Category: اہم خبریں

انسدادِ دہشت گردی عدالت اسلام آباد کا بڑا فیصلہ سامنے آ گیا

9مئی ریاستی اداروں کیخلاف ڈیجیٹل دہشت گردی کرنے کے کیس کا فیصلہ سنا دیا گیا،عدالت نے عادل راجہ، سابق اینکرپرسن صابر شاکر ، وجاہت ایس خان ، ڈاکٹر معید پیرزادہ ، حیدرمہدی سمیت دیگر ملزمان کو 2, 2 بار عمر قید اور 15 لاکھ جرمانہ کی سزا سنادی،عدالت کے جج طاہر عباس سپرا نے فیصلہ سناتے ہوئے عادل راجہ، حیدر مہدی اور وجاہت سعید کو 2،2 بار عمر قید کی سزا دی جبکہ صابر شاکر اور معید پیرزادہ کو بھی 2،2 بار عمر قید کی سزا سنائی گئی۔ دیگر دفعات کے تحت ملزمان کو مجموعی طور پر 35 سال قید اور 15 لاکھ روپے جرمانہ بھی عائد کیا گیا۔تھانہ آبپارہ کے مقدمے میں صابر شاکر، معید پیرزادہ اور سید اکبر حسین کو عمر قید کی سزا سنائی گئی، جبکہ تھانہ رمنا کے مقدمے میں شاہین صبہائی، حیدر مہدی اور وجاہت سعید کو سزا دی گئی۔

پراسکیوشن کی جانب سے مجموعی طور پر 24 گواہان عدالت میں پیش کیے گئے۔ ملزمان کی غیر موجودگی میں ٹرائل مکمل کیا گیا، جیسا کہ انسداددہشت گردی قوانین کے تحت ممکن ہے۔ عدالت نے گلفام اشرف گورائیہ ایڈوکیٹ کو ملزمان کا وکیل مقرر کیا تھا، جبکہ راجہ نوید حسین کیانی پراسیکوشن کی نمائندگی کرتے رہے۔فیصلہ محفوظ کرنے کے بعد عدالت نے ٹرائل کا اختتام کیا، جس کے ذریعے انسداددہشت گردی کے قوانین کے تحت سخت کارروائی کی گئی

وفاقی کابینہ نے اسلام آباد میں شیڈول بلدیاتی انتخابات پھر ملتوی کرنے کی منظوری دیدی۔

وزیراعظم شہباز شریف کی زیرِ صدارت وفاقی کابینہ کا مختصر اجلاس اختتام پذیر ہو گیا،وفاقی کابینہ نے کابینہ کمیٹی برائے قانون سازی کے 3 دسمبر اور 30 دسمبر کے اجلاس کے فیصلوں کی توثیق کر دی۔ذرائع کے مطابق کابینہ اجلاس میں دارالحکومت میں بلدیاتی انتخابات سے متعلق نئی قانون سازی پر تفصیلی غور کیا گیا۔ذرائع کے مطابق چیف کمشنر اسلام آباد کی جانب سے وفاقی کابینہ کو بلدیاتی انتخابات سے متعلق بریفنگ دی گئی،
ذرائع کا کہنا ہے کہ وفاقی کابینہ نے چیف کمشنر اسلام آباد کی بریفنگ کے بعد اسلام آباد میں بلدیاتی انتخابات پھر ملتوی کرنے کی منظوری دیدی،کابینہ نے اسلام آباد میں پنجاب طرز کے بلدیاتی انتخابات کی قانون سازی کی بھی منظوری دی ہے۔

یاد رہے کہ الیکشن کمیشن نے اسلام آباد کے بلدیتی انتخابات کیلئے 15 فروری کی تاریخ مقرر کی تھی جبکہ 16 فروری سے 19 فروری تک نتائج مرتب کیے جانے تھے،

خیبر پختونخوا اور بلوچستان میں سیکورٹی فورسز کی دہشتگردوں کیخلاف کاروائیاں جاری ہیں

بلوچستان کے علاقے سبی میں ایک دھماکے کے نتیجے میں تین افراد جاں بحق ہو گئے۔ دھماکے کی نوعیت اور جاں بحق افراد کی شناخت سے متعلق تفصیلات تاحال سامنے نہیں آ سکیں۔ ایک علیحدہ واقعے میں جھل مگسی میں فائرنگ کے دو واقعات رپورٹ ہوئے، تاہم تاحال کسی جانی نقصان کی تصدیق نہیں ہوئی۔ حکام کے مطابق سکیورٹی فورسز کو دونوں علاقوں میں تعینات کر دیا گیا ہے تاکہ تحقیقات کی جا سکیں، مقامات کو محفوظ بنایا جا سکے اور مزید تشدد کو روکا جا سکے۔

