Category: بہاولپور

اوچ شریف (باغی ٹی وی رپورٹ) حضرت سید جلال الدین حسین میر سرخپوش بخاریؒ کے 755 ویں سالانہ عرس مبارک کی تقریبات مذہبی جوش و خروش کے ساتھ اختتام پذیر ہوئیں۔ تقریبات میں ملک بھر سے عقیدت مندوں اور مشائخ نے شرکت کی۔

سجادہ نشین مخدوم سید حامد نوبہار اور ولی عہد مخدوم سید حسن زمرد حسنی الحسینی البخاری کی قیادت میں عرس کی تقریبات کا آغاز ہوا۔ انجینئر مخدوم دیوان سید عشرت جہانیاں بخاری نے عرس کے موقع پر اپنے خیالات کا اظہار کرتے ہوئے کہا کہ اولیاء اللہ کے آستانے رشدو ہدایت اور قلبی سکون کے مراکز ہیں۔ ان مقدس مقامات سے جڑے رہنا دنیا و آخرت کی کامیابی کا ذریعہ ہے۔

عرس کی تقریبات میں شرکت کرنے والی نمایاں شخصیات میں سید حسن جہانیاں گردیزی، پیر سید نذیر حسین بخاری، مخدوم سید ارشد حسین ترمذی، اور دیگر علما و مشائخ شامل تھے۔ محافل میں درود و سلام، قرآن خوانی اور علمائے کرام کے خطابات سے حاضرین کو روحانی فیض حاصل ہوا۔

اختتامی دعا میں ملک و قوم کی ترقی، امن اور خوشحالی کے لیے خصوصی دعائیں کی گئیں اور اولیاء کرام کی تعلیمات پر عمل پیرا ہونے کی تلقین کی گئی۔

اوچ شریف(باغی ٹی وی،نامہ نگار حبیب خان) سونے کی قیمتوں میں ہوشربا اضافہ، جیولرز کی من مانیوں نے عوام کو پریشان کر دیا

تفصیل کے مطابق سونے کی قیمتوں میں مسلسل اضافے اور جیولرز کی اضافی کٹوتیوں نے شادی بیاہ کے لیے زیورات خریدنے والوں کے لیے مشکلات بڑھا دی ہیں۔ مارکیٹیں سنسان ہو گئی ہیں اور خریدار شدید ذہنی اذیت کا شکار ہیں۔ شہریوں کا کہنا ہے کہ اگر یہی حال رہا تو سونے کا کاروبار ٹھپ ہونے کا خدشہ ہے۔

سونے کی قیمت 2,85,000 روپے فی تولہ تک پہنچ گئی ہے، جس نے عام آدمی کے لیے زیورات خریدنا ناممکن بنا دیا ہے۔ جیولرز نے قیمتوں میں اضافے کا فائدہ اٹھاتے ہوئے خریداروں پر اجرت اور کٹوتیوں کے نام پر اضافی بوجھ ڈال دیا ہے۔ خریداروں کا کہنا ہے کہ فی تولہ سونے پر 27,500 روپے کی کٹوتی کی جاتی ہے جو غریب عوام کے لیے ناقابل برداشت ہے۔

شہریوں نے حکومت سے مطالبہ کیا ہے کہ سونے کی قیمتوں کے حوالے سے مستحکم پالیسی نافذ کی جائے اور جیولرز کی بے ضابطگیوں کے خلاف سخت کارروائی کی جائے تاکہ عوام کو ریلیف مل سکے۔

اوچ شریف (باغی ٹی وی،نامہ نگارحبیب خان) اشٹامپ فروش مافیا کی من مانیوں سے دیہاتی اور سادہ لوح عوام شدید متاثر۔ سرکاری نرخوں سے زائد قیمت پر اسٹامپ فروخت معمول بن گیا، جبکہ سابقہ تاریخوں کے اسٹامپ کے غیر قانونی کاروبار کا بھی انکشاف ہوا۔

ذرائع کے مطابق سب تحصیل اوچ شریف اور ریونیو آفس کے احاطے میں اسٹامپ فروشوں نے 150 روپے والے اسٹامپ 250 روپے تک فروخت کرنا معمول بنا رکھا ہے۔ نیٹ ورک مسائل کا بہانہ بنا کر اضافی رقم وصول کی جارہی ہے، جبکہ اسسٹنٹ کمشنر اور نائب تحصیلدار کسی بھی کارروائی سے قاصر نظر آتے ہیں۔

ممبر بورڈ آف ریونیو پنجاب کے واضح احکامات کے باوجود اسٹامپ فروش احاطہ عدالت کے اندر اور باہر بے ضابطگی سے اسٹامپ فروخت کر رہے ہیں۔ بعض اسٹامپ فروش اپنے لائسنس کرائے پر دے کر غیر قانونی طور پر دھندہ کر رہے ہیں، جس سے عوام شدید مشکلات کا شکار ہیں۔

