Category: بہاولپور

اوچ شریف،باغی ٹی وی(نامہ نگارحبیب خان) جمیعت علماء اسلام کے رہنماؤں اور کارکنوں نے چوک منیر شہید احمدپور شرقیہ میں احتجاج کیا، جس کی قیادت قاری سیف الرحمن راشدی اور مولانا پیر حماد اللہ نے کی۔ مظاہرین نے رہنما شیخ الحدیث جامعہ دارالفتیحہ مولانا محمد سلیمان کی گرفتاری پر شدید احتجاج کیا اور ان کی فوری رہائی کا مطالبہ کیا۔

احتجاجی مظاہرہ میں تحصیل بھر سے سینکڑوں علماء کرام اور کارکن شریک ہوئے، جنہوں نے نعرے بازی کرتے ہوئے کہا کہ علماء اسلام کے خلاف کارروائیاں ناقابل قبول ہیں۔ قاری سیف الرحمن راشدی نے خطاب کرتے ہوئے کہا کہ اگر مولانا محمد سلیمان کو رہا نہ کیا گیا تو قائد جمیعت مولانا فضل الرحمن کی مشاورت سے احتجاج کا دائرہ وسیع کیا جائے گا۔

مولانا محمد احمد جالندھری نے کہا کہ ہم امن پسند لوگ ہیں اور ہمیں امن سے رہنے دیا جائے۔ مظاہرین نے صدر پاکستان، وزیر اعظم، وزیر اعلیٰ پنجاب اور ڈی پی او بہاولپور سے مولانا محمد سلیمان کی فوری رہائی کی اپیل کی۔

احتجاج میں پروفیسر عامر حفیظ، مہر غلام ربانی کاٹھیہ، قاری عبدالمنان قریشی، مولانا غلام مرتضیٰ عثمانی، قاضی عمر فاروق، مولانا سمیع الرحمن، مامون اکمل کمالوی اور دیگر رہنماؤں نے بھی شرکت کی۔

اوچ شریف،باغی ٹی وی (نامہ نگارحبیب خان )حکومت چولستان کے عوام کو بھول گئی،چولستانی پانی کی بجائے زہر پینے پر مجبور،ہیڈ پنجند کی نہریں گندگی اور زہر کا ڈھیر بن گئیں، عوام ہیپاٹائٹس اور وبائی امراض کی لپیٹ میں، زرعی اور معاشی تباہی سر پر منڈلانے لگی۔

تفصیلات کے مطابق چولستان اور روہی کے لاکھوں باسی حکومتی آفیسران کی مجرمانہ غفلت کا شکار ہیں اور نہروں کا آلودہ اور پلید پانی پینے پر مجبور ہیں۔ ہیڈ پنجند سے نکلنے والی نہریں، جو اس علاقے کے عوام کے لیے پانی کا واحد ذریعہ ہیں، سیوریج کے گندے پانی اور جانوروں کے فضلے سے بھر چکی ہیں۔ آلودگی کی شدت اس حد تک بڑھ چکی ہے کہ یہ پانی وضو کے قابل بھی نہیں رہا، مگر چولستانیوں کی زندگی کا دارومدار اسی پانی پر ہے۔

مقامی لوگوں کا کہنا ہے کہ نہروں میں گٹر کا پانی، جانوروں کا گوبر اور زہریلا مواد شامل ہونے کی وجہ سے یہ پانی پینے کے قابل نہیں رہا۔ اس آلودہ پانی کے استعمال سے علاقے میں ہیپاٹائٹس، پیٹ کی بیماریاں اور وبائی امراض میں تشویشناک اضافہ ہوا ہے، جس نے عوام کی زندگی اجیرن بنا دی ہے۔

اس کے علاوہ زراعت اور مویشیوں پر بھی اس آلودگی کے مضر اثرات پڑ رہے ہیں، جس سے مقامی معیشت تباہی کے دہانے پر پہنچ چکی ہے۔ حکومتی ادارے اور بااختیار آفیسران نہ تو مسئلے کا کوئی حل نکال سکے ہیں اور نہ ہی کاغذی کارروائی سے آگے بڑھے ہیں۔

عوام نے وزیراعلیٰ پنجاب مریم نواز شریف سے مطالبہ کیا ہے کہ وہ فوری نوٹس لے کر اقدامات کریں تاکہ چولستانیوں کی صحت، معیشت اور زندگی کو لاحق خطرات کو کم کیا جا سکے۔

اوچ شریف ،باغی ٹی وی( نامہ نگار حبیب خان)یار شاہ قبرستان کی چار دیواری نہ ہونے سے رقبہ سکڑنے لگا، قبروں کی بے حرمتی جاری

اوچ شریف اور نواحی علاقے بیٹ احمد میں واقع یار شاہ قبرستان سنگین مسائل سے دوچار ہے۔ چار دیواری نہ ہونے کے باعث آوارہ جانوروں کی آمدورفت نے قبرستان کی حالت خراب کر دی ہے۔ قبروں کو نقصان پہنچنے کے ساتھ ساتھ قبرستان کا تقدس پامال ہو رہا ہے۔

مقامی افراد کے مطابق قبرستان کا رقبہ تیزی سے کم ہو رہا ہے، جس کی وجہ سے تدفین کے لیے جگہ کی کمی کا سامنا ہے۔ اہل علاقہ نے ڈپٹی کمشنر بہاولپور اور مقامی سیاست دانوں سے فوری اقدامات کا مطالبہ کیا ہے۔

