پی ٹی آئی نے چیف الیکشن کمشنر سکندر سلطان راجہ کیخلاف سپریم جوڈیشل کونسل کو ریفرنس بھجوا دیا
چیف الیکشن کمشنر آئینی ذمہ داریاں ادا نہیں کررہے ان کو عہدے سے ہٹایا جائے،ریفرنس میں حکومتی اتحادیوں کی چیف الیکشن کمشنرسے ملاقات کا بھی ذکر کیا گیا ، دائر ریفرنس میں کہا گیا کہ گزشتہ ماہ پی ڈی ایم نمائندہ وفد نے چیف الیکشن کمشنرسے ملاقات کی تھی، چیف الیکشن کمیشن پر ممنوعہ فنڈنگ کا فیصلہ جلد سنانے کیلئے دباؤ ڈالا گیا، ملاقات کے چند روز کے بعد ہی ممنوعہ فنڈنگ کا فیصلہ سنا دیا گیا،
چیف الیکشن کمشنر کے خلاف ریفرنس تحریک انصاف کے رہنما بابر اعوان کے ذریعے بھجوایا گیا ہے ، ریفرنس میں مزید کہا گیا ہے کہ چیف الیکشن کمشنر جان بوجھ کر بد انتظامی کر رہے ہیں
واضح رہے کہ چیف الیکشن کمشنرپر تحریک انصاف نے فارن فنڈنگ کیس کا فیصلہ سنانے سے قبل ہی الزامات لگانا شروع کر دیے تھے، تحریک انصاف آج الیکشن کمیشن کے خلاف احتجاج بھی کر رہی ہے، تحریک انصاف نے چیف الیکشن کمشنر کے خلاف پنجاب اور خیبر پختونخوا اسمبلی میں قراردادیں بھی پاس کر رکھی ہیں
ترجمان پیپلزپارٹی فیصل کریم کنڈی کی جانب سے ریفرنس پر ردعمل میں کہا گیا ہے کہ پی ٹی آئی کی طرف سے چیف الیکشن کمشنر کے خلاف ریفرنس کھسیانی بلی کھنبہ نوچے کے مترادف ہے، چوری اوپر سے سینہ زوری پی ٹی آئی کا طریقہ واردات ہے ،غیر ملکی ممنوعہ فنڈنگ کی وجہ سے عمران خان خود طاقتور سمجھ رہے ہیں، عمران خان چاہتے تھے کہ الیکشن کمیشن انہیں صادق و امین کا جھوٹا سرٹیفکیٹ دے
دوسری جانب پیپلز پارٹی کی رہنما، وفاقی وزیر موسمیاتی تبدیلی شیری رحمان کا کہنا ہے کہ الیکشن کمیشن کے فیصلے کے بعد احتجاج کے بجائے عمران خان کو پارٹی سربراہی سے مستعفی ہو جانا چاہئے،یہ خیرات کے نام پر بھی غیر ملکی ممنوعہ فنڈنگ لیتے رہے، ایک وزیراعظم کو عدالت نے غلط بیانی کی بنیاد پر نااہل کیا تھا، یہاں معاملہ پیسے نا لینے کا نہیں بلکہ اربوں روپے کی ممنوعہ فنڈنگ لینے، 13 اکائونٹس چھپانے اور مس ڈیکلیریشن کا ہے،قانون اور فیصلے الگ الگ نہیں ہونے چاہئے، عمران خان اور پی ٹی آئی اب قوم سے مزید جھوٹ نہ بولیں
بلدیاتی انتخابات کے دوسرے مرحلے کیلئے حلقہ بندی کیخلاف ایم کیو ایم کی درخواست پر سماعت ہوئی
الیکشن کمیشن اور سندھ حکومت نے حلقہ بندی کیخلاف ایم کیو ایم کی درخواست کی مخالفت کر دی ، وکیل ایم کیو ایم نے سپریم کورٹ میں موقف اپنایا کہ حلقہ بندی میں آبادی کا تناسب یکساں نہیں رکھا گیا، چیف جسٹس عمر عطا بندیال نے استفسار کیا کہ کیا الیکشن کمیشن حلقہ بندی سے مطمئن ہے؟ ڈی جی لا الیکشن کمیشن نے عدالت میں کہا کہ حلقہ بندیاں قانون کے مطابق ہوئی ہیں حد بندی صوبائی حکومت اور انتخابات کرانا الیکشن کمیشن کا کام ہے،وکیل نے کہا کہ جہاں ایم کیو ایم کامیاب ہوئی وہاں ایک یونین کمیٹی 90 ہزار آبادی پر مشتمل ہے پیپلزپارٹی جن علاقوں سے کامیاب ہوتی وہاں یوسی 40 ہزار آبادی پرمشتمل ہے،
وکیل خالد جاوید خان نے کہا کہ اس دلیل کو مان لیا جائے تو قومی و صوبائی اسمبلیوں کی حلقہ بندیاں ختم ہو جائیں گی،قومی اسمبلی کا کوئی حلقہ 3 اور کوئی 9 لاکھ آبادی پر مشتمل ہے، چیف جسٹس عمر عطا بندیال نے ریمارکس دیتے ہوئے کہا کہ تمام فریقین کو 15 اگست کو تفصیل سے سن کر فیصلہ کرینگے،اگست کی 28 تاریخ کو الیکشن ہے اس لیے آئندہ سماعت پر کوئی التوا نہیں دینگے، اکیو ایم کی درخواست خارج بھی کی جا سکتی ہے، ایم کیو ایم کی درخواست صرف شہری علاقوں تک محدود ہے،
