Category: بہاولپور

اوچ شریف (باغی ٹی وی، نامہ نگار حبیب خان) ضلع بہاولپور پولیس اور الرشید ڈائگناسٹک سنٹر (RDC) کے درمیان ایک اہم فلاحی معاہدہ طے پا گیا ہے جس کے تحت شہداء پولیس اہلکاروں کی فیملیز کو مکمل مفت اور حاضر سروس ملازمین کو 50 فیصد رعایت کے ساتھ ڈائگناسٹک سہولیات فراہم کی جائیں گی۔

اس معاہدے پر دستخط کی تقریب میں ڈسٹرکٹ پولیس آفیسر (ڈی پی او) بہاولپور محمد حسن اقبال نے خصوصی شرکت کی۔ انہوں نے اس اقدام کو پولیس فورس کی فلاح و بہبود کے لیے ایک اہم پیش رفت قرار دیا۔ ڈی پی او کا کہنا تھا کہ پولیس شہداء کی قربانیوں کا اعتراف اور زندہ اہلکاروں کی صحت کی نگہداشت ریاست اور نجی شعبے کی مشترکہ ذمہ داری ہے، اور یہ معاہدہ اسی جذبے کی ایک عملی مثال ہے۔

انہوں نے الرشید ڈائگناسٹک سنٹر کی انتظامیہ کا شکریہ ادا کرتے ہوئے کہا کہ ایسے اقدامات سے نہ صرف پولیس اہلکاروں کے اہل خانہ کو سہولت میسر آئے گی بلکہ فورس کے حوصلے میں بھی اضافہ ہوگا۔ یہ معاہدہ عوامی خدمت کے شعبے میں پولیس اور نجی اداروں کے درمیان فلاحی تعاون کی نئی راہیں کھولے گا۔

اوچ شریف (باغی ٹی وی، نامہ نگار حبیب خان) محرم الحرام کے مقدس ایام کی آمد سے قبل اوچ شریف کے مختلف علاقوں خصوصاً بستی سادات میں صفائی کا نظام مکمل طور پر مفلوج ہو چکا ہے۔ گلی کوچے، امام بارگاہوں کے اطراف اور جلوسوں کے روٹس گندگی، کیچڑ اور بدبودار پانی سے بھرے پڑے ہیں، جس سے نہ صرف شہریوں کو شدید پریشانی کا سامنا ہے بلکہ وبائی امراض کے پھیلنے کا بھی خطرہ بڑھ گیا ہے۔

شہریوں نے ضلعی انتظامیہ، بلدیاتی اداروں اور صفائی کے متعلقہ محکموں کی مجرمانہ غفلت پر شدید غم و غصے کا اظہار کرتے ہوئے کہا کہ ہر سال محرم سے قبل نالوں کی صفائی اور جلوس کے روٹس کی تیاری کی جاتی تھی، لیکن اس بار مکمل خاموشی ہے۔ انہوں نے کہا کہ ایسا محسوس ہو رہا ہے جیسے متعلقہ افسران خوابِ غفلت میں ہیں اور شہریوں کو ان کے حال پر چھوڑ دیا گیا ہے۔

عزاداروں کے لیے جلوسوں کے راستوں پر گندگی کے ڈھیر، بند نالے اور بدبو دار پانی کی موجودگی کسی بڑے سانحے کا پیش خیمہ بن سکتی ہے۔ شہریوں نے اسسٹنٹ کمشنر احمد پور شرقیہ محمد نوید حیدر اور ڈپٹی کمشنر بہاولپور سے فوری نوٹس لینے کا مطالبہ کرتے ہوئے خبردار کیا کہ اگر صفائی کے مؤثر اقدامات نہ کیے گئے تو وہ شدید احتجاج پر مجبور ہوں گے۔

شہریوں کا کہنا ہے کہ محرم سے قبل یہ صورتحال انتظامیہ کی کارکردگی پر ایک بڑا سوالیہ نشان ہے اور اگر بروقت ایکشن نہ لیا گیا تو نہ صرف عزاداری متاثر ہوگی بلکہ امن و امان کی صورتحال بھی خطرے میں پڑ سکتی ہے۔

اوچ شریف (باغی ٹی وی، نامہ نگار حبیب خان)پنجاب حکومت کے مالی سال 2025-26 کے بجٹ نے جنوبی پنجاب کے عوام، بالخصوص احمد پور شرقیہ اور اوچ شریف کے رہائشیوں کو ایک بار پھر مایوسی سے دوچار کر دیا ہے۔ تاریخی، ثقافتی اور سیاسی اہمیت کے باوجود احمد پور شرقیہ کو ضلع اور اوچ شریف کو تحصیل کا درجہ دینے کا وعدہ اس سال بھی پورا نہ ہو سکا۔

گزشتہ برس وزیر اعظم میاں شہباز شریف نے احمد پور شرقیہ کو ضلع بنانے کا اعلان کیا تھا، جس پر عوام نے گہری امیدیں وابستہ کیں، مگر تازہ بجٹ میں اس اعلان کا کوئی ذکر شامل نہیں، جس پر شہریوں میں شدید غم و غصے کی فضا ہے۔ دوسری جانب صوفیائے کرام کی سرزمین اوچ شریف، جو روحانیت اور تاریخ میں خاص مقام رکھتا ہے، ترقیاتی منصوبوں سے مکمل محروم رہا۔

