Category: بہاولپور

اوچ شریف (باغی ٹی وی، نامہ نگار حبیب خان)وچ شریف شہر کی معروف جوس شاپ "شاکر جوس کارنر” کے مالک نوجوان محمد شاکر حسین افسوسناک حادثے میں جاں بحق ہو گئے۔ المناک واقعہ اُس وقت پیش آیا جب وہ معمول کے مطابق اپنی دکان پر جوس تیار کر رہے تھے کہ اچانک بجلی کا کرنٹ لگ گیا۔

عینی شاہدین کے مطابق حادثہ اچانک پیش آیا اور وہاں موجود افراد نے فوری طور پر ریسکیو 1122 کو اطلاع دی۔ امدادی ٹیم نے بروقت پہنچ کر ابتدائی طبی امداد (سی پی آر) فراہم کی اور زخمی نوجوان کو شدید نازک حالت میں مریم نواز شریف ہسپتال اوچ شریف منتقل کیا، جہاں وہ جانبر نہ ہو سکے اور خالقِ حقیقی سے جا ملے۔

نوجوان کی ناگہانی موت کی خبر شہر میں جنگل کی آگ کی طرح پھیل گئی، جس پر فضا سوگوار ہو گئی۔ علاقہ مکینوں اور کاروباری برادری نے واقعے پر گہرے دکھ اور افسوس کا اظہار کیا۔

مرحوم محمد شاکر حسین کی نمازِ جنازہ دربار حضرت جمال درویش میں ادا کی گئی، جس میں سیاسی، سماجی اور مذہبی شخصیات سمیت اہلِ علاقہ کی بڑی تعداد نے شرکت کی۔ شرکاء نے غمزدہ خاندان سے دلی ہمدردی اور تعزیت کا اظہار کیا اور مرحوم کے بلند درجات کے لیے دعا کی۔

واضح رہے کہ محمد شاکر حسین نہ صرف ایک محنتی کاروباری نوجوان تھے بلکہ اپنے اخلاق اور خوش اخلاقی کی وجہ سے عوام میں خاص مقبولیت رکھتے تھے۔ ان کی ناگہانی وفات نے شہر بھر کو غم کی لپیٹ میں لے لیا ہے۔

اوچ شریف (باغی ٹی وی، نامہ نگار حبیب خان)اوچ شریف کے نواحی علاقے خیرپور ڈاہا میں انسانی زندگیوں کو چند نوٹوں کے عوض داؤ پر لگا دیا گیا ہے۔ غیر قانونی منی پٹرول پمپ، ایرانی اسمگل شدہ تیل کی کھلے عام فروخت، ناقص حفاظتی انتظامات، اور محکمہ سول ڈیفنس و انتظامیہ کی مجرمانہ خاموشی نے پورے علاقے کو خطرناک بارودی سرنگ میں تبدیل کر دیا ہے، جہاں ہر لمحہ تباہی کی بو محسوس کی جا سکتی ہے۔

ذرائع کے مطابق محکمہ سول ڈیفنس کے بعض افسران مبینہ طور پر بھاری رشوت کے عوض خاموشی کی قیمت وصول کر رہے ہیں۔ بغیر لائسنس، بغیر حفاظتی اقدامات، اور بغیر تربیت کے درجنوں فیول ایجنسیاں پٹرول اور ڈیزل کی فروخت میں مصروف ہیں۔ یہ تیل پلاسٹک کی بوتلوں، کھلے کینوں اور غیر معیاری برتنوں میں بیچا جا رہا ہے، جس سے نہ صرف انسانی جانیں خطرے میں ہیں بلکہ پورے محلوں کو لمحوں میں راکھ میں تبدیل کرنے کا خدشہ موجود ہے۔

