Category: اسلام

تاریخ گواہ ہے کہ فلاح و کامرانی اور نفع مندی کے تمام اعمال انبیا کا شیوہ رہے اور انہی اعمال کا بدلہ جنت ہے۔ انبیا ہمیشہ لوگوں کے لئے منارۂ نور (روشنی کا مینار) بنے۔ انبیا نے دنیا کے تمام معزز اور عظیم کام سر انجام دئیے۔ انبیا نے انسانوں کو جنت کا راستہ دکھایا انہیں رب کی طرف بلایا اور معصیت میں پڑنے سے ڈرایا اور آج یہ ہی امت مسلمہ کا مقصد حیات ہے۔
الله رب العزت کا فرمان ہے:
کُنۡتُمۡ خَیۡرَ اُمَّۃٍ اُخۡرِجَتۡ لِلنَّاسِ تَاۡمُرُوۡنَ بِالۡمَعۡرُوۡفِ وَ تَنۡہَوۡنَ عَنِ الۡمُنۡکَرِ وَ تُؤۡمِنُوۡنَ بِاللّٰہِ ؕ ﴿۱۱۰﴾
تم بہترین امت ہو جو لوگوں کے لئے پیدا کی گئی ہے کہ تم نیکی کا حکم دیتے ہو اور برائی سے روکتے ہو،اور اللہ تعالٰی پر ایمان رکھتے ہو۔
(سورہ آل عمران:110)
آپ غور کریں کہ رب العزت کی ساری مخلوقات کتنے کام سر انجام دے رہی ہیں۔ فرشتے الله کے حکم سے اپنی خدمات سر انجام دے رہے ہیں۔ اسی طرح سورج، چاند، ستارے سب الله کے حکم سے کائنات میں روشنی پھیلانے کا کام کر رہے ہیں۔ لیکن یہ ساری روشنیاں انسان کی مادی زندگی سے تعلق رکھتی ہیں۔ اور جیسے اقبال نے کہا:
"ڈھونڈنے والا ستاروں کی گزرگاہوں کا
اپنے افکار کی دنیا کا سفر کر نہ سکا-
وہ جس نے سورج کی شعاؤں کو گرفتار کیا
زندگی کی شبِ تاریک سحر کر نہ سکا-”
یعنی آج کا انسان ستاروں کے راستے تلاش کرتا ہے سورج کی شعاؤں پر کام کر رہا ہے یقیناً یہ نفع مندی کے کام ہیں لیکن اس سے بھی نفع مند اور عظیم کام لوگوں کو رب کی معرفت کرانا، انہیں رب کی طرف بلانا اور جنت کے راستے پہ چلانا ہے اور یہ ہی زندگی کی شبِ تاریک کو سحر کرنے کا کام ہے جو آج نہیں ہو پا رہا۔ آج ہم بے چینی اور انتشار کا شکار ہیں۔ آج ہم دن رات مادی ضروریات کے حصول کے لئے کوشاں ہیں۔ اور اس مادی جدوجہد میں جنت کا راستہ ہم سے کہیں کھو گیا ہے۔ آج ہمیں ہماری ذات کا پتہ نہیں چلتا ہمیں اپنے رب کا کھوج نہیں ملتا جس نے ہمیں پیدا کیا، آج ہم نے جنت کے راستے کو چھوڑ دیا ہے:
"آئے تھے کیا کرنے اور کیا کر چلے؟”
انسان ہمیشہ یہ ہی سوچتا ہے کہ اپنی ذات اور روزی کے حصول کے لئے جو کام کئے جائیں وہ ہی اصل کام ہیں۔ اسطرح اسکے مادی وجود کے لئے روزی کا اہتمام ہوجاتا ہے۔ زندگی آگے بڑھتی چلی جاتی ہے اسے جینے کے لئے سب کچھ حاصل ہو جاتا ہے پھر اسے سمجھ نہیں آتی کہ اب تمام قوتیں مل گئیں جینے کے لئے سب کچھ حاصل ہو گیا اب کیا کروں؟
اب ذہنی دباؤ کیوں؟
کیونکہ وہ سب سے افضل کام نہیں کرتا وہ سب سے عظیم کام جو حقیقی نفع مندی کا راستہ ہے وہ کام "دعوت الی الله” ہے۔ داعی الی الله (الله کی طرف بلانے والا) کائنات کا خوش نصیب ترین انسان ہے کیونکہ وہ منارۂ نور (روشنی کا مینار) ہوتاہے وہ خود روشن ہوتا ہے اور اسکی روشنی دوسروں تک پہنچتی ہے۔ وہ لوگوں کو رب سے جوڑتا ہے انہیں جنت کے راستے کیطرف بلاتا ہے۔ داعی الی الله جہاں کہیں بھی ہوتا ہے اسکے توسط سے ایمان کی روشنی ارد گرد پھیلتی ہے۔
اگر آج دیکھیں تو ہر طرف دشمنان اسلام غالب ہیں۔ مسلمانوں پر طرح طرح کے مظالم ڈھائے جا رہے ہیں۔ اسکی ایک اہم وجہ مسلمانوں کا دعوت الی الله کا کام نہ کرنا ہے۔
تو اپنا مقصدِ حیات پہچانئیے اور منارۂ نور بن جائیے لوگوں کو رب سے جوڑ دیں دعوت الی الله ایک مومن کی ذمہ داری ہے۔دعوت شہد ہے یہ پہلے داعی کے اندر تیار ہوتا ہے۔ پھر لوگوں کو فائدہ پہنچتا ہے جب داعی دعوت دیتا ہے تب اس میں لوگوں کے لئے شفا ہے۔ یہ بشیر و نذیر کا کردار ہے دوسروں پر واضح کرنا کہ الله تعالیٰ نیکیوں پر کیا اجر دینے والا ہے اور گناہوں پر کیسی پکڑ کرنے والا ہے۔
الله سے دعا ہے کہ ہمیں بہترین منارۂ نور بنائیں اور ہم یہ نورپھیلانے کا کام تاحیات جاری رکھ سکیں۔ آمین
@Nusrat_186

