Category: بہاولپور

اوچ شریف،باغی ٹی وی (نامہ نگارحبیب خان)بہاولپور میں ڈاکوؤں نے سیلز مین کو لوٹنے کی کوشش میں گولیاں ماری دیں،حالت تشویشناک

تفصیل کے مطابق بہاولپورے علاقے کلانچ والا میں ڈکیتی کی واردات پیش آئی ہے جس میں تین مسلح ڈاکوؤں نے ایک موٹر سائیکل سوار سیلز مین کو روک کر اس سے کیش چھیننے کی کوشش کی۔ جب سیلز مین نے مزاحمت کی تو ڈاکوؤں نے بلااشتعال فائرنگ کردی جس کے نتیجے میں سیلز مین کے منہ اور گردن پر گولیاں لگیں۔

واقعے کے مطابق ڈاکو کیش لوٹ کر فوراً موقع سے فرار ہو گئے۔ ریسکیو 1122 کی ایمرجنسی ٹیم نے فوری طور پر موقع پر پہنچ کر زخمی شخص کو ابتدائی طبی امداد فراہم کی اور اسے بہاول وکٹوریہ ہسپتال منتقل کیا۔ زخمی کی حالت تشویشناک بتائی جا رہی ہے۔ زخمی شخص کی شناخت محمد عامر ولد محبوب احمد عمر 26 سال موضع میانی بہاولپور کے طور پر ہوئی ہے۔

پولیس نے موقع پر پہنچ کر شواہد اکٹھے کرنا شروع کر دیے ہیں اور ڈاکوؤں کی گرفتاری کے لیے چھاپے مارے جا رہے ہیں۔

اوچ شریف، باغی ٹی وی (نامہ نگار حبیب خان)میپکو کی غفلت، گنجان آباد علاقے میں موت کے سائے منڈلانے لگے

تفصیلات کے مطابق اوچ شریف کے گنجان آباد علاقےالشمس مارکیٹ میں نصب غیر محفوظ ٹرانسفارمر نے شہریوں کی زندگیوں کو شدید خطرے میں ڈال دیا ہے۔ علاقہ مکینوں کا کہنا ہے کہ میپکو کے ایس ڈی او اور عملے کی لاپرواہی کے باعث یہ علاقہ کسی بھی وقت خوفناک حادثے کا شکار ہو سکتا ہے۔

عینی شاہدین کے مطابق ٹرانسفارمر کے گرد تاروں کا جال کسی بھی وقت چنگاریوں کا سبب بن سکتا ہے اور یہ چنگاریاں قریبی املاک، دکانوں اور انسانی جانوں کے لیے خطرناک ثابت ہو سکتی ہیں۔ خاص طور پر جس ٹرالی پر ٹرانسفارمر رکھا گیا ہے، اس کے اوپر دکان کے ساتھ کوندر اور تنکوں سے بنایا گیا چھپر موجود ہے۔ اگر اس چھپر تک آگ کی ایک چنگاری پہنچ گئی تو پلک جھپکتے ہی سب کچھ خاک بن جائے گا اور اس علاقے میں بڑی تباہی کا خدشہ ہے۔

الشمس مارکیٹ میں میپکو نے انتہائی غفلت کا مظاہرہ کرتے ہوئے ٹرانسفارمر کی ٹرالی موبائل فون مارکیٹ کے راستے پر کھڑی کر دی ہے، جس سےشہریوں کوآمد ورفت میں مشکلات کاسامنا کرناپڑرہاہے ۔ اگر خدانخواستہ یہاں کسی قسم کا حادثہ رونما ہوا تو بہت زیادہ انسانی جانوں کےنقصان کا اندیشہ ہے۔

بازار کے تاجروں نے شکایت کی ہے کہ اس صورتحال نے نہ صرف ان کے کاروبار کو متاثر کیا ہے بلکہ وہ مسلسل خوف کے سائے میں زندگی گزار رہے ہیں۔ مقامی افراد نے بارہا میپکو کے ذمہ داران کو خطرے سے آگاہ کیا لیکن مسئلے کے حل کے لیے کوئی اقدام نہیں کیا گیا۔ ٹرانسفارمر کے اکثر سپارک ہونے کے واقعات کے بعد بھی میپکو حکام کی خاموشی ان کی غفلت کو ظاہر کرتی ہے۔

شہریوں نے اعلیٰ حکام سے اپیل کی ہے کہ وہ فوری طور پر مداخلت کریں، میپکو کے ایس ڈی او اور متعلقہ عملے کے خلاف سخت کارروائی کریں اور علاقے میں ٹرانسفارمر کو محفوظ بنانے کے لیے فوری اقدامات کریں۔ شہریوں کا مزید کہنا تھا کہ کیا عوام کی حفاظت کے لیے ذمہ دار ادارے ہی اب ان کی زندگیوں کے لیے خطرہ بن چکے ہیں؟ حکومت اور متعلقہ حکام کو اس سوال کا فوری جواب دینا ہوگا تاکہ قیمتی جانوں کو بچایا جا سکے۔

