Category: اہم خبریں

عالمی مالیاتی فنڈ( آئی ایم ایف) اور پاکستان کے درمیان اسٹاف لیول معاہدہ طے پا گیا۔

آئی ایم ایف کے مطابق منظوری کے بعدپاکستان کو توسیعی فنڈ سہولت کے 1 ارب ڈالر اور آر ایس ایف کے تحت 21 کروڑ ڈالر تک رسائی حاصل ہوگی یعنی پاکستان کو مجموعی طور پر 1 اعشاریہ 2 ارب ڈالر ملیں گے، پاکستان کو رقم آئی ایم ایف ایگزیکٹو بورڈ کی منظوری کے بعد جاری ہوگی اور نئی قسط ملنے سے پاکستان کو ملنے والی رقم 4.5 ارب ڈالر ہو جائے گی،عالمی مالیاتی فنڈ کا کہنا ہے کہ پاکستانی معیشت میں بہتری، منہگائی اور کرنٹ اکاؤنٹ کنٹرول میں ہے تاہم مشرق وسطیٰ کشیدگی سے معیشت کو خطرات لاحق ہیں۔

اعلامیے کے مطابق حکومت پاکستان مالی خسارہ کم کرنے کا عزم رکھتی ہے اور اس حوالے سے ٹیکس نظام بہتر بنانے کیلئے اصلاحات جاری ہیں، غریب عوام کیلئے بینظیر انکم سپورٹ پروگرام میں توسیع کی گئی، منہگائی کے اثرات کم کرنے کیلئے امداد بڑھانے کا فیصلہ کیا گیا، اسٹیٹ بینک منہگائی کنٹرول کیلئے سخت پالیسی جاری رکھے گا، ضرورت پڑنے پر شرح سود مزید بڑھائی جا سکتی ہے،زرمبادلہ ذخائر میں اضافہ، معاشی استحکام بہتر ہوا ہے، تاہم توانائی قیمتوں میں اتار چڑھاؤ منہگائی بڑھا سکتا ہے۔

آئی ایم ایف نے پاکستان پر ٹیکس نیٹ بڑھانے اور اخراجات کنٹرول کرنے پر زور دیتے ہوئے کہا کہ ایف بی آر اصلاحات پر عملدرآمد شروع ہونے سے مثبت نتائج سامنے آنے لگے ہیں، پاکستان ڈیجیٹل انوائسنگ اور ٹیکس آڈٹ نظام مضبوط بنانے کی کوشش کر رہا ہے، ٹیکس پالیسی آفس درمیانی مدت کی اصلاحاتی حکمت عملی تیار کر رہا ہے، وفاق اور صوبوں کے درمیان مالی بوجھ کی بہتر تقسیم پر کام جاری ہے، وفاق اور صوبوں کے درمیان مالی بوجھ کی منصفانہ تقسیم پر کام جاری ہے،مالی سال 2026 میں 1.6 فیصد پرائمری سرپلس کا ہدف ہے، پاکستان کا مالی سال 2027 میں سرپلس 2 فیصد تک بڑھانے کا منصوبہ ہے،پاکستان نے صحت، تعلیم اور سماجی تحفظ پر اخراجات بڑھانے کا فیصلہ کیا ہے، غربت میں کمی اور سماجی تحفظ حکومت کی ترجیحات میں شامل ہے جبکہ منہگائی سے متاثرہ طبقے کو ہدفی امداد دینے کی کوششیں جاری ہیں، پاکستان نے بینکاری نظام کو بیرونی ادائیگیوں کے لیے مستحکم رکھنے کی یقین دہانی کرائی ہے جبکہ پاکستان نے توانائی شعبے میں اصلاحات، گردشی قرضے روکنے کا عزم کیا ہے،پاکستان کی سرکاری اداروں کی اصلاحات اور نجکاری اہم ترجیح ہے، حکومت پاکستان نے مارکیٹ میں حکومتی مداخلت کم کرنے کا عندیہ بھی دیا ہے، پاکستان بدعنوانی کے خلاف اقدامات اور سرمایہ کاری کے فروغ کی کوششیں کر رہا ہے،موسمیاتی تبدیلی سے نمٹنے کے لیے حکومتی اقدامات تیز کیے جائیں گے جبکہ آئی ایم ایف کی جانب سے گرین ٹرانسپورٹ اور کاربن اخراج میں کمی پر بھی زور دیا جا رہا ہے، پانی کے نظام کی بہتری اور آفات سے نمٹنے کے لیے مالی نظام کی تیاری جاری ہے، پاکستان میں موسمیاتی اہداف کے مطابق توانائی اصلاحات جاری ہیں۔

