Category: اہم خبریں

امریکی صدر ڈونلڈ ٹرمپ نے اعلان کیا ہے کہ امریکہ نے ایران کے بجلی گھروں اور توانائی کے بنیادی ڈھانچے کے خلاف ممکنہ فوجی کارروائی کو عارضی طور پر مؤخر کر دیا ہے،

سابق امریکی صدر ڈونلڈ ٹرمپ نے اپنے بیان میں کہا کہ امریکہ اور ایران کے درمیان گزشتہ دو دنوں کے دوران "بہت مثبت اور تعمیری” مذاکرات ہوئے ہیں۔ ان مذاکرات کی نوعیت کو مدنظر رکھتے ہوئے انہوں نے امریکی فوج کو ہدایت دی ہے کہ ایران کے بجلی گھروں اور توانائی کے بنیادی ڈھانچے پر کسی بھی قسم کے فوجی حملے کو پانچ دن کے لیے مؤخر کر دیا جائے۔ یہ فیصلہ جاری مذاکرات کی کامیابی سے مشروط ہوگا۔ آئندہ دنوں میں بات چیت کا سلسلہ جاری رہے گا ۔

پاکستان میں ہائی آکٹین ایندھن کی قیمت میں 200 روپے فی لیٹر تک اضافے کے بعد سوشل میڈیا پر شدید بحث چھڑ گئی، سینئر صحافی و اینکر پرسن مبشر لقمان نے سماجی رابطے کی ویب سائٹ ایکس پر حکومت کو کھری کھری سنائیں، جس پر وفاقی وزیر اطلاعات عطاتارڑ بھی ایکس پر ہی جواب دینے آ گئے.

سینئر صحافی مبشر لقمان نے سوشل میڈیا پلیٹ فارم ایکس ایکس پر ا یک پوسٹ میں کہا کہ حکومت یہ تاثر دے رہی ہے کہ امیروں پر ٹیکس لگایا جا رہا ہے، لیکن حقیقت اس کے برعکس ہے۔ انہوں نے سوال اٹھایا کہ ملک میں کتنی لگژری سرکاری گاڑیاں استعمال ہو رہی ہیں اور ان پر کتنا مفت ایندھن خرچ کیا جا رہا ہے۔ عوام پہلے اپنی محنت کی کمائی سے حکومتی شخصیات کے لیے مہنگی گاڑیاں خریدتے ہیں اور پھر انہی گاڑیوں کے ایندھن اور دیگر اخراجات بھی برداشت کرتے ہیں۔ اگر حکومت واقعی سنجیدہ ہے تو ملک بھر میں مفت ایندھن کی سہولت ختم کی جائے، ورنہ عوام کو قربانی کا درس نہ دیا جائے۔مفت ایندھن سرکاری سطح پر ختم کریں گے تو تب ہی ہم یقین کریں گے کہ آپ کچھ اچھا کر رہے ہیں۔ بصورت دیگر پیچھے بیٹھیں اور خاموش رہیں۔ اندازہ لگائیں کہ پاکستان میں کتنی سرکاری کاریں استعمال ہو رہی ہیں اور انہیں مفت ایندھن کی مقدار دی جا رہی ہے؟ پھر ہمیں کہو کہ قربانی دو

دوسری جانب وزیر اطلاعات عطاء اللہ تارڑ نے ایکس پر مبشر لقمان کی پوسٹ پر ردعمل دیتے ہوئے کہا کہ حکومت نے سب سے پہلے اپنے اخراجات کم کیے، 60 فیصد سرکاری گاڑیاں بند کیں اور ایندھن کے استعمال میں نمایاں کمی لائی۔ انہوں نے کہا کہ عوام کو جو ریلیف دیا گیا وہ انہی بچتوں اور کفایت شعاری کے اقدامات کا نتیجہ ہے۔ ہائی آکٹین پر لیوی بڑھانے پر اعتراض نہیں ہونا چاہیے کیونکہ اس کا عام شہری پر کوئی اثر نہیں پڑتا، بلکہ اس سے حاصل ہونے والی رقم عوام کو مزید ریلیف دینے کے لیے استعمال کی جائے گی۔ لگژری گاڑیوں کے مالکان مشکل حالات میں اضافی بوجھ برداشت کرنے کی صلاحیت رکھتے ہیں۔

