Category: بہاولپور

اوچ شریف ،باغی ٹی وی (نامہ نگار حبیب خان) اوچ شریف کے نواحی علاقے نو شہرہ جدید میں تیز رفتاری کے باعث موٹرسائیکل حادثہ، 16 سالہ لڑکامحمد اشرف جاں بحق جبکہ اس کا 6 سالہ بھائی شدید زخمی ہو گیا۔

تفصیلات کے مطابق جھانگڑہ روڈ پر ایک تیز رفتار موٹر سائیکل بے قابو ہو کر فٹ پاتھ سے جا ٹکرائی، جس کے نتیجے میں محمد اشرف ولد محمد اکرم موقع پر ہی دم توڑ گیا، جبکہ اس کا 6 سالہ بھائی محمد اظہر شدید زخمی ہو گیا۔

ریسکیو 1122 کی ٹیم فوری طور پر جائے حادثہ پر پہنچی اور زخمی بچے کو طبی امداد دینے کے بعد وکٹوریہ ہسپتال، بہاولپور منتقل کر دیا گیا۔ ریسکیو عملے کے مطابق حادثہ موٹر سائیکل کی تیز رفتاری اور عدم توازن کے باعث پیش آیا۔

حادثے کی اطلاع ملتے ہی پولیس بھی موقع پر پہنچ گئی، جبکہ جاں بحق نوجوان کی میت قانونی کارروائی کے بعد ورثا کے حوالے کر دی گئی۔

اوچ شریف ،باغی ٹی وی(نامہ نگارحبیب خان) ککس موڑ پر موت کا رقص جاری، آئے روز حادثات، انتظامیہ تماشائی

تفصیل کے مطابق اوچ شریف کے نواح میں واقع ککس موڑجہاں ہر روز موت گھات لگائے بیٹھی ہے، جہاں روزانہ کوئی نہ کوئی قیمتی جان حادثے کی نذر ہو جاتی ہے مگر انتظامیہ کی آنکھیں بند اور ضمیر سو رہا ہے۔

تازہ ترین واقعے میں 50 سالہ محمد اقبال ولد حاجی احمد جو ہتھیجی کے رہائشی تھے، ایک خوفناک حادثے کا شکار ہو گئے۔ تیز رفتار ٹرالی اور ٹریلر کے خوفناک تصادم کے باعث وہ شدید زخمی ہوئے۔ ریسکیو ٹیمیں فوراً موقع پر پہنچیں مگر سر پر شدید چوٹ لگنے کی وجہ سے محمد اقبال ہسپتال پہنچنے سے پہلے ہی دم توڑ گئے۔

یہ پہلا سانحہ یا حادثہ نہیں ہے کہ بلکہ ککس موڑ پر ہونے والے حادثات کی ایک نہ ختم ہونے والی فہرست ہے، جہاں اب تک درجنوں افراد اپنی جان سے ہاتھ دھو بیٹھے ہیں۔ ہر حادثے کے ساتھ کسی کا سہاگ اجڑ جاتا ہے، کسی ماں کی گود خالی ہو جاتی ہے اور کئی بچے یتیم ہو جاتے ہیں مگر متعلقہ ادارے خوابِ غفلت میں ہیں۔

علاقہ مکینوں کا کہنا ہے کہ یہ حادثات انتظامیہ کی بے حسی اور لاپرواہی کا نتیجہ ہیں۔ اگر یہاں مناسب ٹریفک سائنز، اسپیڈ بریکر اور دیگر حفاظتی اقدامات کیے جاتے تو کئی قیمتی جانیں ضائع ہونے سے بچ سکتی تھیں۔

شہریوں نے حکومت اور متعلقہ اداروں سے پُرزور مطالبہ کیا ہے کہ فوری طور پر حفاظتی اقدامات کیے جائیں، بصورتِ دیگر عوام احتجاج پر مجبور ہوگی۔
شہریوں کا مزید کہنا تھا کہ اگر فوری اقدامات نہ کیے گئے تو مزید قیمتی جانیں ضائع ہو سکتی ہیں۔ کیا انتظامیہ مزید گھروں کے چراغ گل ہونے کے بعد جاگے گی؟ یا پھر عوام کو خود سڑکوں پر نکل کر اپنے حقوق کے لیے لڑنا ہوگا؟

حکام کو ہوش کے ناخن لینے ہوں گے، ورنہ عوامی غصہ ایک شدید احتجاج میں تبدیل ہو سکتا ہے!

