Category: اہم خبریں

پیپلز پارٹی کے چیئرمین بلاول زرداری نیب دفتر پہنچ گئے، اس دوران پیپلز پارٹی کے کارکنان کو پولیس نے گرفتار کر لیا ہے

باغی ٹی وی کی رپورٹ کے مطابق بلاول زرداری نیب دفتر پہنچ گئے ہیں، آصفہ زرداری ، مرتضیٰ وہاب اورنیّر بخاری بھی بلاول بھٹو کے ہمراہ ہیں ،نیب ہیڈکوارٹرزکے باہر پیپلز پارٹی کے کارکنان موجود ہیں جنہوں نے شدید نعرے بازی کی ،پولیس نے پی پی کے کارکنان کو ڈی چوک پر روکا جہاں کارکنان نے پولیس والوں کے ساتھ ہاتھا پائی کی ،پولیس نے متعدد کارکنان کو گرفتار کر لیا ہے. پولیس نے جیالوں کو منتشر کرنے کے لئے واٹر کینن کا بھی استعمال کیا ہے

واضح رہے کہ نیب راولپنڈی نے سابق صدرآصف زرداری کو 29 مئی کودوبارہ طلب کیا ہے .پیپلز پارٹی کے شریک چیئرمین آصف زرداری کو پاورپروجیکٹ،غیرقانونی ٹھیکوں کے کیس میں نیب نے طلب کیا ہے، زرداری کو نیب نے 29 مئی کو اولڈ نیب ہیڈکوارٹر پیش ہونے کی ہدایت کی ہے تاہم زرداری نے پیش ہونے سے معذرت کر لی . اسی روز پیپلز پارٹی کے چیئرمین بلاول زرداری کو بھی جے وی اوپل کیس میں طلب کر رکھا ہے .بلاول کو نیب نے 24 مئی کو بلایا تھا لیکن بلاول پیش نہ ہوئے اب نیب نے بلاول کو بھی 29 مئی کو ہی طلب کیا ہوا ہے. بلاول نیب میں پیش ہو چکے ہیں.

پیپلز پارٹی کے چیئرمین بلاول بھٹو آج نیب میں پیش ہوں گے جبکہ شریک چیئرمین آصف زرداری نے آج نیب پیش ہونے سے معذرت کر لی. بلاول بھٹوکےہمراہ نیب آفس آنے والےسینکڑوں جیالوں کوایوب چوک پرروک دیا گیا

باغی ٹی وی کی رپورٹ کے مطابق بلاول زرداری آج نیب میں پیش ہوں گے ،بلاول کو پارک لین کمپنی کی انکوائری میں نیب راولپنڈی کی مشترکہ تحقیقاتی ٹیم کے سامنے پیش ہو کر بیان ریکارڈ کروانے کے لئے طب کیا گیا ہے۔ بلاول بھٹو کارکنوں کے ہمراہ قافلے کی صورت میں نیب دفتر جا رہے تھے کہ کارکنان کو ایوب چوک پر روک دیا گیا ، نیب نے آئی جی اسلام آباد سے سیکورٹی سخت کرنے کے انتظامات کے لئے خط لکھا تھا، وفاقی پولیس کے ساڑھے تین سو ماتحت پولیس افسران و اہلکار تعینات کئے ہیں۔ اس موقع پر کسی کارکن کو نیب بلڈنگ میں داخلہ کی اجازت نہیں دی جائے گی. دوسری جانب آصف علی زرداری نے نیب راولپنڈی میں آج پیش ہونے سے معذرت کرلی۔ آصف زرداری کے وکیل فاروق ایچ نائیک نے نیب کو درخواست دے دی ہے جس میں کہا گیا ہے کہ آج ہائی کورٹ میں کیس ہے، پیش نہیں ہو سکتا، عید کے بعد کی کوئی تاریخ دے دیں پیش ہو جاؤں گا۔

پی ٹی آئی حکومت کی جانب سے مستقبل کے چیف جسٹس قاضی فائز عیسیٰ کے خلاف سپریم جوڈیشل کونسل میں ریفرنس دائر کر دیا گیا ہے۔

باغی ٹی وی کی رپور‌ٹ کے مطابق ایک سینئر صحافی کی طرف سے سوشل میڈیا سائٹ ٹویٹر پر کی گئی ٹویٹ میں‌ کہا گیا ہے کہ
پی ٹی آئی کی حکومت نے مذکورہ ریفرنس صرف جسٹس قاضی فائز عیسیٰ کے خلاف ہی دائر نہیں کیا بلکہ تین اور ججز بھی ہیں جن کے خلاف سپریم جوڈیشل کونسل سے رجوع کیا گیا ہے۔

یاد رہے کہ جسٹس قاضی فائز عیسیٰ وہی سینئر جسٹس ہیں‌ جنہوں نے جسٹس مشیر عالم کے ہمراہ فیض آباد دھرنا کیس کا فیصلہ سنایا تھا. اس فیصلے میں‌ وفاقی وزیر ریلوے شیخ رشید احمد اور بعض‌ دوسری حکومتی شخصیات کے کردار سے متعلق بھی سوالات اٹھائے گئے تھے. اس فیصلہ کے خلاف پاکستانی وزارت دفاع نے بھی سپریم کورٹ‌ میں‌ نظر ثانی کی اپیل دائر کی تھی جس میں‌ استدعا کی گئی تھی کہ مذکورہ فیصلہ سے پاک فوج سے متعلق استعمال ہونے والے الفاظ حذف کیے جائیں۔

پی ٹی آئی حکومت کی طرف سے مستقبل کے چیف جسٹس قاضی فائز عیسیٰ سے متعلق سپریم جوڈیشل کونسل میں ریفرنس دائر کرنے کی خبروں‌ سے ملک میں ایک نئی بحث چھڑ گئی ہے.