قرآنی تمثیلات پر اپنے انداز میں ایک عالمانہ تبصرہ ہے جو تفہیمی افادیت کا حامل ہے آج کی تحریر کا انتساب بڑا اچھوتا اور ایمان افروز ہے درحقیقت یہ تحریر اُن لوگوں کے نام ہے جو حق و صداقت کا ادراک کرکے اسے منافقت اور مصلحت کے پردے میں نہیں چھپاتے بلکہ بلا خوف و خطر اعلان کرکے اصحاب عزیمت کی قیادت کرتے ہیں

بے خطر کود پڑا آتشِ نمرود میں عشق
عقل ہے محوِ تماشائے لبِ بام ابھی

اب میں اپنے دعوے پر قرآن کی ایک تمثیل بیان کر کے موضوع کو واضح کرتا ہوں

وَکُنْتُمْ اَزْوَاجاً ثَلثَۃً
اور تم ہوجاؤ تین گروہ

اللہ تبارک و تعالیٰ نے اپنے قرآنِ مجید فرقانِ حمید کے ستائیسویں پارے کے سورہ واقعہ کی آیت نمبر 7 سے لیکر آیت نمبر 46 تک قیامت کے دن نوعِ انسانی کے تین گروہوں میں تقسیم کرنے کا ذکر فرمایا اور
ان تینوں گروہوں کو انکے اعمال کی نسبت سے تقسیم کیا گیا ہے
اور اس تقسیم کی نسبت سے انکے ساتھ جزاء و سزا کا معاملہ طے ہونا بتلایا گیا ہے

اللہ تعالیٰ ان آیات میں فرماتا ہے
نوعِ انسانی قیامت کے دن تین گروہوں میں بٹ جائے گی ایک دائیں بازو والے ۔ دوسرے بائیں بازو والے ۔ اور تیسرے سب سے آگے آگے

سبقت لے جانے والا گروہ……….

اور یہی تیسرا گروہ اللہ تعالیٰ کے انبیاء صدیقین شہداء صالحین اور مقرّبین کا ہوگا
جن کو انعام کے طور پر نعمت کے باغ عطا ہوں گے ۔ یہ سونے سے بنے پلنگوں پر گاؤ تکیے لگائے ایک دوسرے کے بالمقابل بیٹھے ہوں گے
انکے ارد گرد ستھری شراب کے آب خورے اور جام لئے ہوئے خوبصورت لڑکے پھر رہے ہوں گے ۔ یہ شراب ایسی ہوگی جس سے نہ طبیعت میں گرانی ہوگی اور نہ نشہ ۔ اُن کیلئے پھل ہوں گے جو وہ منتخب کریں گے ۔
اور اُڑتے پرندوں کا گوشت جس قسم کا ان کا جی چاہے اور بڑی بڑی آنکھوں والی خوبصورت دوشیزائیں ہوں گی جو لڑی میں پروئے ہوئے موتی کی طرح ہوں گی ۔ ایسے ماحول میں وہاں گفتگو جھوٹ سے پاک اور سلامتی والی ہوگی اور یہ سب بدلہ ہوگا اُن کے اعمال کا .
دائیں بازو والا گروہ…………

