Category: بین الاقوامی

ایرانی سپاہ پاسداران انقلاب کے شعبہ جامد دفاع کے سربراہ غلام رضا جلالی نے کہا ہے کہ ڈالرکی قیمت امریکا کا کمزور پہلو ہے۔ ایرانی عوام کو چاہیے کہ وہ امریکی کرنسی ڈالر کو سڑکوں پر رکھ کرآگ لگا دیں۔

باغی ٹی وی کی رپورٹ‌کے مطابق انہوں نے ایک اجلاس سے خطاب کرتے ہوئے کہاکہ ترکی کی طرح ایرانی عوام میں‌ بھی امریکی ڈالر کو نذرآتش کرنے کا جذبہ پیدا ہو جائے تو اس سے ایران کی قومی کرنسی پر انحصار بڑھے گا اور یہ اقدام دشمن کی کمزور رگ پر حملے کے مترادف ہوگا۔

غلام رضا جلالی کا کہنا تھا کہ چین، روس، ترکی اور ایران مل کر ڈالر کو عالمی مالیاتی نیٹ ورک سے نکال باہر کریں‌۔اگر مالیاتی لین دین سے ڈالر کو نکال باہر کرنے پر اتفاق رائے ہو جائے تو امریکہ کا اقتصادی طاقت کا گھمنڈ بہت جلد ٹوٹ جائے گا۔

سپاہ پاسداران انقلاب کے رہنما کا کہنا تھا کہ اقتصادی ماہرین نے کہا ہےکہ تیل کی قیمت 120 سے 100 ڈالر فی بیرل ہونے سے ایران کے خلاف امریکی پابندیاں ختم ہو جائیں گی۔ امریکی اور یورپی تیل کی اتنی زیادہ قیمت برداشت نہیں کرسکتے۔

یاد رہے کہ ایران اور امریکہ کے مابین ان دنوں‌سخت کشیدگی پائی جاتی ہے اور دونوں‌طرف سے جارحانہ بیان بازی کی جارہی ہے. ایرانی سپاہ پاسداران انقلاب کی جانب سے ڈالر کو سڑکوں‌پر آگ لگانے کا بیان بھی اسی تناظر میں دیا گیا ہے.

ایران کے نائب وزیر خارجہ عباس عراقچی نے کہا ہے کہ ایران خطہ کے ممالک سے بات چیت کیلئے تیار ہے جبکہ امریکہ کی پابندیوں سے متعلق پالیسی سے مشرق وسطیٰ کی سکیورٹی خطرے سے دوچار ہوگئی ہے۔

باغی ٹی وی کی رپور‌ٹ‌ کے مطابق ایران امریکہ کشیدگی کے پیش نظر دونوں‌ طرف سے جارحانہ بیانات دیے جارہے ہیں اور ایرانی وزیر خارجہ محمد جواد ظریف کی طرح نائب وزیر خارجہ عباس عراقچی بھی مختلف ملکوں کے دورے کررہے ہیں. ان کا یہ بیان بھی سوموار کویتی حکام سے بات چیت کے دوران دیا گیا ہے۔ان کا یہ بیان ایرانی وزارت ِخارجہ کی ویب سائٹ پربھی جاری کیا گیا ہے. ایک دن قبل انہوں‌نے اتوار کو خلیجی ریاست اومان کا بھی دورہ کیا تھا تاہم اب وہ کویت کے بعد قطر کا دورہ کرنے والے ہیں۔

واضح رہے کہ امریکہ کی طرف سے تازہ بیان سامنے آیا ہے جس میں‌کہا گیا ہے کہ ایران بات چیت کیلئے تیار ہوا تو امریکہ بھی اس کیلئے تیار ہے.

برطانوی وزیرِ اعظم تھریسا مے کی طرف سے استعفیٰ‌ دینے کے اعلان پر وزارتِ عظمیٰ کی دوڑ میں برطانوی وزیرِ داخلہ ساجد جاوید بھی شامل ہوگئے ہیں‌۔

باغی ٹی وی کی رپورٹ کے مطابق ساجد جاوید ایک پاکستانی بس ڈرائیور کے صاحبزادے ہیں‌ جن کی پیدائش روش ڈیل میں ہوئی ہے وہ ڈوئچے بینک کے مینیجنگ ڈائریکٹر بھی رہے ہیں۔ 49 سالہ ساجد جاوید کے اعلان کے بعد اب وزارتِ عظمیٰ کے امیدواروں کی تعداد 9 ہوچکی ہے اور وہ کنزرویٹو پارٹی کے سربراہ بننے کی تگ و دو بھی کررہے ہیں۔

تھریسا مے 7 جون کو وزارتِ عظمیٰ کے عہدے سے دست بردار ہوں‌گی . پاکستانی نژاد ساجد جاوید اس وقت برطانوی وزیر داخلہ کے عہدے پر فائز ہیں. ساجد جاوید نے کہاکہ ہمیں بریگزٹ پر کام کرنا اور اس کے لیے اعتماد قائم کرنا ہوگا.

