Category: بہاولپور

اوچ شریف (نامہ نگارحبیب خان) محکمہ آثار قدیمہ نے مذہبی سیاحت کے فروغ اور عالمی ثقافتی ورثے کے تحفظ کے لیے اہم قدم اٹھاتے ہوئے اوچ شریف کے تاریخی مقبروں اور مزارات کی تزئین و آرائش کے لیے 31 ملین روپے سے زائد فنڈز کی منظوری دے دی۔

تفصیلات کے مطابق ان فنڈز کے تحت مقبرہ بی بی جیوندیؒ کی بحالی کے لیے ایک کروڑ روپے، مقبرہ حضرت ابوحنیفہؒ کے لیے 62 لاکھ 82 ہزار روپے، جب کہ حضرت سید جلال الدین سرخپوش بخاریؒ اور حضرت سید غوث بندگیؒ کے مزارات کے لیے مجموعی طور پر ڈیڑھ کروڑ روپے مختص کیے گئے ہیں۔

یہ منصوبہ نہ صرف ان عالمی شہرت یافتہ مقامات کی حفاظت میں مددگار ثابت ہوگا بلکہ مذہبی سیاحت کے فروغ اور مقامی معیشت کو بھی تقویت دے گا۔ عوامی حلقوں نے اس اقدام کو ثقافتی ورثے کے تحفظ کی جانب اہم پیش رفت قرار دیا ہے۔

اوچ شریف (باغی ٹی وی ،نامہ نگارحبیب خان) سب تحصیل اوچ شریف میں بینک آف پنجاب کی برانچ نہ ہونے کے باعث سرکاری ملازمین، اراضی مالکان اور کاروباری طبقے کو روزمرہ امور کی انجام دہی میں سخت مشکلات کا سامنا ہے۔ فیسوں کی ادائیگی اور دیگر معاملات کے لیے شہریوں کو 22 کلومیٹر دور احمد پور شرقیہ جانا پڑتا ہے۔

تفصیلات کے مطابق 45 سے زائد مواضعات اور دو قانون گوئی پر مشتمل اس علاقے میں بینک آف پنجاب کی عدم موجودگی سرکاری سکولوں کے اساتذہ کے لیے خاص طور پر پریشان کن ہے، جنہیں نان سیلری بجٹ اور دیگر فنڈز کے لیے طویل سفر کرنا پڑتا ہے، جس سے تعلیمی امور متاثر ہو رہے ہیں۔

اسی طرح اسٹامپ پیپرز کے اجرا کے لیے بھی شہریوں کو شدید مشکلات کا سامنا ہے۔ لینڈ ریکارڈ سینٹر کی موجودگی کے باوجود رجسٹریوں اور انتقالات کے سلسلے میں سرکاری فیسوں کی ادائیگی کے لیے احمد پور شرقیہ جانا پڑتا ہے، جس سے نہ صرف شہریوں کا وقت ضائع ہوتا ہے بلکہ اضافی اخراجات بھی برداشت کرنے پڑتے ہیں۔

عوامی و سماجی حلقوں نے حکومت سے مطالبہ کیا ہے کہ اوچ شریف میں فوری طور پر بینک آف پنجاب کی برانچ قائم کی جائے تاکہ شہریوں کو درپیش مشکلات کا ازالہ ہو اور نیشنل بینک پر موجود دباؤ کم ہو سکے۔

اوچ شریف (باغی ٹی وی رپورٹ) حضرت سید جلال الدین حسین میر سرخپوش بخاریؒ کے 755 ویں سالانہ عرس مبارک کی تقریبات مذہبی جوش و خروش کے ساتھ اختتام پذیر ہوئیں۔ تقریبات میں ملک بھر سے عقیدت مندوں اور مشائخ نے شرکت کی۔

سجادہ نشین مخدوم سید حامد نوبہار اور ولی عہد مخدوم سید حسن زمرد حسنی الحسینی البخاری کی قیادت میں عرس کی تقریبات کا آغاز ہوا۔ انجینئر مخدوم دیوان سید عشرت جہانیاں بخاری نے عرس کے موقع پر اپنے خیالات کا اظہار کرتے ہوئے کہا کہ اولیاء اللہ کے آستانے رشدو ہدایت اور قلبی سکون کے مراکز ہیں۔ ان مقدس مقامات سے جڑے رہنا دنیا و آخرت کی کامیابی کا ذریعہ ہے۔

