Category: اہم خبریں

لاڑکانہ سندھ ، فیصل آباد، چنیوٹ، سرگودھا کے بعد صوبائی دارالحکومت لاہور میں ایڈز کے مریضوں کی بڑی تعداد سامنے آ گئی

باغی ٹی وی کی رپورٹ کے مطابق صوبائی دارالحکومت لاہور میں بھی ایڈز کے مریضوں کی بڑی تعداد سامنے آئی ہے، پنجاب ایڈز کنٹرول پروگرام کے اعدادو شمار کے مطابق صوبائی دارالحکومت لاوہر میں ایچ آئی وی ایڈز کے رجسٹرڈ مریضوں کی تعداد 1200 سے زیادہ ہے. جن میں 200 خواتین بھی شامل ہیں، ایچ آئی وی ایڈز کی تشخیص اور علاج کے لئے لاہور کے ہسپتالوں میو ہسپتال، جناح اور سروسز ہسپتال میں بنائے گئے سنٹرز میں روزانہ پندرہ سے بیس مریضوں کا چیک اپ کیا جاتا ہے اور ادویات دی جاتی ہیں.

صوبائی دارالحکومت لاہور میں ایچ آئی وی ایڈز سے متاثرہ افراد میں سے ساٹھ فیصد سرنج سے نشہ کرنے والے ہیں. ایڈز کنٹرول پروگرام کے تحت پنجاب بھر میں ایچ آئی وی اور ایڈز کے رجسٹرڈ مریضوں کی تعداد مجموعی طور پر 13 ہزار 500 سے زائد ہے.

واضح رہے کہ ایک سال سرگودھا کے نواحی علاقے قبل کوٹ عمرانہ میں ایڈز کے 300 سے زائد مریضوں کی نشاندہی ہوئی تھی۔جن کی تعداد 480 کے قریب پہنچ چکی ہے.

چنیوٹ کے نواحی گاؤں چک نمبر 127 ج ب میں ایڈز جیسی موذی مرض سے متاثرہ مرنیوالے افراد کی تعداد 55 ہوگئی ہے .

پنجاب ایڈز کنٹرول پروگرام کے جاری کردہ اعداد و شمار کے باوجود فیصل آباد ڈویژن کے تین اضلاع فیصل آباد،چنیوٹ اور جھنگ سمیت ساہیوال اور ننکانہ میں ابھی تک ضلعی انتظامیہ خاموشی کا مظاہرہ کررہی ہیں کیونکہ ابھی تک ضلعی حکومتوں کی جانب سےایک بھی ضلع میں کسی بھی مقام پر کوئی اسکریننگ کیمپ نہیں لگایا گیا۔ جبکہ یہ بھی وارننگ دی گئی ہے کہ پی اے سی پی کا متعلقہ سٹاف کسی کو بھی بیماری کے حوالے سے کوئی معلومات کسی کو دے گا نہ کوئی رپورٹ لیک کرے گا بصورت دیگراس کے خلاف سخت کارروائی کی جائے گی۔

دوست ملک قطر نے پاکستان میں 3 ارب قطری ریال کی سرمایہ کاری اعلان کیا ہے۔

باغی ٹی وی رپورٹ کے مطابق امیر قطر کے پاکستان میں کامیاب دورے کے بعد قطر کی سرکاری خبر رساں ایجنسی کے مطابق امیر قطر شیخ تمیم بن حمد الثانی کی ہدایت پر قطر کے نائب وزیراعظم اور وزیر خارجہ نے پاکستان میں تین ارب قطری ریال کی سرمایہ کاری اعلان کیا جو ڈپازٹ اور ڈائریکٹ انویسٹمنٹ کی صورت میں ہوگی۔

قطری نائب وزیراعظم اور وزیر خارجہ کا کہناہےکہ دونوں ممالک کے درمیان شراکت داری 9 ارب ڈالر کی ہوگی۔
واضح رہے کہ وزیراعظم عمران خان کی دعوت پر امیرِ قطر شیخ تمیم بن حمد الثانی گزشتہ دنوں دو روزہ دورے پر پاکستان آئے اس دوران پاکستان اور قطر کے درمیان مختلف شعبوں میں تعاون کی یادداشتوں پر دستخط کیے گئے۔

سابق صدر آصف زرداری کی ہمشیرہ فریال تالپور کے جسمانی ریمانڈ میں 14 دن کی توسیع کر دی گئی

باغی ٹی وی کی رپورٹ کے مطابق فریال تالپور کو نیب نے احتساب عدالت میں‌ پیش کیا، احتساب عدالت کے جج ارشد ملک نے کیس کی سماعت کی ،نیب نے عدالت سے استدعا کی کہ مزید تفتیش کرنی ہے ،ریمانڈ دیا جائے جس پر عدالت نے نیب کی استدعا منظور کرتے ہوئے فریال تالپور کا مزید چودہ دن کا جسمانی ریمانڈ دے دیا.

