Category: بہاولپور

اوچ شریف،باغی ٹی وی(نامہ نگارحبیب) ڈیرہ نواب صاحب میں واقع مرکزی عید گاہ اور جنازہ گاہ سیوریج کے گندے پانی اور کوڑا کرکٹ کے ڈھیر میں تبدیل ہو گئی، لیکن انتظامیہ کی بے حسی برقرار ہے۔

نواب سر صادق محمد خان عباسی مرحوم کے آبائی علاقے صادق گڑھ پیلس روڈ پر واقع اس مقام پر اہل علاقہ عید نماز اور جنازے کی ادائیگی کرتے ہیں، مگر سیوریج لائن بند ہونے کے بعد اہل محلہ نے گندہ پانی عیدگاہ میں چھوڑ دیا، جس سے بدبو اور تعفن پھیل گیا ہے۔

علاوہ ازیں، صفائی نہ ہونے کے باعث جگہ جگہ کوڑا کرکٹ کے ڈھیر لگ چکے ہیں جبکہ لوگوں نے مین گیٹ بند ہونے کے سبب دیواریں توڑ کر غیر قانونی راستے بھی بنا لیے ہیں۔

ویسٹ مینجمنٹ اور میونسپل کمیٹی کے ذمہ داران خاموش تماشائی بنے ہوئے ہیں۔ شہریوں کا کہنا ہے کہ ایڈمنسٹریٹر میونسپل کمیٹی، اسسٹنٹ کمشنر احمد پور شرقیہ اور چیف آفیسر میونسپل کمیٹی نے کبھی اس جانب توجہ دینا گوارا نہیں کیا۔

ڈیرہ نواب صاحب کے رہائشی اور سماجی شخصیت قاضی محمد افضل ایڈووکیٹ ہائی کورٹ نے کمشنر بہاولپور ڈویژن اور ڈپٹی کمشنر بہاولپور سے فوری نوٹس لینے کا مطالبہ کیا ہے۔

اوچ شریف (نامہ نگار حبیب خان) وزیراعلیٰ پنجاب مریم نواز شریف کی زیر صدارت اجلاس میں پنجاب میں سیاحت کے فروغ کے لیے اہم فیصلے کیے گئے ہیں۔ پنجاب میں 170 سیاحتی مقامات اور ٹریلز کی تعمیر و مرمت اور بحالی کی اصولی منظوری دی گئی ہے۔ اس کے علاوہ، پنجاب کی پہلی مکمل ٹورازم میگنی فیسینٹ ایپ بھی تیار کر لی گئی ہے، جس کا جلد آغاز کیا جائے گا۔ میگنی فیسینٹ ایپ کے ذریعے 170 سیاحتی مقامات کی ورچوئل سیر کی جا سکے گی۔

میگنی فیسینٹ ایپ کی خصوصیات
* سیاحت سے متعلق تمام تر فیچرز شامل
* ٹریول وزٹ اور ہوٹل بکنگ کی سہولت
* فوڈ پانڈا اور دیگر سروسز تک رسائی
* چیٹ بوٹ سے مفید معلومات

وزیراعلیٰ مریم نواز شریف نے پنجاب کے سب سے بڑے اور جامع ٹورازم پلان کی اصولی منظوری دے دی ہے۔ پنجاب بھر میں مذہبی، تاریخی، قدیمی ورثہ، اثار قدیمہ اور ایکو ٹورازم کو فروغ دیا جائے گا۔ قدیمی تہذیب سے قربت کا احساس دلانے کے لیے سیاحوں کے لیے ٹورسٹ ویلج بھی بنائے جائیں گے۔ پنجاب میں پہلی مرتبہ ٹورازم ٹریل بھی تیار کی جائیں گی۔

سیاحتی ٹریلز:
* ڈسٹرکٹ مال روڈ، وال سٹی آف لاہور، سکھ سائٹس، جی ٹی روڈ کی مغل یادگاریں
* سالٹ رینج، بھاٹی گیٹ، ٹیکسالی گیٹ، گوجرانوالہ، ایمن آباد سکھ ٹورازم ٹریل
* گندھار تہذیب سے متعلق گندھار ٹریل (ٹیکسلا میوزیم، دھرما راچی کا، جولیاں، سرکیپ اور گری قلعہ)

پنجاب میں گوردوارے اور گرجاگھروں کی قدیمی عمارتوں کو بھی بحال کرنے کی تجویز کا جائزہ لیا جا رہا ہے۔ ملتان کی لیونگ ہیریٹیج سائٹ قلعہ کہنہ قاسم باغ کو وادی سندھ کی تہذیب کے نشان کے طور پر بحال کیا جائے گا۔ اوچ شریف میں زائرین کی سہولت کے لیے خصوصی ٹریل ڈویلپ کی جائے گی۔ چھانگا مانگا فارسٹ پارک اور لال سوہانرا نیشنل پارک کو ایکو ٹورازم کے فروغ کے لیے ڈویلپ کرنے پر اتفاق کیا گیا ہے۔

