Category: کشمیر

شوپیاں انکاؤنٹر،کشمیری نوجوانوں کے والدین کا بھارتی فوجی اہلکاروں کو سزائے موت دینے کا مطالبہ

باغی ٹی وی کی رپورٹ کے مطابق مقبوضہ کشمیر کے علاقے شوپیاں میں فیک انکاؤنٹر میں شہید ہونے والے کشمیری نوجوانوں کے والدین نے بھارتی فوج کے اہلکاروں کو سزائے موت دینے کا مطالبہ کیا ہے

بھارتی فوج نے 18 جولائی کو شوپیان کے علاقے ایمشی پورہ میں محاصرے اور تلاشی کی کارروائی کے دوران تین نوجوانوں کوشہید کرنے کے بعد انہیں عسکریت پسند قرار دیا تھا ۔ تاہم بعد میں شہید ہونے والے نوجوانوں کے اہلخانہ نے ان کی شناخت امتیاز احمد ، ابرار احمد اور محمد ابرار کے نام سے کی تھی جو جموں خطے کے ضلع راجوری سے مزدوری کی غرض سے وادی کشمیر آئے تھے۔

اہلخانہ نے بھارتی فوج کی طر ف سے جاری کردہ تصویروں کے ذریعے اپنے پیاروں کی شناخت کی تھی۔ قابض بھارتی فوج نے گذشتہ روز اعتراف کیا کہ یہ نوجوان راجوری کے رہائشی تھے۔

مقتول نوجوانوں کے ایک رشتہ دار محمد سلیم نے میڈیا سے گفتگو کرتے ہوئے کہا کہ وہ تینوں مزدوری کی تلاش میں شوپیان گئے تھے جہاں بھارتی فوج نے انہیں جعلی مقابلے میں مار دیا۔ ڈی این اے نمونوں کی جلد از جلد تصدیق ہونی چاہئے تاکہ ہمیں اپنے بھائیوں کی لاشیں مل سکیں ۔

شہید نوجوان امتیاز احمد کے والد صابر حسین نے کہا کہ بھارتی فوج کو چاہیے کہ وہ نوجوانوں کے قتل کے اس گھناؤنے جرم میں ملوث اپنے اہلکاروں کو سزائے موت دینے کا اعلان کرے۔ میں اپنے بیٹے اور دو بھتیجوں کے لئے انصاف چاہتا ہوں ۔

مقتول نوجوانوں کے چچا لال حسین نے کہا کہ ان کے تین مطالبات ہیں، ہمیں اپنے پیاروں کی میتیں لوٹائی جائیں تاکہ ہم آبائی قبرستان میں انکی تدفین کرسکیں ، جعلی مقابلے میں ملوث اہلکاروں کو پھانسی کی سزا دی جائے اور یہ بیان واپس لیا جائے کی ہمارے لڑکے عسکریت پسند تھے۔

شوپیاں انکاؤنٹر، اختیارات سے تجاوز کرتے ہوئے کارروائی کی، بھارتی فوج مان گئی

شوپیاں انکاؤنٹر، اختیارات سے تجاوز کرتے ہوئے کارروائی کی، بھارتی فوج مان گئی

باغی ٹی وی کی رپورٹ کے مطابق مقبوضہ کشمیر کے ضلع شوپیاں میں ہونے والے تصادم کے معاملے میں بھارتی فوج نے اعتراف کر لیا ہے کہ سکیورٹی فورسز نے اپنے اختیارات سے تجاوز کرتے ہوئے کارروائی کی تھی۔

بھارتی فوج نے اس معاملے کی تحقیقات کی ہے اور اس میں پتا چلا ہے کہ موجود شواہد سے یہ ظاہر ہوتا ہے کہ سکیورٹی فورسز نے اس معاملے میں آرمڈ فورسز سپیشل پاور ایکٹ (اے ایف ایس پی اے) کی حد پار کی ہے۔ انڈین خبر رساں ادارے پی ٹی آئی کے مطابق جمعے کو فوج کے عہدیداروں نے بتایا کہ اس معاملے میں آرمی ایکٹ کے تحت کارروائی شروع کر دی گئی ہے۔