قابلِ اعتماد سکیورٹی ذرائع کے مطابق کالعدم تنظیم تحریک طالبان پاکستان (ٹی ٹی پی) کے سربراہ نور ولی محسود کو افغان طالبان کی جانب سے کابل کے حساس علاقے گرین زون (ڈپلومیٹک انکلیو) میں ایک کثیر المنزلہ عمارت میں پناہ دیے جانے کا انکشاف ہوا ہے۔

ذرائع کا کہنا ہے کہ مذکورہ عمارت میں دیگر افراد بھی موجود ہیں جنہیں مبینہ طور پر انسانی ڈھال کے طور پر استعمال کیا جا رہا ہے تاکہ نور ولی محسود کو کسی بھی ممکنہ کارروائی سے محفوظ رکھا جا سکے۔سکیورٹی حکام کے مطابق کابل کا گرین زون انتہائی محفوظ علاقہ تصور کیا جاتا ہے جہاں سفارتی مشنز اور اہم سرکاری تنصیبات واقع ہیں، پاکستان کی جانب سے خطے میں امن و استحکام کے لیے مسلسل کوششیں جاری ہیں۔ پاکستان ایک طرف مذاکرات کے ذریعے مسائل کا حل تلاش کر رہا ہے تو دوسری جانب دہشت گرد عناصر کے خلاف فیصلہ کن کارروائیاں بھی کی جا رہی ہیں۔ سکیورٹی ذرائع کا کہنا ہے کہ پاکستان پائیدار امن کے قیام کے لیے ہر ممکن حد تک جانے کے لیے تیار ہے اور اس حوالے سے اپنے اہداف پر مکمل توجہ مرکوز رکھے ہوئے ہے۔

افغان طالبان حکومت کی جانب سے نور ولی محسود کو پاکستان کے حوالے کرنے کے بجائے اسے سفارتی ڈھال فراہم کرنا ایک خطرناک پیش رفت ہے، جو نہ صرف دوطرفہ تعلقات کو متاثر کر سکتی ہے بلکہ پورے خطے کے امن کے لیے بھی سنگین خطرات پیدا کر سکتی ہے۔ماہرین کا کہنا ہے کہ اگر اس صورتحال کو بروقت حل نہ کیا گیا تو اس کے اثرات خطے میں سکیورٹی کی مجموعی صورتحال پر مرتب ہو سکتے ہیں، جس کے باعث کشیدگی میں مزید اضافہ ہونے کا خدشہ ہے۔

بہترین اور مؤثر سفارتکاری ، پاکستان عالمی امن کا ضامن بن کر ابھر رہا ہے

پاکستان نے دنیا میں امن اور استحکام کیلئے کامیاب سیاسی اور ملٹری ڈپلومیسی کا لوہا منوایا ،امریکی نمائندہ خصوصی برائے مشرق وسطیٰ اسٹیو وٹکوف نے بطور ثالث پاکستان کے اہم کردار پر مہر ثبت کر دی ،امریکی کابینہ میں پاکستان کی کامیاب سفارتکاری کا اعتراف کرتے ہوئے اسٹیووٹکوف نے کہا کہ؛ امن معاہدے کے فریم ورک کیلئے 15نکالتی ایکشن لسٹ پاکستان کے ذریعے ایران تک پہنچائی گئی ہے،پاکستان ایران اور امریکا میں بطور ایک ثالث کے اہم کردار ادا کر رہاہے ،پاکستان کے ذریعے ایران کیساتھ مضبوط اور مثبت پیغامات اور مذاکرات سامنے آئے ہیں

