اسلام آباد: وزیراعظم کی زیرصدارت اہم ملاقات میں ایئر چیف مارشل سے پاک فضائیہ کے پیشہ ورانہ امور اور دفاع وطن میں ان کے کردار پر تفصیلی تبادلہ خیال کیا گیا۔ اس موقع پر وزیراعظم نے پاک فضائیہ کے شہدا اور جوانوں کو شاندار خراج تحسین پیش کیا اور کہا کہ پاک فضائیہ ملک کے دفاع کی مضبوط دیوار ہے۔
وزیراعظم نے کہا کہ پاک فضائیہ نے معرکہ حق میں دشمن کے ہوائی جہاز گرا کر دشمن کو کاری ضرب دی ہے، جو قوم کے لیے باعث فخر ہے۔ انہوں نے کہا کہ ہمارے شاہین وطن عزیز کی حفاظت کے لیے ہر لمحہ چوکس اور تیار ہیں اور یہ سیسہ پلائی دیوار کی طرح ملک کی فضائی حدود کا تحفظ کر رہے ہیں۔ملاقات کے دوران دفاعی امور، پاک فضائیہ کی جدید ترین تربیت، فنی صلاحیتوں میں اضافے اور نئے تکنیکی آلات کے حصول پر بھی گفتگو کی گئی۔ وزیراعظم نے پاک فضائیہ کی پیشہ ورانہ مہارت اور قربانیوں کو ملک کی سلامتی کی ضمانت قرار دیا۔
وزیراعظم نے کہا کہ پاک فضائیہ کا کردار ملک کی خودمختاری اور سلامتی کے لیے انتہائی اہم ہے اور حکومت ہر ممکن وسائل فراہم کر کے اس ادارے کو مزید مضبوط بنائے گی۔
سکیورٹی فورسز نے بلوچستان کے علاقے مچھ میں فتنہ الہندوستان کیخلاف بڑی کارروائی کی ہے
مچھ کے علاقے میں فتنہ الہندوستان کے دہشتگردوں کی پہاڑوں میں موجودگی کی اطلاع پر آپریشن کیا گیا،سکیورٹی فورسز نے مچھ کے پہاڑوں میں چھپے دہشتگردوں کیخلاف سٹرائیکس کیں،سکیورٹی فورسز کی ان سٹرائیکس میں اب تک 25 سے 30 دہشتگرد جہنم واصل ہوچکے ہیں،دہشتگردوں کے ٹھکانوں پر سٹرائیکس کے نتیجے میں بھاری نقصانات کی بھی اطلاعات ہیں
پاکستان کی سکیورٹی فورسز ملک سے دہشتگردی کی عفریت کو ختم کرنے کیلئے پرعزم ہیں،پاکستان سے آخری دہشتگرد کے خاتمے تک سکیورٹی فورسز کا آپریشن جاری رہے گا
اسلام آباد: بھارت نے 24 گھنٹوں کے دوران پاکستان سے دوبارہ رابطہ کر کے دریائے ستلج میں ممکنہ سیلاب کے حوالے سے پیشگی اطلاعات فراہم کی ہیں۔ یہ اطلاعات سفارتی ذرائع کے مطابق بھارتی ہائی کمیشن اسلام آباد کی جانب سے وزارت خارجہ پاکستان کو دی گئی ہیں۔
ذرائع نے بتایا کہ بھارت کی طرف سے ماضی میں بھی سیلابی پانی کی معلومات دی جاتی رہی ہیں تاکہ کسی بھی ناگہانی صورتحال سے بچا جا سکے۔ تاہم، اس بار یہ رابطہ سندھ طاس معاہدے کے بجائے سفارتی چینلز کے ذریعے کیا گیا ہے۔دفتر خارجہ کے ترجمان شفقت علی خان نے تصدیق کی کہ بھارت نے 24 اگست کو دریائے ستلج میں سیلاب کی وارننگز سندھ طاس کمیشن کی بجائے براہ راست سفارتی رابطوں سے پاکستان کو دی ہیں۔ اس موقع پر پاکستان نے بھارت کو واضح کیا کہ وہ سندھ طاس معاہدے کی تمام شقوں پر مکمل عملدرآمد کا پابند ہے۔