پہلے مرحلے میں کامیاب ہونے والے نمائندوں کی فریق بننے کی درخواستیں منظور کر لی گئی سپریم کورٹ نے کیس کی سماعت 15 اگست تک ملتوی کردی
وزیراعظم شہباز شریف کی ڈیرہ اسماعیل خان آمد ہوئی ہے
وزیراعظم شہباز شریف کو ڈیرہ اسماعیل خان میں سیلاب سے تباہ کاریوں سے متعلق بریفنگ دی گئی ،وزیراعظم شہباز شریف کو بریفنگ میں بتایا گیا کہ سیلاب سے متاثرہ علاقوں میں ریلیف اینڈ ریسکیوکا کام جاری ہے سیلاب اور بارش سے متاثرہ افراد کو خوراک فراہم کی گئی،
وزیراعظم شہبازشریف کی ٹانک آمد پر مولانافضل الرحمان،امیر مقام اور اسعد محمود بھی ہمراہ تھے،وزیراعظم شہباز شریف نے سیلاب سے جاں بحق افراد کے لواحقین کے لیے امدادی رقم بڑھاکر 10لاکھ روپے کرنے کی ہدایت کی اور کہاکہ بلوچستان میں بھی ہم نے لواحقین کے لیے امدادی رقم بڑھائی سیلاب متاثرین کی بحالی کے لیے 24گھنٹے کام جاری رکھا جائے
وزیراعظم شہباز شریف کا کہنا تھا کہ خیبرپختونخوا کا موسم بہتر نہ ہونے کے باعث دورہ تاخیر کاشکار ہوا، صوبائی حکومتوں کے ساتھ ملکر سیلاب سے متاثرہ افراد کو امداد فراہم کررہے ہیں خیبرپختونخوا حکومت کے ساتھ مل کر فوری بحالی کے خواہشمند ہیں،ہم نے کچے اور پکے مکان کی تمیز ختم کردی پکا مکان ہو یا کچا جو بھی گرا ہواس کے لیے 2 لاکھ روپے دیئے جائیں گے،آرمی چیف سے متاثرہ علاقوں کے جوائنٹ سروے پر بات کی آرمی چیف نے کہا جوائنٹ سروے اچھا کام ہے انہوں نے حامی بھرلی جوائنٹ سروے سے متاثرین کی حق تلفی نہیں ہوگی صوبائی حکومت فصلوں کے نقصان کا اندازہ لگارہی ہے اس وقت خیبرپختونخوا سے کوئی اختلاف نہیں ،مل کر بحالی کاکام کریں گے ،کوئی سیاست نہیں ہوگی آخری فرد کے پاوں پر کھڑے ہونے اور آخری گھر کے آباد ہونے تک چین سے نہیں بیٹھیں گے وفاق سیلاب سے جاں بحق افراد کے ورثا کو 10 لاکھ روپے دے رہا ہے
وزیراعظم نے خیبرپختونخوا انتظامیہ کی جانب سے ریلیف کاموں میں خصوصی دلچسپی لینے پر تعریف کی اور کہا کہ وزیراعلیٰ خیبرپختونخوا کو میرا سلام دیں، انہیں بتائیں انتظامیہ اچھا کام کر رہی ہے وزیراعظم شہباز شریف نے انتظامیہ خیبرپختونخوا کا پشتو میں شکریہ ادا کیا،وزیراعظم شہباز شریف کا کہنا تھا کہ انسان چلا جاتاہے لیکن کام سے یاد رہتاہے ،ہمیں لگن سے کام کرناچاہیے خلق خدا کی خدمت کرکے آگے بڑھنا ہے، شعبہ صحت میں بھی خیبرپختونخوا حکومت اچھا کام کررہی ہے
پی ڈی ایم سربراہ مولانا فضل الرحمان کا کہنا تھا کہ سیلاب کے باعث ڈیڑھ سو کے قریب لوگوں کے مکانات گرے، خیبرپختونخوا آنے پر وزیراعظم شہبازشریف کا مشکور ہوں وزیراعظم سے درخواست کی کہ وہ سیلاب سے متاثرہ علاقوں کا بھی دورہ کریں
راولپنڈی:لیفٹیننٹ جنرل آصف غفور کو کمانڈر کور 12 کوئٹہ تعینات کر دیا گیا۔پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق لیفٹیننٹ جنرل آصف غفور کو کمانڈر 12 کور کوئٹہ تعینات کر دیا گیا ہے۔
