیہ ہائی الرٹ
تفصیلات کے مطابق مظفرگڑھ میں دریائے چناب میں انتہائی اونچے درجے کا سیلاب آنے پر انتظامیہ ہائی الرٹ پر ہے۔ وزیراعلیٰ پنجاب مریم نواز کی ہدایت پر کمشنر ڈیرہ غازی خان اشفاق احمد چوہدری فوری طور پر مظفرگڑھ پہنچ گئے۔
ڈپٹی کمشنر آفس میں سیلابی صورتحال پر اعلیٰ سطحی اجلاس ہوا جس کی صدارت کمشنر نے کی۔ اجلاس میں ڈپٹی کمشنر عثمان طاہر جپہ، ایڈیشنل ڈپٹی کمشنرز عوید ارشاد اور میڈم انعم سمیت تمام متعلقہ محکموں کے افسران شریک ہوئے۔ اجلاس میں ریسکیو 1122، ضلعی انتظامیہ، پی ڈی ایم اے اور محکمہ انہار کو ریلیف پلان کو حتمی شکل دینے کی ہدایت دی گئی۔
کمشنر اشفاق احمد نے فلڈ کنٹرول روم کا دورہ کیا اور پانی کے بہاؤ کی صورتحال کا جائزہ لیا۔ ان کا کہنا تھا کہ انتظامیہ اور ریسکیو ادارے 24 گھنٹے الرٹ رہیں گے، بندوں کی مضبوطی اور ریلیف آپریشن کے انتظامات مکمل کئے جائیں، متاثرہ علاقوں میں فوری ریلیف کیمپ قائم کئے جائیں اور عوام کو بروقت آگاہ کرنے کے لیے لوکل نیٹ ورکس کو متحرک کیا جائے۔
ڈپٹی کمشنر عثمان طاہر جپہ نے نشیبی علاقوں کے مکینوں کو محتاط رہنے اور محفوظ مقامات پر منتقل ہونے کی ہدایت کی۔ انہوں نے بتایا کہ پی ڈی ایم اے حکام کو ریسکیو اور ریلیف اقدامات حتمی شکل دینے کا ٹاسک دے دیا گیا ہے۔
بعد ازاں کمشنر ڈی جی خان نے دریائے چناب کے دوآبہ اور چک روہاڑی فلڈ بند کا بھی دورہ کیا، اس موقع پر چیف انجنیئر اریگیشن رانا ذوالفقار علی اور ڈپٹی کمشنر بھی ان کے ہمراہ تھے۔ کمشنر کا کہنا تھا کہ سیلاب سے نمٹنے کے لیے تمام دستیاب وسائل بروئے کار لائے جا رہے ہیں اور متاثرہ مکینوں کے بروقت انخلاء کے ساتھ ریلیف کیمپوں میں سہولیات کو یقینی بنایا جارہا ہے۔
ڈپٹی کمشنر عثمان طاہر جپہ نے بتایا کہ 30 اگست کو دریائے چناب کا ریلہ ضلع کی حدود میں داخل ہوگا۔ سیلابی صورتحال سے نمٹنے کے لیے تمام سرکاری محکموں کی چھٹیاں منسوخ کردی گئی ہیں۔ ایڈیشنل ڈپٹی کمشنر کے مطابق 104 مواضعات اور 76 ہزار نفوس متاثر ہونے کا خدشہ ہے۔
ضلعی انتظامیہ کی جانب سے 18 ریلیف کیمپ قائم کر دیے گئے ہیں جہاں خوراک، علاج اور مویشیوں کی دیکھ بھال کی سہولت فراہم کی جارہی ہے۔ اے ڈی سی آر کے مطابق ضلعی اور تحصیل سطح پر قائم کنٹرول رومز 24 گھنٹے آپریشنل ہیں۔
اوکاڑہ (نامہ نگار ملک ظفر) سول ڈیفنس آفیسر چوہدری وقار اکبر کی زیر نگرانی محکمہ کے اہلکار اور رضاکار رات گئے تک سیلابی صورتحال کے دوران عوامی جان و مال کے تحفظ کے لیے سرگرم رہے۔ محکمہ سول ڈیفنس کی ٹیموں نے دریائے راوی سے ملحقہ ماڑی پتن کے مقام پر موضع بھوجیاں میں لوگوں کے انخلا اور محفوظ مقامات پر منتقلی کے سلسلے میں امدادی کارروائیوں میں حصہ لیا۔
