Category: بین الاقوامی

عالمی ادارہ صحت (ڈبلیو ایچ او) نے ماحولیاتی آلودگی سے متعلق ایک رپورٹ جاری کی ہے جس میں‌ ماحولیاتی آلودگی سے دنیا بھر میں ہر سال 70 تا 80 لاکھ افراد موت کے منہ میں جانے کا انکشاف کیا ہے۔

باغی ٹی وی کی رپورٹ کے مطابق رپورٹ میں‌ ماحولیاتی آلودگی کو بین الاقوامی مسئلہ قرار دیا اور کہا گیا ہے کہ 2016 کے دوران 6 لاکھ بچوں کی اموات ماحولیاتی آلودگی سے ہوئی ہے اور یہ معاملہ کسی ایک علاقے یا ملک کا مسئلہ نہی ہے بلکہ یہ بین الاقوامی معاملہ کی حیثیت اختیار کر چکا ہے.

رپورٹ میں کہا گیا ہے کہ عرب ممالک کے بچے ماحولیاتی آلودگی کا زیادہ شکار ہو رہے ہیں. اسی طرح یہ بھی کہا گیا ہےکہ کم اور اوسط آمدنی والے ممالک جن میں‌ براعظم افریقہ ، جنوب مشرقی ایشیاء ، مشرق وسطیٰ اور بحر الکاہل کے مغربی علاقے شامل ہیں، اس کی زد میں زیادہ ہیں۔

اپریل 2019ء کے دوران لانسیٹ پلانٹری ہیلتھ نے کہا تھا کہ عرب بچوں میں نائٹروجن ڈائی آکسائیڈ سے لگنے والے دمے کے مرض کی شرح پوری دنیا میں سب سے زیادہ ہے۔ اسی طرح یہ بھی کہا گیا ہے کہ عرب ممالک میں کویتی بچے نظام تنفس کی بیماری میں سب سے زیادہ مبتلا ہیں۔ سالانہ ایک لاکھ بچوں میں سے 550 کویتی بچے دمے میں مبتلا ہو رہے ہیں۔ اس معاملہ میں‌متحدہ عرب امارات کا نمبر دوسرا ہے جہاں سالانہ 440 بچے دمے کا شکار ہو رہے ہیں۔ سعودی عرب اس سلسلہ میں‌ پوری دنیا میں 17ویں نمبر پر ہے۔

یاد رہے کہ ماحولیاتی آلودگی اس وقت دنیا کا بہت بڑا مسئلہ بن چکا ہے اور آئے دن اس مسئلہ پر اجلاس بھی ہوتے ہیں‌تاہم ابھی تک اس پر قابو پانے کیلئے کوئی مضبوط لائحہ عمل اختیار نہیں‌کیا جاسکا ہے.

مارکسی کمیونسٹ پارٹی(سی پی ایم)نے بی جے پی پر الزام عائد کیا ہے کہ الیکشن جیتنے کے بعد وہ تری پورہ ریاست میں مسلمانوں اور دیگر اقلیتوں‌کے خلاف فسادات کی آگ بھڑکانے کی کوشش کر رہی ہے.

باغی ٹی وی کی رپورٹ‌کے مطابق کیمونسٹ پارٹی نے کہاکہ تری پورہ میں‌ بی جے پی کے برسراقتدار آنے سے اقلیتی اکثریتی علاقوں بشال گڑھ، ادے پور،سونم پورا،جرانیا اور اگرتلا کے سرحدی اور کچھ مضافاتی علاقوں میں فرقہ وارانہ تنازعہ کا خطرہ ہے۔ بی جے پی انتخابات کے نتائج کے اعلان کے بعد سے ریاست کے اقلیتی اور قبائلی اکثریتی علاقوں میں فرقہ وارانہ تنازعہ کو فروغ دینے کا الزام لگا رہی ہے جس سے حالات بگڑ رہے ہیں۔

