Category: بہاولپور

اوچ شریف (باغی ٹی وی، نامہ نگار حبیب خان) تھانہ دھوڑکوٹ کی حدود میں موضع ودھنور کے رہائشی نوجوان نے پسند کی شادی نہ ہونے اور والد کی ڈانٹ سے دلبرداشتہ ہو کر زہریلی دوا پی کر خودکشی کر لی۔ متوفی کی شناخت 22/23 سالہ عبدالحمید ولد سعید احمد، قوم حسام کے طور پر ہوئی ہے۔

تفصیلات کے مطابق عبدالحمید نے گھریلو رنجش اور مرضی کی شادی میں ناکامی پر گھر میں موجود فصلِ کپاس پر استعمال ہونے والی زہریلی اسپرے پی لی۔ تشویشناک حالت میں اسے فوری طور پر بہاول وکٹوریہ ہسپتال منتقل کیا گیا جہاں وہ دوران علاج دم توڑ گیا۔ واقعے کی اطلاع پر مقامی پولیس افسر خدا بخش ایس آئی نے ضابطے کی کارروائی مکمل کرتے ہوئے لاش کو پوسٹ مارٹم کے لیے احمد پور شرقیہ ہسپتال منتقل کیا۔

تاہم لواحقین نے پوسٹ مارٹم کرانے سے انکار کر دیا اور مطالبہ کیا کہ لاش بغیر پوسٹ مارٹم کے حوالے کی جائے۔ پولیس نے قانونی تقاضوں کے تحت پوسٹ مارٹم کو ضروری قرار دیا جس پر متوفی کے ورثہ نے سول ہسپتال کے باہر احتجاج کرتے ہوئے سڑک بلاک کر دی۔ احتجاج کی اطلاع پر ایس ایچ او تھانہ سٹی احمد پور شرقیہ فوری طور پر موقع پر پہنچے، ورثہ سے مذاکرات کیے اور انہیں اعتماد میں لے کر روڈ کھولوا دیا۔

پولیس اور ورثہ کے درمیان جاری کشیدگی وقتی طور پر ختم کر دی گئی ہے، جبکہ قانونی کارروائی جاری ہے۔

اوچ شریف (باغی ٹی وی،نامہ نگار حبیب خان)اسلام آباد کے تربیلا ڈیم میں نہاتے ہوئے ڈوبنے والا اوچ شریف کا نوجوان محمد علی اکبر مانک تین روز کی مسلسل تلاش کے بعد مردہ حالت میں مل گیا، جس کے بعد چک مانک گاؤں میں کہرام مچ گیا اور علاقہ سوگ میں ڈوب گیا۔

محمد علی اکبر مانک، جو روزگار کے سلسلے میں اسلام آباد میں مقیم تھا، تین روز قبل دوستوں کے ہمراہ تفریح کے لیے غازی تربیلا ڈیم گیا تھا، جہاں نہاتے ہوئے وہ اچانک گہرے پانی میں ڈوب گیا۔ واقعے کے بعد ریسکیو ٹیموں نے تین دن مسلسل سرچ آپریشن جاری رکھا اور آج بالآخر اس کی لاش برآمد کر لی گئی۔

لاش کی اطلاع جنگل میں آگ کی طرح پھیل گئی، گاؤں میں غم و اندوہ کی فضا چھا گئی، والدین اور عزیز و اقارب پر قیامت ٹوٹ پڑی۔ اسلام آباد میں نمازِ جنازہ ادا کی گئی جس میں بڑی تعداد میں دوست احباب اور اہل علاقہ نے شرکت کی، بعدازاں میت کو آبائی گاؤں چک مانک منتقل کیا گیا جہاں آج تدفین عمل میں لائی جائے گی۔

اہل علاقہ نے نوجوان کی ناگہانی موت پر گہرے دکھ اور افسوس کا اظہار کرتے ہوئے کہا کہ یہ واقعہ ہر دل کو دہلا دینے والا ہے اور والدین کے لیے ناقابلِ برداشت صدمہ ہے۔

اوچ شریف باغی ٹی وی (نامہ نگار حبیب خان)اوچ شریف کے نواحی علاقے شمس کالونی میں غیرت کے نام پر فائرنگ کا لرزہ خیز واقعہ پیش آیا، جس میں تین افراد شدید زخمی ہو گئے۔ پولیس نے مقدمہ درج کر کے کارروائی شروع کر دی ہے، جبکہ شہر میں خوف و ہراس کی فضا قائم ہے۔

