Category: اہم خبریں

ڈی جی آئی ایس پی آر کی دی ملینیم یونیورسل کالج اور فیوچر ورلڈ سکول میں طلبہ و اساتذہ کے ساتھ خصوصی نشست ہوئی ہے

ڈی جی آئی ایس پی آر لیفٹینیٹ جنرل احمد شریف نے داخلی صورتحال اور ملکی دفاع کی اہمیت پر نوجوانوں سے اہم گفتگو کی،خصوصی نشست کے دوران طلباء اور اساتذہ کا پاک فوج کو زبردست خراج تحسین پیش کیا گیا،اس موقع پر اساتذہ نے اظہار خیال کرتے ہوئے کہا کہ؛پاک افواج خودمختاری اور قومی سالمیت کے تحفظ کے ساتھ عوام کی حفاظت بھی کرتی ہیں،آج کی نشست نے طلبہ کو روایتی سوچ سے ہٹ کر غوروفکر کرنے کا بھی موقع دیا، سیشن نے نوجوانوں کو پاکستانیّت، فعال شہریت اور سماجی ذمہ داریوں کے حقیقی تصور سے روشناس کیا

طلبہ کا کہنا تھا کہ؛معرکہ حق میں پاک افواج کے کردار نے نوجوانوں میں پاکستان کے نا قابل تسخیر دفاع کا عزم بڑھایا،آج کی نشست سے احساس ہوا کہ میڈیا پر خبروں کو بغیر تجزیہ اور تصدیق کے پھیلانا غیر ذمہ دارانہ عمل ہے،
پاک فوج ہم سے اور ہم پاک فوج سے ہیں،

پاکستان کے مختلف حصوں میں حالیہ سیکیورٹی صورتحال کے پیشِ نظر اہم پیش رفت سامنے آئی ہے، جن میں دہشت گردوں کی گرفتاری، خفیہ نیٹ ورکس کا خاتمہ، حساس واقعات کی تحقیقات میں کامیابی، قبائلی عمائدین کے جرگے اور حکومتی مشاورتی اجلاس شامل ہیں۔

اسلام آباد کی سیکٹر J-11 کچہری میں ہونے والے خودکش حملے کی تحقیقات میں اہم کامیابی حاصل ہوئی ہے۔ سیکیورٹی ذرائع کے مطابق، انٹیلی جنس بیورو اور کاؤنٹر ٹیررازم ڈیپارٹمنٹ نے مشترکہ کارروائی کرتے ہوئے کالعدم ٹی ٹی پی سے وابستہ پورا دہشت گرد سیل گرفتار کر لیا ہے۔ گرفتار افراد میں حملے کے مرکزی ہینڈلر، آپریشنل کمانڈر اور تین سہولت کار شامل ہیں۔تحقیقات میں انکشاف ہوا ہے کہ حملے کی منصوبہ بندی افغانستان میں موجود ٹی ٹی پی کے اہم کمانڈر اور خفیہ شعبے کے سربراہ سعید الرحمان عرف داداللہ نے کی۔ وہ ٹیلیگرام ایپ کے ذریعے پاکستان میں موجود کارندوں سے مسلسل رابطے میں رہا اور ہدایات دیتا رہا۔تفتیش کے دوران ہینڈلر ساجداللہ عرف شینہ نے اعتراف کیا کہ وہ خودکش بمبار عثمان عرف قاری کو افغانستان سے پاکستان لایا اور اسے اسلام آباد کے مضافات میں چھپائے رکھا۔ عثمان کا تعلق ننگرہار کے ضلع اچین کے شنواری قبیلے سے بتایا گیا ہے۔ اسے خودکش جیکٹ وہی پہنائی گئی جو ساجداللہ نے پشاور کے اخون بابا قبرستان سے وصول کی تھی۔ حملے کے روز یہی جیکٹ پہن کر عثمان ہدف کی جانب روانہ ہوا۔

کوئٹہ میں چیف سیکریٹری شکیل قادر خان کی زیر صدارت اعلیٰ سطح اجلاس میں لیویز فورس کو صوبائی پولیس میں ضم کرنے کے انتظامی و تکنیکی مراحل کو حتمی شکل دے دی گئی۔وزیراعلیٰ میر سرفراز بگٹی نے ہدایت کی کہ انضمام کو باوقار اور مؤثر طریقے سے مکمل کیا جائے اور اس دوران ترقیوں، تبادلوں اور سینیارٹی کے معاملات کو باقاعدہ منظوری دی جائے۔مزید برآں، اہلکاروں کے لیے جدید تربیتی ماڈیولز اور بنیادی پولیس ٹریننگ نافذ کرنے کی منظوری بھی دی گئی تاکہ صوبے میں امن و امان کے اداروں کے درمیان ہم آہنگی اور سروس ڈلیوری بہتر بنائی جا سکے۔