سی پی ایم لیڈر اور سابق رکن پارلیمنٹ جتیندر چودھری نے الزام لگایا کہ بی جے پی شرارتی عناصروں کوپناہ دے رہی ہے جو مذہب کے نام پر اقلیتی اور بدامنی کے شکار علاقوں میں فرقہ وارانہ تناؤ پھیلانے کی کوشش کررہے ہیں۔ ذات پات پر مبنی تناؤ بھی پھیلایا جارہا ہے.
سبھی غیر سماجی عناصر مقامی لیڈروں کے ذریعہ سے بی جےپی میں شامل ہوگئے اور بھاری رقوم لے کر ریاست کے مختلف حصوں میں وسیع سطح پر تشدد کررہے ہیں جو اب بی جےپی اور وزیراعلی وپلو کمار دیو کے کنٹرول سے باہر ہے۔

یاد رہے کہ بی جے پی کے برسراقتدار آنے کے بعد سے مسلمانوں‌پر تشدد کے واقعات بڑھ گئے ہیں. سوموار کے دن ایک مسلم نوجوان کو ٹوپی پہننے پر تشد د کا نشانہ بنایا گیا ہے جبکہ ایک دن قبل مسلم خاندان کو گائے کا گوشت رکھنے پر تشدد کا نشانہ بنایا گیا اور ایک خاتون سمیت تین افراد کو زخمی کر دیا گیا تھا.

بھارت میں اپوزیشن جماعت کانگریس نے حالیہ انتخابات میں شکست کا جائزہ لینے کیلئے پانچ رکنی کمیٹی تشکیل دی ہے.

باغی ٹی وی کی رپورٹ‌کے مطابق دہلی کانگریس کی صدر شیلا ڈکشت کا کہنا ہے کہ دہلی میں پارٹی کی لوک سبھا الیکشن میں شکست فاش کی وجوہات کا پتہ لگانے کی کوشش کی جائے گی۔

پانچ رکنی بنائی گئی کمیٹی میں سابق رکن پارلیمنٹ پرویز ہاشمی، سابق وزیر ڈاکٹر اے کے والیا ،ڈاکٹر یوگا نند شاستری، کانگریس کے قومی ترجمان پون کھیڑا اور سابق رکن اسمبلی جے کشن شامل ہیں۔

اس کمیٹی کو یہ ٹارگٹ بھی دیا گیا ہے کہ یہ عام انتخابات میں پارٹی کی فتح کو یقینی بنانے کا طریقہ بتلائے گی اور 2020 میں دہلی میں ہونے والے اسمبلی انتخابات میں پارٹی کی جیت یقینی بنانے کی منصوبہ بندی کی جائے گی۔

یاد رہے کہ کانگریس کو حالیہ لوک سبھا الیکشن میں‌بری طرح شکست کا سامنا کرنا پڑا ہے اور بی جے پی تنہا تین سو سے زائد سیٹیں‌ لے گئی ہے.

امریکی صدر ڈونلڈ ٹرمپ نے کہا ہے کہ اگر ایران امریکہ سے بات چیت کا خواہشمند ہوا تو میں بھی اس کے لئے تیار ہوں. یہ بات انہوں نے جاپانی وزیراعظم شنزو آبے کے ساتھ ملاقات کے دوران کہی ہے.

باغی ٹی وی کی رپورٹ‌ کے مطابق ٹرمپ نے کہا کہ کوئی بھی یہ نہیں‌ چاہتا کہ بدترین چیزیں‌ پیش آئیں. میں‌ سمجھتا ہوں کہ ایران بات چیت کا خواہش مند ہے۔ اگر اس کی طرف سے اس خواہش کا اظہار کیا گیا تو ہم بھی اس کے خواہش مند ہیں۔ انہوں نے کہا کہ ہم دیکھیں گے کہ کیا ہوتا ہے تاہم میں ایک حقیقت جانتا ہوں کہ وزیراعظم شنزوآبے کے ایران کی قیادت کے ساتھ قریبی تعلقات ہیں۔