انہوں نے اپنے ٹویٹر پیغام میں ایک ویڈیو پوسٹ کی ہے۔

برطانوی وزیراعظم تھریسامے کے استعفٰی کے اعلان کے بعد برطانیہ کے نئے وزیراعظم کی دوڑمیں پاکستانی نژاد ساجدجاوید ساجدجاویدٹاپ ٹین میں شامل ہیں۔ ساجدجاوید گزشتہ سال برطانوی وزیرداخلہ کےعہدے پرتعینات ہوئےتھے۔ پاکستانی نژاد ساجد جاوید اس سے قبل برطانیہ کی لوکل گورنمنٹ، ہاوسز کے وفاقی وزیر بھی رہ چکے ہیں ۔ ساجد جاوید 2010 سے برطانوی پارلیمنٹ کا حصّہ ہیں۔ وہ برطانیہ کے سابق انویسٹمنٹ بینکر، اور برومزگرو سے ایم پی منتخب ہوکر وزیر برائے بزنس اور ثقافت بھی رہ چکے ہیں۔

تھریسا مے کی طرح وہ بھی یورپی یونین سے برطانیہ کی علیحدگی کے حق میں ہیں جہیں بریگزیٹر بھی کہا جاتا ہے۔ ساجد جاوید کے اعلان سے قبل ایک اور امیدوار ڈومینک راب اپنے مخالفین کو ٹی وی پر مناظرے کی دعوت دے چکے ہیں۔ یہ عمل کنزرویٹو پارٹی میں گہری تقسیم کو بھی ظاہر کرتا ہے۔

انڈین ایئر فورس نے اپنی ایک فارنسک ٹیم فرانس بھجوانے کا فیصلہ کیا ہے تاکہ دیکھا جاسکے کہ رافیل طیاروں سے متعلق اہم راز تو نہیں‌ چرائے گئے. انڈین ایئر فورس کی ٹیم تین سے چار اہلکاروں‌ پر مشتمل ہے جو فرانس میں ہندوستانی رافیل پروجیکٹ مینجمنٹ ٹیم آفس کے کمپیوٹر سسٹم کی جانچ پڑتال کرے گی.

باغی ٹی وی کی رپورٹ کے مطابق بھارتی رافلی ٹیم کا دفتر پیرس کے سینٹ بادل کے مضافات میں فرانسیسی ڈاسٹ ایوی ایشن آفس کے آس پاس ہے.

چند دن قبل ہندوستانی میڈیا نے دعویٰ کیا تھا کہ انڈین ایئر فورس کے دفتر کے تالے توڑ ے گئے جہاں سے 36رافیل لڑاکا جیٹ طیاروں کی حصولی کے امورکی نگرانی کی جارہی ہے۔ بھارتی میڈیا نے ہندوستانی فوجی ذرائع کے حوالہ سے دعویٰ کیا تھا کہ ایئر انڈیا کے دفتر میں بعض افراد جو غیر متعلقہ تھے، کا ایک گروپ گھسا اور رافیل طیاروں سے متعلق اہم راز چوری کرنے کی کوشش کی گئی.

بھارتی میڈیا کے مطابق ایئر انڈیا کی دفتر انتظامیہ کی جانب سے مقامی پولیس کو بھی اس ساری صورتحال سے آگاہ کر دیا گیا جس پر مقامی پولیس نے کہا ہے کہ وہ اس واقعہ کی تحقیقات کر رہی ہے۔ میڈیا رپورٹس میں‌کہا گیا ہے کہ ابتدائی تحقیقات سے پتہ چلا ہے کہ یہاں سے کچھ بھی ڈیٹا یا ہارڈویئر کی چوری نہیں کی گئی۔ بھارتی فضائیہ کا یہ بھی کہنا ہے کہ اس نے واقعہ کی اطلاع ہندوستانی وزارت دفاع کو بھی دے دی ہے۔

باغی ٹی وی کی رپورٹ‌ کے مطابق ہندوستانی میڈیا کا کہنا تھا کہ پیرس میں ہندوستانی سفارتخانہ بھی فرانسیسی حکام کے ساتھ ربط میں ہے۔ آئی اے ایف کا رافیل پراجکٹ مینجمنٹ کا آفس رافیل جیٹ بنانے والی کمپنی ڈسالٹ ایوی ایشن کے کامپلکس میں واقع ہے۔بھارتی میڈیا کے مطابق ہندوستانی وزارت دفاع یا آئی اے ایف کی طرف سے اس واقعہ کے بارے میں سرکاری طور پر کوئی ردعمل ظاہر نہیں کیا گیا ہے۔

یاد رہے کہ رافیل طیاروں‌ کا معاملہ اس سے قبل بھی بھارت میں زیر بحث رہا ہے اور مودی حکومت پر اس حوالہ سے کرپشن کے الزامات لگتے رہے ہیں.