اوچ شریف،باغی ٹی وی(نامہ نگار حبیب خان) احمدپور شرقیہ کے علاقے تھانہ صدر کی حدود میں تیزاب گردی کا لرزہ خیز واقعہ پیش آیا، جہاں 45 سالہ محنت کش خاتون شاہینہ بی بی اور اس کی 11 سالہ بیٹی مسکان پر رات کی تاریکی میں تیزاب پھینک دیا گیا۔ واقعہ 20 فروری کو رات 11 بجے پیش آیا جب ماں اور بیٹی اپنے گھر میں سو رہی تھیں۔

تیزاب گردی کے نتیجے میں شاہینہ بی بی بری طرح جھلس گئیں اور انہیں تشویشناک حالت میں نشتر ہسپتال ملتان منتقل کیا گیا، جہاں وہ زندگی اور موت کی کشمکش میں مبتلا ہیں جبکہ 11 سالہ مسکان کی حالت خطرے سے باہر بتائی جا رہی ہے۔

متاثرہ خاتون کے اہل خانہ نے وزیراعلیٰ پنجاب مریم نواز اور ڈی پی او بہاولپور سے انصاف کی اپیل کرتے ہوئے مقدمے میں نامزد ملزمان کی فوری گرفتاری کا مطالبہ کیا ہے۔ والدہ زرینہ بی بی کی مدعیت میں ایک نامزد اور ایک نامعلوم شخص کے خلاف مقدمہ درج کر لیا گیا ہے۔

متاثرہ خاتون کے والد غلام یٰسین نے آبدیدہ ہو کر بتایا کہ ان کی بیٹی کو اس کے شوہر مجاہد اور اس کے بہن بھائیوں کی جانب سے دھمکیاں دی جا رہی تھیں کہ "ہم تمہیں زہر دے دیں گے” اور ان پر دباؤ ڈالا جا رہا تھا کہ وہ 10 مرلہ پلاٹ ان کے نام کروائیں اور رقم حوالے کریں۔

متاثرہ خاتون کے 14 سالہ بیٹے زبیر کا بھی کہنا ہے کہ اس کی والدہ کو مسلسل دھمکایا جا رہا تھاجبکہ واقعے کے بعد بھی گواہوں کو ملزمان کی جانب سے دھمکیاں دی جا رہی ہیں۔ اہل خانہ نے خدشہ ظاہر کیا ہے کہ ہسپتال میں بھی شاہینہ کی جان کو خطرہ لاحق ہے لہٰذا وہاں سیکیورٹی فراہم کی جائے۔

پولیس کے مطابق تفتیش جاری ہے اور میرٹ پر فیصلہ کیا جائے گا جبکہ سماجی و سیاسی حلقوں نے تیزاب گردی کے اس اندوہناک واقعے پر شدید غم و غصے کا اظہار کرتے ہوئے اعلیٰ حکام سے فوری انصاف کی فراہمی کا مطالبہ کیا ہے۔

اوچ شریف،باغی ٹی وی(نامہ نگار حبیب خان) تاریخی شہر اوچ شریف میں چوری اور ڈکیتی کی وارداتوں میں خطرناک حد تک اضافہ ہو چکا ہے، جبکہ پولیس تاحال مجرموں کو پکڑنے میں ناکام ہے۔ چھت پھاڑ چور گینگ ایک بار پھر سرگرم ہوگیا اور پولیس کو چیلنج کرتے ہوئے تھانہ اوچ شریف کے قریب ہی ایک بڑی واردات کر ڈالی۔

خیرپور ڈاہا روڈ پر واقع شاہد الیکٹریشن کی دکان کی چھت پھاڑ کر نامعلوم چور لاکھوں روپے مالیت کی 7 قیمتی بجلی کی موٹریں اور ایک بنڈل بجلی کی تار چوری کر کے فرار ہوگئے۔ حیران کن بات یہ ہے کہ یہ واردات اس علاقے میں ہوئی جہاں پولیس کی موجودگی عام ہے، مگر اس کے باوجود مجرموں کو روکنے والا کوئی نہیں تھا۔

مقامی تاجروں اور شہریوں نے پولیس کی مسلسل ناکامی پر شدید غم و غصے کا اظہار کرتے ہوئے ضلعی انتظامیہ اور اعلیٰ پولیس حکام سے فوری نوٹس لینے کا مطالبہ کیا ہے۔ ان کا کہنا ہے کہ اگر پولیس اور متعلقہ ادارے جرائم پیشہ عناصر کے خلاف سخت کارروائی نہیں کرتے تو کاروبار کرنا ناممکن ہو جائے گا، اور شہریوں کو اپنی حفاظت کے لیے خود اقدامات کرنے پر مجبور ہونا پڑے گا۔

اوچ شریف کے تاجروں نے عندیہ دیا ہے کہ اگر چوری کی بڑھتی وارداتوں پر قابو نہ پایا گیا اور سیکیورٹی کے مؤثر اقدامات نہ کیے گئے تو وہ اپنی دکانیں بند کر کے احتجاج کریں گے۔

پولیس کے مطابق واردات کی تحقیقات جاری ہیں اور جلد چوروں کو گرفتار کر کے قانون کے کٹہرے میں لایا جائے گا۔ تاہم شہریوں کا کہنا ہے کہ پولیس ماضی میں بھی محض بیانات دیتی رہی ہے اور عملی اقدامات نظر نہیں آئے۔