پنجگور میں دہشت گردوں کی فائرنگ کے واقعے میں تین افراد شہید اور ایک زخمی ہو گیا۔ ذرائع کے مطابق دہشت گردوں نے علاقے میں فائرنگ کی جس کے نتیجے میں زاہد، محمد حسین اور جاسم سیف اللہ شہید ہو گئے۔ قدوس ولد ملنگ شدید زخمی ہوا جسے طبی امداد کے لیے قریبی اسپتال منتقل کر دیا گیا۔ حکام کے مطابق ملزمان کی تلاش اور تحقیقات شروع کر دی گئی ہیں جبکہ علاقے میں سکیورٹی مزید سخت کر دی گئی ہے تاکہ مزید واقعات کو روکا جا سکے۔

ریسکیو ذرائع کے مطابق منگل کو سبی میں چیک چوک کے باہر گرلز ہائی اسکول کے قریب ہینڈ گرنیڈ حملے میں ایک شخص جاں بحق جبکہ پانچ افراد زخمی ہو گئے۔ بتایا گیا ہے کہ گرنیڈ ایک اجتماع پر پھینکا گیا جس سے علاقے میں خوف و ہراس پھیل گیا۔ ریسکیو ٹیمیں اور پولیس فوری طور پر موقع پر پہنچیں اور زخمیوں کو قریبی اسپتال منتقل کیا، جہاں ایک زخمی دم توڑ گیا۔ بعض زخمیوں کی حالت تشویشناک بتائی گئی ہے۔ واقعے کے بعد پولیس اور حساس اداروں کے اہلکاروں نے علاقے کو گھیرے میں لے کر سرچ آپریشن شروع کر دیا۔ شواہد اکٹھے کر لیے گئے ہیں اور حملے کی نوعیت اور ذمہ داران کا تعین کرنے کے لیے تحقیقات جاری ہیں۔ تاحال کسی گروہ نے حملے کی ذمہ داری قبول نہیں کی۔ حکام کے مطابق علاقے میں سکیورٹی سخت کر دی گئی ہے اور مزید تحقیقات جاری ہیں۔

ذرائع کے مطابق سکیورٹی فورسز نے ضلع خیبر کے علاقے باڑہ میں کالعدم تحریک طالبان پاکستان (ٹی ٹی پی) کے ایک گروہ کو نشانہ بنایا، جس کے نتیجے میں سات دہشت گرد زخمی ہو گئے۔ ذرائع کے مطابق یہ انٹیلی جنس بیسڈ آپریشن اکاخیل کے علاقے عالم کیلے میں منزہ ٹو پوسٹ کے قریب کیا گیا، جہاں کالعدم ٹی ٹی پی کے کمانڈر صدام عرف ابوذر کی قیادت میں ایک گروہ اور پشاور سے آنے والے ایک اور دہشت گرد گروہ کی موجودگی کی اطلاع ملی تھی۔ فائرنگ کے تبادلے میں ایک سکیورٹی اہلکار شہید جبکہ ایک زخمی ہو گیا، جسے طبی امداد کے لیے قریبی اسپتال منتقل کر دیا گیا۔ ذرائع کے مطابق فائرنگ کا سلسلہ جاری ہے اور مزید فورسز علاقے میں بھیج دی گئی ہیں۔ آپریشن مکمل ہونے کے بعد مزید تفصیلات سامنے آئیں گی۔

پولیس کے مطابق مہمند کے علاقے یکہ غنڈئی میں دہشت گردوں کی جانب سے چھوڑا گیا ایک بارودی مواد پھٹنے سے تین معصوم بچے شدید زخمی ہو گئے۔ واقعہ سپری گاؤں میں یکہ غنڈئی تھانے کی حدود میں پیش آیا، جہاں سیمت اللہ خان کے تین بیٹوں نے دہشت گردوں کے چھوڑے گئے دھماکہ خیز مواد کو کھلونا سمجھ کر اس سے کھیلنا شروع کر دیا، جو زور دار دھماکے سے پھٹ گیا۔ زخمی بچوں کو فوری طور پر پشاور کے اسپتال منتقل کر دیا گیا۔ پولیس کے مطابق واقعے کی تحقیقات شروع کر دی گئی ہیں اور سکیورٹی فورسز کو علاقے میں مزید بارودی مواد کی تلاش کے لیے الرٹ کر دیا گیا ہے۔