خیبر پختونخوا کے ضلع کرک کے علاقے بانڈہ داؤد شاہ میں سی ٹی ڈی اور پولیس کے مشترکہ آپریشن میں ایک انتہائی مطلوب دہشت گرد مارا گیا۔فائرنگ کے شدید تبادلے کے بعد ہلاک دہشت گرد کی شناخت سلیمان عرف اکرم کے نام سے ہوئی، جو کالعدم کلیم اللہ تشکیل گروہ کا اہم رکن اور متعدد دہشت گرد کارروائیوں میں ملوث تھا۔سیکیورٹی اداروں نے اس عزم کا اعادہ کیا ہے کہ صوبے سے دہشت گردی کے خاتمے کے لیے بھرپور کارروائیاں جاری رہیں گی۔

کوہاٹ میں خفیہ اطلاعات کی بنیاد پر سی ٹی ڈی اور پولیس کے مشترکہ آپریشن میں تین انتہائی مطلوب دہشت گرد مارے گئے۔ہلاک ہونے والے دہشت گردوں میں محمد قاسم ولد خانا جان، شاہمد ولد مشعل خان اور ساحر عرف پاٹا ولد نسیم شامل ہیں۔ یہ سب درہ آدم خیل سے سرگرم سعد عرف شاہ گل تشکیل گروہ سے وابستہ تھے اور متعدد حملوں میں ملوث تھے، جن میں کانسٹیبل حضرت عمر کی شہادت کا واقعہ بھی شامل ہے۔سیکیورٹی حکام کے مطابق کارروائیاں مکمل امن کے قیام تک جاری رہیں گی۔

بنوں میں بڑھتی ہوئی بدامنی اور اغوا کے واقعات کے تناظر میں سرکاری ملازمین کے لیے خصوصی سیکیورٹی ایڈوائزری جاری کی گئی ہے۔ہدایت نامہ کے مطابق سفر کے دوران سرکاری شناخت ظاہر نہ کریں،عوامی مقامات پر غیر ضروری وقت نہ گزاریں،غیر ضروری سفر اور رات کی نقل و حرکت سے گریز کریں،موبائل فون میں سرکاری و ذاتی ڈیٹا محفوظ رکھیں.مشکوک علاقوں اور غیر ضروری اجتماعات سے پرہیز کریں،رات گئے دستک دینے والے کے لیے دروازہ نہ کھولیں،حکام کے مطابق یہ اقدامات موجودہ حالات کے تقاضوں کے مطابق ضروری ہیں۔

خیبر ضلع باڑہ میں بارم خیل قبیلے کے مشران اور فرنٹیئر کور کے مابین بڑا جرگہ منعقد ہوا جس میں علاقے میں بڑھتی ہوئی بدامنی، جرائم اور منشیات کے پھیلاؤ پر تشویش کا اظہار کیا گیا۔جرگے میں “سپریم یونٹی کمیٹی” کے قیام کا بھی اعلان کیا گیا، جو علاقے میں جرائم پیشہ عناصر کی نشاندہی اور کارروائی میں معاونت کرے گی۔

تیراہ میدان میں گزشتہ رات دہشت گردوں نے منشیات مافیا کے تعاون سے سیکورٹی فورسز کی پانچ چوکیوں پر حملے کیے، جنہیں فوری جوابی کارروائی سے ناکام بنا دیا گیا۔ ابتدائی اطلاعات کے مطابق سات دہشت گرد مارے گئے جبکہ زخمیوں کو بعد ازاں اسپتال منتقل کیا گیا، جہاں اسے غلط طور پر ڈرون حملہ ظاہر کرنے کی کوشش کی گئی۔ذرائع کے مطابق زخمیوں کے زخم چھوٹے ہتھیاروں کی فائرنگ سے مطابقت رکھتے ہیں۔ کسی بھی زخمی میں ڈرون حملے کے مخصوص دھماکہ خیز زخم نہیں پائے گئے۔

باجوڑ میں مبینہ ڈرون حملے میں 12 سے 15 دہشت گردوں کی ہلاکت کی اطلاعات موصول ہوئی ہیں۔پولیس کے مطابق اس مقام پر مسلح افراد کی موجودگی کی پہلے سے اطلاع تھی۔ مزید حقائق کی تصدیق جاری ہے۔