یاد رہے کہ دو روز قبل پاک فوج کا ہیلی کاپٹر لسبیلہ سے لاپتہ ہو گیا تھا جس میں کور کمانڈر کوئٹہ لیفٹیننٹ جنرل سرفراز علی سمیت 6 افراد سوار تھے، گزشتہ روز ان کی شہادت کی تصدیق ترجمان پاک فوج کی جانب سے کی گئی تھی۔
واضح رہے کہ آصف غفور ماضی میں پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) کی ذمہ داری بھی ادا کر چکے ہیں۔ وہ اِس عہدے پر 15 دسمبر 2016ء سے 16 جنوری 2020ء تک فائز رہے۔ اس کے بعد ان کا تبادلہ جی او سی 40 ڈویژن اوکاڑہ کر دیا گیا۔
یاد رہے کہ نومبر 2020ء کو پاکستان آرمی میں 6 میجر جنرل نے لیفٹیننٹ جنرل کے عہدے پر ترقی پائی تھی۔
پاک فوج کے شعبہ تعلقات عامہ آئی ایس پی آر کے مطابق ترقی پانے والوں میں میجر جنرل آصف غفور بھی شامل تھے۔ لیفٹیننٹ جنرل آصف غفور آئی جی کمیونیکیشن اینڈ انفارمیشن ٹیکنالوجی مقرر کر دیے گئے تھے۔
وزیراعظم شہباز شریف کی زیر صدارت حکمران اتحاد کے قائدین کے اجلاس کی اندرونی کہانی کا باغی ٹی وی نے پتہ لگا لیا۔
باغی ٹی وی کی رپورٹ کے مطابق حکمران اتحاد کے قائدین کے اجلاس میں مسلم لیگ ن کے قائد اور سابق وزیراعظم نواز شریف نے اتحادی جماعتوں کو آئندہ 48 گھنٹوں میں پاکستان تحریک انصاف کے خلاف ریفرنس سپریم کورٹ بھیجنے کی ہدایت کردی۔
ذرائع کے مطابق سابق وزیراعظم نواز شریف نے ہدایت کی ہےکہ سپریم کورٹ سے استدعا کی جائےکہ اس ریفرنس کو فل کورٹ سنے۔ نواز شریف کا کہنا تھا کہ ملک دشمن عناصرکے ایجنڈے پر عدم استحکام پیدا کرنے والوں سےکوئی رعایت نہ برتی جائے، انہوں نے کہا کہ عمران خان سی پیک کو رول بیک اور کشمیرکا سودا کرنے میں بھی براہ راست ملوث ہے۔
اس موقع پر قومی وطن پارٹی کے سربراہ آفتاب شیرپاؤ نےکہا کہ اتحادی حکومت کو اب کارکردگی دکھانا ہوگی، حکومت کو مہنگائی کے جن کو ہر صورت قابو کرنا ہوگا۔ اجلاس میں فیصلہ کیا گیا کہ اتحادی جماعتیں ملک بھر میں تحریک انصاف کے خلاف مل کر جلسےکریں گی، ایم کیو ایم کراچی میں اور پیپلز پارٹی حیدر آباد اور سکھر میں جلسے کرےگی۔ جے یو آئی پشاور میں پختونخوامیپ اوربی این پی مینگل کوئٹہ میں جلسہ کریں گی، مسلم لیگ ن لاہور ، راولپنڈی اور اسلام آباد میں جلسے کرےگی، جلسوں میں اتحادی جماعتوں کی تمام قیادت شریک ہوگی۔
قبل ازین بھی سابق وزیراعظم اور مسلم لیگ ن کے قائد نواز شریف نے لندن میں میڈیا کے نمائیندوں سے گفتگو کرتے ہوئے کہا تھا کہ میں یہ سمجھتا ہوں کہ ثاقب نثار صاحب چاہے ریٹائر ہو گئے ہیں لیکن وقت آئے گا اور ان کو ان سب باتوں کا جواب دینا پڑے گا. عظمت شیخ صاحب جو جج تھے ان کو اس بات کا جواب دینا پڑے گا،انہوں نے وٹس ایپ پر کس طرح سے جے آئی ٹی بنائی؟،اب کھوسہ صاحب کو بھی اس بات کا جواب دینا پڑے گا کہ انہوں نے عمران خان کو کہا تم کیوں سڑکوں پر پھرتے ہو ؟ اؤ ہمارے پاس اپنا کیس لے کر آؤ،ہم فیصلہ سنائیں گے.
نواز شریف نے کہا کہ حد ہوتی ہے نا انصافیوں کی ،ظلم کی، ذیادتیوں کی، میرے خلاف ظلم ،ذیادتی ،ناانصافی کرتے کرتے پاکستان کو ڈبو دیا.پاکستان کو نعوزوبلا تباہ وبرباد کر دیا.آج پاکستان کو ایسی جگہ پر پہنچا دیا ہے جہان آج پاکستان کو اپنے پاؤں پر کھڑا کرنا مشکل ہو رہا ہے.پاکستان کی معیشت کا گزشتہ چار سال میں وہ حال کر دیا ہے کہ اس کو وینٹی لیٹر پر لے آئے ہیں،جس کی آج دوبارہ سانس بحال کرنا مشکل ہو رہا ہے.
