Category: بہاولپور

اوچ شریف (باغی ٹی وی،نامہ نگارحبیب خان) میونسپل کمیٹی اوچ شریف کی جانب سے تجاوزات کے خلاف آپریشن جاری ہے۔ مین بازار، خیر پور ڈاہا روڈ اور ہاتھی دروازہ بازار میں کارروائیوں کے دوران دکانوں کے سامنے رکھا ہوا سامان قبضے میں لے لیا گیا، جبکہ آہنی شیڈز اور سائن بورڈز بھی ہٹا دیے گئے۔

تفصیلات کے مطابق چیف آفیسر قاضی محمد نعیم کی قیادت میں میونسپل عملے نے ڈپٹی کمشنر بہاول پور ڈاکٹر فرحان فاروق کی ہدایات پر شہر کے مختلف علاقوں میں تجاوزات کے خلاف کارروائیاں کیں۔ الشمس چوک، مین بازار اور خیر پور ڈاہا روڈ پر غیر قانونی تجاوزات کو فوری طور پر ختم کیا گیا۔

چیف آفیسر قاضی محمد نعیم نے واضح کیا کہ تجاوزات کے خلاف کریک ڈاؤن بلاتعطل جاری رہے گا اور دکانوں کے باہر سامان رکھنے یا فٹ پاتھوں پر قبضہ کرنے والوں کے خلاف سخت کارروائی کی جائے گی۔ انتظامیہ نے شہریوں سے اپیل کی ہے کہ وہ رضاکارانہ طور پر تجاوزات ختم کرکے تعاون کریں۔

اوچ شریف (باغی ٹی وی،نامہ نگارحبیب خان) 2 موٹر سائیکلوں میں ٹکر، ایک خاتون ٹریلرکے نیچے آکرجاں بحق،3 زخمی

تفصیلات کے مطابق اوچ شریف کے نواحی علاقے طاہر والی قومی شاہراہ پر آج دو موٹر سائیکلوں کے درمیان ایک شدید تصادم ہو ا۔ اس حادثے میں ایک خاتون جاں بحق ہو گئی جبکہ تین دیگر افراد زخمی ہو گئے۔

ایک موٹر سائیکل پنکچر ہونے کی وجہ سے سامنے آنے والی ایک اور موٹر سائیکل سے ٹکرا گئی۔ اس ٹکر کے نتیجے میں ایک خاتون موٹر سائیکل سے گر کر قریب سے گزرنے والے ایک ٹرالر کے نیچے آ گئی، جس سے وہ موقع پر ہی جاں بحق ہو گئی۔

حادثے میں زخمی ہونے والے تینوں افراد کو فوری طور پر قریبی ہسپتال منتقل کر دیا گیا ہے۔ جاں بحق خاتون کی شناخت بشریٰٰ بی بی زوجہ خلیل احمدبعمر 40 سال سکنہ ابولحسن کالونی رحیم یار خان کے نام سے ہوئی ہے

اس حادثے کے بعد علاقے میں غم کا ماحول پیدا ہو گیا ہے۔ مقامی لوگوں کا کہنا ہے کہ اس علاقے میں تیز رفتار گاڑیوں کی وجہ سے اکثر حادثات ہوتے رہتے ہیں اور انتظامیہ کو اس حوالے سے فوری اقدامات کرنے چاہئیں۔

اوچ شریف (باغی ٹی وی،نامہ نگارحبیب خان) جنگلات کی کٹائی میں ملوث،کرپٹ فاریسٹ گارڈ برطرف

تفصیلات کے مطابق محکمہ جنگلات نے کرپشن کے خلاف سخت کارروائی کرتے ہوئے ایک فاریسٹ گارڈ کو برطرف کر دیا ہے۔ ڈویژنل فاریسٹ آفیسر راجہ جاوید اقبال نے فاریسٹ گارڈ اصغر علی کو عہدے سے برطرف کرتے ہوئے محکمہ جنگلات رحیمیارخان رپورٹ کرنے کا حکم جاری کیا ہے۔

گزشتہ روز عباسیہ مین کینال پر فاریسٹ گارڈ اصغر علی کی مبینہ آشیرباد سے درختوں کی کٹائی کا معاملہ سامنے آیا تھا۔ مقامی صحافی فاریسٹ گارڈ اور ان کے ساتھیوں کی اس واقعے کی ویڈیو بنا کر سوشل میڈیا پر وائرل کردی تھی۔ اس ویڈیو میں واضح طور پر دیکھا جا سکتا ہے کہ فاریسٹ گارڈ خود درختوں کی کٹائی میں ملوث ہے۔

اس واقعے کی تحقیقات کے بعد ڈویژنل فاریسٹ آفیسر راجہ جاوید اقبال نے فاریسٹ گارڈ اصغر علی کو کرپشن اور عہدے کے ناجائز استعمال کے الزام میں برطرف کر دیا۔

ڈویژنل فاریسٹ آفیسر راجہ جاوید اقبال نے واضح کیا ہے کہ محکمہ جنگلات کرپشن اور غیر قانونی سرگرمیوں کے خلاف سخت کارروائی کرے گا۔ انہوں نے کہا کہ محکمہ جنگلات میں کرپٹ اور نااہل افراد کی کوئی جگہ نہیں ہے۔

