Category: جرائم و حادثات

ڈیرہ غازی خان( باغی ٹی وی، نیوز رپورٹر شاہد خان) ویسٹ مینجمنٹ کمپنی نے گند دیہات میں پھینک کر علاقہ برباد کردیا، عوام سراپا احتجاج
تفصیل کے مطابق ویسٹ مینجمنٹ کمپنی Dewoo نے شہر کا کچرا باڑہ کے خوبصورت علاقے اور وڈور روڈ کے قریب ڈال کر علاقہ مکینوں کی زندگی اجیرن بنا دی ہے۔ گندگی کے ڈھیروں سے ملیریا، ہیضہ اور دیگر بیماریاں پھیلنے لگی ہیں جبکہ مقامی افراد اور گزرنے والے شہریوں کو سانس لینے میں بھی شدید دشواری کا سامنا ہے۔

اہل علاقہ نور محمد، فیض بخش، فیضان ماچھی، حیات اللہ، عبداللہ ماچھی، عبداللہ لغاری، عمران لغاری و دیگر نے الزام لگایا ہے کہ انتظامیہ کی نااہلی کے باعث اب تک 15 سے 20 افراد سانس کی بیماریوں کے باعث جان کی بازی ہار چکے ہیں اور باقی لوگ دوائیاں جیب میں رکھ کر چلنے پر مجبور ہیں۔

مکینوں نے خبردار کیا ہے کہ اگر گند ڈالنے کا سلسلہ نہ روکا گیا تو وہ سرکاری دفاتر کے سامنے شدید احتجاج کریں گے اور کچرا پھینکنے والی گاڑیوں کو روک دیں گے۔

اہل علاقہ نے وزیر اعلیٰ پنجاب مریم نواز، کمشنر اور ڈپٹی کمشنر ڈیرہ غازی خان سے فوری نوٹس لینے کا مطالبہ کیا ہے تاکہ بیماریوں کے پھیلاؤ کو روکا جا سکے۔

ڈیرہ غازی خان (سٹی رپورٹر): ڈیرہ غازی خان میں ضلعی انتظامیہ نے عوام کو معیاری اور محفوظ خوراک کی فراہمی یقینی بنانے کے لیے کریک ڈاؤن کا سلسلہ جاری رکھا ہوا ہے۔ اسسٹنٹ کمشنر ہیڈ کوارٹر نذر حسین کورائی نے مارکیٹوں کے معائنہ کے دوران بغیر تصدیقی مہر کے گوشت فروخت کرنے والے دو قصابوں کو گرفتار کرایا۔ اس کے علاوہ، دودھ اور دہی مقررہ قیمت سے زیادہ پر فروخت کرنے پر تین دکانداروں کو بھی گرفتار کرایا گیا۔

ڈپٹی کمشنر محمد عثمان خالد کی ہدایت پر یہ کارروائیاں عمل میں لائی جا رہی ہیں۔ ملزمان کے خلاف قانونی کارروائی کے لیے استغاثے بھی جمع کرا دیے گئے ہیں۔

اسسٹنٹ کمشنر نذر حسین کورائی نے سرکاری سلاٹر ہاؤس کا بھی دورہ کیا اور وہاں صفائی ستھرائی اور دیگر سہولیات کا جائزہ لیا۔ انہوں نے قصابوں کو سختی سے ہدایت کی کہ وہ صرف سرکاری سلاٹر ہاؤس میں ویٹرنری ڈاکٹر کی نگرانی میں جانور ذبح کریں اور گوشت پر ڈاکٹر کی مہر لگوائیں، بصورت دیگر سلاٹر ہاؤس ایکٹ کے تحت سخت کارروائی کی جائے گی۔

ڈپٹی کمشنر محمد عثمان خالد نے کہا کہ شہریوں کو صحت مند گوشت اور اشیائے خوردونوش مقررہ نرخ پر فراہم کرنا حکومت کی اولین ترجیح ہے۔ انہوں نے مزید کہا کہ اس سلسلے میں بلا امتیاز کارروائیاں جاری رہیں گی۔ انہوں نے دکانداروں سے بھی اپیل کی کہ وہ سرکاری نرخنامے نمایاں جگہ پر آویزاں کریں اور ان پر عمل درآمد کریں۔