امریکی صدر نے کہا کہ امریکہ اور شمالی کوریا کے درمیان بڑا اور متبادل احترام پایا جاتا ہے۔ انہوں نے جاپانی وزیراعظم سے بات چیت میں کہا کہ شمالی کوریا کے ساتھ بہت سی اچھی چیزیں ہوں گی، ہم نے بڑا فاصلہ طے کر لیا ہے۔ ملاقات کے دوران جاپانی وزیراعظم شنزو آبے نے کہا کہ انہوں نے امریکی صدر کے ساتھ شمالی کوریا، اقتصادی معاملات اور آئندہ جی 20 سربراہ اجلاس کے حوالے سے بات چیت کی۔

یاد رہے کہ ایران اور امریکہ کے مابین ان دنوں‌کشیدگی چل رہی ہے اور دونوں اطراف سے جارحانہ بیان بازی دیکھنے میں آرہی ہے. امریکی صدر نے قبل ازیں دھمکی دیتے ہوئے یہ بھی کہا تھا کہ اگر جنگ ہوئی تو ایران ختم ہو جائے گا جبکہ ایران نے اس دھمکی پر شدید ردعمل ظاہر کیا تھا.

بھارتی انتخابات میں بی جے پی کی کامیابی کے بعد ہندو انتہا پسند آپے سے باہر ہو چکے ہیں اور انہوں نے مسلمانوں پر تشدد کا سلسلہ شروع کر دیا ہے. بھارتی ریاست ہریانہ میں ٹوپی پہن کر بازار سے گزرنے والے مسلم نوجوان کو ہندو انتہا پسندوں نے تشدد کا نشانہ بنایا .اور جے شری رام کا نعرہ لگانے پر مجبور کیا.

باغی ٹی وی کی رپورٹ کے مطابق بھارتی ریاست ہریانہ کے علاقے گروگرام میں ایک مسلمان لڑکا ٹوپی پہنے بازار سے گزرا توہندو انتہا پسندوں نے اسے روکا، ٹوپی اتاری اور تشدد کا نشانہ بنایا، ہندو انتہا پسندوں نے مسلم نوجوان کو کے شری رام کا نعرہ لگانے پر بھی مجبور کیا. عالم نامی نوجوان کے ساتھ یہ واقعہ اس وقت پیش آیا جب وہ نماز پڑھ کر مسجد سے گھر جا رہا تھا. عالم نے پولیس میں ہندو انتہا پسندوں کے‌ خلاف کاروائی کے لئے درخواست دے دی ہے. جس میں اس نے لکھا کہ ہندو انتہا پسندوں نے اسے کہا کہ یہاں ٹوپی پہننے کی اجازت نہیں. مجھے شدید تشدد کا نشانہ بنایا گیا،ہندو انتہا پسندوں نے ’بھارت ماتا کی جے‘ کا نعرہ لگانے کے لیے کہا۔ ان کے کہنے پر میں نے نعرہ لگا دیا۔ اس کے بعد انھوں نے مجھے ’جے شری رام‘ بولنے کے لیے بھی مجبور کیا، لیکن میں نے ایسا کرنے سے انکار کر دیا۔ اس کے بعد ہندو انتہا پسندوں نے لاٹھی سے میری بری طرح پٹائی کی۔ مسلمان نوجوان کی چیخ و پکار سن کر مقامی لوگ مدد کی لئے آئے تو ہندو انتہا پسند فرار ہو گئے. گروگرام شہر کے اے سی پی راجیو کمار نے اس حوالہ سے کہا کہ واقعہ کے متعلق تھانہ میں تعزیرات ہند کی دفعہ 153، 149، 323 اور 506 کے تحت ایک ایف آئی آر درج کی گئی ہے. مدعی کا میڈیکل بھی کروایا گیا ہے. ۔ ملزموں کو گرفتار کرنے کی کوشش کریں گے.