اسلام آباد: وزیراعظم شہباز شریف نے عید کے موقع پر مسلح افواج کے سربراہان سے ٹیلیفونک رابطہ کرکے انہیں مبارکباد پیش کی۔

وزیراعظم نے چیف آف آرمی سٹاف، فیلڈ مارشل سید عاصم منیر سے گفتگو کی، جبکہ ظہیر احمد بابر اور نوید اشرف سے بھی ٹیلیفونک رابطہ کیا۔گفتگو کے دوران وزیراعظم نے سروسز چیفس کو عید کی دلی مبارکباد دی اور ملکی سلامتی کے لیے ان کی خدمات کو سراہا۔وزیراعظم شہباز شریف نے سرحدوں کی حفاظت پر مامور افسران اور جوانوں کو خراج تحسین پیش کرتے ہوئے کہا کہ قوم کو اپنی بہادر افواج پر فخر ہے جو ہر وقت ملک کے دفاع کے لیے تیار رہتی ہیں۔

وفاقی وزیر اطلاعات عطا تارڑ نے کہا کہ آنے والے دنوں میں عالمی منڈی میں تیل کی قیمتیں مزید اوپرجاسکتی ہیں، ہم سب کو مل کر بچت کے حوالے سے آئندہ کا لائحہ عمل بنانا ہوگا۔

وفاقی وزیراطلاعات عطا تارڑ اور وفاقی وزیر پٹرولیم علی پرویز ملک نے مشترکہ پریس کانفرنس کی، علی پرویز ملک کا کہنا تھاکہ خطے میں اس وقت کشیدگی کا سامنا ہے، وزیراعظم نے اپنی پوری ٹیم کو اکٹھا کرکے کفایت شعاری کی، وزیراعظم کی ٹیم کی مراعات میں کٹوتیاں کی گئیں، کفایت شعاری کے باعث اس ہفتے پیٹرول اور ڈیزل کی قیمتوں کے آگے بند باندھاگیا، وزیراعظم نے عید کی خوشیوں کومد نظر رکھتے ہوئے پیٹرول اور ڈیزل کی قیمتوں کو برقرار رکھا، حکومت اور عوام دونوں کو توانائی کی بچت میں بھرپور کردار ادا کرنا ہو گا،عوام کو بھی مکمل ذمہ داری کے ساتھ اپنا کردار ادا کرنا ہو گا، صوبائی حکومتوں کے ساتھ مشاورت سے مضبوط نظام قائم کریں گے، حکومت کمزور طبقے کا مضبوط سہارا بننا چاہتی ہے، ہم سب کو مل کر ملک کو اس بحران سے نکالنا ہے۔

وفاقی وزیر اطلاعات عطا تارڑ کا کہنا تھاکہ عالمی منڈی کے حساب سے پیٹرولیم مصنوعات کی قیمتوں کا تعین کیاجاتا ہے، ہمیں ہرحال میں تیل کی بچت کو ممکن بنانا ہے،اس ہفتے جب عالمی منڈی میں تیل کی قیمتیں بڑھ گئیں، وزیراعظم کو تجویز دی گئی کہ پٹرول 77 روپے اور ڈیزل 176 روپے بڑھائے جائیں، مگر وفاقی حکومت نے 69 ارب روپے کی سبسڈی فراہم کی تاکہ عوام پر مزید بوجھ نہ پڑے، اس ہفتے پیٹرول کی قیمت میں 150 اور ڈیزل کی قیمت میں 250روپے اضافہ روکاگیا، آنے والےدنوں میں عالمی منڈی میں تیل کی قیمتیں مزید اوپرجاسکتی ہیں، ہم سب کو مل کر بچت کے حوالے سے آئندہ کا لائحہ عمل بنانا ہوگا،وزیر اعظم صاحب نے وقت سے پہلے کمیٹی تشکیل دی اور روزانہ جائزہ اجلاس کرتے رہے، جس کے نتیجے میں پاکستان میں تیل کے ذخائر مناسب مقدار میں موجود رہے۔پاکستان میں دستیاب تیل کی قیمت عالمی منڈی کے مطابق طے کی جاتی ہے۔ بھرپور کوشش کی گئی کہ پہلے 55 روپے کے اضافے کے بعد عوام پر مزید بوجھ نہ پڑے۔

