اوچ شریف(باغی ٹی وی ،نامہ نگارحبیب خان ) یومِ سیاہ کشمیر پر خاموشی، سول سوسائٹی اور اداروں کی بے حسی پر عوام کا اظہارِ مایوسی
تفصیل کے مطابق 27 اکتوبر کو جہاں ملک بھر میں یومِ سیاہ کشمیر منایا گیا اور کشمیریوں کے ساتھ یکجہتی کا اظہار کیا گیا، وہیں اوچ شریف میں اس موقع پر خاموشی اور بے حسی نے سب کو حیران کر دیا۔ مذہبی و سیاسی جماعتوں، سول سوسائٹی، اور میونسپل کمیٹی کی عدم دلچسپی سے شہر میں نہ کوئی ریلی نکالی گئی اور نہ ہی کسی تقریب کا انعقاد ہوا۔ اس دن کی خاموشی نے عوام میں مایوسی پیدا کی اور کشمیریوں کے ساتھ یکجہتی کے مظاہرے کو نظر انداز کیے جانے پر سوالات اٹھائے۔
مقامی افراد کا کہنا تھا کہ حکومتی سطح پر اس دن کے حوالے سے کوئی خاص حکمتِ عملی نہ ہونے کی وجہ سے عوام کو یومِ سیاہ کشمیر کی اہمیت سے آگاہ نہیں کیا جا سکا۔ مسجدوں میں کوئی خصوصی دعا یا خطاب بھی منعقد نہیں ہوا اور نہ ہی شہریوں نے بینرز یا پلے کارڈز اٹھا کر کشمیریوں کے حق میں آواز بلند کی۔ سول سوسائٹی اور مذہبی جماعتوں کی جانب سے عدم شرکت نے شہریوں کو مایوس کر دیا جو اس موقع پر کشمیری بھائیوں کے ساتھ اظہارِ یکجہتی کی امید کر رہے تھے۔
شہر کے نوجوانوں اور سماجی کارکنوں نے افسوس کا اظہار کرتے ہوئے کہا کہ یہ موقع کشمیری عوام کے ساتھ یکجہتی کا مظاہرہ کرنے کا تھا لیکن اداروں اور سیاسی جماعتوں کی بے حسی نے اس کی اہمیت کو نظرانداز کر دیا۔ ان کا کہنا تھا کہ اسسٹنٹ کمشنر احمد پور شرقیہ کی جانب سے بھی کوئی واضح حکمتِ عملی نہیں بنائی گئی جس سے عوام میں شعور اور جذبہ بیدار ہو سکتا۔
کچھ شہریوں نے زور دیا کہ کشمیر کے مسئلے پر عوام میں شعور اجاگر کرنے اور آئندہ یومِ سیاہ کشمیر کو مؤثر طریقے سے منانے کے لیے اقدامات کیے جائیں۔ ان کا کہنا تھا کہ حکومت اور متعلقہ اداروں کو ایسے مواقع پر سرگرمیوں کا اہتمام کرنا چاہیے تاکہ عوام میں کشمیر کے حوالے سے جذبات کو زندہ رکھا جا سکے اور کشمیری عوام کے ساتھ یکجہتی کا مظاہرہ کیا جا سکے۔