شمالی وزیرستان کے اسپین وام کے گاؤں برکلی میں خفیہ اطلاع پر کیے گئے آپریشن کے دوران دہشت گرد عید مرجان کے تین مبینہ سہولت کار گرفتار کر لیے گئے۔گرفتار افراد میں اورنگزیب، امیر الرحمان اور مہرب عابد شامل ہیں۔ تینوں کو تفتیش کے لیے ہیڈکوارٹر منتقل کر دیا گیا ہے۔ عید مرجان کی گرفتاری کے لیے کارروائیاں جاری ہیں۔

باجوڑ میں سیکیورٹی فورسز کی حالیہ انٹیلی جنس بیسڈ کارروائی میں مارے جانے والوں میں کالعدم ٹی ٹی پی کے دو اہم کارندے سجاد اور حبیب کی شناخت کی تصدیق ہو گئی ہے۔سیکیورٹی اہلکاروں کے مطابق علاقے میں دہشت گرد نیٹ ورک کے خاتمے کے لیے کارروائیاں جاری ہیں۔

تیراہ ویلی میں سوشل میڈیا پر پھیلائے جانے والے اس دعوے کی سختی سے تردید کی گئی ہے کہ مسجد پر پاکستانی فورسز نے ڈرون حملہ کیا۔حیات آباد میڈیکل کمپلیکس کے ڈاکٹروں نے تصدیق کی ہے کہ زخمیوں کے زخم معمولی نوعیت کے ہیں اور کسی قسم کا ڈرون حملہ نہیں ہوا۔سیکیورٹی ذرائع کے مطابق واقعہ ذاتی دشمنی کا تھا، جسے فساد پھیلانے کے لیے غلط رنگ دیا جا رہا ہے۔

خیبر ضلع شلوبار میں شلوبار ارجالی ریور پوسٹ پر دہشت گردوں کی فائرنگ کا سیکیورٹی فورسز نے بھرپور جواب دیتے ہوئے حملہ ناکام بنا دیا۔جوابی کارروائی میں متعدد حملہ آور زخمی ہوئے جبکہ سیکیورٹی فورسز کے اہلکار محفوظ رہے۔ علاقے میں سرچ آپریشن جاری ہے۔

اسلام آبادضلعی عدالت کے باہر ہونے والے خودکش دھماکے کی تحقیقات میں پیش رفت سامنے آئی ہے۔

تفتیشی حکام نے تصدیق کی ہے کہ حملہ آور افغانی شہری تھا۔ ابتدائی معلومات کی بنیاد پر کی گئی سرچ آپریشن کے دوران باجوڑ سے تعلق رکھنے والے سہولت کار کو بھی گرفتار کر لیا گیا ہے۔پولیس ذرائع کے مطابق راولپنڈی اور اسلام آباد سے مزید پانچ مشتبہ افراد کو حراست میں لے کر تحقیقات شروع کر دی گئی ہیں تاکہ حملے کے پیچھے موجود نیٹ ورک کا سراغ لگایا جا سکے۔سکیورٹی ذرائع نے مزید بتایا کہ وانا کیڈٹ کالج پر حملے میں ملوث عسکریت پسند بھی افغانی شہری تھے اور یہ حملہ افغانستان میں ہی منصوبہ بندی کے تحت تیار کیا گیا تھا۔ حتمی احکامات کالعدم ٹی ٹی پی کے سربراہ نور ولی محسود نے جاری کیے جبکہ عملی منصوبہ بندی ایک شدت پسند، زاہد، کے ذمے تھی۔ بعد ازاں اس حملے کی ذمہ داری ’’جیش الہند‘‘ کے نام سے قبول کی گئی۔

انٹیلی جنس بیورو اور سی ٹی ڈی کی مشترکہ کارروائی میں دھماکے میں ملوث پورا سیل پکڑا جا چکا ہے، دورانِ تفتیش خودکش حملہ آور کے ہینڈلر ساجد اللّٰہ عرف ’شینا‘ نے اعتراف کیا کہ افغانستان میں موجود ٹی ٹی پی کمانڈر سعید الرحمن عرف ’داد اللّٰہ‘ نے ٹیلی گرام ایپ پر رابطہ کرکے اسلام آباد میں خودکش حملہ کرنے کی ہدایت دی تھی۔حکام کے مطابق خودکش بمبار افغانستان سے پاکستان پہنچا تو اسے اسلام آباد کے نواحی علاقے میں ٹھہرایا گیا۔ داداللّٰہ کی ہدایت پر اس نے پشاور سے خودکش جیکٹ حاصل کی اور اسے اسلام آباد پہنچایا، ساجداللّٰه نے ہی خودکش بمبار کو خودکش جیکٹ پہنائی۔حکام کا بتانا ہے کہ خودکش بمبار عثمان عرف ’قاری‘ کا تعلق شینواری قبیلے سے تھا اور وہ افغانستان کے صوبے نگرہار کا رہائشی تھا۔حکومت کا کہنا ہے کہ ٹی ٹی پی، فتنہ الخوارج کی افغانستان میں موجود اعلیٰ قیادت ہر قدم پر اس نیٹ ورک کی رہنمائی کر رہی تھی۔