سول ڈیفنس کے اہلکار رات گئے تک ماڑی پتن اور گردونواح کے دیہات سے متاثرہ افراد کو محفوظ مقامات پر منتقل کرنے میں مصروف رہے۔ اس موقع پر سول ڈیفنس آفیسر چوہدری وقار اکبر نے کہا کہ سیلابی صورتحال میں عوام کو تحفظ فراہم کرنے اور انہیں محفوظ مقامات پر منتقل کرنے کے لیے محکمہ سول ڈیفنس کی ٹیمیں پوری طرح متحرک ہیں اور عوام کے جان و مال کے تحفظ کے لیے ہر دم تیار ہیں۔
انہوں نے شہریوں پر زور دیا کہ وہ سیلاب کے دوران اپنی حفاظت اور مال مویشیوں کو محفوظ مقامات پر منتقل کرنے کے لیے انتظامیہ اور محکمہ سول ڈیفنس کی ٹیموں سے مکمل تعاون کریں۔
سابق رکن قومی اسمبلی رمیش کمار کے گھر میں ڈکیتی کی واردات، ڈاکو دو کروڑ روپے کا سامان لے اڑے۔
رمیش کمار نے بتایا کہ 3 مسلح ڈاکو گھر میں داخل ہوئے اور توڑ پھوڑ کی، ڈاکو گھر سے 5 گھڑیاں، چشمے اور جوتے لے گئے جن کی مالیت دو کروڑ روپے بنتی ہے ڈاکووؤں نے ملازمین کو تشدد کا نشانہ بھی بنایا اور ان سے میرے بارے میں تفصیلات مانگتے رہے،3 ڈاکو آپس میں پشتو زبان میں بات چیت کررہے تھے۔
پولیس نے سابق رکن قومی اسمبلی گھر میں ڈکیتی کا مقدمہ درج کر کے ضابطے کی کارروائی شروع کر دی ہے۔
سیلاب اور بارشوں سے تباہی،قوم کو متحد ہونا ہوگا.تجزیہ:شہزاد قریشی
3 سالہ بیٹی سےمبینہ جنسی زیادتی کے الزام میں گرفتار باپ کی ضمانت منظور
کوٹ رادھا کشن میں 30 روپے کے تنازع پر 2 بھائیوں کو قتل کرنے کے الزام میں گرفتار ملزمان اپنے ہی ساتھیوں کی فائرنگ سے مارے گئے۔
چند روز قبل موضع رتی پنڈی کے 2 بھائیوں 22 سالہ واجد اور 25 سالہ راشدکا ایک ریڑھی والے سے پھل خریدنے کے بعد محض 30 روپے پر جھگڑا ہوگیا تھا.ریڑھی بان تیمور اور اویس نے اپنے 5 نامعلوم ساتھیوں کے ساتھ مل کر دونوں بھائیوں کو ڈنڈوں سے تشدد کا نشانہ بنایا تھا جس سے 22سالہ واجد موقع پر دم توڑ گیا جب کہ 25سالہ راشد دوران علاج چل بسا تھا،تاہم اب سی سی ڈی ترجمان کا بتانا ہے کہ زیرحراست ملزم اویس اور شہزاد اپنے ہی ساتھیوں کی فائرنگ سے ہلاک ہوگئے۔
ترجمان کے مطابق سی سی ڈی گرفتار ملزمان کو نشاندہی کے لیے رائیونڈ لےجا رہی تھی جس دوران زیر حراست ملزمان کے ساتھیوں نے انہیں چھڑوانے کے لیے فائرنگ کردی،ترجمان کا بتانا ہےکہ اس پولیس مقابلے میں گرفتار 2 ملزمان ساتھیوں کی فائرنگ سے ہلاک ہوگئے ہیں۔
سیالکوٹ (باغی ٹی وی، ڈسٹرکٹ رپورٹر مدثر رتو) صوبائی وزیر بلدیات میاں ذیشان رفیق نے سیالکوٹ کے نشیبی علاقوں کا دورہ کیا اور رنگ پورہ چوک پر میڈیا سے گفتگو کرتے ہوئے کہا کہ سیالکوٹ کی تاریخ میں کبھی اتنی زیادہ بارش ریکارڈ نہیں ہوئی۔ صرف ایک دن میں 405 ملی میٹر اور رات کے وقت مزید 110 ملی میٹر بارش سے شہر میں ایمرجنسی صورتحال پیدا ہو گئی ہے۔