ایرانی اسمگل شدہ تیل کے استعمال سے نہ صرف گاڑیوں کے انجن تباہ ہو رہے ہیں بلکہ عوام کو مہنگے داموں دھوکہ دہی سے تیل فروخت کیا جا رہا ہے۔ پیمانے میں کمی، معیار میں جعلسازی، اور قیمتوں میں من مانی معمول بن چکا ہے۔ اس کے باوجود پولیس، تحصیل انتظامیہ اور ضلعی افسران کی خاموشی نے کئی سوالات کو جنم دیا ہے:
کیا یہ خاموشی کسی اندرونی گٹھ جوڑ یا کرپشن کی علامت ہے؟
کیا ضلعی انتظامیہ اس موت کے کاروبار میں شریکِ جرم بن چکی ہے؟

عوامی حلقے، سماجی کارکنان، اور تاجر برادری سراپا احتجاج ہیں۔ ان کا کہنا ہے کہ میڈیا رپورٹس، سوشل میڈیا ویڈیوز، اور بارہا شکایات کے باوجود اگر کوئی کاروائی نہ کی گئی تو کسی بڑے سانحے کی صورت میں مکمل ذمہ داری ضلعی انتظامیہ اور متعلقہ اداروں پر عائد ہو گی۔

مطالبہ کیا گیا ہے کہ وزیراعلیٰ پنجاب، چیف سیکریٹری پنجاب، اور ڈپٹی کمشنر بہاولپور فوری طور پر خیرپور ڈاہا میں غیر قانونی فیول ایجنسیوں، ایرانی تیل کی اسمگلنگ، اور محکمہ سول ڈیفنس میں موجود کالی بھیڑوں کے خلاف فیصلہ کن کریک ڈاؤن کریں۔ عوامی سلامتی کو مزید نظر انداز کرنا ایک مجرمانہ کوتاہی ہو گی جس کے سنگین نتائج برآمد ہو سکتے ہیں۔

اوچ شریف (باغی ٹی وی، نامہ نگارحبیب خان)اوچ شریف کے نواحی علاقے مستوئی روڈ پر ایک افسوسناک اور غفلت پر مبنی حادثے میں 30 سالہ موٹر سائیکل سوار محمد ذیشان جاں بحق ہو گئے۔ حادثہ اس وقت پیش آیا جب سڑک کنارے کھڑی ایک ٹرالی سے لکڑیاں اتارنے کے لیے لوہے کی زنجیر (ٹوچین) سڑک پر باندھی گئی تھی، تاہم اندھیرے اور مناسب حفاظتی علامات کے نہ ہونے کی وجہ سے وہ زنجیر نظر نہ آ سکی۔

عینی شاہدین کے مطابق محمد ذیشان ولد عبدالقادر ایک مریض کو موٹر سائیکل پر اسپتال لے جا رہے تھے کہ تیز رفتاری کے باعث ان کی موٹر سائیکل مذکورہ زنجیر سے ٹکرا گئی، جس سے وہ سڑک پر جا گرے اور ان کے سر، گردن اور سینے پر شدید چوٹیں آئیں۔ موقع پر موجود افراد نے فوری طور پر ریسکیو 1122 کو اطلاع دی، جنہوں نے جائے وقوعہ پر پہنچ کر ابتدائی طبی امداد فراہم کی، OPA اور CPR کے ذریعے جان بچانے کی کوشش کی اور انہیں شدید زخمی حالت میں تحصیل ہیڈکوارٹر ہسپتال احمد پور شرقیہ منتقل کیا، مگر وہ زخموں کی تاب نہ لاتے ہوئے دم توڑ گئے۔

حادثے کے بعد علاقہ غم و اندوہ میں ڈوب گیا ہے جبکہ شہریوں میں شدید غم و غصہ پایا جا رہا ہے۔ مقامی افراد نے حادثے کی ذمہ داری غیر محفوظ انداز میں ٹرالی سے سامان اتارنے اور سڑک پر بغیر کسی وارننگ کے رکاوٹیں ڈالنے پر عائد کی ہے۔ عوام نے انتظامیہ سے مطالبہ کیا ہے کہ سڑکوں پر عوامی تحفظ کو یقینی بنانے کے لیے فوری اقدامات کیے جائیں اور غفلت کے مرتکب افراد کے خلاف کارروائی کی جائے۔

