Category: بہاولپور

اوچ شریف (باغی ٹی وی، نامہ نگار حبیب خان) سیر و تفریح کا خوشگوار خواب اس وقت خوفناک حادثے میں بدل گیا جب سکھر سے اسلام آباد جانے والی ایک فیملی کی ہائی روف وین موٹر وے پر جھانگڑہ انٹرچینج کے قریب ایک کھڑے ٹریلر سے جا ٹکرائی۔ حادثے کا سبب ڈرائیور کو اچانک نیند کا آ جانا بتایا جا رہا ہے، جس کے باعث گاڑی قابو سے باہر ہو گئی اور ٹریلر سے جا ٹکرائی۔

اس افسوسناک واقعے میں 28 سالہ نوجوان محمد حامد ولد محمد ماجد شدید زخمی ہو گیا۔ اطلاعات کے مطابق حادثے کے نتیجے میں اس کے بائیں پاؤں پر گہرا زخم اور دائیں ران پر شدید خراشیں آئیں۔ واقعے کی اطلاع ملتے ہی ریسکیو 1122 کی ٹیم فوری طور پر جائے حادثہ پر پہنچی اور ابتدائی طبی امداد فراہم کرنے کے بعد زخمی کو رورل ہیلتھ سنٹر اوچ شریف منتقل کر دیا۔ ڈاکٹروں کے مطابق نوجوان کی حالت خطرے سے باہر ہے۔

حادثے کے بعد موٹر وے پولیس اور ریسکیو ٹیموں نے جائے وقوعہ کو کلیئر کر کے متاثرہ گاڑی کو ہٹایا اور ٹریفک کو بحال کیا۔ فیملی کے دیگر افراد معجزانہ طور پر محفوظ رہے تاہم حادثے کے باعث شدید ذہنی صدمے کا شکار ہیں۔ پولیس نے ابتدائی رپورٹ درج کر لی ہے جبکہ حادثے کی مزید تفتیش جاری ہے۔

بہاولپور (باغی ٹی وی،نامہ نگارحبیب خان) تھانہ مسافر خانہ کے ایس ایچ او محمد آصف پر انور کالونی کی ایک بے سہارا خاتون اور اس کے بچوں پر مبینہ تشدد، زبردستی مکان پر قبضے کی کوشش اور موبائل فون چھیننے کے سنگین الزامات عائد کیے گئے ہیں۔ متاثرہ خاتون ناہید بی بی نے صحافیوں سے گفتگو میں انکشاف کیا کہ گزشتہ شب وہ اپنے بچوں کے ہمراہ گھر کے صحن میں سو رہی تھیں کہ اچانک ایس ایچ او محمد آصف پولیس کی بھاری نفری کے ساتھ دیوار پھلانگ کر گھر میں داخل ہوا، کمروں کے تالے توڑے اور زبردستی مکان پر قبضے کی کوشش کی۔

ناہید بی بی کے مطابق جب انہوں نے مزاحمت کی تو پولیس اہلکاروں نے ان پر اور ان کے کمسن بچوں پر تشدد کیا، بالوں سے پکڑ کر زمین پر گھسیٹا گیا اور ان کی چیخ و پکار پر کوئی رحم نہ کیا گیا۔ انہوں نے بتایا کہ ان کی بہن نے جب اس ظلم کی ویڈیو بنانے کی کوشش کی تو ایس ایچ او نے اسے بھی مارا پیٹا اور موبائل فون چھین لیا، ساتھ ہی سنگین نتائج کی دھمکیاں دے کر موقع سے چلا گیا۔

واقعے کی اطلاع ملتے ہی اہلِ علاقہ کی بڑی تعداد متاثرہ خاندان کے گھر کے باہر جمع ہوگئی اور پولیس کے خلاف شدید نعرے بازی کی۔ مظاہرین نے وزیراعلیٰ پنجاب مریم نواز، آئی جی پنجاب اور ڈی پی او بہاولپور سے مطالبہ کیا کہ ایس ایچ او محمد آصف کو فوری طور پر معطل کر کے اس کے خلاف قانونی کارروائی کی جائے۔

اہلِ علاقہ کا کہنا ہے کہ ایس ایچ او محمد آصف کے خلاف پہلے بھی اختیارات کے ناجائز استعمال کی شکایات سامنے آ چکی ہیں، مگر پولیس افسران نے ہمیشہ چشم پوشی سے کام لیا۔ انہوں نے خبردار کیا کہ اگر متاثرہ خاتون کو انصاف نہ ملا اور ایس ایچ او کو قانون کے کٹہرے میں نہ لایا گیا تو وہ احتجاج کا دائرہ وسیع کر کے ضلعی اور صوبائی سطح پر عوامی تحریک شروع کریں گے۔

ناہید بی بی نے اعلیٰ حکام سے اپیل کی ہے کہ ان کے اور ان کے بچوں کے تحفظ کو یقینی بنایا جائے، ورنہ وہ وزیراعلیٰ ہاؤس اور لاہور ہائی کورٹ کے باہر احتجاج کرنے پر مجبور ہوں گی۔