وزیر بلدیات نے کہا کہ سیالکوٹ اس وقت ایک قدرتی آفت کا سامنا کر رہا ہے لیکن حکومتی اقدامات میں کسی قسم کی کمی نہیں آنے دی جائے گی۔ انہوں نے کہا کہ عوام کا ریلیف حکومت کی پہلی ترجیح ہے، جہاں بھی سیلاب یا خطرہ ہے وہاں سے شہریوں کو محفوظ مقامات پر منتقل کیا جا رہا ہے۔ انہوں نے یقین دہانی کرائی کہ لوگوں کے نقصان کا ازالہ حکومت کرے گی کیونکہ وزیر اعلیٰ مریم نواز شریف ہمیشہ عوام کے ساتھ کھڑی ہیں۔
میاں ذیشان رفیق نے کہا کہ ڈی سی آفس میں قائم کنٹرول روم دن رات کام کر رہا ہے اور نکاسی آب و ریلیف کے لیے ہر ممکن اقدامات کیے جا رہے ہیں۔ ان کا کہنا تھا کہ جب تک نالہ ایک میں پانی کے بہاؤ کا نظام معمول پر نہیں آتا، نشیبی علاقوں میں پانی موجود رہے گا، تاہم ریلیف ٹیمیں مسلسل سرگرم ہیں۔
انہوں نے مزید بتایا کہ ضلعی انتظامیہ، واسا اور میونسپل کارپوریشن کی ٹیمیں گزشتہ 48 گھنٹوں سے فیلڈ میں مصروف ہیں اور شہریوں کو پانی سمیت بنیادی ضروریات کی فراہمی یقینی بنائی جا رہی ہے۔ وزیر بلدیات نے کہا کہ وہ ذاتی طور پر ریلیف سرگرمیوں کی مانیٹرنگ کر رہے ہیں تاکہ کسی بھی قسم کی کوتاہی نہ ہو۔
اوکاڑہٰ(نامہ نگارملک ظفر) دریائے راوی میں پانی کی سطح خطرناک حد تک بڑھنے کے بعد ضلع اوکاڑہ میں انتہائی اونچے درجے کے سیلاب کا الرٹ جاری کر دیا گیا ہے۔ ڈپٹی کمشنر احمد عثمان جاوید نے ایم پی اے چوہدری غلام رضا ربیرہ اور دیگر افسران کے ہمراہ دریائے راوی کے علاقے کا دورہ کیا اور صورتحال کا جائزہ لیا۔
موضع جندراکہ کے مقام پر پانی کی صورتحال کا جائزہ لینے کے بعد محکمہ انہار کے افسران نے ڈپٹی کمشنر کو بریفنگ دی۔ بریفنگ میں بتایا گیا کہ دریائے راوی میں جسڑ کے مقام پر پانی کا اخراج 2 لاکھ 29 ہزار کیوسک سے زائد جبکہ ہیڈ بلوکی پر 80 ہزار کیوسک سے تجاوز کر چکا ہے۔ اگلے 24 گھنٹوں کے دوران دریائے راوی میں انتہائی اونچے درجے کے سیلاب کا خدشہ ہے۔
علاقے خالی کرانے کے احکامات: ڈپٹی کمشنر نے دریا سے ملحقہ تمام علاقوں کو فوری طور پر خالی کروانے کے احکامات جاری کر دیئے ہیں۔
تمام محکموں کو الرٹ رہنے کی ہدایت: ممکنہ سیلاب سے نمٹنے کے لیے تمام متعلقہ محکموں کو الرٹ رہنے کی ہدایات جاری کی گئی ہیں۔
عوام اور مال کا تحفظ: ڈپٹی کمشنر نے کہا کہ عوام اور ان کے مال کو محفوظ بنانے کے لیے تمام دستیاب وسائل استعمال کیے جائیں گے۔
ایمرجنسی رسپانس ٹیمیں متحرک: ایمرجنسی رسپانس ٹیموں کو ریسکیو اور ریلیف آپریشنز کو متحرک انداز میں سرانجام دینے کی ہدایت کی گئی ہے۔
ضلعی انتظامیہ نے عوام سے اپیل کی ہے کہ وہ ان ہدایات پر عمل کریں اور کسی بھی غیر ضروری نقل و حرکت سے گریز کریں۔