اوچ شریف کے عوام نے وزیراعلیٰ پنجاب، آئی جی پنجاب اور دیگر ارباب اختیار سے مطالبہ کیا ہے کہ شہر میں بڑھتی ہوئی وارداتوں کا فوری نوٹس لیا جائے اور پولیس کو مؤثر کارروائی کے احکامات جاری کیے جائیں، تاکہ شہری اور تاجر خود کو محفوظ محسوس کر سکیں۔

اوچ شریف ،باغی ٹی وی(نامہ نگارحبیب خان) چک 181 مراد، چونا والا روڈ کے قریب ایک مسافر بس خوفناک حادثے کا شکار ہوگئی، جس کے نتیجے میں 15 افراد زخمی ہوگئے۔

ریسکیو ذرائع کے مطابق حادثہ اس وقت پیش آیا جب کھچی والا سے بہاولپور جانے والی گل برادرز کی نان اے سی بس (LRO-2678) کا اسٹیئرنگ اچانک لاک ہوگیا، جس کے باعث ڈرائیور قابو نہ رکھ سکا۔ تیز رفتاری کے باعث بس بے قابو ہو کر ایک کیکر کے درخت سے ٹکرا گئی اور الٹ گئی۔

حادثے کی اطلاع ملتے ہی بہاول نگر کنٹرول کو ایمرجنسی کال موصول ہوئی، جس پر فوری طور پر ریسکیو 1122 کی امدادی ٹیمیں جائے وقوعہ پر روانہ کردی گئیںجبکہ بہاولپور کنٹرول کو بھی مطلع کیا گیا۔

ریسکیو ذرائع کے مطابق زخمیوں میں شامل افراد کو ابتدائی طبی امداد فراہم کرنے کے بعد قریبی اسپتال منتقل کردیا گیا ہے۔ زخمیوں میں شامل افراد میں اریبہ دختر محمد اقبال (23 سال)مشتبہ ناک کی ہڈی کا فریکچرسکنہ رفیق آباد اڈہ کھچی والا۔مسرت پروین زوجہ محمد مختیار (50 سال) دائیں بازو کی ہڈی کا فریکچرسکنہ احمد پور شرقیہ۔مزید 13 زخمیوں کو فوری طور پر طبی امداد کے لیے اسپتال منتقل کیا جا چکا ہے جبکہ دیگر زخمیوں کو بھی ہسپتال میں ضروری علاج فراہم کیا جا رہا ہے۔

حادثے کے بعد مقامی شہریوں نے بسوں کی فٹنس اور حفاظتی اقدامات کی عدم موجودگی پر شدید تشویش کا اظہار کیا ہے۔ ان کا کہنا ہے کہ اکثر بسیں فنی خرابیوں کے باوجود سڑکوں پر دوڑ رہی ہیں جو خطرناک حادثات کا سبب بن سکتی ہیں۔

اوچ شریف،باغی ٹی وی(نامہ نگارحبیب خان) بہاولپور کے علاقے گلشنِ اجمل محلہ باغ ماہی میں سسر کی ناپاک خواہش پوری نہ کرنے پر بہو پر تشدد، جس کے باعث اس کا تین ماہ کا حمل ضائع ہونے کا خدشہ ہے۔

تفصیلات کے مطابق مسکان صدیق کی شادی 9 ماہ قبل ہوئی تھی تاہم اس کا سسر محمد اجمل اس پر بری نظر رکھے ہوئے تھا۔ گزشتہ روز جب مسکان کا شوہر کام کے سلسلے میں گھر سے باہر تھا تو محمد اجمل نے بہو کے کمرے میں داخل ہو کر ناپاک ارادے سے اسے دبوچ لیا۔ مسکان کے شور مچانے پر اہلِ خانہ اکٹھے ہو گئے تو محمد اجمل نے اپنی عزت بچانے کے لیے اسے زبردستی گھر سے نکال دیا۔

بعد ازاں محمد اجمل اور اس کے بیٹے مدنی اجمل نے الزام لگایا کہ مسکان گھر سے بھاگ گئی ہے اور اسے گلی میں پکڑ کر بہیمانہ تشدد کا نشانہ بنایا، جس سے وہ بے ہوش ہو گئی۔ حاملہ بہو کی بگڑتی حالت دیکھ کر سسرالیوں نے ایک مقامی معزز شخص کو بلا کر مسکان کو اس کے والد کے گھر بھجوا دیا اور ساتھ ہی دھمکیاں دیں کہ وہ جھوٹے مقدمات میں پھنسا دیں گے۔

متاثرہ خاتون مسکان صدیق نے اپنے والد محمد صدیق کے ہمراہ میڈیا سے گفتگو کرتے ہوئے وزیراعلیٰ پنجاب مریم نواز شریف اور اعلیٰ حکام سے اپیل کی ہے کہ انہیں انصاف فراہم کیا جائے اور ظالموں کے خلاف کارروائی کی جائے۔