پولیس اور مقامی ذرائع کے مطابق چند روز قبل دہشت گردوں کے ہاتھوں اغوا ہونے والے ایک انجینئر کو ضلع کرم میں بحفاظت بازیاب کرا لیا گیا ہے۔ بازیابی تحصیل فتح شیری کے علاقے تتی نصراتی میں مقامی خٹک یونین کے عمائدین کی کوششوں سے ممکن ہوئی۔ ذرائع کے مطابق انجینئر محفوظ ہے اور اسے حکام کے حوالے کر دیا گیا ہے۔ پولیس نے اغوا کے واقعے کی مزید تحقیقات شروع کر دی ہیں جبکہ علاقے میں سکیورٹی سخت کر دی گئی ہے۔

کالعدم تحریک طالبان پاکستان (ٹی ٹی پی) کی جانب سے خود ساختہ، غیر ہدفی اور بے قابو راکٹوں کا استعمال ایک بار پھر عام شہریوں کے خلاف اس گروہ کی کھلی دشمنی کو ظاہر کرتا ہے۔ خوارج سے منسلک سوشل میڈیا اکاؤنٹس پر گردش کرنے والی تصاویر سے ظاہر ہوتا ہے کہ یہ دیسی ہتھیار نہ تو درست نشانہ لگانے کی صلاحیت رکھتے ہیں اور نہ ہی ان پر کوئی کنٹرول ہوتا ہے، جس کے باعث یہ اکثر رہائشی علاقوں میں جا گرتے ہیں۔ تجزیہ کاروں کے مطابق ان راکٹوں میں کوئی رہنمائی نظام موجود نہیں ہوتا، جس کے باعث یہ کسی مخصوص فوجی ہدف کو نشانہ بنانے کے قابل نہیں ہوتے۔ نتیجتاً یہ شہری آبادیوں میں گر کر بچوں، خواتین اور غیر مسلح شہریوں کی جانوں کو خطرے میں ڈال دیتے ہیں اور املاک کو نقصان پہنچاتے ہیں۔ مبصرین کے مطابق یہ اندھا دھند تشدد اس گروہ کے اصل مقصد کو ظاہر کرتا ہے، یعنی خوف پھیلانا اور معاشرے کو عدم استحکام کا شکار بنانا۔ ماہرین نے اس بات پر زور دیا کہ ایسے ہتھکنڈے انسانیت اور بین الاقوامی قوانین کی کھلی خلاف ورزی ہیں۔

حکام اور مقامی ذرائع کے مطابق کنڈی سرکل سے چند ماہ قبل اغوا ہونے والے چار سکیورٹی اہلکاروں کو بحفاظت بازیاب کرا لیا گیا ہے۔ ذرائع کے مطابق اہلکاروں کو مقامی طالبان عناصر نے چار سے پانچ ماہ قبل مختلف دیہات سے اغوا کیا تھا۔ ان کی بازیابی مسلسل امن جرگے کی کوششوں سے ممکن ہوئی۔ بازیاب ہونے والوں میں زبیر ولد عمر دراز، انشاءاللہ ولد جمعہ خان، جہانزیب خان مروت اور پولیس کانسٹیبل حکمت اللہ شامل ہیں۔ حکام کے مطابق تمام اہلکار محفوظ ہیں اور علاقے میں امن و امان کو یقینی بنانے کے لیے تحقیقات جاری ہیں۔

حکام کے مطابق تحصیل سروکئی کے علاقے چگملائی میں شدت پسندوں کی جانب سے کواڈ کاپٹر کے ذریعے لائے گئے دھماکہ خیز مواد کے گرنے سے ایک مکان کو جزوی نقصان پہنچا۔ ذرائع کے مطابق دھماکہ خیز آلہ ٹکرانے پر آگ بھڑک اٹھی جس سے مکان کا ایک کمرہ متاثر ہوا۔ خوش قسمتی سے کوئی جانی نقصان یا زخمی ہونے کی اطلاع نہیں ملی۔ سکیورٹی فورسز نے موقع پر پہنچ کر نقصان کا جائزہ لیا اور واقعے کی تحقیقات شروع کر دی ہیں۔

