سیاسی و مذہبی جماعتوں کے قائدین، وکلاء اورتاجر رہنماؤں نے مرکزی مسلم لیگ کی عظیم الشان تکبیر کانفرنس سے خطاب کرتے ہوئے کہا ہے کہ جوہری صلاحیت ہمارے ماتھے کا جھومر ہے۔آئی ایم ایف یا کسی بھی عالمی قوت کے دباؤ پر ایٹمی پروگرام سے دستبرداری نامنظور ہے۔ہم بھوکے رہ لیں گے لیکن سی ٹی بی ٹی جیسے کسی معاہدہ پر دستخط قبول نہیں کریں گے۔ہم دشمن کا کوئی بھی ایجنڈا پاکستان میں کامیاب نہیں ہونے دیں گے۔ دفاعی اداروں اور تنصیبات پر حملے پاکستان کی تاریخ کا سیاہ باب ہیں، ملوث عناصر کو قرارواقعی سزا دی جائے۔
مینار پاکستان جیسا اتحاد و یکجہتی کا مظاہرہ عوام الناس ہر شہر میں کریں گے۔ بلوچ عوام محب وطن ہیں، ان کی محرومیاں ختم کریں گے۔کشمیریوں کی جدوجہد آزادی کے ساتھ ہیں۔ملکی مسائل کا حل باہم مذاکرات سے نکالا جائے۔ملکی میڈیا کو بھی نظریہ پاکستان کے احیا کے فروغ اور قوم کو متحد کرنے کے لئے کردار ادا کرنا چاہئے۔اسرائیل کو تسلیم کرنا فلسطینیوں کے ساتھ ظلم کے مترادف ہے۔مینار پاکستان کے وسیع و عریض گراؤنڈ میں ہونے والی تکبیر کانفرنس میں مختلف سیاسی، مذہبی و سماجی تنظیموں کے کارکنان سمیت تمام مکاتب فکر اور شعبہ ہائے زندگی سے تعلق رکھنے والے لاکھوں افراد نے شرکت کی۔ تکبیر کانفرنس سے مرکزی مسلم لیگ کے صدر خالد مسعود سندھو، چوہدری محمد سرور، لیاقت بلوچ، مولانا عبدالخبیر آزاد،غلام محمد صفی، پیرسید ہارون علی گیلانی، خواجہ معین الدین محبوب کوریجہ،علامہ ابتسام الہیٰ ظہیر،سیف اللہ خالد، عظمیٰ حمید گل،یعقوب شیخ، ڈاکٹر عبدالغفور راشد،قبائلی رہنما نواب ظفر اللہ خاں شاہوانی،علامہ آغا سید جواد نقوی، حافظ عبدالغفار روپڑی،مولانا فضل الرحیم اشرفی،سردار بشن سنگھ ،فیصل ندیم،علامہ زاہد محمود قاسمی،علامہ ناصر مدنی، مزمل اقبال ہاشمی، چوہدری شفیق الرحمن، انجینئر حارث ڈار، حافظ خالد ولید، قبائلی رہنما میر شاہ جہاں، انور گلزئی، رانا محمدا شفاق، مقتدر اختر شبیر ایڈوکیٹ، احسان اللہ منصور، چیئرمین پیاف شیخ فہیم الرحمان،شیخ نعیم بادشاہ،رانا انتظار، انجینئر حارث ڈار،احسان چودھری، انجینئر عادل خلیق،ڈاکٹر عبدالمتین،حافظ عثمان شفیق ،عدیل عامر،تاجر رہنما نعیم میر،ریاض احمد احسان، محمد انس،عبدالحفیظ ایڈوکیٹ ودیگر نے خطاب کیا۔ کانفرنس کے لاکھوں شرکاء سے خطاب کرتے ہوئے پاکستان مرکزی مسلم لیگ کے صدر خالد مسعود سندھو نے کہاکہ ہم بتا دینا چاہتے ہیں کہ پاکستان کے ایٹمی اثاثوں کے حوالہ سے پاکستانی قوم کبھی کمپرومائز نہیں ہو نے دے گی۔لاکھوں لوگوں کا ٹھاٹھیں مارتا انسانی سمندر اس بات کی گواہی دے رہا ہے کہ ہم پاکستان کے ساتھ ہیں اور پاکستان کی سالمیت پر کسی قسم کی آنچ نہیں دیں گے۔