اوچ شریف، باغی ٹی وی (نامہ نگار حبیب خان) مغلیہ دور کی تاریخی جامع مسجد اور قبرستان اوچ موغلہ کی تقدس کی پامالی اور بے حرمتی کا سلسلہ طویل عرصے سے جاری ہے، جس کی روک تھام کے لیے کوئی اقدامات نہیں کیے جا رہے۔

اس تاریخی اور مذہبی مقام کی چار دیواری نہ ہونے کے باعث قبرستان کی زمین مسلسل سکڑ رہی ہے جبکہ ناجائز قابضین نے اس پر قبضہ جما رکھا ہے۔ قبرستان میں قبروں پر جانور باندھے جا رہے ہیں اور آوارہ کتے اور گدھے اس مقدس مقام کی بے حرمتی میں اضافے کا باعث بن رہے ہیں۔

بدقسمتی سے اربابِ اختیار اور منتخب نمائندگان (ایم این ایز اور ایم پی ایز) اس سنگین مسئلے پر خاموش ہیں۔ مقامی عوام کا کہنا ہے کہ قبرستان کے اندر سیوریج کا پانی چھوڑا جا رہا ہے، جس سے نہ صرف اس تاریخی مقام کی بے حرمتی ہو رہی ہے بلکہ فضائی آلودگی اور صحت کے مسائل بھی بڑھ رہے ہیں۔

علاقے کے مکینوں نے اعلیٰ حکام سے اپیل کی ہے کہ فوری طور پر قبرستان کی زمین کو ناجائز قابضین سے واگزار کرایا جائے اور چار دیواری کی تعمیر کے احکامات جاری کیے جائیں۔ انہوں نے وزیرِاعظم، وزیرِاعلیٰ پنجاب اور ڈپٹی کمشنر بہاولپور سے مطالبہ کیا ہے کہ وہ اس مسئلے پر فوری نوٹس لے کر اس مقدس مقام کی حرمت بحال کریں تاکہ مرنے والوں کی آخری آرامگاہ محفوظ رہ سکے۔

اوچ شریف، باغی ٹی وی (نامہ نگار حبیب خان) موٹروے ایم-5 پر اوچ شریف انٹرچینج کے قریب بستی ڈمر کے علاقے میں تیز رفتاری کے باعث ایک افسوسناک حادثہ پیش آیا، جس میں چار افراد شدید زخمی ہوگئے۔

حادثہ اس وقت پیش آیا جب ایک فارچونر گاڑی بے قابو ہو کر ٹرالر سے ٹکرا گئی، جس سے گاڑی مکمل طور پر تباہ ہوگئی۔ زرائع کے مطابق، زخمیوں میں ایک مرد اور ایک خاتون کی حالت تشویشناک بتائی جارہی ہے، جنہیں فوری طور پر قریبی اسپتال منتقل کیا گیا، جبکہ دیگر دو زخمیوں کی حالت کے بارے میں مزید معلومات کا انتظار ہے۔

مقامی پولیس اور ریسکیو ٹیمیں فوری طور پر موقع پر پہنچ گئیں اور امدادی کارروائیاں انجام دیں۔ ابتدائی تحقیقات میں حادثے کی وجوہات میں تیز رفتاری اور ممکنہ غفلت شامل ہیں۔ پولیس حادثے کی مکمل تحقیقات کر رہی ہے۔

اوچ شریف ،باغی ٹی وی( نامہ نگار حبیب خان )نواحی موضع مانک نوشہرہ کی رہائشی خاتون عذرا بی بی نے تھانہ اوچ شریف میں ایک درخواست دائر کی ہے، جس میں اس نے سنگین الزامات عائد کیے ہیں۔ خاتون کے مطابق 20 دسمبر 2024 کو صبح کے وقت جب وہ اپنی فصل میں گھاس کاٹ رہی تھی تو ملزمان جہانزیب، محمد شفیق اور غلام حسن مسلح ڈنڈے اور سوٹیاں لے کر آئے اور اس پر وحشیانہ حملہ کر دیا۔

عذرا بی بی کا کہنا ہے کہ جہانزیب نے اسے بالوں سے پکڑ کر گھسیٹا جبکہ محمد شفیق نے تھپڑوں اور مکوں سے تشدد کیا، جس سے اس کے کپڑے پھٹ گئے اور وہ نیم برہنہ ہو گئی۔ خاتون نے مزید بتایا کہ اس دوران اس کی سونے کی چین زمین پر گر گئی، جسے ملزمان نے چوری کر لیا۔ جب اس نے شور مچایا تو اس کے شوہر خلیل احمد اور گواہ حاجی احمد موقع پر پہنچے اور اس کی جان بچائی۔

عذرا بی بی نے پولیس سے انصاف کی اپیل کرتے ہوئے ملزمان کے خلاف سخت کارروائی کا مطالبہ کیا ہے۔ اوچ شریف پولیس نے واقعے کا مقدمہ درج کر لیا ہے تاہم تاحال ملزمان گرفتار نہیں ہو سکے۔ پولیس کا کہنا ہے کہ ملزمان کو جلد از جلد گرفتار کر کے قانون کے مطابق سخت سزا دی جائے گی۔