Category: بہاولپور

اوچ شریف (باغی ٹی وی، نامہ نگار حبیب خان) اوچ شریف کے الشمس چوک پر نجی تعلیمی اداروں کے اساتذہ، سکول کے طلباء اور انجمن تاجران نے تعلیمی اداروں کو کمرشل بنانے اور اضافی ٹیکسوں کے نفاذ کے خلاف بھرپور احتجاج کیا۔ احتجاجی ریلی کی قیادت مرکزی صدر انجمن تاجران اوچ شریف اور سول سوسائٹی کے رہنما عمر خورشید سہمن نے کی۔ ریلی ڈاکخانہ چوک سے الشمس چوک تک نکالی گئی، جس میں بڑی تعداد میں اساتذہ، طلباء اور تاجروں نے شرکت کی۔

ریلی کے شرکاء نے حکومت کے فیصلے کے خلاف شدید نعرے بازی کی اور مطالبہ کیا کہ تعلیمی اداروں کو کمرشل قرار دینے کا فیصلہ واپس لیا جائے۔ احتجاج کے دوران اساتذہ اور تاجروں نے کہا کہ تعلیمی اداروں پر بھاری ٹیکسوں کا نفاذ نہ صرف نجی تعلیمی اداروں کے لیے مشکلات پیدا کر رہا ہے بلکہ طلباء کے تعلیمی مستقبل کو بھی خطرے میں ڈال رہا ہے۔

مظاہرین نے الزام عائد کیا کہ میونسپل کمیٹی اوچ شریف کی جانب سے آئے دن سکولوں کو مختلف وجوہات کی بنا پر سیل کر دیا جاتا ہے، جس کے باعث بچوں کی تعلیم میں مسلسل خلل پیدا ہو رہا ہے۔ مظاہرین نے کہا کہ انتظامیہ کے ان اقدامات سے طلباء اور والدین ذہنی دباؤ کا شکار ہو رہے ہیں۔

خطاب کرتے ہوئے عمر خورشید سہمن نے کہا کہ "یہ اقدامات بچوں کے مستقبل کے لیے سنگین خطرہ ہیں اور قوم کے نونہالوں کا مستقبل تاریک ہوتا نظر آ رہا ہے۔ اگر حکومت نے اس فیصلے پر نظرثانی نہ کی تو ہم احتجاج کا دائرہ وسیع کریں گے۔” انہوں نے ڈپٹی کمشنر بہاولپور سے مطالبہ کیا کہ فوراً تمام سکولوں کو ڈی سیل کیا جائے اور تعلیمی اداروں پر عائد بھاری ٹیکسوں کو ختم کیا جائے۔

احتجاج کے دوران سکول سربراہان اور دیگر شرکاء نے اعلان کیا کہ اگر حکومت نے ہمارے مطالبات پر کوئی سنجیدہ قدم نہیں اٹھایا تو ہم ڈپٹی کمشنر بہاولپور آفس کے سامنے دھرنا دیں گے۔ انہوں نے حکومت پر زور دیا کہ تعلیم جیسے بنیادی شعبے کو کاروباری زمرے میں شامل نہ کیا جائے اور فوری طور پر تعلیمی اداروں کو درپیش مسائل کا حل نکالا جائے تاکہ طلباء کی تعلیم اور اساتذہ کی محنت متاثر نہ ہو۔

مظاہرین نے حکومت سے پرزور مطالبہ کیا کہ تعلیمی اداروں پر عائد غیر ضروری ٹیکسوں اور رکاوٹوں کو فوری طور پر ختم کیا جائے تاکہ بچوں کی تعلیمی سرگرمیاں متاثر نہ ہوں۔ انہوں نے کہا کہ تعلیم ہر شہری کا بنیادی حق ہے اور اس میں کسی بھی قسم کی رکاوٹ کسی صورت قبول نہیں کی جائے گی۔

احتجاج کے بعد شرکاء پرامن طور پر منتشر ہو گئے، تاہم انہوں نے واضح کیا کہ اگر ان کے مطالبات پر فوری عملدرآمد نہ کیا گیا تو وہ مزید سخت احتجاجی اقدامات اٹھانے پر مجبور ہوں گے۔

اوچ شریف (باغی ٹی وی، نامہ نگار حبیب خان) اوچ شریف کے نواحی علاقے رسول پور میں پل پنجند کی خستہ حالی کے باعث عوام سراپا احتجاج بن گئے اور حکام سے فوری مرمت و تعمیر کا مطالبہ کر رہے ہیں۔ برسوں سے مخدوش حالت میں موجود یہ پل درجنوں دیہاتوں کو قومی شاہراہ اور سی پیک سے جوڑنے کا واحد ذریعہ ہے، لیکن اس کی خطرناک صورتحال روزانہ سیکڑوں شہریوں کی زندگیوں کو داؤ پر لگا رہی ہے۔

پل کے پشتے کمزور ہو چکے ہیں جبکہ حفاظتی جنگلے بھی ٹوٹ پھوٹ کا شکار ہیں، جس کی وجہ سے حادثات میں اضافہ ہو رہا ہے۔ مقامی کسانوں کو اپنی زرعی اجناس منڈیوں تک لے جانے میں شدید مشکلات کا سامنا ہے، جس سے علاقے کی معیشت پر منفی اثرات مرتب ہو رہے ہیں۔ روزانہ کی بنیاد پر سینکڑوں گاڑیاں اس پل سے گزرتی ہیں، لیکن حفاظتی اقدامات نہ ہونے کے برابر ہیں۔