منگل کو بنوں میں مندن پولیس چوکی پر دہشت گردوں کے حملے کو ناکام بنا دیا گیا۔ پولیس کے مطابق دہشت گردوں نے فتح خیل پولیس چوکی کو نشانہ بنایا تاہم پولیس اور سکیورٹی فورسز کی بروقت کارروائی کے باعث حملہ آور فرار ہو گئے۔ واقعے میں کسی جانی نقصان یا زخمی ہونے کی اطلاع نہیں ملی۔ بعد ازاں علاقے میں سکیورٹی سخت کر دی گئی اور ملزمان کی تلاش کے لیے سرچ آپریشن شروع کر دیا گیا۔ تحقیقات جاری ہیں۔

منگل کو باڑہ کے علاقے منزہ اکاخیل میں سکیورٹی فورسز کے آپریشن کے دوران چار دہشت گرد مارے گئے جبکہ کئی زخمی ہو گئے۔ سکیورٹی ذرائع کے مطابق انٹیلی جنس اطلاع پر دہشت گردوں کو گھیرے میں لیا گیا جس کے بعد فائرنگ کا تبادلہ ہوا۔ حکام کے مطابق آپریشن تاحال جاری ہے اور علاقے کو مکمل طور پر محفوظ بنانے تک کلیئرنس آپریشن جاری رہے گا۔ سکیورٹی اہلکاروں کے جانی نقصان کی اطلاع نہیں ملی۔ مزید تفصیلات آپریشن مکمل ہونے پر جاری کی جائیں گی۔

وزیراعظم محمد شہباز شریف کی زیر صدارت نئے سال کے پہلے دن معاشی اصلاحات، سرمایہ کاری میں اضافہ اور مجوزہ ترقیاتی منصوبوں کی پیشرفت پر جائزہ اجلاس ہوا

وزیراعظم شہباز شریف کا کہنا تھا کہ حکومت کی طرف سے پیش کردہ اقتصادی اصلاحات پر مبنی معاشی گورننس کی پالیسی پر تمام وزارتوں کی طرف سے مؤثر عمل درآمد ناگزیر ہے۔ وزیر اعظم محمد شہباز شریف نے تمام متعلقہ وزارتوں سے عملی اقدامات اور کم سے کم دورانیہ پر مشتمل جامع حکمت عملی کے لیے تجاویز طلب کر لیں اور ساتھ ہدایت دیں کہ تمام وزارتیں اپنے شعبوں سے متعلقہ بیرونی اور اندرونی سرمایہ کاری اور ترقیاتی منصوبوں کے لیے سفارشات جلد از جلد مرتب کریں. وزیراعظم کا کہنا تھا کہ سرمایہ کاروں کی آسانی کے لیے ادارہ جاتی اور انتظامی سہولیات حکومت کی اولین ترجیح ہے۔ وزیراعظم نے بیرونی اور ملکی سرمایہ کاروں کو مزید سہولیات دینے کے لئے سفارشات طلب کرلیں اور ہدایت کی کہ سرمایہ کاری میں اضافے کے لیے برآمدات کے شعبے کی ترویج کی تجاویز اور مجوزہ ترقیاتی منصوبوں کو خصوصی اہمیت دی جائے۔ موثر معاشی اصلاحات اور مجموعی معاشی ترقی کے لیے تمام وزارتوں کی باہمی ہم آہنگی اور وفاقی اور صوبائی حکومتوں کا باہمی تعاون کلیدی کردار رکھتا ہے۔ بیرونی سرمایہ کاری میں اضافے کے لیے متعلقہ وزارتیں دنیا بھر میں پاکستانی سفارتخانوں کے ذریعے بیرونی سرمایہ کاروں کی سہولت کے لیے مؤثر تعاون کریں۔ سرمایہ کاری کے لیے پاکستانی سفارتخانوں میں سرمایہ کاروں کے لیے سہولیات اور دیگر اہم معلومات کی ابتدائی آگاہی کو یقینی بنایا جائے۔ وزارتیں سرمایہ کاری میں اضافے کے لیے صنعتی پیداوار ، زراعت اور دیگر تمام اہم شعبوں پر یکساں توجہ دیں۔