شہریوں ملک فاروق، حاجی ربنواز، محمد سلطان اور دیگر نے ڈپٹی کمشنر بہاولپور اور متعلقہ حکام سے فوری کارروائی اور عوام کو ریلیف فراہم کرنے کا مطالبہ کیا ہے۔

اوچ شریف (باغی ٹی وی نامہ نگار حبیب خان) سردیوں کی آمد کے ساتھ ہی غریب اور متوسط طبقہ شدید مشکلات کا شکار ہو گیا ہے، کیونکہ لنڈے کے کپڑے، جوتے اور جرسیوں کی قیمتوں میں غیر معمولی اضافہ ہو گیا ہے۔ مہنگائی نے عوام کی زندگی اجیرن کر دی ہے، اور غریبوں کے لیے ضروریات زندگی پوری کرنا بھی مشکل ہو چکا ہے۔

تفصیلات کے مطابق موسم سرما کے آغاز کے ساتھ ہی جوتوں، سوئٹرز، جرسیوں اور بچوں کے یونیفارم کی قیمتوں میں دکانداروں نے خود ساختہ اضافہ کر دیا ہے۔ غریب اور متوسط طبقہ جب سردی سے بچنے کے لیے بازار کا رخ کرتا ہے، تو انہیں منہ مانگے داموں کا سامنا کرنا پڑتا ہے، جس سے دکانداروں اور خریداروں کے درمیان تکرار کے واقعات بڑھ گئے ہیں۔

کم آمدنی والے والدین کا کہنا ہے کہ سکول جانے والے بچوں کے سوئٹرز، یونیفارمز اور جوتے خریدنا اب انتہائی مشکل ہوگیا ہے۔ مختلف دکاندار اپنے دکان کے کرایہ جات اور ملازمین کے اخراجات کے پیش نظر قیمتیں بڑھا کر عوام کی جیبوں پر اضافی بوجھ ڈال رہے ہیں۔

مہنگائی کی وجہ سے غریب طبقہ سخت پریشانی کا سامنا کر رہا ہے۔ شہریوں محمد ایاز، عبدالرحمن، ایاز شدہد اور دیگر نے حکومتی اقدامات پر شدید تنقید کرتے ہوئے کہا کہ حکام عوام کے مسائل سے بے خبر ہیں۔ انہوں نے کہا کہ غریبوں کے لیے سردیوں میں تن ڈھانپنا اب ایک سنگین چیلنج بن چکا ہے۔ لنڈا بازار، جو کبھی غریبوں کے لیے ایک ریلیف کا ذریعہ تھا، اب مہنگائی کی لپیٹ میں آ کر غریبوں کے لیے مزید مشکلات کا سبب بن چکا ہے۔

شہریوں کا کہنا ہے کہ حکومت کو غریبوں کی معاشی حالت بہتر بنانے کے لیے عملی اقدامات کرنے کی ضرورت ہے، اور بے لگام مہنگائی کے خلاف سخت کارروائی کرنی چاہیے تاکہ عام آدمی کی زندگی آسان ہو سکے۔

اوچ شریف (باغی ٹی وی،نامہ نگارحبیب خان) برصغیر کے عظیم صوفی بزرگ حضرت سید جلال الدین سرخ پوش بخاری رحمت اللہ علیہ کے 755ویں سالانہ عرس کی تین روزہ تقریبات عقیدت و احترام سے مکمل ہو گئیں۔ دربار جلالیہ عالیہ میں ہونے والی ان تقریبات کی قیادت سجادہ نشین مخدوم سید زمرد حسن بخاری نے اپنے ولی عہد مخدوم سید حسن زمرد اور خاندان کے دیگر اراکین کے ہمراہ کی۔

عرس کی اہم رسومات میں مزار کو عرقِ گلاب سے غسل دینے اور دعا کی محفل شامل تھیں، جن میں ملک بھر سے زائرین اور مریدین نے شرکت کی۔ محفل کے دوران عقیدت مندوں نے روحانی فیض حاصل کیا اور آپ کی تعلیمات کو یاد کیا۔

زائرین کے قیام و طعام کے خصوصی انتظامات کیے گئے، جبکہ کسی بھی ہنگامی صورتحال سے نمٹنے کے لیے میڈیکل کیمپ بھی قائم کیا گیا تھا۔ سیکیورٹی کے لیے ڈی پی او بہاولپور اسد سرفراز کی زیر نگرانی سخت اقدامات کیے گئے، اور مقامی پولیس افسر لطیف احمد جھورڑ کی قیادت میں اہلکار تعینات رہے۔

عرس مبارک حضرت جلال الدین بخاری کی تعلیمات اور روحانیت کے فروغ کا ایک عظیم مظہر تھا، جہاں لاکھوں عقیدت مندوں نے شرکت کر کے اپنے دلوں کو منور کیا۔