لندن میں ہونے والی ورلڈ ٹریول مارکیٹ ٹورازم فیئر کے دوران پاکستانی حکام اور اسرائیلی نمائندوں کے درمیان مبینہ سرکاری ملاقات کی خبریں بے بنیاد اور گمراہ کن ہیں

وہ رپورٹس جن میں کہا گیا کہ پاکستانی حکام نے اسرائیلی نمائندوں سے باضابطہ ملاقات کی، درست نہیں ہیں۔متعلقہ رابطہ ایک عوامی نمائش کے مقام پر ہوا اور یہ بالکل اتفاقی تھا، جیسا کہ بین الاقوامی نیٹ ورکنگ کے دوران عام طور پر ہوتا ہے۔پاکستان اپنی دیرینہ پالیسی پر قائم ہے کہ اس کے اسرائیل کے ساتھ نہ سفارتی تعلقات ہیں اور نہ ہی کوئی سرکاری رابطہ، کسی بھی مصافحے یا بات چیت کو، جو عوامی مقام پر نظر آئی ہو، سرکاری ملاقات یا حمایت تصور نہیں کیا جانا چاہیے۔ یہ دعویٰ بھی بے بنیاد اور گمراہ کن ہے کہ پاکستان غزہ میں کسی بین الاقوامی فورس کا حصہ بننے پر غور کر رہا ہے۔ اسرائیل فلسطین تنازعے پر پاکستان کا مؤقف وہی ہے، یعنی فلسطینی حقوق کی پختہ حمایت، پاکستان بین الاقوامی ٹورازم فیئرز کو محض غیر جانبدار پلیٹ فارمز سمجھتا ہے، جن کا اس کی خارجہ پالیسی یا سفارتی مؤقف سے کوئی تعلق نہیں۔

یہ رپورٹ پاکستان کی خارجہ پالیسی میں کسی حقیقی تبدیلی کی نشاندہی نہیں کرتی یہ محض ایک تصویر ہے جو ٹورازم ایونٹ میں کھینچی گئی، جبکہ اسے ایسے پیش کیا جا رہا ہے جیسے پاکستان اسرائیل کے ساتھ تعلقات قائم کرنے جا رہا ہو، جو درست نہیں۔ اس طرح کی خبریں حقائق بتانے کے لیے نہیں بلکہ ایک مخصوص تاثر پیدا کرنے کے لیے گھڑی جاتی ہیں، تاکہ عوام کو یہ محسوس ہو کہ پاکستان خفیہ طور پر اپنی پالیسی تبدیل کر رہا ہے۔ جب تک حکومت خود کوئی باضابطہ اعلان نہ کرے، ایسے تمام دعوے محض پروپیگنڈا ہیں، حقیقت نہیں۔ پروپیگنڈا اکثر ایسی تصاویر استعمال کرتا ہے تاکہ یہ دکھایا جا سکے کہ کوئی تبدیلی یا معمول پر لانا ہو رہا ہے، حالانکہ اصل پالیسی جوں کی توں ہوتی ہے۔ ایک سادہ سے لمحے کو ’’ اسرائیلی نمائندے سے ملاقات‘‘ بنا کر پیش کرنا دراصل ایک ایسا بیانیہ تخلیق کرنا ہے جو حقیقت پر مبنی نہیں۔ پاکستان کی خارجہ پالیسی میں تبدیلی سے متعلق دفترِ خارجہ کی جانب سے کوئی عوامی یا سرکاری بیان موجود نہیں۔

حکومتی ذرائع نے عوام سے اپیل کی ہے کہ غیر مصدقہ خبروں پر یقین کرنے سے پہلے حقائق کی تصدیق ضرور کریں اور پروپیگنڈا مہمات کے جھانسے میں نہ آئیں۔