انہوں نے کہا کہ بے چارے لوگوں کی مہنگائی سے قمر ٹوٹ گئی ہے ، چار سال سے قمر توڑ مہنگائی کا تسلسل چل رہا ہے جو بند ہونے کا نام ہی نہیں لیتا.میں سمجھتا ہوں کہ یہ سب چیزیں پاکستان کے ساتھ زیادتی ہیں. نواز شریف نے کہا کہ میں بڑے پر زور الفاظ میں حکومت سے کہوں گا اور پاکستان کے سیاسی پارٹیوں کو بھی کہوں گا کہ اس میں کردار ادا کریں اس فتنے کی فتنہ بازی اور شرانگیزی کو اب ہمیشہ کیلئے ختم کریں ،آئین اور قانوں کے مطابق اس کے خلاف فوری ایکشن لیں.
ہیلی کاپٹر حادثہ، امریکی ڈرون کے چرچے،جعلی ٹویٹ،سازشی پکڑے گئے
باغی ٹی وی کی رپورٹ کے مطابق بلوچستان میں ہیلی کاپٹر حادثے کے بعد سوشل میڈیا پر پروپیگنڈے کا سلسلہ جاری ہے
ہیلی کاپٹر حادثے کے بعد سماجی رابطے کی ویب سائٹ ٹویٹر پر ایک ٹویٹ کی گئی جس کو لے کر پروپیگنڈے کا طوفان کھڑا کیا گیا ہے، ہیلی حادثے کے بعد جعلی اکاؤنٹ سے کی جانے والی ٹویٹ میں یہ کہا گیا تھا کہ پاکستان میں امریکی ایمبیسی بڑے افسوس سے اطلاع دیتی ہے کہ غلطی سے پاک فوج کے ہیلی کاپٹر کو ڈرون نے ہٹ کر دیا جس کے نتیجے میں اموات ہوئی ہیں ،ٹیمیں کریش کی جگہ لسبیلہ پر پہنچ رہی ہیں ہمیں لیفٹیننٹ جنرل سرفراز علی کی موت پر افسوس ہے
جب اس اکاؤنٹ سے ٹویٹ کی گئی تو اسکے ٹوٹل دو فالورز تھے جو بعد میں بڑھتے گئے، اسکا سکرین شاٹ بھی وائرل ہوا اور پروپیگنڈہ کیا گیا،حقیقت جاننے کے باوجود یہ ایک فیک اکاؤنٹ ہے پی ٹی آئی کے حامی سول میڈیا صارفین نے اس کو لے کر ٹویٹس کیں اور تنقید کی ،جب جعلی اکاؤنٹ سے کی گئی ٹویٹ وائرل ہونے لگی تو اس اکاؤنٹ کا نام بدل دیا گیا
جس اکاؤنٹ سے ہیلی کاپٹر ڈرون سے گرنے کی ٹویٹ کی گئی باغی ٹی وی کی رپورٹ کے مطابق اس اکاؤنٹ سے پہلے بھی کچھ ٹویٹس کی گئی تھیں جنکو ڈیلیٹ کر دیا گیا ہے، وہ ٹویٹس بھارت مین مسلمانوں کو نشانہ بنانے کے حوالہ سے کی جا رہی تھیں
اس بات میں کوئی شک نہیں ہے کہ اس وقت سوشل میڈیا ایک بہت بڑا فتنہ بنا ہوا ہے اور اس فتنے کا دشمن پھرپور استعمال کررہا ہے۔ مزے کی بات یہ ہے کہ اس فتنے کی مدد سے دشمن ہزارون میل دور بیٹھ کر بھی گھروں میں بیٹھے ہوئے معصوم لوگوں تک پہنچ کر بدگمانی پیدا کر رہا ہے، دشمن ہر برے وقت میں حالات سے بھرپور فائدہ اٹھا رہا ہے اور ایسا کوئی موقع ضائع نہیں ہونے دے رہا جس سے وہ قوم میں انتشار اور بدگمانی پھیلا سکتا ہے۔ یہ ہماری بدنصیبی بھی ہے کہ ہمارے اپنے ملک کے لوگ اس میں استعمال ہو رہے ہیں اور دشمن اپنے ہی لوگوں کا روپ دھار کر خوب فساد مچا رہا ہے۔ یہ ساری باتیں میں ہوا میں نہیں کر رہا ہے بلکہ اس کے ثبوت ایسے ہیں آپ وہ ثبوت دیکھ کر حیران رہ جائیں گے
سینئر صحافی و اینکر پرسن مبشر لقمان نے انکشاف کرتے ہوئے کہا کہ دراصل آج کل ہو کیا رہا ہے کہ بڑے ناموں سے جن کی بات معاشرے کے لوگوں کے لیے اہمیت رکھتی ہے ان کے نام سے جعلی اکاونٹ بنا کر فتنہ پھیلا کر مقاصد حاصل کیے جاتے ہیں اور بعد میں اکاونٹ کا نام تبدیل کر لیا جاتا ہے۔ اگر آپ فیس بک یا ٹویٹر استعمال کرتے ہیں تو آپ اس سے بخوبی واقف ہوں گے کہ کس کس سیاستدان، کس کس مذہبی لیڈر اور دیگر اہم رہنماوں کے نام سے اکاونٹ بنے ہوئے ہیں۔ مثال کے طور پر چوہدری نثار کے نام سے کئی اکاونٹ سامنے آتے ہیں جن سے سیاسی طور پر کئی غیر معمولی باتیں کی جاتی ہیں لیکن چوہدری نثار نے ہمیشہ یہ کہا ہے کہ یہ میرے اکاونٹ نہیں ہیں۔ اسی طرح حال ہی میں ایک ہیلی کاپٹر کو بدنصیب واقعہ پیش آیا جس میں پاک فوج کے سینئر افسران بھی سوار تھے جو حادثہ کی صورت میں شہید ہو گئے۔