شفقت علی خان نے کہا کہ بھارت کا سندھ طاس معاہدہ معطل قرار دینا بین الاقوامی قانون کی سنگین خلاف ورزی ہے اور بھارت کے یکطرفہ اقدامات خطے کے امن و استحکام پر منفی اثرات مرتب کر سکتے ہیں۔ انہوں نے کہا کہ پاکستان علاقائی امن کے لیے ہر ممکن تعاون کرنے کا خواہاں ہے، لیکن تمام فریقین کو قانونی معاہدوں کا احترام کرنا ہوگا۔
یہ رابطہ بھارت کی جانب سے گزشتہ رات بھی کیا گیا تھا، جب پاکستان کو دریائے طوی میں جموں کے مقام پر ممکنہ بڑے سیلاب سے آگاہ کیا گیا۔ ذرائع کے مطابق یہ مئی میں پاک بھارت جنگ کے بعد بھارت کی طرف سے پاکستان سے پہلا بڑا رابطہ تھا۔
مئی میں ہوئی پاک بھارت جنگ کے بعد بھارت نے یکطرفہ طور پر سندھ طاس معاہدہ ختم کرنے کا اعلان کیا تھا، جسے پاکستان نے سختی سے مسترد کیا تھا۔ اس حوالے سے پاکستان نے بارہا کہا ہے کہ سندھ طاس معاہدہ خطے میں پانی کے تنازعات کے حل کے لیے ایک اہم قانونی فریم ورک ہے جس کا احترام لازم ہے۔
انسداد دہشت گردی عدالت فیصل آباد کے جج جاوید اقبال نے رانا ثنا اللہ کے ڈیرے پر حملے کے 9 مئی متعلق کیس میں فیصلہ سنا دیا
انسداد دہشتگردی عدالت نے تھانہ سمن آباد میں درج مقدمہ کا فیصلہ سنا دیا، 109 ملزمان کا ٹرائل مکمل ہونے پر ملزمان کو سزائیں سنائی گئیں،34 ملزمان مقدمہ سے بری، فواد چوہدری کو مقدمہ سے بری کر دیا ،109 ملزمان میں سے 75 کو سزائیں دی گئیں،34 بری کر دیئے گئے،ملزمان کو دس دس سال کی سزائیں سنائی گئیں۔ پی ٹی آئی رہنما عمر ایوب، زرتاج گل، شبلی فراز، کنول شوزب کو دس دس سال کی سزا سنائی گئی۔ اسی طرح ارکان اسمبلی شیخ شاہد جاوید کو 3 سال اور اسماعیل سیلا کو دس سال قید کی سزاسنائی گئی۔
ملک بھر میں جون سے شروع ہونے والی موسلادھار بارشوں، اچانک سیلابوں اور لینڈ سلائیڈنگ کے واقعات نے شہریوں کی زندگیوں کو شدید متاثر کیا ہے۔
نیشنل ڈیزاسٹر مینجمنٹ اتھارٹی (این ڈی ایم اے) کے تازہ ترین اعداد و شمار کے مطابق، 26 جون سے 25 اگست کے دوران بارشوں اور سیلاب کی تباہ کاریوں میں اب تک 799 افراد جاں بحق اور 1080 افراد زخمی ہو چکے ہیں۔این ڈی ایم اے کی رپورٹ میں بتایا گیا ہے کہ جاں بحق ہونے والوں میں 203 بچے، 476 مرد اور 119 خواتین شامل ہیں، جبکہ زخمیوں میں بھی بچوں، مردوں اور خواتین کی بڑی تعداد شامل ہے۔ اس دوران 592 ریسکیو آپریشنز کیے گئے جن میں ایک لاکھ 6 ہزار سے زائد افراد کو محفوظ مقامات پر منتقل کیا گیا۔سیلابی صورتحال کی وجہ سے ملک بھر میں 7175 مکانات کو نقصان پہنچا ہے اور 5552 مویشی ہلاک ہو چکے ہیں، جس نے کسانوں اور دیہی علاقوں کے باشندوں کی زندگیوں پر منفی اثر ڈالا ہے۔
خیبرپختونخوا: سب سے زیادہ 497 افراد جاں بحق ہوئے، جبکہ 347 افراد زخمی ہوئے۔پنجاب: 165 اموات اور 584 زخمی رپورٹ ہوئے جو سب سے زیادہ زخمیوں کی تعداد ہے۔سندھ: 55 افراد جان کی بازی ہار گئے اور 71 زخمی ہوئے۔بلوچستان: 24 اموات اور 5 زخمی ہوئے۔گلگت بلتستان: 45 افراد جاں بحق اور 42 زخمی ہوئے۔آزاد جموں و کشمیر: 23 اموات اور 28 زخمی رپورٹ ہوئے۔وفاقی دارالحکومت اسلام آباد: 8 افراد جاں بحق اور 3 زخمی ہوئے۔