جسٹس امین الدین نے وفاقی آئینی عدالت کے پہلے چیف جسٹس کا حلف اٹھالیا ہے

صدر مملکت آصف علی زرداری نے جسٹس امین الدین خان سے ان کے عہدے کا حلف لیا،ایوان صدر میں ہونے والی اس تقریب میں وزیراعظم شہباز شریف، وفاقی وزراء، اراکین پارلیمنٹ، چیئرمین پیپلز پارٹی بلاول بھٹو زرداری شریک ہوئے۔فیلڈ مارشل سید عاصم منیر سمیت پاک بحریہ اور فضائیہ کے سربراہان نے بھی تقریب میں شرکت کی۔ تقریب میں اسپیکر قومی اسمبلی، چیئرمین سینیٹ سمیت اٹارنی جنرل بھی شریک ہوئے۔

ذرائع کا کہنا ہے کہ وفاقی آئینی عدالت کے چیف جسٹس امین الدین خان اسلام آباد ہائیکورٹ کے روم نمبر 1 میں بیٹھیں گے، جبکہ چیف جسٹس اسلام آباد ہائیکورٹ سرفراز ڈوگر کورٹ روم نمبر 2 میں منتقل ہو جائیں گے۔

گزشتہ روز جسٹس امین الدین کی وفاقی آئینی عدالت کے چیف جسٹس کے طور پر تقرری کی گئی تھی،

سینیٹ نے آرمی، ائیرفورس، نیوی ترمیمی ایکٹ اور پریکٹس اینڈ پروسیجر ترمیمی بل منظور کرلیے۔

سینیٹ کا اجلاس چیئرمین یوسف رضا گیلانی کی سربراہی میں ہوا جس میں وفاقی وزرا اسحاق ڈار، خواجہ آصف اور طارق فضل چوہدری نے بل پیش کیے۔ایوان نے پاکستان آرمی ایکٹ، پاکستان ائیر فورس ایکٹ، پاکستان نیوی ایکٹ اور پریکٹس اینڈ پروسیجر ترمیمی بل کثرت رائے سے منظور کرلیے۔ سینیٹ میں بلوں کی منظوری کے موقع پر پی ٹی آئی اور جے یو آئی کے ارکان کی جانب سے بل کی مخالفت کی گئی۔ہمایوں مہمند اور کامران مرتضیٰ نے بل جی مخالفت کرتے ہوئے بل کو کمیٹی میں بھیجنے کا مطالبہ کیا تاہم چیئرمین سینیٹ نے بلوں کی منظوری کے لیے ایوان سے رائے لی جس کے بعد ایوان نے بلوں کو کثرت رائے سے منظور کرلیا۔

ایوان میں اظہار خیال کرتے ہوئے اسحاق ڈار نے کہا کہ ایوان نے27 ویں آئینی ترمیم منظورکی اور اسی سبب ایکٹس میں ترمیم کی ضرورت تھی، آرمی، نیوی اور ائیر فورس ایکٹ میں ترمیم کی گئی۔

راولپنڈی: تاجکستان کے وزیرِ دفاع کرنل جنرل صوبیر زودا امام علی عبدالرحیم نے جنرل ہیڈکوارٹرز (جی ایچ کیو) میں چیف آف آرمی اسٹاف فیلڈ مارشل سید عاصم منیر سے ملاقات کی۔

آئی ایس پی آر کے مطابق ملاقات میں باہمی دلچسپی کے امور، خطے کی سکیورٹی صورتحال اور دوطرفہ دفاعی تعاون پر تفصیلی بات چیت ہوئی۔ دونوں ممالک نے دفاعی شعبے میں موجود تعاون کو مزید مضبوط بنانے کے عزم کا اظہار کیا، خصوصاً تربیت، انسدادِ دہشتگردی اور خطے میں امن و استحکام سے متعلق شعبوں میں شراکت داری بڑھانے پر اتفاق کیا گیا۔تاجک وزیرِ دفاع نے پاک فوج کی پیشہ ورانہ صلاحیتوں کو سراہتے ہوئے خطے میں امن و استحکام کے فروغ کے لیے پاکستان کے مثبت کردار کو خراجِ تحسین پیش کیا۔

آرمی چیف فیلڈ مارشل عاصم منیر نے اس موقع پر کہا کہ خطے کے دیرپا امن و ترقی کے لیے مشترکہ کوششیں ضروری ہیں۔ انہوں نے پاکستان اور تاجکستان کے درمیان دفاعی و سکیورٹی تعلقات کو مزید مضبوط بنانے کے عزم کا اعادہ بھی کیا۔