یہ وہ گروہ ہے جو بیری کے کانٹوں سے پاک درختوں میں رہتے ہوں گے ۔ اُن کے لئے کیلے تہہ در تہہ ہوں گے ۔ گھنی چھاؤں ہوگی ۔ بہتا ہوا پانی پینے کو ہوگا ۔ اور میوے کثرت سے ہوں گے ۔ جو نہ گھٹیں گے اور نہ ہی اُن کے میووں کے کھانے میں کوئی رکاوٹ ہوگی اور اونچی باعزت بیٹھنے کی جگہیں ہوں گی ۔ بچھونے لگے ہوں گے ۔ دوشیزائیں جن کو جسمانی اور روحانی لحاظ سے ایک خاص معیار پر بنایا گیا ہے اور وہ دوشیزائیں ایسی کہ جو دل کو لبھاتی ہیں ایک ہی عمر کی اور کنواریاں ہوں گی اور یہ سب انعام دائیں بازو والوں کیلئے ہے نیز اس گروہ میں اگلوں اور پچھلوں سے بھی لوگ کثرت سے شامل ہوں گے .
بائیں بازو والا گروہ……….

اس گروہ کا حال یہ ہے کہ وہ آنچ کی بھاپ اور جلتے پانی میں ہوں گے ۔ اور ان کے سروں پر دھوئیں کی چھاؤں ہوگی جو نہ ٹھنڈی ہو گی اور نہ ہی عزت کی ہوگی .
ہاں البتہ اس مقام سے پہلے وہ بڑے آسودہ حال لوگ تھے اور گناہوں کی لذت میں ڈوبے ہوئے تھے اور گناہوں پر ضد کے مصر رہے
اس گروہ کی بدبختی یہ ہے کہ انہوں نے دنیا میں اپنی آسودہ حالی کو حصولِ رحمتِ خداوندی کیلئے استعمال نہیں کیا ۔ یہ بائیں بازو والے اپنے نظریات ایمانیات اور اعمال کے لحاظ سے اللہ تعالیٰ کے غیض و غضب کا شکر ہوئے ۔ اپنی انانیت تکبر و غرور میں بھرے خود کی موت سے انجان اور دوسروں کی زندگی میں تاک جھانک اپنا کام سمجھنے والے
زندگی کے اصل مقصد کو بھلا کر رب تعالیٰ کو راضی کرنے کے بجائے اپنے خالقِ حقیقی کی نافرمانیوں میں اپنے رات دن بسر کرنے والے یہ وہی لوگ ہیں جنہیں قرآن مجید میں اللہ رب العزت نے بائیں بازو والے نام سے مخاطب فرمایا ہے جبکہ اپنے پاک کلام میں اللہ عزوجل نے حیاتِ دنیاوی کو کھیل کود تماشہ اور باہم ایک دوسرے پر فخر کرنے کا محض سامان قرار دیا ہے اور شاید یہی وجہ ہے کہ لوگ دنیاوی ساز و سامان کے چکر میں اپنا ایمان اخلاقیات کردار گفتار اور رشتے تک پسِ پشت ڈال دیتے ہیں

خلاصہ سبق…………
ایک انسان کو چاہیے کہ وہ اپنی طاقت بھرپور یہ کوشش کرتا رہے کہ وہ اپنے امورِ خانہ دار کے ساتھ ساتھ اپنے مہربان رب العالمین کو جانی مالی بدنی عبادات کرنے سے راضی کرتا رہے اور حتَّی المقدور حقوق العباد کے معاملے میں بھی محتاط زندگی گزارے

بارگاہِ ایزدی میں التجاء

اللہ جل شانہ کی بارگاہِ بے کس پناہ میں دعا گو ہوں کہ وہ اس تحریر کو ہم سب کیلئے ذریعہ نجات بنائے آمین ثم آمین