آرمی چیف،فیلڈ مارشل سید عاصم منیر نے عیدالفطر کے موقع پر کرم کا دورہ کیا اور جوانوں و افسران کے ساتھ عید منائی۔ انہوں نے نمازِ عید ادا کی اور پاکستان کے استحکام و خوشحالی کے لیے دعا کی۔

فیلڈ مارشل نے جوانوں کے بلند حوصلے، غیر متزلزل عزم اور پیشہ ورانہ مہارت کو سراہتے ہوئے انہیں عید کی مبارکباد دی۔ آپریشن "غضبُ الحق” میں دہشتگرد نیٹ ورکس کے خاتمے اور سرحدی علاقوں میں امن کے قیام کے لیے ان کی کارکردگی کو خراجِ تحسین پیش کیا۔انہوں نے واضح کیا کہ افغانستان میں موجود محفوظ پناہ گاہوں سے سرگرم دہشتگردوں کو پاکستان کی سلامتی نقصان پہنچانے کی اجازت نہیں دی جائے گی، اور اس بات پر زور دیا کہ افغان سرزمین پاکستان کے خلاف استعمال نہیں ہونی چاہیے۔فیلڈ مارشل نے کامیابیوں کو شہداء کی عظیم قربانیوں اور افسران و جوانوں کے عزم کا نتیجہ قرار دیا، اور مسلح افواج کے پاکستان کی خودمختاری و سالمیت کے دفاع کے غیر متزلزل عزم کا اعادہ کیا۔قبل ازیں آمد پر کور کمانڈر پشاور نے ان کا استقبال کیا۔

اڈیالہ جیل میں عید الفطر کی نماز، بانی پی ٹی آئی عمران خان نماز میں شریک نہ ہو ئے

ملک بھر کی طرح عید الفطر کے موقع پر اڈیالہ جیل میں بھی نماز عید ادا کی گئی، تاہم سکیورٹی وجوہات کے باعث بانی پی ٹی آئی نماز میں شرکت نہ کر سکے۔جیل ذرائع کے مطابق عام قیدیوں نے نماز عید جیل کی جامع مسجد اور امام بارگاہ میں باجماعت ادا کی۔ دوسری جانب بانی پی ٹی آئی عمران خان نے نماز عید کے دوران اپنے سیل میں ہی قیام کیا اور نماز میں شریک نہیں ہو سکے۔ذرائع کا کہنا ہے کہ بانی پی ٹی آئی کی آج اپنے بچوں سے ٹیلی فون پر بات کرائے جانے کا امکان ہے، جبکہ ان کی اہلیہ بشریٰ بی بی کی بھی ملاقات متوقع ہے۔

واضح رہے کہ ملک بھر میں آج عید الفطر مذہبی عقیدت و احترام کے ساتھ منائی جا رہی ہے، جہاں مساجد اور عیدگاہوں میں خصوصی اجتماعات کا انعقاد کیا گیا،

ملک بھر میں آج عید الفطر مذہبی عقیدت و احترام کے ساتھ منائی جارہی ہے۔

ملک کے چھوٹے بڑے شہروں میں نماز عید کے ہزاروں چھوٹے بڑے اجتماعات منعقد ہوئے ہیں جس میں امت مسلمہ اور ملک کی سلامتی، ترقی اور خوشحا لی کیلئے دعائیں مانگی گئیں،نماز عید کی ادائیگی کے بعد لوگوں نے ایک دوسرے کو گل مل کر عید کی مبارکباد دی،وفاقی دارالحکومت اسلام آباد میں عید الفطر کی مرکزی نماز فیصل مسجد میں ادا کی گئی جس میں ہزاروں کی تعداد میں افراد نے شرکت کی جبکہ لاہور کی بادشاہی مسجد میں اور کراچی کی مختلف مساجد میں عید کے بڑے اجتماعات منعقد ہوئے۔