بھارتی ریاست بہار میں ایک مسلم نوجوان کو اپنا نام بتانے پر ہندوانتہاپسندوں کی جانب سے گولی مارنے کا افسوسناک سانحہ پیش آیا ہے. بی جے پی کے الیکشن جیتنے کے بعد مسلمانوں‌پر مسلسل حملے دیکھنے میں آرہے ہیں.

باغی ٹی وی کی رپورٹ کے مطابق یہ واقعہ بھارتی ریاست بہار کے بیگو سرائے علاقہ میں پیش آیا ہے. اس حادثہ سے متعلق آل انڈیا مسلم مجلس اتحاد المسلمین سربراہ اسد الدین اویسی نے بھی ٹوئٹ کیا ہے۔ انہوں نےایک ویڈیو ٹوئٹ کو دوبارہ ٹوئٹ کیا اور لکھا ہے کہ قاسم نےاپنا نام بتا کراپنی زندگی تقریباً کھودی تھی، لیکن یہ سچ ہے کہ میں ڈررہا ہوں۔ یہ پاگل پن کہاں سےآتا ہے؟ ادھر بی جے پی قیادت نے ہمیں پاکستان کے ساتھ جوڑا ہے اور ہم ان کی نظرمیں انسان نہیں ہیں، یہی وجہ ہے کہ ہم نشانے پرہیں.

اسد الدین اویسی نے لکھا ہے کہ مسلمانوں کے خلاف ایک اورتشدد کا سانحہ۔ بہارکے بیگو سرائے میں ایک مسلم ہاکرکوگولی ماردی گئی.
کسی لڑکےنےاس کا نام پوچھا، اس نےکہاکہ میرا نام محمد قاسم ہے جس پر ہندوانتہاپسند نے نازیبا الفاظ کا استعمال کرتے ہوئے کہا ‘تویہاں کیا کررہا ہے، تجھے تو پاکستان میں ہونا چاہئے اوراسے گولی ماردی۔ اسدالدین اویسی نے ٹوئٹ کے ساتھ ایک ویڈیو بھی پوسٹ کی ہے۔

باغی ٹی وی کی رپورٹ‌کے مطابق مسلم نوجوان کو گولی مارنے سے متعلق بریار پور تھانے میں کیس درج کر لیا گیا ہے اور پولیس کا کہنا ہے کہ وہ ملزم کو گرفتار کرنے کی کوشش کررہی ہے. سوشل میڈیا پر زخمی ہونے والے نوجوان کی ویڈیو پر گردش کر رہی ہے جس میں اسے اپنی آپ بیتی سناتے ہوئے دیکھا جاسکتا ہے. گولی مارنے والے ہندوانتہاپسند کا نام راجیو یادو بتایا جارہا ہے.

بھارتی وزیراعظم نریندر مودی کی لوک سبھا انتخابات میں‌ کامیابی کے بعد تقریب حلف برداری 30 مئی کو ہو گی.

باغی ٹی وی کی رپورٹ‌کے مطابق ہندوستانی وزارت خارجہ کا کہنا ہے کہ تقریب میں‌ کرغزستان کے صدر ،موریطانیہ کے وزیراعظم بھی مدعو ہیں تاہم بھارتی میڈیا نے کہا ہے کہ مودی کی حلف برداری تقریب میں‌پاکستانی وزیر اعظم عمران خان کو دعوت نہیں‌ دی گئی.

بھارتی وزارت خارجہ نے کہا ہے کہ حلف برداری کی تقریب میں بنگلادیش،بھوٹان، میانمار،نیپال، سری لنکا، تھائی لینڈ کےسربراہان کو بھی دعوت دی گئی ہے. واضح رہے کہ ہندوستانی وزیر اعظم نریندر مودی نے حالیہ الیکشن میں بھاری اکثریت سے کامیابی حاصل کی ہے اور وہ دوسری مرتبہ وزیر اعظم کا حلف اٹھانے والے ہیں.