مقامی افراد کا کہنا ہے کہ وہ عرصہ دراز سے ارباب اختیار کو پل کی مرمت کے لیے درخواستیں دے رہے ہیں، مگر کوئی شنوائی نہیں ہو رہی۔ شہریوں نے خبردار کیا کہ اگر حکام نے بروقت قدم نہ اٹھایا تو کسی بڑے حادثے کا خدشہ ہے، جو نہ صرف قیمتی جانوں کے ضیاع کا باعث بن سکتا ہے بلکہ علاقے کی ترقی کو بھی شدید متاثر کر سکتا ہے۔

اہلیانِ علاقہ نے کمشنر بہاول پور، ڈپٹی کمشنر بہاول پور، وزیر اعلیٰ پنجاب اور دیگر اعلیٰ حکام سے مطالبہ کیا ہے کہ وہ فوری طور پر پل کی مرمت اور توسیع کے لیے ہنگامی بنیادوں پر اقدامات کریں۔ ان کا کہنا ہے کہ یہ پل نہ صرف مقامی ٹریفک کے لیے اہم ہے بلکہ سی پیک کے راستے کو بھی سہولت فراہم کرتا ہے، اس لیے اس کی بحالی کو اولین ترجیح دی جائے۔

اوچ شریف باغی ٹی وی ( نامہ نگار حبیب خان )محمد بن قاسم کے دور کی یادگار اوچ موغلہ کی تاریخی مسجد اپنی آخری سانسیں لینے گی،کیا یہ عظیم ورثہ حکومتی عدم توجہی کی نذر ہو جائے گا؟ 74 ہجری میں تعمیر کی گئی یہ قدیم مسجد، جو فنِ تعمیر کا شاندار نمونہ اور تاریخ کا اہم حصہ سمجھی جاتی ہے، آج زبوں حالی کا شکار ہے۔ کیا اس ورثے کی حفاظت کے لیے کوئی اقدامات کیے جائیں گے؟

یہ تاریخی مسجد جو مٹی سے بنی ہوئی تھی وقت کے ساتھ ساتھ بوسیدہ ہو چکی ہے۔ اس کی دیواریں گرنے کے قریب ہیں اور اردگرد کی نئی تعمیرات اور زمین کی بھرائی اس قدیم ورثے کو مکمل طور پر دفن کرنے کے درپے ہیں۔ اگر یہی صورتحال رہی تو سوال یہ پیدا ہوتا ہے کیا آنے والی نسلیں اس عظیم تاریخ کے آثار دیکھ پائیں گی؟

مقامی روایات کے مطابق یہ مسجد محمد بن قاسم کی فتوحات کے دور کی ایک نشانی ہے، لیکن آج اس کی بحالی کے لیے کوئی سنجیدہ کوشش نظر نہیں آ رہی۔ کیا آثارِ قدیمہ کے ماہرین، مقامی انتظامیہ یا متعلقہ حکومتی ادارے اس معاملے کو سنجیدگی سے لیں گے؟ کیا کوئی ایسا اقدام کیا جائے گا جس سے یہ ورثہ مزید تباہ ہونے سے بچ سکے؟

یہ مسجد نہ صرف ایک قدیم عبادت گاہ بلکہ اسلامی تاریخ اور ثقافت کا ایک جیتا جاگتا ثبوت ہے۔ ماہرین آثارِ قدیمہ کے مطابق اس کے کھنڈرات بھنبھور اور الور کے قدیم آثار سے مماثلت رکھتے ہیں جو اس کی تاریخی اہمیت کو مزید اجاگر کرتے ہیں۔ اگر اس کی حفاظت نہ کی گئی توایسا لگتا ہے کہ ہم اپنی تاریخ اور شناخت کھو دیں گے

یہ سوال ابھی تک جواب طلب ہے کہ اس تاریخی مسجد کی بحالی اور تحفظ کے لیے کون اقدامات کرے گا؟ کیا محکمہ آثارِ قدیمہ یا حکومت کوئی عملی قدم اٹھائے گی یا پھر یہ مسجد بھی دیگر تاریخی ورثوں کی طرح ماضی کا ایک دھندلا عکس بن کر مٹی میں دفن ہوجائے گی؟

مقامی شہریوں، سیاسی، سماجی اور مذہبی حلقوں نے اس ثقافتی اور مذہبی ورثے کی بحالی کے لیے حکومت سے فوری نوٹس لینے کا مطالبہ کیا ہے تاکہ یہ تاریخی علامت آنے والی نسلوں کو ہمارے شاندار ماضی کی گواہی دے سکے۔

اوچ شریف،باغی ٹی وی (نامہ نگارحبیب خان) درگاہ قادریہ غوثیہ گیلانیہ عالیہ محبوب سبحانی اوچ شریف کے سجادہ نشین حضرت مخدوم الملک مخدوم سید حامد محمد شمس الدین گیلانیؒ کا 39واں سالانہ عرس مبارک عقیدت و احترام کے ساتھ منایا گیا۔

عرس کی دوروزہ تقریبات شمس محل میں منعقد ہوئیں، جس میں سجادہ نشین مخدوم سید افتخار الحسن گیلانی اور ولی عہد مخدوم سید عمر رضا گیلانی جلوہ افروز ہوئے۔ علماء کرام اور نعت خوان حضرات نے نذرانہ عقیدت پیش کیا۔

اس موقع پر حضرت مخدوم سید افتخار الحسن گیلانی نے ملک کی سلامتی، امن و خوشحالی کے لیے خصوصی دعا کرائی۔ درگاہ کو عطر و گلاب سے غسل دیا گیا، جبکہ ملک بھر سے آئے ہوئے عقیدت مندوں اور زائرین نے مزار پر پھولوں کی چادریں چڑھائیں اور عقیدت کے پھول نچھاور کیے۔

عرس کی تقریبات کے اختتام پر زائرین روحانی فیض حاصل کرنے کے بعد اپنے گھروں کو روانہ ہو گئے۔