مرحوم محمد ذیشان کی نمازِ جنازہ ان کے آبائی علاقے میں ادا کی جائے گی۔ ان کی ناگہانی موت پر ہر آنکھ اشکبار ہے، اور پورا علاقہ سوگوار ہے۔

اوچ شریف (باغی ٹی وی، نامہ نگار: حبیب خان)ڈپٹی کمشنر بہاولپور ڈاکٹر فرحان فاروق کی زیر صدارت ایک اہم اجلاس میں ایل پی جی گیس کی غیرقانونی ری فلنگ اور پبلک ٹرانسپورٹ میں اس کے خطرناک استعمال کے خلاف بھرپور اور فیصلہ کن کریک ڈاؤن کا اعلان کیا گیا ہے۔

اجلاس میں ڈسٹرکٹ امپلیمنٹیشن کمیٹی کے اراکین، سول ڈیفنس، محکمہ تعلیم، کالجز، موٹر وے، ٹریفک اور پٹرولنگ پولیس سمیت ریجنل ٹرانسپورٹ اتھارٹی کے افسران شریک ہوئے جبکہ تحصیلوں کے اسسٹنٹ کمشنرز نے ویڈیو لنک کے ذریعے شرکت کی۔

ڈاکٹر فرحان فاروق نے کہا کہ غیرقانونی ری فلنگ نہ صرف قانون شکنی ہے بلکہ انسانی زندگیوں کے لیے مہلک خطرہ ہے۔ انہوں نے متعلقہ اداروں کو ہدایت کی کہ ایسی تمام دکانوں اور پوائنٹس کے خلاف فوری اور مؤثر کارروائی کی جائے جو غیرقانونی طور پر ایل پی جی کی ڈی کینٹنگ میں ملوث ہیں۔

ڈپٹی کمشنر نے پبلک ٹرانسپورٹ میں ایل پی جی سلنڈر کے استعمال کو مکمل طور پر ناقابلِ قبول قرار دیتے ہوئے واضح کیا کہ اس حوالے سے کوئی نرمی نہیں برتی جائے گی۔ اجلاس میں تمام اداروں کو باہمی تعاون کے ساتھ فیلڈ میں جا کر کارروائیاں تیز کرنے کی ہدایات جاری کی گئیں۔

ڈاکٹر فرحان فاروق نے کہا کہ عوامی جان و مال کا تحفظ ضلعی انتظامیہ کی اولین ترجیح ہے، اور اس مہم میں عوام کا تعاون بھی نہایت اہم ہے۔ انہوں نے شہریوں سے اپیل کی کہ وہ اپنے اردگرد موجود غیرقانونی ری فلنگ پوائنٹس کی نشاندہی کریں تاکہ کسی بڑے حادثے سے پہلے اس خطرناک رجحان کا خاتمہ ممکن بنایا جا سکے۔

اوچ شریف(نامہ نگارحبیب خان)لیاقت پور سے احمد پور شرقیہ امتحان دینے کے بعد واپس جانے والی نجی کالج کی طالبات کی وین میں آتشزدگی کے افسوسناک واقعے میں زخمی ہونے والی ایک اور طالبہ اجالا بنت سلیم دم توڑ گئی، جس کے بعد جاں بحق طالبات کی تعداد دو ہو گئی ہے۔ اجالا کو شدید جھلسنے کے باعث نشتر اسپتال ملتان منتقل کیا گیا تھا، مگر وہ جانبر نہ ہو سکی۔ اس سے قبل طالبہ طیبہ عباس موقع پر ہی جاں بحق ہو گئی تھی، جن کی نمازِ جنازہ آبائی علاقے لیاقت پور میں ادا کر دی گئی۔

پولیس ذرائع کے مطابق حادثے کے بعد فرار ہونے والے وین ڈرائیور کو گرفتار کر لیا گیا ہے۔ جبکہ وین مالک، تین نجی کالجوں کی انتظامیہ اور دیگر ذمہ داران کے خلاف اقدام قتل اور انسداد دہشت گردی کی دفعات کے تحت مقدمہ درج کر کے تین افراد کو گرفتار کر لیا گیا ہے۔