ہم واضح طور پر بتا دینا چاہتے ہیں کہ دفاعی اداروں اور تنصیبات پر حملے پاکستان کی تاریخ کا سیاہ ترین باب ہیںجس کی جتنی مذمت کی جائے کم ہے۔جو لوگ ان حملوں میں ملوث تھے انہیں سخت ترین سزائیں دی جائیں، البتہ جو لوگ اس واقعہ میں ملوث نہیں اور بے گناہ ہیں ان کو رہا کر دینا چاہئے۔خالد مسعود سندھو کا کہنا تھا کہ چند برسوں میں ملک کو عدم استحکام کی طرف دھکیل دیا گیا، ملکی اداروں کے سامنے کھڑے ہونے کی بجائے افہام و تفہیم سے مسائل کا حل نکالنا چاہئے۔ملکی میڈیا کو بھی نظریہ پاکستان کے احیا کے فروغ اور قوم کو متحد کرنے کے لئے کردار ادا کرنا چاہئے، پاکستان مرکزی مسلم لیگ نے یوم تکبیر کے موقع پر آج مینار پاکستان سے یہ پیٖغام دیا ہے کہ قومی ادارے ہمارے ہیں انکی عزت ہماری عزت ہے۔
انہوں نے کہاکہ پاکستانی قوم میں نظریہ پاکستان کاشعور بیدار کر کے وطن عزیز کو ناقابل تسخیر قوت بنائیں گے۔آئی ایم ایف یا کسی بھی عالمی قوت کے دباؤ پر ایٹمی پروگرام سے دستبرداری نامنظور ہے۔ پوری قوم ایسی کسی بھی کوشش کے خلاف سیہ پلائی دیوار ثابت ہوگی۔ شہدا پاکستان کی قربانیوں کو خراج تحسین پیش کرتے ہیں اور اس بات کا عزم کرتے ہیں کہ ان کی قربانیوں کو کسی صورت ضائع نہیں ہونے دیں گے۔ملک میں دفاعی اداروں و تنصیبات پر حملوں اور توڑ پھوڑ کے واقعات کی شدید مذمت کرتے ہیں۔ملوث عناصر کو قانون کے مطابق سخت سزا دی جائے۔ سابق گورنر پنجاب چودھری سرور نے کہا کہ کامیاب کانفرنس کے انعقاد پر مرکزی مسلم لیگ کی قیادت کو مبارکباد دیتا ہوں، بلوچستان کے بھائیوں کی تقریریں سن رہا تھا میں انکو کہنا چاہتا ہوں کہ ہم مانتے ہیں بلوچستان محرومیوں کا شکار ہے، بلوچستان کے ساتھ انصاف نہیں ہوا۔ بلوچستان کے لوگوں کو یقین دلاتا ہون کہ پاکستان کی ترقی بلوچستان سے ہی ہے، بلوچستا ن میں جو معدنیات ہیں انکواستعمال کریں تو پاکستان دنیا کے امیر ممالک میں شامل ہو سکتا ہے۔ نو مئی کے واقعات کی مذمت کرتا ہوں۔ یہ مطالبہ کرتا ہوں کہ جو لوگ اس میں ملوث تھے انکو کیفر کردار تک پہنچایا جائے، انہوں نے جناح ہاوس کو جلایا، جی ایچ کیو پر حملہ کیا گیا، سب سے زیادہ ندامت اسوقت ہوئی جب ہماری پاک فوج کے جوان سڑک پر جا رہے ہیں اور شرپسند انہیں پتھر مار رہے ہیں، اگر یہ ایکشن دشمن کرتا تو فوج جواب دیتی لیکن پاک فوج نے عوام اور فوج کو لڑانے کی سازش کو ناکام بنایا، پاکستان کی فوج کے جوانوں کو پیغام دیتے ہیں کہ پاکستانی قوم پاک فوج کے شانہ بشانہ کھڑی ہے۔