نیپرا کی طرف سے ایک بار پھر بجلی کے نرخوں میں اضافہ کر دیا گیا ہے جس پر پاکستانی عوام میں تشویش کی لہر دوڑ‌ گئی ہے.

باغی ٹی وی کی رپورٹ کے مطابق پٹرول کی قیمتوں میں اضافہ کی خبروں‌کے بعد اب 55 پیسے فی یونٹ اضافے کی منظوری کی خبریں‌سامنے آنے پر مہنگائی کے ہاتھوں‌ پریشان لوگوں‌ میں شدید بے چینی پائی جاتی ہے. نیپرا نے منگل کے دن بجلی کی قیمتوں میں 55 پیسے فی یونٹ اضافے کی منظوری دیدی ہے. اضافے سے صارفین پر 5 ارب 20 کروڑ روپے کا اضافی بوجھ پڑے گا جب کہ اضافہ اپریل کی ماہانہ فیول پرائس ایڈجسٹمنٹ کی مد میں کیا گیا ہے. اس اضافے کا اطلاق لائف لائن صارفین، کے الیکڑک اور زرعی صارفین پر نہیں ہوگا جب کہ اضافی رقم آئندہ ماہ کے بلوں میں وصول کی جائے گی۔

سی پی پی اے کے مطابق اپریل میں آر ایل این جی والے پلانٹس نہیں چلائے گئے. اسی طرح اپریل میں ہائیڈل سے 22.94 فیصد اور کوئلے سے 10.34 فیصد بجلی پیدا کی گئی ہے جبکہ مقامی گیس سے 18.24 فیصد اوردرآمدی ایل این جی سے30.83 فیصد بجلی پیدا کی گئی.

یاد رہے کہ پچھلے چند ماہ میں متعدد مرتبہ بجلی، گیس اور پٹرول کی قیمتوں‌ میں اضافہ کیا گیا ہے جس سے مہنگائی بہت زیادہ بڑھی ہے اور عوام پریشانی سے دوچار ہیں.

پاکستان کے نامور ایٹمی سائنسدان اور محسن پاکستان محسن پاکستان ڈاکٹر عبدالقدیر خان نے کہا ہے کہ پاکستان آدھے سے پونے گھنٹے میں انڈیا کے تمام شہروں کو صفحہ ہستی سے مٹاسکتا ہے. وطن عزیز پاکستان کے ایٹمی طاقت بننے کے بعد اللہ کے فضل و کرم سے اب کوئی ملک شرارت کرنے کے بعد آرام سے نہیں نکل سکتا.

باغی ٹی وی کی رپورٹ‌ کے مطابق ڈاکٹر عبدالقدیر خان نے کہا کہ 1971 میں ازلی دشمن انڈیا نے پاک فوج کے ساتھ بہت بدسلوکی کی تھی لیکن ایٹمی دھماکوں کے بعد اب وہ سب دہرانا اور ایسی کوئی مذموم حرکت کرنا بھارت کیلئے خواب بن چکا ہے. اس وقت حالات یہ ہیں‌ کہ یہ ایٹم بم ہی ہے جس کی وجہ سے بھارت پاکستان سے جنگ نہیں کر رہا. کسی کو بھی اب نیوکلیئر جنگ کا نہیں سوچنا چاہیے۔

انہوں نے کہاکہ ایٹم بم پاکستان نے بہت پہلے بنا لیا تھا مگرحکمرانوں کی وجہ سے دھماکے کرنے میں تاخیر ہوئی. ہم چاہتے تو 1983-84 میں ایٹمی دھماکہ آسانی سے کر سکتے تھے او ہم نے بہت مختصر عرصے میں ایٹم بم بھی بنا کر رکھ دیا تھا۔ جنرل ضیاءالحق کو ایک ہفتے کا نوٹس لکھ کر دے دیا تھا اور 1998 میں نواز شریف بھی ٹال مٹول کر رہے تھے، تمام سائنسدانوں نے ملک کیلئے اپنی فیملی کو بھلا دیا تھا تاہم جب پاکستان نے دھماکے کیے تو خوشی ہوئی۔

انہوں نے کہا کہ جس طرح امریکہ کو روس کا ڈر ہے اسی طرح بھارت کو پاکستان کا ڈر ہے ، بھارت ہمیں تباہ کرسکتا ہے تو ہم بھی انہیں تباہ کرسکتے ہیں ، پاکستان آدھے سے پونے گھنٹے میں بھارت کے تمام شہر مٹاسکتا ہے، کسی کو اگر دیوار سے لگادیا جائے تو پھر اس کے پاس جو ہتھیار ہوتا ہے وہ استعمال ہوہی جاتا ہے ۔