سکیورٹی فورسز نے 18 جولائی کو دعویٰ کیا تھا کہ جنوبی کشمیر کے ضلع شوپیاں کے امشی پورہ گاؤں میں ہوئے ایک انکاؤنٹر میں تین جنگجو شہید ہوگئے تھے۔ اس انکاؤنٹر کے بعد سوشل میڈیا میں ایسی رپورٹس آنے لگيں کہ انکاؤنٹر میں مارے جانے والے افراد کا تعلق در اصل جموں کے ضلع راجوری سے ہے، جو امشی پورہ گاؤں میں لاپتہ ہوگئے تھے۔

سری نگر میں دفاعی ترجمان راجیش کالیا کے مطابق فوج نے سوشل میڈیا رپورٹس کے بعد تفتیش شروع کردی تھی۔ انھوں نے کہا کہ انڈین فوج انتہا پسندی کے خلاف کارروائیوں کے دوران اخلاقی اقدار پر عمل پیرا ہونے کے لیے پُرعزم ہے۔یہ تفتیش ریکارڈ چار ہفتوں میں مکمل کر لی گئی۔

سری نگر میں فوج کے ترجمان کا کہنا تھا کہ تفتیش کے دوران ملنے والے ابتدائی شواہد سے ظاہر ہوتا ہے کہ سکیورٹی فورسز نے کارروائی کے دوران ضابطوں کو توڑا ہے۔ فوج کی تفتیش میں پتا چلا ہے کہ سکیورٹی فورسز نے آرمڈ فورسز سپیشل پاور ایکٹ 1990 میں دیے جانے والے اختیارات کی حد سے تجاوز کرتے ہوئے کارروائی کی اور انھوں نے سپریم کورٹ سے منظور شدہ چیف آف آرمی سٹاف کے رہنما خطوط کی خلاف ورزی کی ہے۔

تحقیقات کے دوران ملنے والے ابتدائی شواہد کے مطابق، امشی پورہ کے انکاؤنٹر کے دوران شہید ہونے والے کشمیری نوجوانوں کے نام امتیاز احمد ، ابرار احمد اور محمد ابرار ہیں۔ یہ تینوں جموں کے راجوری کے رہائشی تھے۔ پولیس کو ان تینوں کی ڈی این اے رپورٹ کا انتظار ہے۔ اب یہ تفتیش بھی کی جارہی ہے کہ آیا ان تینوں نوجوانوں کے کسی بھی شدت پسندی کی سرگرمی میں ملوث ہونے کے شواہد موجود ہیں یا نہیں۔

پاکستان نے شوپیاں میں جعلی مقابلے میں مزید چار کشمیریوں کے ماورائے عدالت قتل اور محرم الحرام کے دوران مذہبی جلوسوں اور مجالس پر پابندیوں کی شدید مذمت کی تھی، دفتر خارجہ کے ترجمان زاہد حفیظ چوہدری نے ایک بیان میں کہا تھا کہ گزشتہ ایک برس کے دوران قابض بھارتی فوج نے جعلی مقابلوں اور محاصرے اور تلاشی کی کارروائیوں کے دوران خواتین اور بچوں سمیت تقریباً تین سو بے گناہ کشمیریوں کو شہید کیا۔انہوں نے کہا کہ کشمیری عوام کو قتل تشدد جبری گمشدگیوں اور نظر بندیوں کے ذریعے محکوم رکھنے کے بھارت کے غیر انسانی ہتھکنڈے ماضی میں بھی ناکام رہے ہیں اور مستقبل میں بھی کامیاب نہیں ہوں گے۔