جماعت اسلامی پاکستان کے نائب امیر لیاقت بلوچ نے کہاکہ پاکستان کے دفاع کے لیے کسی قربانی سے دریغ نہیں کیا جائے گا۔ ایٹمی پروگرام کے خلاف بیرونی سازشیں ناکام بنائیں گے۔کشمیری و فلسطینی مسلمانوں کی جدوجہد آزادی کے ساتھ ہیں۔ پاکستان کی بقا اور سلامتی کے تحفظ لیے پوری قوم متحد و بیدار ہے۔ملکی مسائل کا حل باہم مذاکرات سے نکالا جائے۔ چیئرمین رویئت ہلال کمیٹی، خطیب بادشاہی مسجد مولانا عبدالخبیر آزادنے کہا کہ مینار پاکستان کے سائے تلے تکبیر کانفرنس کے انعقاد پر مبارکباد پیش کرتا ہوں۔ آج یوم تجدید عہد کا دن ، پاکستان اسلام کا قلعہ اور اسکی حفاظت ہم سب کی ذمہ داری ہے وطن عزیز پاکستان کو بنانے میں ہمارے بڑوں نے کردار ادا کیا پاکستان بچانے میں ہماری اولادیں بھی جانیں قربان کرنے کو تیار ہیں ۔ہم دشمن کا کوئی بھی ایجنڈا پاکستان میں کامیاب نہیں ہونے دیں گے پاکستان اسلام کا قلعہ، یہ ملک ہمارا، اسکی افواج بھی ہماری ہیں،آج پوری قوم افواج پاکستان کے ساتھ کھڑی ہے،پاکستان محفوظ ہے تو عالم اسلام محفوظ ہے ۔ھدیۃ الھادی پاکستان کے سربراہ پیر سید ہارون علی گیلانی او رغلا م محمد صفی نے کہا کہ پاکستان نے ایٹمی دھماکے کر کے بھارتی عزائم کو خاک میں ملا دیا تھا، آج پاکستان مرکزی مسلم لیگ نے مینار پاکستان اور بادشاہی مسجد کے سائے تلے اجتماع کر کے بھارت کے ناپاک ارادوں کو خاک میں ملا کر رکھ دیا اور پیغام دیا کہ دشمنو، یہ قوم آج بھی صرف بیدار نہیں بلکہ متحد بھی ہے۔اغیار کی سازشوں کو ناکام بنانے والوں کو نہیں بھولیں گے، اگر ہمسایہ ملک میں دشمن کی سازش کو ناکام بنا سکتے ہیں تو پاکستان ہمارا گھر ہے، سازش کا جو جال بننے کی کوشش کی گئی وہ کامیاب نہیں ہو گی۔
کوٹ مٹھن شریف کے سجادہ نشین خواجہ معین الدین محبوب کوریجہ کا کہنا تھا کہ جب تک یہ سبز ہلالی پرچم موجود ہیں پاکستان کا کوئی کچھ نہیں بگاڑ سکتا۔ پاکستان کے تحفظ کے لئے ہم شانہ بشانہ آپ کے ساتھ کھڑے ہیں پاکستان مشکل حالات سے گزر رہا ہے۔ ایسے میں مل بیٹھ کر پاکستان دشمنوں کی خواہشات کو خاک میں ملانا چاہئے۔جمعیت اہلحدیث کے ناظم اعلیٰ علامہ ابتسام الہیٰ ظہیر، سیف اللہ خالد اوریعقوب شیخنے کہاکہ جب تک نبی ؐ کے غلام زندہ ہیں پاکستان کی طرف کوئی میلی آنکھ سے نہیں دیکھ سکتا۔اللہ کے فضل و کرم سے پاکستان اسلام کا دیس اور ہم اسلام کے متوالے ہیں۔ اس ملک میں کرپشن کے خاتمے، ڈیموں کی تعمیر و ترقی کے نعرے لگے لیکن آج غلبہ دن کا نعرہ لگانے والے میدان میں آئے ہیں جنہیں کامیاب ہونے سے کوئی نہیں روک سکتا۔یہ تشدد پسندوں کا نہیں بلکہ امن کا نعرہ لگانے اورفساد کو مٹانے والوں کا اجتماع ہے۔مسلح افواج کی تنصیبات پر حملوں کو قبول نہیں کر سکتے۔نو مئی کے ملزمان کو قرارواقعی سزا ملنی چاہئے۔امیر جماعت اہلحدیث حافظ عبدالغفار روپڑی نے کہا کہ مسلم لیگ نے پاکستان بنایا تھا، مسلم لیگ ہی پاکستان بچائے گی۔پاکستان کی طرف کسی نے میلی آنکھ سے دیکھا تو برداشت نہیں کیا جائے گا۔
مزید یہ بھی پڑھیں؛