اسی دن بائیڈن نے ایمن الظوائری کو ڈرون حملے میں اڑانے کی خبر دی۔ پہلے تو تحریک انصاف کے نام نہاد لیڈروں نے یہ سوال پوچھنا شروع کر دیا کہ یہ ڈرون کہاں سے ہو کر گیا تھا۔ لیکن اس کے ساتھ ہی ہمسایہ دشمن ملک نے اس حادثے کے حوالے سے بد گمانی پیدا کرنی شروع کر دی۔ اس کے لیے ایک جعلی اکاونٹ بنایا گیا اس کی پروفائل پر لکھا ہوا تھا Level 2 policy advisor to David blom, US ambassoder to paksitan پھر اس اکاونٹ سے جو Caryn E. Giffordکے نام سے تھا سے ایک ٹویٹ کی گئی کہ پاکستان میں امریکی ایمبیسی بڑے افسوس سے یہ اطلاع دیتی ہے کہ ہمارے ایک Tactical droneنے غلطی سے پاک فوج کے ایک ہیلی کاپٹر کو ٹارگٹ کر دیا جس کے نتیجے میں کچھ اموات ہوئی ہیں، ٹیمیں کریش کی جگہ پر لسبیلہ میں پہنچ رہی ہیں۔ ہمیں لیفٹینٹ جنرل سرفراز علی 12 corpsکے نقصان کا افسوس ہے۔ جب یہ ٹویٹ کہ گئی تو ا سوقت اس اکاونٹ کے فالورز کی تعداد دو تھی۔ جو دیکھتے ہی دیکھتے ایک ہزار تک پہنچ گئی۔ یہ بڑی دلچسپ بات ہے کہ اس کے فالورز کون ہیں۔
ایک ہزار تک فالورز پہنچنے کے بعد اس کے سکرین شارٹس کو پراپیگنڈے کے لیے استعمال کیا گیا اور اکاونٹ کا نام تبدیل کر دیا گیا۔ اور اس اکاونٹ کا نیا نام Chantille Austin رکھ دیا گیا۔ جبکہ پاکستان کے ہیلی کاپٹر پر ٹویٹ کرنے سے پہلے اس اکاونٹ سے ہندو ازم اور مسلمانوں کو ہندوستان میں نشانہ بنانے کے حوالے سے ٹویٹ کی جا رہی تھی۔ جو آپ دیکھ سکتے ہیں۔ جس نے توہین رسالت کرنے والی نوپور شرما کی حمایت کے علاوہ پاکستان کے خلاف بھی ٹویٹ کی ہوئی تھی، جو بعد میں ساری ڈیلیٹ کر دی گئی اکاونٹ کا نام تبدیل کرنے کے بعد۔لیکن اب پھر ان ٹویٹس کو دوبارہ لگا دیا گیا ہے اور کہا گیا ہے کہ میں نے پالیسی کی وجوہات پر وہ ڈیلیٹ کر دی ۔
جبکہ وہ لوگ جو پراپیگنڈا کے لیے فوری ویب سائیٹس بنا کر اس کے اصلی ہونے کا تاثر دینے کے لیے خبریں لگاتے ہیں ان سے ایک ویب سائٹ بھی بنوائی گئی اور یہ خبر وہاں بھی لگائی گئی۔اب آپ اگر ان کے فالورز پر نظر ڈالیں تو حیران ہو ں گے کہ اس میںArmy training command میجر گورو آریا
عائشہ صدیقہ
سبرامینیم سوامی
میجر سرندر پونیا
بھارت کی نیوز ایجنسی اے این آئی
ریپبلک ٹی وی
وزیر اعلی یو ۔ پی ۔۔یوگی ادیتیہ ناتھ
راج ناتھ سنگھ
سمیت بہت سے اہم لیڈروں کے
Verified
اکاونٹ ہیں۔ اب ان لوگوں کے اکاونٹ سے اس طرح کی ٹویٹ ری ٹویٹ ہو گی تو کون ایسا بندہ ہے جو فورا دھوکہ نہیں کھا جائے گا۔اور دوسری سب سے اہم بات یہ ہے کہ تحریک انصاف کے وہ Key board warrier جو Regime change operation کی آڑ میں پاک فوج کو نشانہ بنا رہے ہیں بڑی تعداد میں اس کو فالو کر رہے ہیں۔ اسے فالو کرنے کا مقصد معلومات حاصل کرنا تھا یا کچھ اور ۔ یا یہ ان کے لیے استعمال بھی ہو رہے ہیں یہ کہنا ابھی مشکل ہے۔ لیکن اس میں کئی ایسے بھارتی ایجنٹ ہیں جو تحریک انصاف کے سپورٹر کاروپ دھار کے لگے ہاتھوں اپنے ہاتھ صاف کر رہے ہیں۔اس کا مقصد بھی امریکہ سے پاکستان کے تعلقات کو نقصان پہنچانا ہے، پاکستان میں امریکہ کے لیے نفرت پیدا کرنے ہے، دونوں ملکوں کے تعلقات خراب کر کے پاکستان کے معاشی اور سیاسی حالات کو مزید خراب کرنا ہے۔