وزیراعظم نے معیشت سے متعلقہ تمام وزارتوں کو عملی اقدامات پر مشتمل جامع حکمت عملی اور سفارشات طلب کرلیں۔ اس موقع پر مختلف وزارتوں کی طرف سے وزیراعظم کو جاری ترقیاتی منصوبوں اور معاشی، ادارہ جاتی انتظامی اصلاحات پر جاری کام کی پیشرفت سے آگاہ کیا گیا۔ مزید براں وزیراعظم نے معاشی ترقی اور اصلاحات کی تجاویز میں وزارتوں کے مابین باہمی ہم آہنگی اور صوبوں اور وفاقی اداروں کے باہمی تعاون کو یقینی بنانے کی بھی ہدایت کی۔

اجلاس میں نائب وزیراعظم و وفاقی وزیر خارجہ محمد اسحاق ڈار، وفاقی وزیر براۓ پلاننگ اینڈ ڈویلپمنٹ احسن اقبال، وفاقی وزیر برائے اطلاعات و نشریات عطاء اللہ تارڑ، وفاقی وزیر برائے پٹرولیم علی پرویز ملک، وفاقی وزیر برائے اقتصادی امور احد خان چیمہ ، وزیراعظم کے مشیر رانا ثناء اللہ، وزیراعظم کے معاون خصوصی ہارون اختر، تمام صوبوں کے چیف سیکٹریز ، نیشنل کوارڈینیٹر ایس آئی ایف سی اور دیگر متعلقہ سرکاری عہدے داران نے شرکت کی۔

طالبان کی شدت پسند پالیسیوں کے باعث افغانستان بڑھتی ہوئی عالمی تنہائی کا شکارہو چکا ہے

طالبان رجیم کی غیر جمہوری اور پرتشدد پالیسیوں کے نتیجے میں افغانستان کو شدید عالمی تنہائی کا سامنا ہے،طالبان کی انتہا پسند پالیسیوں کے باعث متعدد ممالک افغانستان کے ساتھ اپنے سفارتی تعلقات معطل کر چکے ہیں،طالبان کے اقتدار میں آنے کے بعد افغان سفارت خانوں کی بندش میں مسلسل اضافہ دیکھنے میں آ رہا ہے، برطانیہ، ترکیہ اور ناروے کے بعد اب جاپان نے بھی افغان سفارت خانہ بند کرنے کا اعلان کر دیا ہے،افغان سفارت خانوں کی مسلسل بندش اس امر کی غمازی کرتی ہے کہ طالبان رجیم سفارتی طور پر ناکامی اور عالمی تنہائی کا شکار ہو چکی ہے، افغان جریدے کابل ٹائمز نے بھی جاپان میں افغان سفارت خانے کی بندش کی تصدیق کرتے ہوئے واضح کیا کہ 31 جنوری 2026 سے سفارت خانے میں تمام سیاسی اور اقتصادی امور معطل کر دیے جائیں گے۔کابل ٹائمز نے بھی خبردار کیا ہے کہ بیرونِ ملک مقیم افغان شہریوں کے لیے سفارتی مشنز کی بندش سنگین نتائج کا باعث بن سکتی ہے، کیونکہ اس سے ان کے قانونی اور انتظامی مسائل میں اضافہ ہوگا،طالبان رجیم کی آمرانہ اور شدت پسند سوچ کے باعث کئی ممالک نے افغان شہریوں کے داخلے سے متعلق قوانین مزید سخت کر دیے ہیں

افغان جریدے آمو کے مطابق سیکیورٹی خدشات کے پیشِ نظر روس نے افغان مزدوروں کی بھرتی سے بھی انکار کر دیا ہے،ماہرین کے مطابق افغانی شرپسندوں اور سیکیورٹی خدشات کی بنا پر امریکا، جرمنی، پاکستان، ایران اور دیگر ممالک سے افغان مہاجرین کو بے دخل کیا جا رہا ہے ، طالبان کی شدت پسند اور غیر جمہوری پالیسیوں کے باعث افغانستان عالمی سطح پر تنہائی کا شکار ہوتا جا رہا ہے جو انتہائی تشویش کا باعث ہے،

بھارتی سیاستدان اور سماج وادی پارٹی کے رہنما سنتان پانڈے نے مودی سرکار کے جھوٹ کا پردہ چاک کرتے ہوئے انکشاف کیا کہ پلوامہ حملہ بی جے پی کا رچایا ہوا ڈرامہ تھا۔