آئین کا تحفظ ہمارے بنیادی فرائض میں شامل ہے۔ چیف جسٹس
100 واں ڈے،پی سی بی نے بابر اعظم کی فتوحات کی فہرست جاری کر دی
لندن میں نواز شریف کے نام پرنامعلوم افراد نے تین گاڑیاں رجسٹرکرالیں،لندن پولیس کی تحقیقات جاری
بینگ سرچ انجن تمام صارفین کیلئے کھول دیا گیا
انٹربینک میں ڈالر سستا ہوگیا
ووٹ کا حق سب سے بڑا بنیادی حق ہے،اگر یہ حق نہیں دیاجاتا تو اس کامطلب آپ آئین کو نہیں مانتے ,عمران خان
سعیدہ امتیاز کے دوست اورقانونی مشیرنے اداکارہ کی موت کی تردید کردی
معروف عالم دین علامہ ناصر مدنی نے خطاب کرتے ہوئے کہا کہ پاکستان کے ادارے ملکی سلامتی کے ضامن ہیں ،نو مئی کو جو ہوا وہ قابل مذمت ہے۔ ہم بھوکے مر جائیں گے مگر سی ٹی بی ٹی ہر دستخط نہیں کرنے دیں گے ۔جنرل (ر) حمید گل کی صاحبزادی عظمیٰ حمید گل نے کہاکہ جوہری صلاحیت کا حصول پاکستان کی بہت بڑی کامیابی ہے۔ دنیا خوف سے ہمارے بم کو اسلامی بم کہتی ہے۔جوہری صلاحیت ہمارے ماتھے کا جھومر ہے۔،علامہ آغا سید جواد نقوی، حافظ عبدالغفار روپڑی،جامعہ اشرفیہ کے مہتمم مولانا فضل الرحیم اشرفی،سردار بشن سنگھ ، ڈاکٹر عبدالغفور راشدعلامہ زاہد محمود قاسمی،تاجر رہنما نعیم میر،علامہ ناصر مدنی،فیصل ندیم، مزمل اقبال ہاشمی، چوہدری شفیق الرحمن، انجینئر حارث ڈار، قبائلی رہنما میر شاہ جہاں، انور گلزئی، رانا محمدا شفاق، مقتدر اختر شبیر ایڈوکیٹ،حافظ خالد ولید، احسان اللہ منصور، چیئرمین پیاف شیخ فہیم الرحمان،شیخ نعیم بادشاہ،رانا انتظار، انجینئر حارث ڈار،احسان چودھری، انجینئر عادل خلیق،ڈاکٹر عبدالمتین،حافظ عثمان شفیق ،عدیل عامر،ریاض احمد احسان، محمد انس،عبدالحفیظ ایڈوکیٹ و دیگر نے کہاکہ پاکستان اسلام کے نام پر بنا تھا، ایٹمی پاکستان کے خلاف مذموم سازشیں کامیاب نہیں ہو نے دیں گے۔ پاکستان امت مسلمہ کا دفاع کرے گا، اتحادسے ہی کامیابیاں ملتی ہیں۔ اسلام و پاکستان دشمن قوتیں ایٹمی پروگرام کے خلاف خوفناک سازشیں کر رہی ہیں۔ہم آئی ایم ایف کے نہیں اللہ کے احکامات کے پابند ہیں۔قرضوں کے نام پرکسی کو ملکی دفاع گروی رکھنے کی اجازت نہیں دیں گے۔
پاکستان مرکزی مسلم لیگ کے زیر اہتمام تکبیر کانفرنس کا اعلامیہ
٭ یوم تکبیر کے تاریخ ساز موقع پر پاکستان مرکزی مسلم لیگ کے زیراہتمام آج مینار پاکستان کے سائے تلے عظیم الشان تکبیر کانفرنس کے انعقاد پر ہم اللہ تعالٰی کا شکر ادا کرتے ہیں اور اس عزم کا اظہار کرتے ہیں کہ پاکستانی قوم میں نظریہ پاکستان کاشعور بیدار کر کے وطن عزیز کو ناقابل تسخیر قوت بنائیں گے۔ ان شاء اللہ
٭ آئی ایم ایف یا کسی بھی عالمی قوت کے دباؤ پر ایٹمی پروگرام سے دستبرداری نامنظور ہے۔ پوری قوم ایسی کسی بھی کوشش کے خلاف سیہ پلائی دیوار ثابت ہوگی۔