مبشر لقمان کا مزید کہنا تھا کہ میں یہ نہیں کہوں گا کہ تحریک انصاف کا سوشل میڈیا بھارت کا ساتھ دے رہا ہے لیکن یہ بات سوچنے کے لائق ہے کہ اگر بھارت کے مفاد میں ہے کہ امریکہ اور پاکستان کے تعلقات خراب کیئے جائیں تو یہاں پاکستان میں لوگ کیوں پاکستان اور امریکہ کے تعلقات کو برباد کرنے پر تلے ہوئے ہیں۔اور پھر کہتے ہیں کہ مین امریکہ کا دشمن نہیں ہوں۔؟
وفاقی وزیر داخلہ رانا ثناء اللّٰہ کا کہنا ہے کہ حکومت نے پی ٹی آئی کو فارن فنڈنگ پارٹی ڈکلیئر کرنے کا فیصلہ کرنا ہے، فوری طور پر یہ کل کے اجلاس میں نتیجہ نہیں آئے گا، ضروری درکار وقت میں یہ کام ہو گا، اس پر کام جاری ہے، کل وفاقی کابینہ میں اس حوالے سے اہم فیصلے ہوں گے۔
انہوں نے کہا کہ کل تحریک انصاف نے الیکشن کمیشن کے سامنے احتجاج کا اعلان کیا، ہمیں محسوس ہوا اس میں ان کی خاص دلچسپی نہیں ہے، کچھ رپورٹس ملی ہیں، عمران خان اور فواد چوہدری کا بیان بھی آیا، رپورٹس کے مطابق یہ الیکشن کمیشن کے سامنے بے نظمی کا ارادہ رکھتے ہیں۔
وزیر داخلہ نے کہا کہ اسلام آباد ہائی کورٹ نے ریڈ زون میں احتجاج پر پابندی لگا رکھی ہے، ریڈ زون میں احتجاج کی قطعاً اجازت نہیں ہے، ریڈ زون میں کسی نے داخل ہونے کی کوشش کی تو پھر گلہ نہیں کرنا، متنبہ کرتا ہوں ریڈ زون کے اندر داخل ہونے کی کوشش نہ کریں۔
رانا ثناء اللّٰہ نے کہا کہ پر امن احتجاج جمہوری دور میں ہر ایک کا حق ہے، مخصوص جگہیں ہیں جہاں پرامن احتجاج کیا جاسکتا ہے، الیکشن کمیشن کے سامنے احتجاج کی اجازت نہیں ہے، قانون کو ہاتھ میں لینے کی کسی کو اجازت نہیں دیں گے۔
انہوں نے کہا کہ الیکشن کمیشن کے فیصلے کے بعد پی ٹی آئی فارن ایڈڈ پارٹی ثابت ہوچکی ہے، عمران خان نے فارن فنڈنگ لی اور پاکستان کی سیاست میں انتشار پھیلایا۔ عدالتوں نےکہا ہے کہ ایچ نائن اور ایف نائن پارک میں احتجاج کریں، احتجاج کی مختص جگہ پر مکمل سیکیورٹی دی جائے گی، ریڈ زون میں زبردستی داخلے پر قانون کے مطابق روکا جائے گا۔
رانا ثناء اللّٰہ نے مزید کہا کہ آنسو گیس کے استعمال کو بھی پھر آپ ظلم اور بربریت سمجھتے ہیں، چار سال ان کے انتقام سے ہم بھیانک شکل سے گزرے ہیں، آپ پرامن احتجاج جمہوری حق کی طرح کریں۔
وزیر داخلہ نے کہا کہ اگر کسی کے خلاف مقدمہ ہے تو اسے گرفتار کریں، عدالت میں پیش کریں، فیصلے سے اگر چوہا نکلا ہے تو احتجاج کیوں رکھا ہے؟
اسلام آباد:حکومتی اتحادی جماعتوں نے چیئرمین پی ٹی آئی عمران خان کو نااہل قرار دینے کیلئے ریفرنس دائر کرنے کا فیصلہ کیا ہے۔پاکستان ڈیموکریٹک موومنٹ (PDM) اور اتحادی جماعتوں کا سربراہی اجلاس وزیر اعظم ہاؤس میں ہوا، وزیر اعظم شہباز شریف اور سربراہ پی ڈی ایم مولانا فضل الرحمان بھی اجلاس میں شریک ہوئے۔