اوچ شریف (باغی ٹی وی، نامہ نگار حبیب خان) تیز رفتاری نے اوچ شریف اور نواحی علاقوں میں دو الگ الگ حادثات میں قیمتی جانیں نگل لیں، جس سے علاقہ کی فضا سوگوار ہو گئی۔ پہلا افسوسناک واقعہ خیرپور ڈاہا چوک، تھانہ دھوڑ کوٹ کی حدود میں پیش آیا، جہاں ایک تیز رفتار ٹرک نے موٹر سائیکل کو پیچھے سے ٹکر مار دی۔ حادثے میں 30 سالہ شبانہ بی بی زوجہ احمد حسن اور ان کی دو سالہ بیٹی مصباح بی بی موقع پر ہی جاں بحق ہو گئیں۔ دونوں لاشیں آر ایچ سی خیرپور ڈاہا منتقل کر دی گئیں۔ ٹرک ڈرائیور موقع سے فرار ہو گیا جبکہ پولیس نے کارروائی شروع کر دی ہے۔

دوسرا حادثہ اوچ شریف روڈ پر اڈا فیض واہ کے قریب پیش آیا، جہاں 37 سالہ محمد عدنان ولد محمد اقبال موٹر سائیکل پر تیز رفتاری کے باعث قابو نہ رکھ سکا اور فٹ پاتھ سے ٹکرا گیا، جس سے وہ شدید زخمی ہو گیا۔ ریسکیو 1122 نے بروقت کارروائی کرتے ہوئے زخمی کو رورل ہیلتھ سینٹر منتقل کیا۔ زخمی کو پیشانی اور پاؤں پر چوٹیں آئیں مگر حالت خطرے سے باہر ہے۔

ریسکیو ٹیم نے زخمی کی جیب سے برآمد شدہ نقدی اور موبائل فون ایمانداری سے اس کے اہلخانہ کے حوالے کیے۔ عینی شاہدین کے مطابق دونوں حادثات کی وجہ تیز رفتاری تھی۔ شہریوں نے انتظامیہ سے مطالبہ کیا ہے کہ سڑکوں پر رفتار کی حد نافذ کی جائے اور اس پر سختی سے عمل درآمد کرایا جائے تاکہ مزید جانوں کا ضیاع روکا جا سکے۔

اوچ شریف (باغی ٹی وی، نامہ نگار حبیب خان)اوچ شریف کے نواحی علاقے رتہر نہڑراں والی بستی عبد اللہ خان میں ایک افسوسناک واقعہ پیش آیا، جہاں ایک زہریلے سانپ کے کاٹنے سے مویشی پال کسان عبدالطیف کی قیمتی گائے موقع پر ہی ہلاک ہو گئی۔ گائے کی مالیت تقریباً ساڑھے تین لاکھ روپے بتائی گئی ہے۔

متاثرہ کسان کے مطابق، گائے حسب معمول گھر کے صحن میں بندھی ہوئی تھی کہ اچانک جھاڑیوں سے ایک زہریلا سانپ نمودار ہوا اور گائے کو کاٹ لیا۔ سانپ کا زہر اتنا تیز تھا کہ چند لمحوں میں ہی گائے کی حالت بگڑ گئی، اور وہ تڑپتے ہوئے زمین پر گر کر دم توڑ گئی۔

واقعے کے بعد کسان عبدالطیف شدید صدمے سے دوچار ہے اور اس کا کہنا ہے کہ یہ نقصان اس کی سال بھر کی محنت پر پانی پھیر گیا۔ مقامی افراد نے انتظامیہ سے مطالبہ کیا ہے کہ علاقہ بھر میں جھاڑیوں کی صفائی اور زہریلے جانوروں کے تدارک کے لیے فوری اقدامات کیے جائیں تاکہ مستقبل میں ایسے واقعات سے بچا جا سکے۔

اوچ شریف (باغی ٹی وی ، نامہ نگار حبیب خان) دھوڑ کوٹ سے ترنڈبشارت جانے والی نئی تعمیر شدہ سڑک چند ماہ میں ہی کھنڈرات کا منظر پیش کرنے لگی ہے۔ حالیہ بارشوں کے بعد سڑک کے دونوں کناروں پر بننے والے گہرے اور خطرناک گڑھے روزانہ حادثات کا سبب بن رہے ہیں، جس کے نتیجے میں متعدد شہری زخمی ہو چکے ہیں۔ موٹر سائیکل، کار اور دیگر گاڑیوں کے الٹنے اور پھسلنے کے واقعات میں مسلسل اضافہ ہو رہا ہے۔

اہل علاقہ نے سڑک کی تباہ حالی پر شدید احتجاج کرتے ہوئے کہا ہے کہ "یہ سڑک نہیں بلکہ کھلا قبرستان بن چکی ہے۔ ہر لمحہ ایسا محسوس ہوتا ہے جیسے موت ہمارے سروں پر منڈلا رہی ہو۔” مقامی افراد روزانہ اسی سڑک سے گزرنے پر مجبور ہیں اور ہر سفر ان کے لیے خوفناک تجربہ بن چکا ہے۔

عوامی حلقوں، بزرگوں، خواتین اور نوجوانوں نے حکومت وقت اور متعلقہ اداروں کو شدید تنقید کا نشانہ بناتے ہوئے وزیراعظم پاکستان، وزیراعلیٰ پنجاب، چیف سیکرٹری پنجاب، ڈپٹی کمشنر بہاولپور ڈاکٹر فرحان فاروق اور ہائی وے ڈیپارٹمنٹ سے پرزور مطالبہ کیا ہے کہ سڑک کے کناروں پر پڑے ان مہلک گڑھوں کو فوری طور پر بھرا جائے اور سڑک کو مکمل طور پر محفوظ بنایا جائے تاکہ قیمتی انسانی جانوں کو مزید ضیاع سے بچایا جا سکے۔