٭ شہدا پاکستان کی قربانیوں کو خراج تحسین پیش کرتے ہیں اور اس بات کا عزم کرتے ہیں کہ ان کی قربانیوں کو کسی صورت ضائع نہیں ہونے دیں گے۔
٭ ملک میں دفاعی اداروں و تنصیبات پر حملوں اور توڑ پھوڑ کے واقعات کی شدید مذمت کرتے ہیں۔ملوث عناصر کو قانون کے مطابق سخت سزا دی جائے، البتہ جن لوگوں پر کوئی الزام ثابت نہیں ہو سکا انہیں سیاسی انتقام کا نشانہ نہ بنایا جائے۔
٭ وطن عزیز میں شدید مہنگائی، بجلی و پٹرول کی بے انتہا قیمتوں اور ٹیکسوں کی بھرمار سے کاروبار تباہ اور انڈسٹری کا چلنا مشکل ہو چکا ہے۔ حکومت بجلی، پٹرول اور گیس کی قیمتیں کم کرے، عوام کی معاشی مشکلات کم کرنے اور روزگار کے مواقع میسر کرنے کے لیے فوری اقدامات اٹھائے۔
٭ شدید مہنگائی سے بچوں کو تعلیم کے حصول میں سخت دشواری کا سامنا ہے۔حکومت نوجوانوں کی تعلیم کا بوجھ خود اٹھائے،یکساں نظام تعلیم کی طرح تعلیمی اداروں کو جدید دور کے تقاضوں کے مطابق ہم آہنگ کیا جائے۔
٭ عدالتوں میں لاکھوں مقدمات زیر التواء ہیں اورسالہا سال گزرنے پر بھی لوگوں کو انصاف نہیں مل رہا۔ اتفاق رائے سے ایسا نظام انصاف ترتیب دیا جائے جس سے مختصر وقت میں لوگوں کو انصاف میسر آ سکے۔
٭ صحت کی ناکافی سہولیات اور مہنگی ترین ادویات عوام کا بنیادی مسئلہ ہے۔ حکومت وقت سے مطالبہ کرتے ہیں کہ سرکاری ہسپتالوں کی ناگفتہ بہ حالت کو درست کیا جائے۔ دور دراز دیہاتی علاقوں تک بھی لوگوں کو صحت کی بنیادی سہولیات فراہم کی جائیں۔
٭ اگر حکومت وقت عوام کو بنیادی حقوق اور ضروریات فراہم کرنے میں ناکام رہتی ہے تو پاکستان مرکزی مسلم لیگ مطالبہ کرتی ہے کہ حکومت فی الفور مستعفی ہو۔
٭ مرکزی مسلم لیگ اس بات کا عہد کرتی ہے کہ خدمت خلق کی سیاست کو جاری رکھتے ہوئے حکومتی وسائل کے بغیر ہی عوام پاکستان کی مشکلات حل کرنے کےلئے بھر پور کوشش کرتے رہیں گے۔
٭ مقبوضہ کشمیر میں جی 20کے اجلاس اقوام متحدہ کی قراردادوں کی خلاف ورزی ہے اور بھارت کو شہ دینے کے مترادف ہے۔چین، سعودی عرب، ترکی اور مصر کی طرف سے جی 20اجلاس کا بائیکاٹ خوش آئند اقدام ہے۔
٭ پاکستان مرکزی مسلم لیگ اس بات کا اعادہ کرتی ہے کہ مظلوم کشمیری عوام کی تحریک آزادی کی اخلاقی، سفارتی اور سیاسی حمایت جاری رکھیں گے۔
٭ عالمی برادری سے مطالبہ کرتے ہیں کہ مسئلہ کشمیر کو کشمیری عوام کی امنگوں کے مطابق، اقوام متحدہ کی قراردادوں کی روشنی میں فی الفور حل کیا جائے۔
٭ پاکستان مرکزی مسلم لیگ اس بات کا بھی مطالبہ کرتی ہے کہ تحریک آزادی کشمیر کے قائدین جو بھارتی جیلوں میں ناحق قید ہیں ، ان کو فی الفور رہا کیا جائے۔ قائدین تحریک آزادی کشمیر کو عمر قید اور پھانسی کی سزائیں دینے کی منصوبہ بندی کی جا رہی ہے، ان سزاؤں کو فی الفور ختم کیا جائے۔