سیاحت کے فروغ کے لیے گورننس کی بہتری کے لیے پنجاب ٹورازم اینڈ ہیریٹیج اتھارٹی ایکٹ 2025ء پیش کیا جائے گا۔ وزیراعلیٰ مریم نواز شریف نے پنجاب کی پہلی ٹورازم اینڈ ہیریٹیج اتھارٹی کی اصولی منظوری بھی دے دی ہے۔ لاہور، ملتان، بہاولپور، چکوال اور جہلم سمیت مختلف شہروں میں ٹورازم سائٹس کو ڈویلپ کیا جائے گا۔

وزیراعلیٰ مریم نواز شریف کا کہنا ہے کہ پنجاب میں عالمی سیاحت کے فروغ کی بنیاد رکھی جا رہی ہے۔ تمام سیاحتی مقامات کو عالمی معیار کے مطابق بنایا جائے گا۔ ٹیکسلا کو مکمل ٹورسٹ سائٹ بنایا جائے گا، جہاں فائیو سٹار ہوٹل بھی تعمیر کیا جائے گا۔ ان کی پوری توجہ پنجاب میں سیاحت کے فروغ پر مرکوز ہے، اور وہ پنجاب کو سیاحتی مرکز بنانا چاہتی ہیں۔

اوچ شریف (باغی ٹی وی) وزیر اعلیٰ پنجاب کی ہدایت پر اسسٹنٹ کمشنر احمد پور شرقیہ نوید حیدر فیلڈ میں متحرک، گراں فروشوں کے خلاف کریک ڈاؤن جاری، سرکاری نرخوں پر عملدرآمد یقینی بنانے کے احکامات جاری۔ خلاف ورزی پر سخت کارروائی کی وارننگ۔

تفصیلات کے مطابق احمد پور شرقیہ سمیت تحصیل بھر میں گراں فروشی کے خلاف گرینڈ آپریشن جاری ہے۔ اسسٹنٹ کمشنر نوید حیدر نے سبزی، فروٹ، گوشت اور دیگر اشیاء کے اسٹالز اور دکانوں کا معائنہ کیا۔ اضافی نرخ وصول کرنے پر جرمانے عائد کیے گئے۔ بعد ازاں انہوں نے سستا چینی سیل پوائنٹس کا بھی معائنہ کرتے ہوئے انتظامیہ کو مزید بہتری کے احکامات جاری کیے۔

اس موقع پر اسسٹنٹ کمشنر کا کہنا تھا کہ سرکاری نرخوں پر عملدرآمد ہر صورت یقینی بنایا جائے گا اور گراں فروشی کسی صورت برداشت نہیں کی جائے گی۔ خلاف ورزی پر سخت قانونی کارروائی عمل میں لائی جائے گی۔

اوچ شریف،باغی ٹی وی (نامہ نگارحبیب خان )مولانا فضل الرحمان کا قاری سیف الرحمان راشدی سے ٹیلیفونک رابطہ، جواں سال بیٹے کے انتقال پر اظہار افسوس

جمعیت علمائے اسلام (ف) کے سربراہ مولانا فضل الرحمان نے جے یو آئی بہاولپور کے امیر قاری سیف الرحمان راشدی سے ٹیلیفونک رابطہ کیا اور ان کے جواں سال بیٹے کے انتقال پر گہرے دکھ اور افسوس کا اظہار کیا۔

مولانا فضل الرحمان نے مرحوم کے لیے دعائے مغفرت کرتے ہوئے کہا کہ اللہ کریم مرحوم کی مغفرت فرمائے، درجات بلند کرے اور اعلیٰ علیین میں مقام عطا فرمائے۔ انہوں نے قاری سیف الرحمان اور ان کے اہل خانہ سے دلی تعزیت کا اظہار کرتے ہوئے کہا کہ جواں اولاد کی موت بڑا صدمہ ہے، اللہ کریم آپ کو صبر جمیل عطا فرمائے۔

اوچ شریف (نامہ نگار حبیب خان) اوچ شریف کے نواحی علاقے موضع ککس بستی حاجی محمد یار ککس میں ایک اہم اور خوش آئند واقعہ پیش آیا، جہاں مقامی رہائشی محمد جاوید ولد عبد الرزاق نے جرائم سے توبہ کر کے ایک نئی زندگی شروع کرنے کا اعلان کیا۔ اس موقع پر علاقے کے معززین، بزرگوں اور دیگر اہلِ علاقہ کی بڑی تعداد موجود تھی، جنہوں نے محمد جاوید کے اس فیصلے کو سراہا اور اسے نیکی اور بھلائی کے راستے پر چلنے کی تلقین کی۔

توبہ کے اس یادگار اجتماع میں زراعت آفیسر عبدالمالک، قاری بشیر احمد اور دیگر اہم شخصیات نے شرکت کی۔ انہوں نے اس موقع پر کہا کہ محمد جاوید کا جرائم سے کنارہ کش ہو کر ایک مثبت زندگی کی طرف آنا پورے علاقے کے لیے خوشی کی بات ہے۔ انہوں نے نوجوانوں پر زور دیا کہ وہ جرائم سے دور رہیں اور اپنی زندگی کو بہتر بنانے کے لیے محنت اور ایمانداری کے راستے کو اپنائیں۔