بھارتی میڈیا رپورٹس کے مطابق سنتان پانڈے کا کہنا تھا کہ 2019 میں پلوامہ حملہ غیر ملکی نہیں بلکہ بی جے پی کی سازش کا حصہ تھا، بی جے پی نے جھوٹ چھپانےکیلئے پلوامہ کی سازش کا ڈھونگ رچایا، بی جے پی آج تک نہ بتاسکی کہ حملے میں استعمال ہوا آرڈی ایکس کہاں سے آیا، بغیر تحقیقات اور ثبوت کے پاکستان پر الزام لگانا مودی حکومت کی عادت بن گئی ہے، بمبئی اورپلوامہ حملے، سمجھوتہ ایکسپریس اور پہلگام جیسے فالس فلیگ آپریشنز کیے گئے، ایسےفالس فلیگ آپریشنز مودی حکومت کے مذموم مقاصد کے حصول کا پرانا طریقہ ہے۔

یاد رہے کہ مودی سرکار نے 2019 میں ہونے والے پلوامہ حملے اور پھر 2025 میں ہونے والے پہلگام واقعے کا الزام پاکستان پر عائد کیا تاہم پاکستان کی جانب سے ہر بین الاقوامی فورم پر بھارت کے بنیاد اور جھوٹے الزامات کی سختی سے ناصرف تردید کی گئی بلکہ کہا گیا کہ اگر بھارتی حکومت شواہد فراہم کرے تو پاکستان ہر قسم کے تعاون کے لیے تیار ہے تاہم بھارت کی ہندو انتہا پسند سرکار آج تک ان حملوں سے متعلق کوئی ایک بھی ثبوت فراہم نہیں کر سکی ہے۔

خیبر پختونخوا اور بلوچستان میں سیکورٹی فورسز کی دہشتگردوں کیخلاف کاروائیاں جاری ہیں

بلوچستان لبریشن فرنٹ (بی ایل ایف) نے دعویٰ کیا ہے کہ قلات میں ڈرون حملے کے نتیجے میں اس کے پانچ جنگجو مارے گئے ہیں۔ تنظیم کے مطابق ہلاک ہونے والوں میں عبدالاحد، اسرار احمد، شعیب احمد، عبیداللہ سیاہ پاد اور فیصل بدینی شامل ہیں۔ حکام کی جانب سے تاحال اس کارروائی یا جانی نقصان کی کوئی سرکاری تصدیق جاری نہیں کی گئی۔ سیکیورٹی فورسز نے بھی حملے پر کوئی تبصرہ نہیں کیا، جبکہ واقعے کی تحقیقات جاری ہیں۔

سیکیورٹی فورسز نے نوکنڈی میں کارروائی کرتے ہوئے پاکستان میں غیر قانونی طور پر داخل ہونے کی کوشش کرنے والے 179 افغان شہریوں کو گرفتار کر لیا۔ سرکاری ذرائع کے مطابق یہ آپریشن سرحدی علاقوں میں غیر قانونی نقل و حرکت سے متعلق خفیہ اطلاعات کی بنیاد پر کیا گیا۔ حکام کا کہنا ہے کہ گرفتار افراد کو معمول کی چیکنگ اور نگرانی کے دوران روکا گیا۔ تمام زیر حراست افراد کے پاس درست سفری دستاویزات موجود نہیں تھیں، جس کے بعد انہیں مزید قانونی کارروائی کے لیے تحویل میں لے لیا گیا۔ بعد ازاں گرفتار افغان شہریوں کو تصدیق اور رجسٹریشن کے لیے مخصوص مرکز منتقل کر دیا گیا۔ حکام کے مطابق اسکریننگ اور دستاویزی عمل امیگریشن قوانین کے تحت جاری ہے۔ سیکیورٹی فورسز نے واضح کیا ہے کہ غیر قانونی سرحدی داخلے کے خلاف کارروائیاں جاری رہیں گی۔

کاؤنٹر ٹیررازم ڈیپارٹمنٹ (سی ٹی ڈی) پنجاب نے اوکاڑہ میں خفیہ اطلاعات کی بنیاد پر کارروائی کرتے ہوئے کالعدم تحریک طالبان پاکستان (ٹی ٹی پی) کے ایک کارندے کو گرفتار کر لیا۔ گرفتار ملزم کی شناخت مطیع اللہ کے نام سے ہوئی ہے۔ سی ٹی ڈی ذرائع کے مطابق ملزم کے قبضے سے انتہاپسند لٹریچر اور پروپیگنڈا مواد برآمد ہوا ہے۔ ابتدائی تحقیقات میں اس کے کالعدم تنظیم کے لیے بھرتی کی سرگرمیوں میں ملوث ہونے کا انکشاف ہوا ہے۔ مزید تفتیش جاری ہے تاکہ اس کے نیٹ ورک اور روابط کا پتہ چلایا جا سکے۔