صدر مملکت آصف علی زرداری نے نمازعید زرداری ہاؤس نوابشاہ میں ادا کی، صدر زرداری نے ملک کی سلامتی اور استحکام کے لیے دعائیں کیں۔وزیراعظم شہباز شریف نے لاہور میں نماز عید ادا کی، چیئرمین پیپلز پارٹی بلاول بھٹو زرداری نے لاڑکانہ میں نماز عید ادا کی، نمازعید کی ادائیگی کے بعد بلاول بھٹو زرداری شہریوں سے گھل مل گئے، عید ملے اور مصافحہ بھی کیا،گورنر سندھ نہال ہاشمی نے عید کی نماز گورنر ہاؤس میں ادا کی جبکہ سابق وزیر داخلہ شیخ رشید نے راولپنڈی میں نماز عید پڑھی۔ مولانا فضل الرحمان نے ڈی آئی خان کے علاقے عید الخیل میں عید الفطر کی نماز پڑھائی۔

صدر مملکت آصف علی زرداری اور وزیراعظم شہبازشریف نے قوم کو عیدالفطر کی مبارک باد دی ہے،صدر زرداری نے اپنے بیان میں کہاکہ آج کے دن ہمیں قومی یکجہتی،آئینی بالادستی اورقانون کی پاسداری کے عزم کی تجدید بھی کرنی چاہیے ۔وزیراعظم شہبازشریف نے کہاکہ عید پر بھی ہمارے دل غزہ اورمشرقِ وسطیٰ کیلئے غمگین ہیں۔ان کی تکلیف اس بات کی یاد دہانی ہے کہ امتِ مسلمہ میں مزید اتحاد کی اشد ضرورت ہے ۔

پاک فوج کی جانب سے بھی قوم کو عیدالفطر کی مبارکباد دی گئی،آئی ایس پی آر کے مطابق مسلح افواج کے سربراہان نے پاکستانیوں کے لیے نیک خواہشات کا اظہار کیا،آئی ایس پی آر کی جانب سے جاری بیان میں کہا گیا ہے کہ دعا ہے عید پاکستان اور امتِ مسلمہ کے لیے امن و خوشحالی لائے۔ عید ہمیں اتحاد، ہمدردی اور شکرگزاری کا درس دیتی ہے۔پاک فوج کے جوان عید کے دن بھی وطن کے دفاع میں مصروف ہیں۔

کراچی میں ریلوے ٹریک پر دہشت گردی کامنصوبہ ناکام، نیٹ ورک پکڑا گیا۔ 5 گرفتار دہشتگرد تخریب کاری کی منصوبہ بندی کررہے تھے، اسلحہ و گولہ بارود برآمد، دہشتگردوں کے تمام نیٹ ورکس ہمسایہ ملک سے آپریٹ ہورہے ہیں، کالعدم بی ایل اے اور بی ایل ایف کوبھارتی خفیہ ایجنسی ’’را‘‘مالی معاونت فراہم کررہی ہے۔

سی ٹی ڈی کا انسداد دہشت گردی کے حوالے سے بہترین اقدام،ریلوے ٹریک بلاسٹ میں ملوث 05 دہشت گرد گرفتار کر لئے گئے،وزیر داخلہ سندھ ضیاء الحسن لنجار نے دہشت گردوں کی گرفتاری پر ڈی آئی جی سی ٹی ڈی، وفاقی حساس اداروں اور انکی ٹیمز کو شاباش دی ہے اور کہا کہ آپ تمام نے دہشت گردوں کے خلاف انتہائی بہترین اور لائق ستائش کام کیا ہے۔دہشت گردوں کا کوئی مذہب نہیں ہوتا یہ صرف اور صرف انسانیت کے دشمن ہیں۔ملک اور سماج دشمن عناصر کی بیخ کنی اور خاتمہ عوام دوست پولیسنگ کا مرہون منت ہے۔گرفتار دہشت گردوں سے تفتیش کا ٹاسک ماہر اور پیشہ ور پولیس افسر کو دیا جائے۔ مؤثر تفتیش اور ٹھوس چالان سے دہشت گردوں کو مثالی سزاؤں کی سنوائی یقینی ہے۔