محمد جاوید نے کہا کہ ماضی میں وہ بعض غلط سرگرمیوں میں ملوث رہا، لیکن اب وہ سچے دل سے ان سب سے توبہ کرتا ہے اور آئندہ ایک دیانتدار اور نیک زندگی گزارنے کا عزم رکھتا ہے۔ اس کے اس فیصلے پر اہل علاقہ نے خوشی اور اطمینان کا اظہار کیا اور دعا کی کہ اللہ تعالیٰ اسے ثابت قدم رکھے۔

اوچ شریف (نامہ نگار حبیب خان) وزیر اعلیٰ پنجاب مریم نواز شریف کی خصوصی ہدایت پر شہریوں کی جان و مال کے تحفظ اور موٹروے پر حادثات کے دوران بروقت امداد فراہم کرنے کے لیے ریسکیو 1122 کی ٹیمیں اور گاڑیاں 24 گھنٹے الرٹ رہیں گی۔ اوچ شریف انٹرچینج اور جھانگڑہ مشرقی انٹرچینج پر جدید سہولیات سے آراستہ ایمبولینسز اور ریسکیو اہلکاروں کی موجودگی یقینی بنا دی گئی ہے تاکہ کسی بھی ہنگامی صورتحال میں فوری مدد فراہم کی جا سکے۔

وزیر اعلیٰ پنجاب مریم نواز شریف نے صوبے بھر میں شہریوں کو محفوظ سفری سہولیات فراہم کرنے کے عزم کا اظہار کیا ہے۔ ان کی ہدایات پر ریسکیو 1122 کے اہلکاروں کو خصوصی تربیت دی گئی ہے تاکہ وہ حادثات، طبی ایمرجنسیز اور دیگر ہنگامی حالات میں فوری اور مؤثر مدد فراہم کر سکیں۔ اس اقدام کا مقصد نہ صرف شہریوں کی حفاظت کو یقینی بنانا ہے بلکہ موٹروے پر سفر کرنے والوں کو اعتماد دینا ہے کہ کسی بھی ناگہانی صورتحال میں ریسکیو 1122 ان کی مدد کے لیے موجود ہو گی۔

ڈسٹرکٹ ایمرجنسی آفیسر باقر حسین نے کہا کہ ریسکیو 1122 کی گاڑیاں اور اہلکار دن رات کسی بھی ممکنہ حادثے یا طبی ایمرجنسی کے لیے مکمل تیار رہیں گے۔ اس حوالے سے تمام ضروری اقدامات مکمل کر لیے گئے ہیں اور ریسکیو 1122 کی خصوصی ٹیمیں جدید طبی آلات اور سہولیات سے لیس ایمبولینسز کے ساتھ تعینات کر دی گئی ہیں۔

ڈسٹرکٹ ایمرجنسی آفیسر کے مطابق کسی بھی ناخوشگوار واقعے کی صورت میں شہری فوری طور پر ریسکیو 1122 کے ہیلپ لائن نمبر 1122 پر کال کریں۔ عوام کی آگاہی کے لیے موٹروے پر مختلف مقامات پر بینرز اور سائن بورڈز بھی لگائے گئے ہیں، جن پر ریسکیو 1122 کے رابطہ نمبرز اور حفاظتی تدابیر درج ہیں۔

ریسکیو 1122 اور پنجاب حکومت نے شہریوں کی حفاظت کے پیش نظر چند احتیاطی تدابیر بھی جاری کی ہیں، جن پر عمل کرکے حادثات کی شرح کو کم کیا جا سکتا ہے:

گاڑی کی رفتار مقررہ حد میں رکھیں اور سیٹ بیلٹ کا استعمال یقینی بنائیں۔
طویل سفر سے پہلے گاڑی کے بریک، ٹائر، انجن آئل اور دیگر فنی پہلوؤں کا معائنہ کروائیں۔
دھند، بارش یا خراب موسم میں غیر ضروری سفر سے گریز کریں۔
نیند یا تھکاوٹ محسوس ہو تو گاڑی روک کر آرام کریں تاکہ حادثات سے بچا جا سکے۔
کسی بھی ہنگامی صورتحال میں فوری طور پر ریسکیو 1122 کو اطلاع دیں تاکہ بروقت مدد فراہم کی جا سکے۔

وزیر اعلیٰ پنجاب مریم نواز نے کہا کہ "عوام کی حفاظت اور فلاح و بہبود ہماری اولین ترجیح ہے۔ ہم شہریوں کو زیادہ سے زیادہ سہولیات فراہم کرنے کے لیے ہر ممکن اقدامات کر رہے ہیں، اور ریسکیو 1122 کی 24 گھنٹے تعیناتی اسی وژن کا ایک اہم حصہ ہے۔