عرس کی تقریبات میں شرکت کرنے والی نمایاں شخصیات میں سید حسن جہانیاں گردیزی، پیر سید نذیر حسین بخاری، مخدوم سید ارشد حسین ترمذی، اور دیگر علما و مشائخ شامل تھے۔ محافل میں درود و سلام، قرآن خوانی اور علمائے کرام کے خطابات سے حاضرین کو روحانی فیض حاصل ہوا۔

اختتامی دعا میں ملک و قوم کی ترقی، امن اور خوشحالی کے لیے خصوصی دعائیں کی گئیں اور اولیاء کرام کی تعلیمات پر عمل پیرا ہونے کی تلقین کی گئی۔

اوچ شریف(باغی ٹی وی،نامہ نگار حبیب خان) سونے کی قیمتوں میں ہوشربا اضافہ، جیولرز کی من مانیوں نے عوام کو پریشان کر دیا

تفصیل کے مطابق سونے کی قیمتوں میں مسلسل اضافے اور جیولرز کی اضافی کٹوتیوں نے شادی بیاہ کے لیے زیورات خریدنے والوں کے لیے مشکلات بڑھا دی ہیں۔ مارکیٹیں سنسان ہو گئی ہیں اور خریدار شدید ذہنی اذیت کا شکار ہیں۔ شہریوں کا کہنا ہے کہ اگر یہی حال رہا تو سونے کا کاروبار ٹھپ ہونے کا خدشہ ہے۔

سونے کی قیمت 2,85,000 روپے فی تولہ تک پہنچ گئی ہے، جس نے عام آدمی کے لیے زیورات خریدنا ناممکن بنا دیا ہے۔ جیولرز نے قیمتوں میں اضافے کا فائدہ اٹھاتے ہوئے خریداروں پر اجرت اور کٹوتیوں کے نام پر اضافی بوجھ ڈال دیا ہے۔ خریداروں کا کہنا ہے کہ فی تولہ سونے پر 27,500 روپے کی کٹوتی کی جاتی ہے جو غریب عوام کے لیے ناقابل برداشت ہے۔

شہریوں نے حکومت سے مطالبہ کیا ہے کہ سونے کی قیمتوں کے حوالے سے مستحکم پالیسی نافذ کی جائے اور جیولرز کی بے ضابطگیوں کے خلاف سخت کارروائی کی جائے تاکہ عوام کو ریلیف مل سکے۔

اوچ شریف (باغی ٹی وی،نامہ نگارحبیب خان) اشٹامپ فروش مافیا کی من مانیوں سے دیہاتی اور سادہ لوح عوام شدید متاثر۔ سرکاری نرخوں سے زائد قیمت پر اسٹامپ فروخت معمول بن گیا، جبکہ سابقہ تاریخوں کے اسٹامپ کے غیر قانونی کاروبار کا بھی انکشاف ہوا۔

ذرائع کے مطابق سب تحصیل اوچ شریف اور ریونیو آفس کے احاطے میں اسٹامپ فروشوں نے 150 روپے والے اسٹامپ 250 روپے تک فروخت کرنا معمول بنا رکھا ہے۔ نیٹ ورک مسائل کا بہانہ بنا کر اضافی رقم وصول کی جارہی ہے، جبکہ اسسٹنٹ کمشنر اور نائب تحصیلدار کسی بھی کارروائی سے قاصر نظر آتے ہیں۔

ممبر بورڈ آف ریونیو پنجاب کے واضح احکامات کے باوجود اسٹامپ فروش احاطہ عدالت کے اندر اور باہر بے ضابطگی سے اسٹامپ فروخت کر رہے ہیں۔ بعض اسٹامپ فروش اپنے لائسنس کرائے پر دے کر غیر قانونی طور پر دھندہ کر رہے ہیں، جس سے عوام شدید مشکلات کا شکار ہیں۔

شہریوں ملک فاروق، حاجی ربنواز، محمد سلطان اور دیگر نے ڈپٹی کمشنر بہاولپور اور متعلقہ حکام سے فوری کارروائی اور عوام کو ریلیف فراہم کرنے کا مطالبہ کیا ہے۔