ترجمان دفتر خارجہ کا مزید کہنا تھا کہ بھارت کی ریاستی دہشت گردی کا تسلسل کشمیریوں کے عزم کو توڑ نہیں سکتا اور نہ ہی انہیں اپنے ناقابل تنسیخ حق خود ارادیت کے حصول کی ان کی جدوجہد کو دبا سکتا ہے جس کا وعدہ سلامتی کونسل کی متعلقہ قرار دادوں میں بھی کیا گیا ہے۔انہوں نے عالمی برادری سے مطالبہ کیا کہ وہ کشمیریوں کے خلاف سنگین جرائم پر بھارت کا محاسبہ کرے ۔

خاتون کی شہادت، کشمیری سڑکوں پر نکل آئے،پاکستان زندہ باد کے نعرے، بھارتی فوجی کی شیلنگ
مقبوضہ کشمیر میں سری نگر کے سینکڑوں شہریوں اور بھارتی دستوں کے مابین شدید جھڑپیں ہوئی ہیں۔ یہ جھڑپیں گزشتہ رات بھارتی فورسز کے ہاتھوں تین کشمیری حریت پسندوں اور ایک خاتون کی شہادت کے بعد شروع ہوئیں پولیس اور عینی شایدین نے بتایا کہ یہ تصادم اس وقت شروع ہوا، جب جمعرات کو علی الصبح سینکڑوں کی تعداد میں مقامی شہریوں نے پولیس اور نیم فوجی دستوں کے ہاتھوں مزید چار شہادتوں کے بعد احتجاج کرنا شروع کر دیا۔مقبوضہ کشمیر پولیس کے مطابق یہ کارروائی شہر کے ایک رہائشی علاقے میں مبینہ حریت پسندوں کے چھپے ہونے کی خفیہ اطلا ع ملنے کے بعد نصف شب کے وقت شروع کی گئی تھی۔

ساوتھ ایشین وائر کے مطابق ذاکر احمد ولد نثار احمد ساکنہ آلورہ شوپیان، عبیر مشتاق ولد مشتاق احمد ساکنہ بدراگنڈ کولگام اور عادل حسین بھٹ ولد عبد الرشید بھٹ ساکنہ بٹپورہ چرسو کا تعلق حزب المجاہدین سے تھا، مقامی میڈیا کے مطابق بھارتی سکیورٹی دستوں نے بٹہ مالو نامی علاقے میں ایک گھر میں متعدد حریت پسندوں کے چھپے ہونے کی اطلاع ملنے پر علاقے کو اپنے گھیرے میں لے لیا تھا۔

Nocturnal protests erupt against the killing of three Militants and a woman in the #Batamaloo area of #Srinagar #Kashmir. pic.twitter.com/Tzs2Cbdvlc

— The Lal Chowk Journal (@LalChowkJournal) September 17, 2020

سری نگر میں یہ مظاہرین شدید غصے میں تھے، مظاہرین میں خواتین اور بچے بھی شامل تھے،مظاہرین نے بھارتی سکیورٹی دستوں پر پتھراو بھی شروع کر دیا تھا۔ اس پربھارتی فوج نے ان کے خلاف آنسو گیس اور پیلٹ گنز کا بھی کا استعمال کیا ۔یہ مظاہرین ‘پاکستان زندہ باد اور ‘ہم آزادی چاہتے ہیں جیسے نعرے لگا رہے تھے۔

مقبوضہ جموں کشمیر میں علیحدگی پسندی کی موجودہ تحریک کو اب کئی سال ہو چکے ہیں اور اس دوران اب تک بیسیوں ہزار افراد شہید کئے جا چکے ہیں۔ کشمیر میں ایسے تصادم زیادہ تر وادی کے مختلف شہروں میں تو ہوتے رہتے ہیں مگر دارالحکومت سری نگر میں ایسی خونریزی کم ہی دیکھنے میں آتی ہے ۔ سری نگر میں گزشتہ رات سے پہلے اپنی نوعیت کا ایسا آخری واقعہ جون کے مہینے میں پیش آیا تھا، جب بھارتی دستوں کے ہاتھوں تین نوجوان شہید ہو گئے تھے اور کم از کم 15 مکانات بھی تباہ ہو گئے تھے۔