اجلاس میں پیپلزپارٹی کی جانب سے خورشید شاہ، فیصل کریم کنڈی، پلوشہ بہرام اور فاروق ایچ نائیک، جب کہ مسلم لیگ ن کی نائب صدر مریم نواز، مریم اورنگزیب، اعظم تارڑ، رانا تنویر، دیگر جماعتوں کے آفتاب شیرپاؤ، محمود خان اچکزئی، کشور زہرہ بھی شریک ہوئیں، اجلاس میں لندن سے ویڈیو لنک پر نواز شریف اور اسحاق ڈار بھی شریک ہوئے۔
پی ڈی ایم اور حکومتی اتحادی جماعتوں نے اجلاس میں چیئرمین تحریک انصاف عمران خان کو نااہل قرار دینے کیلئے ریفرنس دائر کرنے کا فیصلہ کرلیا۔
اجلاس میں عمران خان اور دیگر پی ٹی آئی رہنماؤں کے نام ای سی ایل میں شامل کرانے پر بھی اتفاق ہوا، وفاقی کابینہ کل اجلاس میں نام ای سی ایل میں ڈالنے سے متعلق فیصلہ کرے گی۔
گزشتہ روز ہونے والے پی ڈی ایم اجلاس کی اندرونی کہانی سامنے آگئی ہے، جس میں دو کمیٹیوں کے قیام کا فیصلہ کیا گیا۔ سیاسی کمیٹی کے سربراہ خورشید شاہ، جب کہ قانونی کمیٹی کے وفاقی وزیر قانون اعظم نذیر تارڑ ہوں گے۔
ذرائع کا کہنا ہے کہ اجلاس میں حکومتی اتحادی جماعتوں کا تحریک انصاف کے خلاف سخت فیصلے کرنے پر اتفاق ہوا، اور فیصلہ کیا گیا ہے کہ الیکشن کمیشن کے فارن فنڈنگ کیس کے فیصلے پر پی ڈی ایم جماعتیں نیا سیاسی بیانیہ بنائیں گی، اور وزیراعظم شہبازشریف نے وزراء کو الیکشن کمیشن (ECP) کے فیصلے پر پی ٹی آئی کو ٹف ٹائم دینے کی ہدایت کردی ہے۔
پی ڈی ایم اجلاس،عمران خان کے خلاف کارروائی سے متعلق غور
باغی ٹی وی کی رپورٹ کے مطابق حکومتی اتحاد کا وزیراعظم شہباز شریف کی زیر صدارت اجلاس ہوا
اجلاس میں پیپلزپارٹی اوردیگر اتحادی جماعتیں شریک تھیں آفتاب شیرپاؤ،محمود اچکزئی ،کشور زہرہ شریک تھے خورشید شاہ،فیصل کریم کنڈی،پلوشہ بہرام اور فاروق نائیک شریک تھے ن لیگ کی نائب صدرمریم نواز بھی پی ڈی ایم اجلاس میں شریک تھیں مریم اورنگزیب،اعظم نذیرتارڑ،رانا تنویر نے بھی شرکت کی ،اجلاس میں الیکشن کمیشن فیصلے پرعمران خان کے خلاف کارروائی سے متعلق غور کیا گیا پی ٹی آئی کے مرکزی اور صوبائی عہدیداروں کیخلاف کارروائی شروع ہوگی پورے پاکستان میں مختلف ٹیمیں بیک وقت کارروائی کریں گی، ایف آئی اے اور دیگر متعلقہ ادارے کارروائی کریں گے عمران خان کیخلاف الیکشن کمیشن کے فیصلے کی روشنی میں کارروائی ہو گی،عمران خان کی نااہلی کیلئے قانونی کارروائی کرنے کا اصولی فیصلہ کر لیا گیا
نجی ٹی وی کے مطابق عمران خان کے ساتھیوں کی گرفتاری اورقانونی کارروائی عمل میں لائی جائیگی، پی ٹی آئی سینٹرل سیکریٹریٹ کے4 ملازمین کو شامل تفتیش کرنے کا فیصلہ کیا گیا ہے پی ٹی آئی کے مرکزی فنانس بورڈ کے 6 ارکان کیخلاف بھی قانونی کارروائی ہوگی،
دوسری جانب پریس کانفرنس کرتے ہوئے پی ڈی ایم کے سربراہ مولانا فضل الرحمان کا کہنا تھا کہ عمران خان اور تحریک انصاف کے خلاف فرد جرم آچکا ہے،عمران خان ایک ملزم نہیں بلکہ اب مجرم بھی قراردیا جا رہا ہے .