دوران سماعت فریال تالپور روسٹرم پرآگئیں،جج ارشد ملک نے استفسار کیا کہ کیا آپ کو ہسپتال لے کر گئے،فریال تالپور نے کہاکہ میڈیکل ٹیم آئی تھی بلڈپریشر کا مسئلہ تھا،میں شوگر کی مریضہ بھی ہوں، جج نے استفسار کیا کہ کیا آپ کو ہائپرٹینشن بھی ہے ،اس پر سابق صدرآصف زرداری کی ہمشیرہ نے کہا کہ جی ہاں ،جج ارشد ملک نے کہا کہ جن کیخلاف مقدمات ہوں وہ ہائپرٹینشن کا شکار کیوں ہو جاتا ہے،عدالت نے فریال تالپور کو نشست پر بیٹھنے کی اجازت دیدی.

واضح رہے کہ اسلام آباد ہائیکورٹ سے درخواست ضمانت مسترد ہونے پر نیب نے فریال تالپور کو گرفتار کیا تھا ، بعد ازاں عدالت نے15جون کوفریال تالپورکو9روزہ جسمانی ریمانڈپرنیب کےحوالےکیاتھا، آج جسمانی ریمانڈ ختم ہونے پر فریال تالپور کو دوبارہ عدالت میں پیش کیا گیا.

بھارت میں‌ دماغی بیماری سے ہلاکتیں سینکڑے سے بھی تجاوز کر گئی.علاقے میں خوف و ہراس کے پہرے، بچے خاص نشانہ

باغی ٹی وی رپورٹ کے مطابق بھارت میں "اینسفالٹ "کے نام سے پہچانی جانے والی دماغی انفیکشن کی بیماری سے ہلاکتوں کی تعداد 145 تک جا پہنچی ہے۔

بھارت کے روزنامہ انڈیا ٹو ڈے کے مطابق ملک کے مشرقی صوبے بہار میں آکیوٹ اینسفالٹ سینڈروم کی وجہ سے 145 بچے موت کے منہ میں جا چکے ہیں۔

خبر کے مطابق بیماری کی وجہ سے ہونے والی ہلاکتوں میں سے 129 مظفر پور میں ہوئی ہیں۔

رواں مہینے کے آغاز سے صوبے کے 16 مختلف مقامات پر 600 سے زائد بچوں میں مذکورہ متعدی بیماری کی تشخیص ہوچکی ہے۔

ڈاکٹروں نے تاحال اس بیماری کی وجوہات کا تعین نہیں کیا تاہم ماہرین کے مطابق بھارت کے غریب ترین صوبے بہار میں یہ متعدی بیماری کچی لیچی کے استعمال سے پھیلی ہے۔

بیماری خاص طور پر بچوں کو متاثر کر رہی ہے اور اس میں مبتلا مریضوں کے دماغ میں سوجن ، قے اور شدید بخار کی علامتیں دیکھی جا رہی ہیں۔

پنجاب میں نئے بلدیاتی نظام کے خلاف درخواست پر سماعت غیر معینہ مدت تک ملتوی کر دی گئی

باغی ٹی وی کی رپورٹ کے مطابق پنجاب میں نئے بلدیاتی نظام کے خلاف درخواستوں پرسماعت غیر معینہ مدت کیلئےملتوی کر دی گئی،جسٹس مامون رشید شیخ کی سربراہی میں فل بنچ نےسماعت ملتوی کی، عدالت نے پنجاب حکومت اورالیکشن کمیشن سمیت دیگرفریقین سے جواب طلب کرلیا ہے

عدالت میں دائردرخواستوں میں بلدیاتی نظام اوربلدیاتی اداروں کی تحلیل کوچیلنج کیا گیا ہے ،ایڈووکیٹ جنرل پنجاب اوربلدیاتی اداروں کےسابق نمائندے بھی عدالت میں پیش ہوئے ،درخواست گزار کا کہنا ہے کہ نیاقانون،آئین اورسپریم کورٹ کے فیصلوں سے متصادم ہے.