واضح رہے کہ گروگرام میں مسلمانوں پرہندو انتہا پسندوں کے تشدد کے کئی واقعات گزشتہ ایک سال میں سامنے آ ئے ہیں ۔

حوثی باغیوں نے سعودی عرب کے ائیر پورٹ پر ڈرون حملہ کی کوشش کی جس کو سیکورٹی فورسز نے ناکام بنا دیا ہے

باغی ٹی وی کی رپورٹ کے مطابق حوثی باغیوں نے جیزان میں ملک عبداللہ ایئرپورٹ پر فوجی تنصیبات کو ڈرون حملے کے ذریعہ نشانہ بنایا ہے۔ کرنل ترکی المالکی نے کہا ہے کہ ڈرون کو تباہ کر دیا ہے ،ائیر پورٹ ہزاروں لوگ استعمال کرتے ہیں سویلین لوگوں‌کو خصوصی حفاظت کی ضرورت ہے، سویلین لوگوں‌ پر حملہ بنیادی انسانی قوانین کے خلاف ہے.
سعودی عرب پر بہت زیادہ تنقید کی گئی کہ اس نے یمن پر ائیر سٹرائک کیں. تا ہم دوسری جانب حوثی باغی مسلسل دو ہفتوں سے سعودی عرب پر میزائل و ڈرون حملے کر رہے ہیں ،تیل کی تنصیبات پر حملوں کی ذمہ داری بھی حوثی باغیوں نے قبول کی، حوثی باغیوں نے دعویٰ کیا تھا کہ وہ سعودی عرب کی اہم تنصیبات پر حملہ کریں گے. حالیہ کشیدگی کا تعلق ایران اور امریکہ کے ساتھ موجودہ کشیدگی کے ساتھ بھی ہے.

واضح رہے کہ حوثی باغی اس سے قبل نجران کے ایئر پورٹ کو بھی نشانہ بنا چکے ہیں۔ گذشتہ دو ہفتے میں سعودی عرب کے مختلف شہروں میں میزائل اور ڈرون حملوں میں اضافہ دیکھنے میں آیا ہے۔

بھارت میں لوک سبھا انتخابات میں شکست کے بعد کانگریس کے صدر راہل گاندھی استعفیٰ دینے پر بضد ہیں اور انہیں‌ منانے کی کوششیں کی جارہی ہیں.

باغی ٹی وی کی رپورٹ کے مطابق کانگریس ورکنگ کمیٹی میں انہوں نے استعفیٰ کی پیش کش بھی کی لیکن اسے منظور نہیں‌ کیا گیا. کہا جارہا ہے کہ راہل گاندھی پارٹی صدر کے عہدہ پر قائم رہنے کیلئے اب تیار نہیں ہیں اور ان کی خواہش ہے کہ اب کوئی اور یہ ذمہ داری سنبھالے.

کانگریس کی ورکنگ کمیٹی اجلاس میں‌ پرینکا کا نام بھی لیا گیا تاہم راہل گاندھی نے کہاکہ میری بہن کو اس معاملہ میں مت کھینچیں کانگریس کا نیا صدر گاندھی خاندان سے باہر ڈھونڈنا چاہیے. ورکنگ کمیٹی کا اجلاس چھ گھنٹے تک جاری رہا جس میں حالیہ انتخابات میں شکست کا جائزہ لیا گیا.

ورکنگ کمیٹی اجلاس میں‌ راہل کی والدہ سونیا گاندھی، بہن پرینکا گاندھی اور سابق وزیر اعظم منموہن سنگھ بھی موجود تھے. اس موقع پر راہل گاندھی کا کہنا تھا کہ وہ کانگریس کے سپاہی ہیں‌اور بغیر کسی عہدہ کے بھی لڑتے رہیں گے.