موسمیاتی تبدیلیوں اور موسلادھار بارشوں نے ملک کے کئی علاقوں میں زندگی کو معمول سے بہت متاثر کر دیا ہے۔ کئی شہروں میں سیلابی پانی نے گھروں، سڑکوں، اسکولوں اور دیگر بنیادی سہولیات کو نقصان پہنچایا ہے جس سے نہ صرف رہائشی متاثر ہوئے بلکہ انفراسٹرکچر بھی بری طرح متاثر ہوا۔
حکومتی ادارے، نیشنل ڈیزاسٹر مینجمنٹ اتھارٹی اور دیگر متعلقہ محکمے ہنگامی حالات سے نمٹنے کے لیے 24 گھنٹے چوکس ہیں اور متاثرہ علاقوں میں ریسکیو اور ریلیف آپریشنز جاری ہیں۔ تاہم، حکام نے عوام کو بھی احتیاطی تدابیر اختیار کرنے اور غیر ضروری سفر سے گریز کرنے کی ہدایت کی ہے تاکہ مزید جانی و مالی نقصان سے بچا جا سکے۔
خیبر پختونخوا کے سیلاب زدہ علاقوں خاص طور پر شانگلہ اور بونیر میں پاک فوج کی امدادی کارروائیاں تیزی سے جاری ہیں۔ سیلاب کی تباہ کاریوں سے متاثرہ عوام کو ریلیف فراہم کرنے کے لیے پاک فوج کی امدادی ٹیمیں دن رات محنت کر رہی ہیں تاکہ متاثرین کو ہر ممکن سہولت فراہم کی جا سکے۔
پاک فوج کی امدادی ٹیموں نے بونیر اور شانگلہ میں راشن، کھانے پینے کی اشیاء، صاف پانی اور دیگر ضروری اشیاء تقسیم کیں۔ اس کے علاوہ فوج کی میڈیکل ٹیمیں بھی متاثرین کے طبی معائنے اور ابتدائی علاج معالجے کے لیے تعینات کی گئی ہیں تاکہ صحت کے مسائل کو بروقت حل کیا جا سکے۔متاثرہ علاقوں کے باشندوں نے پاک فوج کی قربانیوں اور ہمدردی کو سراہتے ہوئے ان کی کاوشوں کا شکریہ ادا کیا ہے۔ مقامی لوگ پاک فوج کی امدادی کارروائیوں کو اپنی زندگیوں میں امید کی کرن قرار دے رہے ہیں۔
پاک فوج نے اعلان کیا ہے کہ متاثرین کی مکمل بحالی تک امدادی کارروائیاں جاری رہیں گی اور سیلاب زدگان کی مدد کے لیے ہر ممکن اقدامات کیے جائیں گے۔ حکومت اور پاک فوج کی مشترکہ کوششوں سے متاثرین کو جلد از جلد اپنی زندگی معمول پر لانے میں مدد دی جائے گی۔
این ایل سی کی شاندار کامیابی ، علاقائی تجارت میں نیا باب رقم ہو گیا
نیشنل لاجسٹک سیل (این ایل سی) اور ڈی پی ورلڈ نے متحدہ عرب امارات سے تاجکستان تک تجارتی سامان کی پہلی کامیاب ترسیل مکمل کر لی،این ایل سی اور ڈی پی ورلڈ کی متحدہ عرب امارات سے تاجکستان تک تجارتی سامان کی کامیاب ترسیل کی گئی،این ایل سی اور ڈی پی ورلڈ نے کامیابی سے 38 ٹن کی کھیپ تاجکستان کے دارالحکومت دوشنبے پہنچا دی، 38 ٹن آٹو موبائل اسپیئر پارٹس کی کھیپ جبل علی پورٹ سے کراچی پہنچی تھی ،دبئی سے دوشنبے تک کا سفر محض 16 دنوں میں ممکن بنایا گیا،این ایل سی نے اپنی پیشہ ورانہ مہارت اور جدید لاجسٹکس نظام کے ذریعے اس کامیابی کو ممکن بنایا،این ایل سی اور ڈی پی ورلڈ خلیجی ممالک اور وسطی ایشیائی ریاستوں کے درمیان نئی راہداری فراہم کر رہی ہے