ثابت ہوچکا ہے کہ تحریک انصاف کو غیر ملکی فنڈنگ ہوئی ہے ,عمران خان الیکشن کمیشن کے فیصلے کے بعد صادق اور امین نہیں رہے عمران خان نے 5سال تک الیکشن کمیشن کے سامنے جھوٹ بولاعمران خان کا بیانیہ ہر دن تبدیل ہوتارہا ہے،الیکشن کمیشن میں جھوٹے سرٹیفکیٹ اور حلف نامہ جمع کیا گیا،ممنوعہ فنڈنگ کیس عمران خان کے خلاف فرد جرم ہے،اب آئین اور قانون کے مطابق کارروئی کی جائے گی،عمران خان عملی طور پر پاکستان کے نااہل ترین حکمران ثابت ہوئے،اس نے اسرائیل اور ہندوستان سے فنڈنگ لی ہے،عمران خان نے الیکشن کمیشن میں جھوٹا بیان حلفی جمع کرایا،16 بینک اکاونٹس الیکشن کمیشن سے چھپائے، ایک دوسرے کو مبارکباد دیتے رہے کہ فیصلہ ہمارے حق میں آگیا،عمران خان نے متعدد غیرملکی کمپنیوں اور غیرملکی شہریوں سے فنڈنگ لی،الیکشن کمیشن کو بلیک میل کیا جا رہا ہے،پی ٹی آئی کی 2013کے بعد کی فنڈنگ کا بھی حساب لیا جائے،
مولانا فضل الرحمان کا کہنا تھا کہ حکومت فوری طور پران کیخلاف کارروائی کرے، ڈاکٹر عارف علوی کو فوری طور پر عہدے سے استعفیٰ دینا چاہئے،فوری طور پر ان کی گرفتاریاں عمل میں لائی جائیں جن کے نا م پر اکاونٹس کھولے گئے ہیں ان کو بھی گرفتار کر کے تحقیقات کی جائیں
قبل ازیں ن لیگی رہنما محمد زبیر نے کہا ہے کہ پی ٹی آ ئی والوں نے فیصلہ رکوانے کی کوشش کی ،ن لیگی رہنما محمد زبیر کا کہنا تھا کہ درخواست اکبر ایس بابر نے دی تھی جو پی ٹی آئی کے ہی رکن ہیں،ہم سمجھے تھے کہہ یہ لوگ تھوڑا بہت شرمندہ ہونگے مگر نہیں ،اگر کوئی مسئلہ نہیں تھا تو 8 سال سے رکوانے کی کوشش کیوں کی ،پی ٹی آئی نے فارن فنڈنگ کیس کی رپورٹ سامنے نہ آنے کیلئے دباؤ ڈالا، پی ٹی آئی والے انگلی اٹھا اٹھا کر پچھلے 10 سال سے ہر ایک پر الزام لگاتے رہے،پی ٹی آئی سپورٹرز 7 صفحے پڑھ لیں ، عمران خان اور پی ٹی آئی سے سوال کریں ،عارف نقوی نے 2012 میں کوئی غلط کام نہیں کیا،آج فواد چودھری نے کہا عارف نقوی پرتو کوئی کیس ہی نہیں،
آرمی چیف کی کوئٹہ میں لیفٹیننٹ جنرل سرفراز علی اور بریگیڈیئر محمد خالد شہید کی نماز جنازہ میں شرکت
باغی ٹی وی کی رپورٹ کے مطابق آرمی چیف جنرل قمر جاوید باجوہ کوئٹہ پہنچ گئے ہیں ڈی جی آئی ایس پی آر کے مطابق آرمی چیف جنرل قمر جاوید باجوہ نے کوئٹہ میں لیفٹیننٹ جنرل سرفراز علی اور بریگیڈیئر محمد خالد شہید کی نماز جنازہ میں شرکت کی، نماز جنازہ میں وزیر اعلیٰ بلوچستان ،گورنر اور اعلی ٰفوجی اور سرکاری افسران نے شرکت کی
ڈی جی آئی ایس پی آر کے مطابق آرمی چیف جنرل قمر جاوید باجوہ نے شہید لیفٹیننٹ جنرل سرفراز علی اور بریگیڈیئر محمد خالد کے اہل خانہ سے ملاقات کی ،آرمی چیف جنرل قمر جاوید باجوہ نے شہید لیفٹیننٹ کرنل لئیق بیگ مرزا کے اہلخانہ سے بھی ملاقات کی
ڈی جی آئی ایس پی آر کے مطابق میجر طلحہ منان ،میجر محمد سعید او رنائیک مدثر فیاض کی نماز جنازہ ادا کردی گئی تینوں شہدا کی نماز جنازہ ان کے آبائی علاقوں میں ادا کی گئی نائیک مدثر فیاض کی نما زجنازہ شکر گڑھ نارووال میں اداکی گئی میجرمحمد سعید کی نماز جنازہ لاڑکانہ میں ان کے آبائی علاقے میں ادا کی گئی میجر طلحہ منان کی نماز جنازہ راولپنڈی میں ادا کی گئی میجر طلحہ منان کی نماز جنا زہ میں چیف آف جنرل اسٹاف لیفٹینٹ جنرل اظہرعباس نے شرکت کی میجر طلحہ منان کی نماز جنازہ میں کورکمانڈر راولپنڈی ساحرشمشاد نے شرکت کی تینوں شہدا کی تدفین کے وقت انہیں گارڈ آف آنر پیش کی گئی تینوں شہدا کی تدفین کے وقت انہیں گارڈ آف آنر پیش کیا گیا