تفصیلات کے مطابق مرکزی ملزم محمد جعفر ولد لعل حسین قوم عباسی، سکنہ شمس کالونی، نے اپنی بیوی فوزیہ بی بی اور ساتھی محمد سلیم ولد غلام حیدر قوم پوترار کے ہمراہ غیرت کے شبہ پر حملہ کیا۔ ملزمان رکشے پر سوار ہو کر شمس کالونی میں واقع درزی سعید احمد ولد غلام حیدر بلوچ کی دکان پر پہنچے۔ محمد جعفر نے دکان کے باہر اتر کر سعید احمد پر 30 بور پستول سے فائر کیا جو سیدھا اس کی گردن پر لگا، نتیجتاً وہ شدید زخمی ہو گیا۔

ملزمان اس کے بعد رکشے پر ہی چند قدم دور فیصل لطیف ولد حاجی عبدالطیف انور کی دکان پر پہنچے، جہاں حاجی عبدالطیف اپنے بیٹے فیصل کے ہمراہ موجود تھے۔ محمد جعفر نے دوبارہ فائرنگ کی، جس سے حاجی عبدالطیف کے دائیں کندھے کے نیچے گولی لگی اور وہ شدید زخمی ہو گئے۔ اس ہولناک حملے میں ایک راہگیر محمد آصف ولد خادم حسین قوم مغل پٹھان، جو قریبی حمام کے باہر موجود تھا، کو بھی بائیں ٹانگ پر گولی لگی۔

واقعے کے فوراً بعد شہری محمد اکرم ولد اللہ بخش اور محمد عثمان ولد خدا بخش بلوچ نے مضروبین کو سنبھالا اور فوری طور پر قریبی اسپتال منتقل کیا۔ پولیس نے موقع پر پہنچ کر عینی شاہدین کے بیانات قلمبند کیے اور مدعی فیصل لطیف کی تحریری درخواست پر مقدمہ درج کر لیا۔

درخواست کے مطابق محمد جعفر کو شبہ تھا کہ اس کی بیوی کے درزی سعید احمد اور حاجی عبدالطیف کے ساتھ ناجائز تعلقات ہیں، جس پر اس نے قانون اپنے ہاتھ میں لیتے ہوئے دن دہاڑے تین افراد کو گولیوں کا نشانہ بنایا۔

واقعے کے بعد شمس کالونی اور اطراف میں شدید خوف و ہراس پھیل گیا ہے۔ مقامی شہریوں اور سماجی حلقوں نے واقعے کی شدید مذمت کرتے ہوئے مطالبہ کیا ہے کہ غیرت کے نام پر قانون ہاتھ میں لینے والے درندہ صفت افراد کو فوری گرفتار کر کے قانون کے مطابق سخت سے سخت سزا دی جائے تاکہ معاشرے میں عدل، انصاف اور امن کو یقینی بنایا جا سکے۔

اوچ شریف(باغی ٹی وی ،نامہ نگارحبیب خان ) جعلی دودھ کا زہریلا کھیل، فوڈ اتھارٹی کی خاموشی عوام کی زندگیوں پر بھاری

اوچ شریف میں ایک شرمناک اور خطرناک صورتِ حال روزمرہ کا معمول بن چکی ہے، جہاں خالص دودھ کے نام پر شہریوں کو کیمیکلز سے بھرپور زہریلا مشروب پلایا جا رہا ہے۔ زم زم ڈیری سمیت شہر کی متعدد دودھ فروش دکانیں غلیظ پانی، سنگاڑھا پاؤڈر، یوریا، سرف اور دیگر جان لیوا کیمیکلز سے تیار کردہ جعلی دودھ اور دہی سینکڑوں گھرانوں تک سپلائی کر رہی ہیں۔ سادہ لوح عوام خالص دودھ کی تلاش میں اپنی جیب خالی کر رہے ہیں اور اپنی صحت کو شدید خطرات سے دوچار کر رہے ہیں۔ اس زہریلے دودھ کے استعمال سے ہیپاٹائٹس، معدے کے امراض، دل کی بیماریاں، بچوں کی قوتِ مدافعت میں کمی اور فوڈ پوائزننگ کے کیسز میں خطرناک حد تک اضافہ ہو رہا ہے۔ ہسپتال مریضوں سے بھرے پڑے ہیں، لیکن فوڈ اتھارٹی اور ضلعی انتظامیہ اس سنگین مسئلے پر مجرمانہ خاموشی اختیار کیے ہوئے ہیں۔