واضح رہے کہ نیا بلدیاتی نظام پنجاب اسمبلی سے منطور ہو چکا ہے، مسلم لیگ ن نے بل پیش کرنے کے موقع پر ایجنڈےکی کاپیاں پھاڑ دی تھیں اور بھر پور احتجاج کیا تھا، تحریک انصاف اس بل کے پاس ہونے کو بہت بڑی کامیابی قرار دے رہی ہے . نئے ترمیمی بل کے تحت ناظمین اب چئیرمین کہلائیں گے، تمام ڈویژنل ہیڈکوارٹرز میں سٹی لوکل گورنمنٹس بنائی جائیں گی۔تحصیل کونسل چیئرمین اور میئر سٹی لوکل گورنمنٹ کے انتخابات جماعتی بنیاد پر جبکہ ویلیج و نیبر ہوڈ کونسل کے انتخابات غیر جماعتی بنیادوں پر ہوں گے

مسلم لیگ ق کے رہنما سپیکر پنجاب اسمبلی چودھری پرویز الہیٰ کے بیٹے مونس الہی نے سماجی رابطے کی ویب سائٹ ٹویٹر پراسمبلی سے منظور کردہ بلدیاتی نظام کوخیبر پختونخواکے نظام کا کاپی پیسٹ قراردے دیا .مونس الہیٰ کا کہنا تھا کہ پنجاب اور کے پی کے کا موازنہ نہیں کیا جاسکتا،دونوں صوبوں کی آبادی اوررقبے میں واضح فرق ہے،نئے بلدیاتی نظام میں ماضی کی طرح کئی نقائص ہیں،چارہزاریونین کونسل کی جگہ 24 ہزارولیج اور پنچایت کونسلزبہت زیادہ ہیں ،ایسے نظام سے انتظامی ڈھانچے اور مالی اخراجات میں چھ گنا اضافی ہوگا ،کم ازکم آٹھ ارب روپے سالانہ اور دیگر اخراجات ضائع ہوں گے ،

قومی کرکٹ ٹیم نے سیمی فائنل کی طرف سفر جاری کر دیا،مگر فیلڈنگ بہتر بنانا ہوگی

باغی ٹی وی رپورٹ قومی کرکٹ ٹیم نے سیمی فائنل کی طرف سفر جاری کر دیاہے مزید کامیابی سمٹنے کے لیے اپنی فیلڈینگ کی خامیوں کودور کرنا ہوگا اور کیچ چھوڑنےکی عادت اب ترک کرنا ہوگی.
ورلڈکپ کے اہم میچ میں پاکستان نے جنوبی افریقا کو 49 رنز سے شکست دے دی اور اس طرح سیمی فائنل میں رسائی کیلئے پاکستان کا سفر ابھی جاری ہے۔

پاکستان کو بقیہ تین میچوں میں نیوزی لینڈ، افغانستان اور بنگلہ دیش کو شکست دینا ہوگی۔ورلڈ کپ میں پانچواں میچ ہار کر افغانستان کے بعد جنوبی افریقا کی ٹیم بھی باہر ہوگئی ہے۔

پاکستان ٹیم نے جنوبی افریقا کو شکست تو دی پر روایتی فیلڈنگ کرنا بھی نہیں بھولی، جنوبی افریقا کے خلاف میچ میں پاکستان نے 7 کیچز ڈراپ کیے ، فاسٹ بولر محمد عامر کے ہاتھ چار کیچز نہ آئے، وکٹ کیپر سرفرازاحمد ، وہاب ریاض اور شاداب بھی کیچز نہ تھام سکے۔

جمعیت علماء اسلام کے سربراہ مولانا فضل الرحمان نے حکومت کے خلاف اے پی سی میں شرکت کے لئے مریم نواز کو دعوت دی

باغی ٹی وی کی رپورٹ کے مطابق مولانا فضل الرحمان نے مسلم لیگ ن کی نائب صدر مریم نواز کو اے پی سی میں شرکت کی دعوت دی جو مریم نواز نے قبول کر لی، مولانا فضل الرحمان کی صدارت میں اپوزیشن جماعتوں کی اے پی سی 26 جون کو اسلام آباد کے مقامی ہوٹل میں ہو گی، اے پی سی کا فیصلہ رمضان میں بلاول زرداری کی رہائشگاہ پر ہونے والی افطار پارٹی کے دوران کیا گیا تھا سابق صدر آصف زرداری کا کہنا تھا کہ مولانا کی سربراہی میں اے پی سی ہو گی اور حکومت کے خلاف تحریک کی قیادت بلاول اور مریم کریں گی.

واضح رہے کہ مریم نواز نے دو روز قبل پریس کانفرنس میں کہا تھا کہ اے پی سی میں میرے جانے کا فیصلہ شہباز شریف کریں گے کیونکہ مسلم لیگ ن کے صدر وہ ہیں اس لئے ان کا فیصلہ ہو گا کہ کون کون اے پی سی میں مسلم لیگ ن سے شرکت کرے گا، لیکن مریم نواز نے اپنی پریس کانفرنس سے ایک بار پھر یوٹرن لے لیا اور مولانا فضل الرحمان کی جانب سے ا ے پی سی میں شرکت کی دعوت پر خود سے دعوت قبول کر لی.