مقامی افراد کا کہنا ہے کہ اوچ شریف میں آج بھی بجلی، پانی، سڑکوں، صحت و تعلیم جیسی بنیادی سہولیات کا فقدان ہے۔ شہریوں اور سیاسی و سماجی حلقوں نے حکومت پنجاب سے مطالبہ کیا ہے کہ احمد پور شرقیہ کو فوری ضلع کا درجہ دیا جائے اور اوچ شریف کو تحصیل بنا کر بنیادی ڈھانچے کی بہتری اور سیاحت کے فروغ کے لیے بجٹ مختص کیا جائے۔ عوام کا کہنا ہے کہ اگر حکومت جنوبی پنجاب کی ترقی میں واقعی سنجیدہ ہے تو وعدوں کی بجائے عملی اقدامات کیے جائیں تاکہ محروم علاقے ترقی کی راہ پر آ سکیں۔

اوچ شریف (باغی ٹی وی نامہ نگار حبیب خان)وفاقی حکومت کی جانب سے پیٹرول اور ڈیزل کی قیمتوں میں ایک بار پھر اضافہ کر دیا گیا، جس نے اوچ شریف کے شہریوں کو شدید غم و غصے میں مبتلا کر دیا ہے۔ شہریوں نے اس اقدام کو غربت کی چکی میں پسے عوام پر ایک اور معاشی بم قرار دیتے ہوئے شدید ردعمل دیا۔

نئے نرخوں کے مطابق پیٹرول کی قیمت میں 4 روپے 80 پیسے فی لیٹر اضافہ ہوا جس کے بعد نئی قیمت 258 روپے 43 پیسے، جبکہ ڈیزل کی قیمت میں 7 روپے 95 پیسے اضافہ ہوا، جس کے بعد نئی قیمت 262 روپے 59 پیسے فی لیٹر ہو گئی۔

اوچ شریف کے شہریوں محمد علی، معاذ خالد، محمود الحسن، محمد عمران، محمد شاہد نذیر، ملک یعقوب اور محمد ساجد خان نے میڈیا سے گفتگو کرتے ہوئے کہا کہ حکومت نے عوام پر مہنگائی کا ایک اور زہریلا وار کیا ہے۔ پہلے ہی غربت، بے روزگاری اور مہنگائی نے زندگی اجیرن کر رکھی ہے، اب ایندھن کی قیمتیں بڑھنے سے روزمرہ زندگی مزید ناقابلِ برداشت ہو جائے گی۔

شہریوں نے حکمرانوں کی شاہانہ زندگی اور پروٹوکول پر تنقید کرتے ہوئے کہا کہ جب تک حکومتی اخراجات میں کٹوتی نہیں کی جاتی اور صرف عوام کو ہی قربانی کا بکرا بنایا جاتا رہے گا، تب تک یہ بحران سنگین ہوتا جائے گا۔ شہریوں نے خبردار کیا کہ اگر حکومت نے فوری ریلیف نہ دیا تو عوامی ردعمل حکومت کے لیے خطرے کی گھنٹی بن سکتا ہے۔

انہوں نے مطالبہ کیا کہ حکمران اپنی عیاشیاں ختم کریں اور مہنگائی کے خلاف عملی اقدامات کرتے ہوئے پٹرولیم قیمتوں میں کیا گیا اضافہ واپس لیں تاکہ عوام کچھ سکھ کا سانس لے سکیں۔

اوچ شریف (باغی ٹی وی نامہ نگار حبیب خان)اوچ شریف سے احمد پور شرقیہ، چنی گوٹھ، علی پور اور جلال پور پیر والا تک چلنے والی پرانی، خستہ حال اور غیر فٹ پبلک ویگنیں شہریوں کی جانوں کے لیے خطرہ بن چکی ہیں۔ یہ کھٹارا گاڑیاں نہ کھڑکیوں سے لیس ہیں، نہ شیشوں سے، اور نہ ہی ان کے پاس فٹنس سرٹیفکیٹ موجود ہیں۔ حیران کن طور پر یہ گاڑیاں ایل پی جی سلنڈروں پر چلائی جا رہی ہیں، جن کا استعمال پبلک ٹرانسپورٹ میں اوگرا کی جانب سے سختی سے ممنوع قرار دیا گیا ہے۔

مسافروں کے مطابق یہ ویگنیں حد سے زیادہ اوورلوڈ ہوتی ہیں اور اندر نصب سلنڈر کسی بھی وقت دھماکہ کر سکتے ہیں، مگر ریجنل ٹرانسپورٹ اتھارٹی، سول ڈیفنس، ٹریفک پولیس اور پٹرولنگ فورس سب نے آنکھیں بند کر رکھی ہیں۔ ذرائع کا کہنا ہے کہ ان اداروں کے بعض افسران اور ٹرانسپورٹ مافیا کے درمیان مبینہ "ماہانہ ڈیل” طے ہے، جس کے نتیجے میں گاڑیاں بلاخوف رواں دواں ہیں۔ پولیس ناکوں پر روکنے کے باوجود بھی کوئی مؤثر کارروائی نہیں ہوتی، صرف چند رسمی چالان کرکے افسران کی "اطمینان رپورٹ” تیار کر لی جاتی ہے۔

اوچ شریف تا احمد پور شرقیہ اور دیگر علاقوں میں سڑکوں پر دوڑتی یہ غیرقانونی گاڑیاں انتظامیہ کی کارکردگی پر سوالیہ نشان بن چکی ہیں۔ شہریوں اور مسافروں نے کمشنر بہاول پور، ڈپٹی کمشنر، اور ڈی پی او بہاول پور سے فوری نوٹس لینے، غیرقانونی ٹرانسپورٹ کے خلاف زیرو ٹالرینس پالیسی اپنانے، اور ملوث افسران و ٹرانسپورٹ مافیا کے خلاف فوجداری مقدمات درج کرنے کا پرزور مطالبہ کیا ہے تاکہ قیمتی انسانی جانوں کو بچایا جا سکے۔