فوڈ اتھارٹی جو عوام کی صحت کی نگہبان ہونی چاہیے، اس گھناؤنے کھیل میں مبینہ طور پر مافیا کی سرپرست بنی ہوئی ہے۔ باوثوق ذرائع کے مطابق فوڈ اتھارٹی کے کچھ اہلکار دودھ فروش مافیا سے ماہانہ نذرانے وصول کر کے اس غیر قانونی دھندے کو تحفظ فراہم کر رہے ہیں۔ عوامی شکایات کے باوجود کوئی ٹھوس کارروائی عمل میں نہیں لائی گئی، جس سے شہریوں میں شدید بے چینی اور غصہ پایا جا رہا ہے۔ خالص دودھ کی دوگنی قیمت پر یہ زہریلا مشروب فروخت کیا جا رہا ہے، بےضابطہ کہ نہ کوئی ریٹ لسٹ ہے، نہ معیار کی جانچ اور نہ ہی لیبارٹری رپورٹس۔ یہ سب کچھ انتظامیہ کی سرپرستی میں ہو رہا ہے، جو عوام کی جیب اور صحت پر ڈاکا ڈال رہا ہے۔

شہری، وکلا، اساتذہ، ڈاکٹرز اور سماجی حلقوں نے اس خطرناک صورتِ حال پر گہرے غم و غصے کا اظہار کیا ہے اور ڈپٹی کمشنر بہاولپور ڈاکٹر فرحان فاروق سے فوری ایکشن کا مطالبہ کیا ہے۔ وہ زم زم ڈیری سمیت تمام جعلی دودھ فروشوں کے خلاف مقدمات درج کرنے، فوڈ اتھارٹی کے کرپٹ اہلکاروں کو معطل کر کے انکوائری شروع کرنے، شہر بھر میں دودھ اور دہی کے لیبارٹری ٹیسٹ کر کے رپورٹس عوام کے سامنے پیش کرنے اور ضلعی انتظامیہ کی جانب سے کارروائی کی مکمل تفصیلات جاری کرنے کا مطالبہ کر رہے ہیں۔ شہریوں کا کہنا ہے کہ وہ اب خاموش نہیں رہیں گے اور اپنے حق کے لیے آواز بلند کرتے رہیں گے۔ وہ صاف دودھ اور صحت مند زندگی کو اپنا بنیادی حق سمجھتے ہیں اور اس زہریلے کھیل کے خاتمے تک جدوجہد جاری رکھنے کے لیے پرعزم ہیں۔

اوچ شریف(باغی ٹی وی ،نامہ نگار حبیب خان)نابالغ سے جعلی نکاح کے ذریعے زیادتی، ہائی کورٹ کا سخت ایکشن، مقدمہ درج

اوچ شریف کی راؤ کالونی میں 14 سالہ عاصمہ بی بی کے ساتھ جعلی نکاح کے ذریعے زیادتی کے دل دہلا دینے والے واقعے پر بہاولپور ہائی کورٹ نے سخت نوٹس لیتے ہوئے ملوث افراد کے خلاف فوجداری مقدمات درج کرنے کا حکم دے دیا۔

متاثرہ لڑکی کی والدہ سلمیٰ بی بی نے عدالت میں درخواست دائر کی کہ ان کی بیٹی کو جنید سلیم، شاہد، محبوب، شہزاد اور مرکزی ملزم محمد زاہد نے اغوا کیا۔ بعد ازاں، قاضی محمد وسیم (نکاح خواں) اور دیگر گواہوں کی ملی بھگت سے ایک جعلی نکاح نامہ تیار کیا گیا تاکہ اس غیر قانونی فعل کو نکاح کا روپ دیا جا سکے۔

عدالت عالیہ نے نادرا ریکارڈ کے مطابق متاثرہ لڑکی کی عمر 14 سے 15 سال قرار دی اور فیصلہ سنایا کہ نابالغ لڑکی نکاح کے معاہدے کی قانونی اہلیت نہیں رکھتی۔ عدالت نے ایس ایچ او تھانہ اوچ شریف کو ہدایت کی کہ محمد زاہد، قاضی محمد وسیم، نکاح رجسٹرار اور گواہوں کے خلاف اغوا، زیادتی، جعل سازی اور چائلڈ میرج ریسٹرینٹ ایکٹ سمیت فوجداری دفعات کے تحت مقدمہ درج کیا جائے۔


عدالتی احکامات پر فوری عمل کرتے ہوئے پولیس نے مقدمہ درج کر لیا ہے اور سب انسپکٹر محمد اعتزاز احسن کو تفتیش سونپ دی گئی ہے۔ پولیس ذرائع کا کہنا ہے کہ تمام شواہد اکٹھے کیے جا رہے ہیں اور مکمل چالان جلد عدالت میں پیش کیا جائے گا۔ متاثرہ والدہ نے اعلیٰ حکام سے انصاف کی فراہمی اور ملزمان کو سخت سزا دینے کی اپیل کی ہے تاکہ معاشرے میں ایسے واقعات کی روک تھام ہو سکے۔

اس واقعے نے مقامی آبادی میں شدید غم و غصہ پیدا کیا ہے، اور رہائشیوں اور سماجی کارکنوں نے نابالغ بچیوں کے تحفظ کے لیے سخت قوانین اور ان کے نفاذ پر زور دیا ہے۔