شہریوں نے قبرستان کے لیے چار دیواری کی تعمیر کے علاوہ وضو خانہ، جنازہ گاہ اور دیگر سہولیات فراہم کرنے کی درخواست کی ہے تاکہ تدفین کے عمل میں آسانی ہو سکے۔ مقامی افراد نے خبردار کیا ہے کہ اگر فوری اقدامات نہ کیے گئے تو یہ مقدس مقام اپنی شناخت کھو دے گا اور تدفین کے مسائل مزید سنگین ہو جائیں گے۔

اوچ شریف،باغی ٹی وی( نامہ نگار حبیب خان)ڈپٹی کمشنر بہاول پور ڈاکٹر فرحان فاروق نے احمد پور شرقیہ اور اوچ شریف کا دورہ کرتے ہوئے مختلف ترقیاتی منصوبوں اور عوامی سہولیات کا معائنہ کیا۔

احمد پور شرقیہ میں انہوں نے عباسیہ چوک اور عثمان چوک سمیت مختلف مقامات پر تجاوزات کے خاتمے کے آپریشن اور صفائی کے کاموں کا جائزہ لیا۔ انہوں نے افسران کو ہدایت کی کہ نکاسی آب اور صفائی کے کام معیاری اور بروقت مکمل کیے جائیں اور تجاوزات کا مستقل خاتمہ یقینی بنایا جائے۔

ڈپٹی کمشنر نے لیڈیز پارک چوک منیر شہید میں شجرکاری مہم کا آغاز کرتے ہوئے پودا لگایا اور پارک میں صفائی کے انتظامات کا معائنہ کیا۔ اس کے علاوہ، چاچا بستی چوک سے منیر شہید چوک تک دو رویہ سڑک کی مرمت کے جاری کاموں کا بھی جائزہ لیا۔

ڈاکٹر فرحان فاروق نے تحصیل ہیڈکوارٹر ہسپتال احمد پور شرقیہ کا دورہ کرتے ہوئے ایمرجنسی، آؤٹ ڈور اور وارڈز میں فراہم کی جانے والی طبی سہولیات اور ادویات کے سٹاک کا جائزہ لیا۔ انہوں نے عملے کو ہدایت دی کہ مریضوں کو بہتر علاج کی سہولیات فراہم کی جائیں اور صفائی کے معیار کو برقرار رکھا جائے۔

اوچ شریف میں انہوں نے دیہی مرکز صحت کی اپ گریڈیشن کے کاموں کا معائنہ کیا اور جاری ترقیاتی منصوبوں پر بریفنگ لی۔ اس موقع پر اسسٹنٹ کمشنر احمد پور شرقیہ، ایکسئین بلڈنگ اور ڈپٹی ڈائریکٹر ڈویلپمنٹ بھی ان کے ہمراہ تھے۔

اوچ شریف،باغی ٹی وی(نامہ نگارحبیب خان)پنجند کی نہریں آلودہ، روہی اور چولستان کے باسی گندا پانی پینے پر مجبور

تفصیل کے مطابق ہیڈ پنجند سے نکلنے والی نہریں جو روہی اور چولستان کے باسیوں کے لیے زندگی کا اہم ذریعہ ہیں، شدید آلودگی کا شکار ہو چکی ہیں۔ ان نہروں میں جانوروں کا گوبر، پیشاب، اور گھروں کے گٹروں کا گندا پانی مسلسل ڈالا جا رہا ہے، جس سے پانی انسانی استعمال کے قابل نہیں رہا۔

روہی اور چولستان کے لوگ جو پہلے ہی پانی کی قلت اور سہولیات کی کمی سے متاثر ہیں، اب گندگی سے بھرے ہوئے نہری پانی کو پینے پر مجبور ہیں۔ آلودہ پانی کے استعمال کی وجہ سے متعدد بیماریوں، جیسے پیٹ کی بیماریاں اور ہیپاٹائٹس کے کیسز میں اضافہ ہو رہا ہے۔ یہ مسئلہ نہ صرف صحت بلکہ زراعت اور مویشیوں پر بھی منفی اثر ڈال رہا ہے، جس سے علاقے کی معیشت شدید متاثر ہو رہی ہے۔

ضلعی اور صوبائی حکام کی غفلت اور عدم توجہ نے صورت حال کو مزید سنگین بنا دیا ہے۔ عوام کا کہنا ہے کہ انہیں صاف پانی فراہم کرنا حکومت کی بنیادی ذمہ داری ہے لیکن حکام کی جانب سے کوئی خاطر خواہ اقدام نہیں اٹھایا گیا۔

روہی اور چولستان کے باسیوں نے وزیر اعلیٰ پنجاب مریم نواز شریف سے اپیل کی ہے کہ وہ اس سنگین مسئلے کا فوری نوٹس لیں اور متعلقہ حکام کو فوری کارروائی کا حکم دیں۔ ان کا مطالبہ ہے کہ نہری پانی کو آلودگی سے پاک کیا جائے،نہروں میں گندا پانی ڈالنے والوں کے خلاف سخت اقدامات کیے جائیں اور علاقے کے لوگوں کو صاف پانی کی فراہمی یقینی بنائی جائے۔

اگر فوری اقدامات نہ کیے گئے تو اس کے نتائج نہ صرف عوام کی صحت بلکہ خطے کی ترقی پر بھی منفی اثر ڈالیں گے۔ صاف پانی کی فراہمی ہر انسان کا بنیادی حق ہے، اور حکومت کی یہ ذمہ داری ہے کہ وہ عوام کے اس حق کو یقینی بنائے۔