لکی مروت میں نورنگ تھانے کی حدود میں شیرکالا موڑ کے قریب عسکریت پسندوں کی فائرنگ سے ایک بچہ شہید جبکہ ایک شہری زخمی ہو گیا۔ پولیس کے مطابق حملہ آوروں نے غیر مسلح شہریوں کو نشانہ بنایا اور موقع سے فرار ہو گئے۔ پولیس ذرائع نے بتایا کہ شہید ہونے والا بچہ سب انسپکٹر امتیاز خان کا کمسن بیٹا تھا، جبکہ زخمی شخص ان کا بھائی ہے۔ زخمی کو فوری طور پر قریبی اسپتال منتقل کیا گیا جہاں ڈاکٹروں کے مطابق اس کی حالت خطرے سے باہر ہے۔ واقعے کے بعد پولیس اور سیکیورٹی فورسز نے علاقے کو گھیرے میں لے کر سرچ آپریشن شروع کر دیا۔ مقامی افراد کا کہنا ہے کہ شہید بچہ مکمل طور پر معصوم تھا اور اس کا کسی قسم کے تنازع سے کوئی تعلق نہیں تھا۔ حکام کے مطابق تحقیقات جاری ہیں اور ذمہ داروں کی گرفتاری کے لیے کوششیں کی جا رہی ہیں۔

ڈیرہ اسماعیل خان کے علاقے پہاڑپور میں ضلعی پولیس اور کاؤنٹر ٹیررازم ڈیپارٹمنٹ کی مشترکہ کارروائی کے دوران 21 مشتبہ افراد کو گرفتار کر کے اسلحہ اور گولہ بارود برآمد کر لیا گیا۔ پولیس ذرائع کے مطابق یہ خفیہ اطلاعات پر مبنی کارروائی تھی جس میں مختلف علاقوں میں بیک وقت چھاپے اور سرچ آپریشن کیے گئے، جن میں سیدو والی، برز والی، علی ونڈا، چندہ، کلی ونڈا، گڑھ پیر امام شاہ، گلوٹی اور پنیالہ شامل ہیں۔ آپریشن کی نگرانی سینئر پولیس اور سی ٹی ڈی افسران نے کی، جبکہ البرق فورس، ایلیٹ فورس، سی ٹی ڈی اور ضلعی پولیس کے اہلکاروں نے حصہ لیا۔ کارروائی کے دوران بین الصوبائی سرحد کے قریب پہاڑی علاقے میں مشتبہ عسکریت پسندوں کے ساتھ فائرنگ کا تبادلہ بھی ہوا، تاہم کوئی جانی نقصان نہیں ہوا۔ بعد ازاں گھیراؤ اور سرچ آپریشن کے دوران 21 افراد کو حراست میں لے لیا گیا، جن میں مبینہ سہولت کار بھی شامل ہیں۔ تمام گرفتار افراد کو مزید تفتیش کے لیے نامعلوم مقامات پر منتقل کر دیا گیا ہے۔

سب ڈویژن حسن خیل کے دہشت گردوں نے بازرگئی گاؤں کے علاقے سے سیکیورٹی فورسز کے ایک اہلکار کو اغوا کر لیا ہے۔ پولیس کے مطابق کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں نے، جن کی قیادت اعزاز عرف عمر عثمان کر رہا تھا، سیکیورٹی فورسز کے لانس نائیک ریحان کو اس وقت اغوا کیا جب وہ چھٹی پر اپنے گھر موجود تھا۔ پولیس ذرائع کے مطابق اغوا کے بعد اہلکار کو پہاڑی علاقے کی طرف لے جایا گیا۔ اس واقعے سے مقامی آبادی میں تشویش پائی جاتی ہے۔ سیکیورٹی فورسز نے مغوی اہلکار کی بازیابی کے لیے کارروائیاں شروع کر دی ہیں، جبکہ مقامی عمائدین بھی سیکیورٹی حکام کے ساتھ مل کر محفوظ رہائی کی کوششوں میں مصروف ہیں۔