یاد رہے کہ یکم جولائی کو احمد پور ٹول پلازہ کے قریب کالج وین میں نصب ایل پی جی سلنڈر میں اچانک لیکیج کے باعث دھماکہ ہوا، جس سے پوری وین آگ کی لپیٹ میں آ گئی۔ وین میں سوار 19 طالبات میں سے 10 جھلس گئیں۔ متاثرہ طالبات میں ثنا بنت اللہ دتہ، ثنا بنت رمضان، تانیا بنت محمد بخش، ماریا بنت محمد اسلم، مشعل بنت ظفر، امِ حبیبہ بنت طاہر، اجالا بنت سلیم، عائشہ بنت الٰہی بخش، راحت بی بی بنت غلام مرتضیٰ اور منازہ عرف طیبہ عباس شامل ہیں، جن کی عمریں 17 سے 25 سال کے درمیان ہیں۔

عینی شاہدین کے مطابق سلنڈر پھٹنے سے وین میں آگ بھڑک اٹھی اور طالبات چیختی چلاتی وین سے نکلنے کی کوشش کرتی رہیں، مگر خوفناک شعلوں نے کئی طالبات کو بری طرح جھلسا دیا۔ مقامی لوگوں نے فوری طور پر امدادی کارروائیاں کرتے ہوئے ریسکیو 1122 کو اطلاع دی، جس نے موقع پر پہنچ کر آگ پر قابو پایا اور زخمی طالبات کو اسپتال منتقل کیا۔

ابتدائی طبی امداد کے بعد 10 زخمی طالبات کو ٹی ایچ کیو احمد پور منتقل کیا گیا، جہاں سے پانچ طالبات کو مزید علاج کے لیے بہاولپور وکٹوریہ اسپتال بھیجا گیا۔ تاہم برن یونٹ نہ ہونے کے باعث طالبات کو ملتان برن یونٹ منتقل کیا گیا، جہاں اُجالا نے دورانِ علاج دم توڑ دیا۔

حادثہ نے ایک بار پھر اسکول وینز میں گیس سلنڈر کے استعمال اور متعلقہ اداروں کی غفلت پر کئی سوالات کھڑے کر دیے ہیں۔ متاثرہ خاندانوں نے واقعے کی مکمل اور شفاف تحقیقات کا مطالبہ کیا ہے۔

اوچ شریف(باغی ٹی وی،نامہ نگارحبیب خان) ڈیرہ نواب ریلوے اسٹیشن پر افسوسناک حادثہ پیش آیا جس میں ایک 60 سالہ بزرگ شہری ٹرین سے اترتے ہوئے زخمی ہو گیا۔ ریسکیو 1122 بہاولپور کے کنٹرول روم سے موصولہ اطلاعات کے مطابق یہ واقعہ صبح 4 بج کر 30 منٹ پر پیش آیا، جب لاہور سے کراچی جانے والی پاک بزنس ٹرین جیسے ہی ڈیرہ نواب اسٹیشن پر آہستہ ہوئی تو ایک مسافر اسلم شاہ ولد امام شاہ ٹرین سے اترنے کی کوشش کے دوران پھسل کر نیچے آ گیا۔

حادثے کے نتیجے میں اسلم شاہ کی بائیں ٹانگ گھٹنے کے نیچے سے کٹ گئی۔ ریسکیو ٹیم (BPA-32) نے چھ منٹ میں جائے وقوعہ پر پہنچ کر فوری طور پر ابتدائی طبی امداد فراہم کی اور زخمی کو تحصیل ہیڈ کوارٹر ہسپتال احمد پور شرقیہ منتقل کر دیا۔ ریسکیو ذرائع کے مطابق زخمی کی حالت اب خطرے سے باہر ہے۔

زخمی کا تعلق موضع ٹبی تکوان، احمد پور شرقیہ سے ہے۔