تجارتی سامان کی ترسیل اقوامِ متحدہ کی بین الاقوامی روڈ ٹرانسپورٹ نظام (ٹی آئی آر ) کے تحت کی گئی،این ایل سی خطے میں جدید لاجسٹکس اور علاقائی رابطے کی علامت بن کر ابھرا ہے،وسطی ایشیائی ریاستوں کو این ایل سی پاکستانی بندرگاہوں تک مختصر ترین اور محفوظ راستہ فراہم کر رہی ہے،اس منصوبے کے تحت 100 ملین ڈالر کی غیر ملکی سرمایہ کاری بھی پاکستان میں لائی جا رہی ہے،این ایل سی اور ڈی پی ورلڈ کا اشتراک پاکستان کے بڑھتے ہوئے تجارتی کردار کی ایک تاریخی کامیابی ہے،
ہنگو کی تحصیل ٹل کے علاقے دو آبہ میں فیڈرل کانسٹیبلری (ایف سی) کے قلعے پر حملے میں 3 اہلکار شہید اور 17 زخمی ہو گئے۔
ایس پی آپریشنز اسد زبیر کے مطابق دوآبہ کے علاقے طورہ وڑی میں فیڈرل کانسٹیبلری قلعے پر حملہ کیا گیا،پولیس حکام کے مطابق دہشت گردوں کے حملے میں فیڈرل کانسٹیبلری کے 3 جوان شہید اور 17 زخمی ہوئے،ایس پی آپریشنز کا بتانا ہے کہ پولیس اور ایف سی کی بھرپور جوابی کارروائی میں دہشت گرد فرار ہو گئے،ایس پی اسد زبیر کا کہنا ہے کہ زخمی اہل کاروں کو دوآبہ اسپتال منتقل کر دیا گیا۔
معروف سینئر صحافی مبشر لقمان نے اپنے تازہ ترین وی لاگ میں بھارت کی عالمی پالیسیوں، داخلی بحرانوں اور ممکنہ جنگی عزائم پر شدید تنقید کرتے ہوئے کئی اہم انکشافات کیے۔ انہوں نے کہا کہ بھارت نے حالیہ برسوں میں جو اقدامات کیے ہیں، ان سے عالمی برادری میں اس پر اعتماد کم ہوتا جا رہا ہے، اور اسے ایک غیر ذمہ دار ریاست کے طور پر دیکھا جانے لگا ہے۔
مبشر لقمان نے "آپریشن سندور” اور پلوامہ واقعے کے تناظر میں بھارت کی پالیسیوں کو غیر ذمہ دارانہ قرار دیا۔ انہوں نے کہا کہ بھارت نے بغیر کسی ٹھوس ثبوت کے پاکستان پر حملہ کیا، جس سے خطے میں ایٹمی جنگ کا خطرہ پیدا ہو گیا۔ انہوں نے خبردار کیا کہ اگر پاکستان نے جوابی کارروائی کی ہوتی تو دنیا ایک بڑے بحران کا شکار ہو سکتی تھی۔وی لاگ میں مبشر لقمان نے بھارت کی جانب سے "انڈس واٹر ٹریٹی” کو مسترد کرنے، سارک ممالک کے ویزے منسوخ کرنے اور افغان ٹرانزٹ ٹریڈ بند کرنے جیسے اقدامات کو عالمی معاہدوں کی خلاف ورزی قرار دیا۔ ان کے مطابق، ایسے اقدامات سے بھارت کی ساکھ کو شدید نقصان پہنچا ہے اور دنیا اب اس پر اعتماد کرنے سے گریزاں ہے۔
مبشر لقمان نے بھارتی میڈیا پر بھی تنقید کرتے ہوئے کہا کہ وہاں جنگی بیانیہ کو فروغ دیا جا رہا ہے، جھوٹی رپورٹس اور ایڈیٹ شدہ ویڈیوز کے ذریعے عوام کو گمراہ کیا جا رہا ہے۔ انہوں نے کہا کہ عالمی برادری اب بھارت کو ایک غیر ذمہ دار قوم کے طور پر دیکھنے لگی ہے۔وی لاگ میں مبشر لقمان نے انکشاف کیا کہ بھارت نے چین اور پاکستان کے درمیان فاصلے پیدا کرنے کے لیے پانچ سالہ منصوبہ بنایا ہے، جس میں بلوچستان اور خیبرپختونخوا میں شدت پسند گروہوں کے ذریعے حملے شامل ہیں۔ ان کا کہنا تھا کہ بھارت کا مقصد چین کی سرمایہ کاری کو نقصان پہنچانا ہے۔