عالمی ماہرین کے مطابق ؛پاکستان اپنی مدبرانہ پالیسیوں اور بہترین حکمت عملی کے باعث پوری دنیا کو متاثر کرنے والی جنگ کو رکوا رہاہے ،امریکا ایران جنگ میں پاکستان کی جانب سے ثالثی کا کردار پاکستان کی اہمیت اور عالمی سطح پر بھر پور اعتماد کا عکاس ہے ، پاکستان متوازن تعلقات اور کامیاب سیاسی و ملٹری ڈپلومیسی کے باعث اپنی عالمی ساکھ کو مزید مستحکم کر رہاہے ،

طالبان کی جانب سے داعش خراسان کے خلاف کارروائیوں کے دعوے یَکہ خاجی، فاریاب، افغانستان کے واقعات سے بے نقاب ہو گئے ہیں۔

شفیق اللہ المعروف قاری حکمت کی قیادت میں ایک فعال داعش مرکز جی ڈی آئی (GDI) کی سرپرستی میں کام کر رہا ہے، جہاں ہر وقت 20 سے 30 جنگجو موجود رہتے ہیں۔ عید کے اجتماع کے دوران داعش خراسان کے سینئر رہنما، سیف البحر المعروف شیخ مقبول اور ابو بکر العراقی المعروف ابو سعد العراقی بھی وہاں موجود تھے۔فاریاب میں داعش کے اس اڈے نے منظم گٹھ جوڑ کو بے نقاب کر دیا ہے۔

قاری حکمت کے زیرِ انتظام کیمپ کنڑ، نورستان اور ننگرہار سے منتقل کیے گئے دہشت گردوں کی افغانستان کے اندرونی علاقوں تک نقل و حرکت میں سہولت فراہم کر رہا ہے۔اس نیٹ ورک سے منسلک ناموں میں معاویہ ابو سعد ازبکی، شاہ زور خیری، اور حاجی جان سید المعروف مومن شامل ہیں۔ رپورٹس کے مطابق ٹی ٹی پی کی نقل و حرکت بھی اسی نیٹ ورک کے ذریعے ہو رہی ہے۔ طالبان داعش کا خاتمہ نہیں کر رہے بلکہ اسے منظم اور پناہ فراہم کر رہے ہیں۔

فاریاب میں عید کے اجتماع میں اعلیٰ درجے کے دہشت گرد، عمر الخراسانی، لقمان الخراسانی، محمد ابو حمزہ ترکستانی، اور ابو یاسر بھی شریک تھے۔یہ کیمپ مستقل طور پر 20 سے 30 جنگجوؤں کی میزبانی کرتا ہے اور طالبان کی سرپرستی میں ایک لاجسٹک اور رابطہ مرکز کے طور پر کام کر رہا ہے۔ جب داعش کے کمانڈر جی ڈی آئی کی نگرانی میں کھلے عام سرگرم ہوں تو طالبان کا بیانیہ خود بخود بے اثر ہو جاتا ہے۔حقیقت واضح ہے؛ افغانستان کو علاقائی اور عالمی دہشت گردی کے لیے محفوظ پناہ گاہ میں تبدیل کیا جا رہا ہے۔

امریکی صدر ڈونلڈ ٹرمپ نے اپنی گفتگو میں ایک بار پھر پاکستان کے وزیراعظم شہباز شریف کا ذکر کر ڈالا۔

ٹرمپ نے کہا کہ پاکستانی وزیراعظم بہت اچھے آدمی ہیں، پاکستانی وزیراعظم نے یہ بھی کہا تھا کہ اگر ٹرمپ جنگ نہ رکواتے تو لاکھوں افراد مارے جاتے۔اس کے علاوہ امریکا کے صدر ڈونلڈ ٹرمپ کے خصوصی مندوب اسٹیو وٹکوف نے بطورثالث پاکستان کے کردارکو سراہا۔خصوصی مندوب نے کہا پاکستان کی وجہ سے عمدہ اور مثبت پیغامات کا تبادلہ ہوا ہے، ایران کے قائل ہونے کے مضبوط اشارے مل رہے ہیں ۔

دوسری جانب امریکا کے صدر ڈونلڈ ٹرمپ نے ایران کی توانائی تنصیبات پر حملے مزید 10 روز تک روکنے کا اعلان کردیا۔ سماجی رابطے کی ویب سائٹ پر صدر ٹرمپ نے جاری بیان میں کہا کہ 6 اپریل 2026 تک وہ ایران کی توانائی تنصیبات پر حملے روک رہے ہیں، وہ یہ اقدام ایران حکومت کی درخواست پر کر رہے ہیں۔