سی ٹی ڈی کراچی، سویلین اور وفاقی حساس ادارے کی بڑی کارروائی،کراچی میں ریلوے ٹریک پر دھماکے کا منصوبہ ناکام بنادیا،کالعدم تنظیم بلوچ ریپبلکن گارڈ کے 5 دہشتگرد گرفتار کر لئے گئے،دہشتگردوں کے قبضے سے بارودی مواد، آئی ای ڈی اور اسلحہ ایمونیشن برآمدکر لیا گیا،گرفتار دہشتگردوں میں کمانڈر جھنور، علی جان، نور محمد، جامک اور نیاز شامل ہیں،

پاکستان میں ریلوے ٹریکس پر ہونے والے دہشتگردی واقعات پڑوسی ملک ملوث ہونے کا انکشاف سامنے آیا ہے،پڑوسی ملک کا دہشتگردوں کے ساتھ ایک اور گٹھ جوڑ بے نقاب ہوگیا،چند ماہ کے دوران شکار پور اورجیکب آباد میں کم شدت کے 6 دھماکے کئے گئے،دھماکوں کے نتیجے میں ریلوے ٹریک اور ٹرین کی بوگیوں کو جزوی نقصان پہنچا،تمام حملوں کی ذمہ داری کالعدم تنظیم بلوچ ریپبلکن گارڈنے اپنے سوشل میڈیا پر قبول کی،سی ٹی ڈی سندھ نے سویلین اور وفاقی حساس ادارے کی نشاندہی اور تیکنیکی بنیادوں پر تمام پہلووں کا جائزہ لیا،تیکنیکی بنیادوں پردہشتگردوں کے نیٹ ورک کو انتہائی مہارت سے شناخت کیا،گرفتار ملزمان نے دوران تفتیش کئی کارروائیوں کا انکشاف کیا،اعتراف کیا کہ 18جون 2025 کو جیکب آباد ریلوے ٹریک پردھماکا کیا،28 جولائی کو ریلوے ٹریک پی ایس ہمایوں ضلع شکار پور میں دھماکا کیا،7 اکتوبر جعفر ایکسپریس مسافر ٹرین پر شکار پور میں دھماکا کیا،16دسمبر 2025پی ایس ہمایوں ضلع شکار پور میں دھماکا کیا،26 جنوری 2026 کو پی ایس ہمایوں ضلع شکار پور میں دھماکا کیا،دہشتگردوں نے لہڑی بلوچستان سے ٹریننگ حاصل کی ہے،اسلحہ ایمونیشن چلانا آئی ای ڈی نصب کرنا ٹریننگ میں شامل تھا،دہشتگردوں کو بارودی مواد لہڑی بلوچستان سے دیا جاتا تھا،قانون نافذ کرنے والے اداروں سے بچنے کیلئے فیملی کے ہمراہ اس کی ترسیل کرتے تھے،ملزمان کے سہولت کاروں،ساتھیوں اور سرپرستوں کی گرفتاری کیلئے ٹیمیں تشکیل دے دی گئیں، وفاقی حساس اداروں کے ساتھ مل کر ٹیمیں تشکیل دی گئی۔گرفتار ملزمان سے مزید تفتیش جاری ہے مزید انکشافات کی توقع ہے

وزیراعظم شہباز شریف اور ملائیشیا کے وزیراعظم انور ابراہیم کے درمیان ٹیلیفونک رابطہ ہوا ہے

پاکستان اور ملائیشیا نے ایران اور خلیجی خطے میں جاری کشیدگی پر گہری تشویش کا اظہار کیا،خطے میں تناؤ کم کرنے کی ضرورت پر زور، امن کے فروغ کے لیے مل کر کام کرنے پر اتفاق کیا گیا،عالمی امن کے لیے پاکستان اور ملائیشیا کا مشترکہ کوششیں جاری رکھنے کا عزم کیا،دونوں رہنماؤں کے درمیان عیدالفطر کے موقع پر مبارکباد اور نیک خواہشات کا تبادلہ کیا گیا،شہباز شریف اور انور ابراہیم نے امتِ مسلمہ کے لیے امن، سلامتی اور ہم آہنگی کی دعا کی،