مبشر لقمان نے وزیر اعظم شہباز شریف کے آئندہ دورہ چین اور سی پیک فیز ٹو کے آغاز کو خوش آئند قرار دیا۔ انہوں نے کہا کہ موجودہ حکومت سی پیک کو سنجیدگی سے لے رہی ہے اور اس پر کوئی سمجھوتہ نہیں کیا جائے گا۔ گوادار بندرگاہ اور ایئرپورٹ کی تکمیل کے بعد اب انہیں فعال بنانے کی ضرورت ہے۔وی لاگ کے اختتام پر مبشر لقمان نے ایک "بریکنگ نیوز” دیتے ہوئے کہا کہ بھارت کے بڑے کاروباری گروپس، جیسے ریلائنس اور اڈانی، مودی حکومت سے نالاں ہیں اور چاہتے ہیں کہ وہاں حکومت تبدیل ہو۔ امریکی ٹیرف کے نفاذ کے بعد بھارتی کاروباری طبقہ شدید متاثر ہو رہا ہے، اور ٹاٹا گروپ نے پہلے ہی 14,000 آئی ٹی ماہرین کو فارغ کر دیا ہے۔
مبشر لقمان نے دعویٰ کیا کہ مودی حکومت پاکستان پر حملے کی تیاری کر رہی ہے، لیکن بھارتی افواج کی پیشہ ورانہ حیثیت اور اندرونی بدعنوانی اس میں رکاوٹ بن سکتی ہے۔ انہوں نے کہا کہ بھارتی سیاستدانوں نے اپنی افواج کو بھی کمزور کر دیا ہے، جس سے ان کی ساکھ متاثر ہوئی ہے۔
پاکستان تحریک انصاف (پی ٹی آئی) کے سینئر رہنما اور رکن قومی اسمبلی شیر افضل مروت نے پارٹی چھوڑنے کا اعلان کردیا ہے۔
شیر افضل مروت کا کہنا تھا کہ پی ٹی آئی کی سوشل میڈیا ٹیم نے عمران خان اور پارٹی کو تباہ کر دیا ہے، یہی وجہ ہے کہ پارٹی کا بیانیہ کمزور ہوا۔ انہوں نے دعویٰ کیا کہ عمران خان دراصل اسٹیبلشمنٹ سے تصادم نہیں بلکہ مفاہمت چاہتے ہیں۔انہوں نے انکشاف کیا کہ حیدر مہدی نے ان سے 4 ہزار ڈالر مانگے اور انکار پر ان کے خلاف وی لاگ جاری کیا۔ مزید کہا کہ ڈاکٹر معید پیرزادہ اور عادل راجہ کے بھارتی خفیہ ایجنسی "را” سے تعلقات ہیں۔ انہوں نے الزام عائد کیا کہ عمران خان کے جیل سے جاری ہونے والے پیغامات سب جھوٹے ہوتے ہیں اور ان میں کوئی صداقت نہیں۔
شیر افضل مروت نے اعلان کیا کہ وہ شوکت بسرا، تیمور سلیم جھگڑا اور دیگر کے خلاف قانونی کارروائی کریں گے۔ ان کا کہنا تھا کہ شہباز گل، اظہر مشوانی اور جبران الیاس سمیت پی ٹی آئی کے سوشل میڈیا سے وابستہ کئی افراد عمران خان کے نام پر مالی فائدے اٹھا رہے ہیں جبکہ پارٹی چیئرمین بیرسٹر گوہر بھی ان سے خوفزدہ ہیں۔
انہوں نے یہ بھی الزام لگایا کہ علیمہ خان کے بیٹوں کے تعلقات ریاست مخالف اکاؤنٹس "بابا کوڈا، اڈیالہ کی بلی اور جوکر” سے ہیں۔ مزید کہا کہ محمود خان اچکزئی کو اپوزیشن لیڈر بنانے کا فیصلہ عمران خان کی نہیں بلکہ سلمان اکرم کی خواہش تھی۔ان کا دعویٰ تھا کہ 14 اگست کو احتجاج کا فیصلہ بھی عمران خان کا نہیں بلکہ علیمہ خان کا تھا۔