اس سے پہلے صدر ٹرمپ نے ان تنصیبات پر حملے 5 روز کیلئے روکنے کا اعلان کیا تھا جس کی مدت آج یعنی جمعہ کو ختم ہونا تھی۔ صدر ٹرمپ نے کہا کہ ایران سے بات چیت جاری ہے اور فیک نیوز میڈیا کی جانب سے جاری خبروں کے برعکس یہ بات چیت عمدگی سے جاری ہے۔

حکومتِ پاکستان نے ریاستی پالیسی کے تحت غیر قانونی مقیم افغان مہاجرین کی باعزت، محفوظ اور مرحلہ وار وطن واپسی کے لیے طورخم بارڈر کو عارضی طور پر کھول دیا ہے ۔

اعلامیے کے مطابق واپسی کا عمل 26 مارچ 2026 کو شروع ہوا، جس کے لیے تمام متعلقہ اداروں بشمول ایف آئی اے، نادرا، کسٹمز اور نیشنل لاجسٹکس کارپوریشن کو مکمل ہم آہنگی اور تیاری یقینی بنانے کی ہدایات جاری کی گئی ہیں۔سکیورٹی صورتحال کو مدنظر رکھتے ہوئے طورخم، لنڈی کوتل اور گرد و نواح میں سخت حفاظتی انتظامات نافذ کیے گئے ہیں تاکہ واپسی کے عمل کو ہر قسم کے سیکیورٹی خطرات سے محفوظ بنایا جا سکے۔

حکام کے مطابق صرف رجسٹرڈ مقامات، خصوصاً حمزہ بابا کیمپ کے ذریعے مہاجرین کی منظم انداز میں منتقلی کو یقینی بنایا جائے گا، جبکہ ابتدائی مرحلے میں نقل و حرکت کو کنٹرولڈ رکھا جائے گا تاکہ کسی بھی قسم کی بدانتظامی سے بچا جا سکے۔حکومت نے واضح کیا ہے کہ یہ اقدام قومی سلامتی، سرحدی نظم و ضبط اور امیگریشن قوانین کے مؤثر نفاذ کو یقینی بنانے کے ساتھ ساتھ افغان مہاجرین کی باعزت واپسی کے عزم کی عکاسی کرتا ہے، جس میں سکیورٹی فورسز اور سول ادارے مکمل یکجہتی کے ساتھ کردار ادا کر رہے ہیں۔

خطے میں بڑھتی ہوئی کشیدگی اور قومی سلامتی کے اہم امور پر وزیراعظم شہباز شریف اور چیئرمین پاکستان پیپلزپارٹی بلاول بھٹو زرداری کے درمیان ایک اہم ملاقات ہوئی، جس میں موجودہ علاقائی صورتحال اور پاکستان کے سفارتی کردار پر تفصیلی غور کیا گیا۔

ذرائع کے مطابق ملاقات میں ایران اور امریکا کے درمیان جاری کشیدگی کے تناظر میں پاکستان کی سفارتی حکمت عملی زیر بحث آئی۔ وزیراعظم نے بلاول بھٹو زرداری کو ایران،امریکا تنازع میں پاکستان کے کردار اور اب تک ہونے والی پیش رفت سے آگاہ کیا۔ملاقات میں وزیراعلیٰ سندھ مراد علی شاہ اور وزیراعلیٰ بلوچستان سرفراز بگٹی بھی شریک تھے۔ دونوں وزرائے اعلیٰ نے اپنے اپنے صوبوں میں اسمارٹ لاک ڈاؤن کے نفاذ اور اس سے متعلق حکمت عملی پر وزیراعظم کو بریفنگ دی۔ذرائع کا کہنا ہے کہ اجلاس میں ملک کی مجموعی سیاسی صورتحال پر بھی تبادلہ خیال کیا گیا، جبکہ وزیراعظم کے ہمراہ وفاقی وزراء بھی موجود تھے۔ ملاقات کو ملکی استحکام اور خطے کی بدلتی صورتحال کے تناظر میں نہایت اہم قرار دیا جا رہا ہے۔