دہشت گردوں نے بنوں میں کمبائنڈ ملٹری اسپتال (سی ایم ایچ) کے علاقے پر راکٹ حملہ کیا جس کے نتیجے میں زور دار دھماکہ ہوا، تاہم کوئی جانی نقصان نہیں ہوا۔ پولیس کے مطابق راکٹ سی ایم ایچ کے قریب کنوائے گراؤنڈ کے علاقے میں ایک خالی احاطے میں گرا۔ حکام کا کہنا ہے کہ دھماکے سے علاقے میں خوف و ہراس پھیل گیا، لیکن کسی قسم کا نقصان نہیں ہوا۔ راکٹ سے قریبی تنصیبات کو بھی کوئی خاص نقصان نہیں پہنچا۔ واقعے کے بعد سیکیورٹی فورسز اور پولیس نے موقع پر پہنچ کر علاقے کو گھیرے میں لے لیا اور سرچ آپریشن شروع کر دیا۔ بم ڈسپوزل اور تحقیقاتی ٹیموں نے بھی جائے وقوعہ کا معائنہ کیا۔ حکام کے مطابق تحقیقات جاری ہیں اور شہر میں حساس مقامات کے گرد سیکیورٹی سخت کر دی گئی ہے۔

میران شاہ میں دہشت گردوں کے حملے میں کاؤنٹر ٹیررازم ڈیپارٹمنٹ (سی ٹی ڈی) کا ایک اہلکار شہید ہو گیا۔ پولیس ذرائع کے مطابق سی ٹی ڈی آپریٹر عمر نیاز کو منگل کے روز ان کی رہائش گاہ کے قریب مسلح افراد نے نشانہ بنایا۔ حکام کے مطابق فائرنگ کے بعد حملہ آور موقع سے فرار ہو گئے۔ شدید زخمی حالت میں عمر نیاز کو قریبی طبی مرکز منتقل کیا گیا، تاہم وہ زخموں کی تاب نہ لاتے ہوئے شہید ہو گئے۔ ان کا تعلق شمالی وزیرستان کے گاؤں دندے درپا خیل سے تھا۔ واقعے کے بعد پولیس اور سیکیورٹی فورسز کی بھاری نفری نے علاقے کو گھیرے میں لے کر سرچ آپریشن شروع کر دیا۔ ابتدائی تحقیقات کے مطابق حملہ ٹارگٹڈ تھا۔ پولیس کا کہنا ہے کہ مزید تحقیقات جاری ہیں اور ملوث افراد کی گرفتاری کے لیے کوششیں کی جا رہی ہیں۔

لائن آف کنٹرول (ایل او سی) پر اگلے مورچوں میں تعینات پاک فوج کے جوانوں نے نئے سال 2026 کے آغاز پر قوم کے نام خصوصی پیغام دیا ہے۔

اپنے پیغام میں بہادر جوانوں نے اپنے غیر متزلزل عزم، جذبۂ قربانی اور مادرِ وطن سے بے لوث محبت کا اعادہ کیا۔ ان کا کہنا تھا کہ شدید سردی، برف باری اور دشوار گزار پہاڑی علاقہ ان کے حوصلے اور عزم کو کمزور نہیں کر سکتا۔پاک فوج کے جری جوانوں نے کہا کہ اگرچہ وہ اپنے گھروں اور اہلِ خانہ سے دور ہیں، مگر وطن کا دفاع ان کی اولین ذمہ داری ہے، اور وہ برف سے ڈھکے بنکروں میں ڈٹ کر کھڑے ہیں تاکہ سرزمینِ پاکستان کی حفاظت یقینی بنائی جا سکے۔انہوں نے اس بات پر زور دیا کہ سرحدوں پر پاک فوج کی موجودگی ہی قوم کے امن و سلامتی کی ضمانت ہے، اور واضح پیغام دیا کہ کسی دشمن کو سرحد پار سے بری نظر ڈالنے کی ہرگز اجازت نہیں دی جائے گی۔

فوجی جوانوں نے دشمن کو سخت پیغام دیتے ہوئے کہا کہ مارکۂ حق اور آپریشن بنیان المرصوص کی کامیابیاں اس بات کا واضح ثبوت ہیں کہ وہ اتحاد، یکجہتی اور پختہ عزم کے ساتھ دشمن کو شکست دینے کی مکمل صلاحیت رکھتے ہیں۔انہوں نے مزید کہا کہ افواجِ پاکستان کے سپاہی دن رات انتہائی پیشہ ورانہ مہارت، بے مثال جرات اور بھرپور لگن کے ساتھ ملکی دفاع کے فرائض سرانجام دے رہے ہیں۔جب آپ سو رہے ہوتے ہیں، افواجِ پاکستان جاگ رہی ہوتی ہیں،پاکستان ہمیشہ زندہ باد