مقامی لوگوں نے فاریسٹ گارڈ کی برطرفی کا خیرمقدم کیا ہے اور محکمہ جنگلات کی اس کارروائی کو سراہا ہے۔ ان کا کہنا ہے کہ اس سے جنگلات کی حفاظت میں مدد ملے گی۔

اوچ شریف (باغی ٹی وی،نامہ نگارحبیب خان) اوچ شریف شہر اور اس کے گردونواح میں مضر صحت اور کیمیکلز سے تیار شدہ جعلی دودھ کی فروخت کھلے عام جاری ہے۔ شہر میں جگہ جگہ ایسے دودھ سے بنی چائے بھی فروخت کی جا رہی ہے جس سے شہریوں کی صحت شدید متاثر ہو رہی ہے۔

تفصیلات کے مطابق ملٹی نیشنل کمپنیوں کی اجارہ داری اور منافع خوری کی وجہ سے کیمیکلز ملا کر دودھ تیار کیا جا رہا ہے اور اسے خالص دودھ کے نام پر مہنگے داموں فروخت کیا جا رہا ہے۔ دودھ میں ہڈیوں کا بورا، یوریا کھاد، سفید رنگ اور بال صفا جیسے مضر صحت کیمیکلز ملائے جانے کا انکشاف ہوا ہے۔ اس سے تیار کردہ دودھ کو مٹھائیوں، آئس کریم اور دیگر دودھ کی مصنوعات میں استعمال کیا جا رہا ہے۔

اس زہریلے دودھ کے استعمال سے شہریوں خاص طور پر بچوں میں قوت مدافعت ختم ہو تی جارہی ہے اور وہ مختلف بیماریوں کا شکار ہو رہے ہیں۔ اس کے علاوہ معدے کی خرابی کے ساتھ ساتھ دیگر امراض میں بھی اضافہ دیکھا جا رہا ہے۔

شہریوں نے فوڈ سیفٹی اتھارٹی پر لاپرواہی کا الزام لگاتے ہوئے ڈپٹی کمشنر سے فوری کارروائی کا مطالبہ کیا ہے۔ ان کا کہنا ہے کہ فوڈ اتھارٹی صرف فوٹو سیشن تک محدود رہتی ہے اور کوئی عملی اقدام نہیں اٹھاتی۔

اوچ شریف (باغی ٹی وی،نامہ نگارحبیب خان) میونسپل کمیٹی اوچ شریف کے چیف آفیسر قاضی محمد نعیم کی قیادت میں اینٹی انکروچمنٹ مہم کا آغاز کر دیا گیا، جس کے تحت الشمس چوک تا ہاتھی گیٹ غیر قانونی تجاوزات ہٹانے کے لیے آپریشن کیا گیا۔

مہم کے دوران دوکانوں کے فرنٹ سے لوہے کے بنے اینگل اور سڑکوں پر رکھی گئی ریڑھیاں اور سامان ہٹا دیا گیا، جس سے آمدورفت میں بہتری آئی اور شہریوں میں خوشی کی لہر دوڑ گئی۔

تفصیلات کے مطابق ڈپٹی کمشنر بہاولپور ڈاکٹر فرحان فاروق اور اسسٹنٹ کمشنر احمد پور شرقیہ نے گزشتہ دنوں شہر کا اچانک دورہ کیا تھا اور تجاوزات پر برہمی کا اظہار کرتے ہوئے فوری ہٹانے کے احکامات جاری کیے تھے۔ ان احکامات پر عملدرآمد کرتے ہوئے تجاوزات کے خلاف بھرپور آپریشن کا آغاز کیا گیا، جس کا دائرہ پورے شہر تک بڑھایا جا رہا ہے تاکہ اوچ شریف کو کھلا اور صاف ستھرا بنایا جا سکے۔

اسسٹنٹ کمشنر احمد پور شرقیہ نے اس مہم کو عوامی سہولت اور ٹریفک کی روانی بہتر بنانے کے لیے ضروری قرار دیا اور شہریوں سے تعاون کی اپیل کی۔ انہوں نے واضح کیا کہ تجاوزات کے خلاف کارروائی ایک مستقل پالیسی کا حصہ ہے اور اس سلسلے میں آئندہ بھی آپریشنز جاری رہیں گے۔

موقع پر موجود شہریوں نے انتظامیہ کے اقدامات کو سراہا۔ شہری ثاقب منظور، محمد عمران، محمد رفیق، محمد زاہد، محمود الحسن اور محمد الیاس نے امید ظاہر کی کہ انتظامیہ ان کے مسائل کے حل کے لیے مزید مؤثر اقدامات کرے گی۔

چیف آفیسر قاضی محمد نعیم نے اس عزم کا اظہار کیا کہ شہر کی بہتری کے لیے تمام متعلقہ اداروں کو مل کر کام کرنا ہوگا۔ انہوں نے کہا کہ شہر کی صفائی اور ترقی کے لیے ان مہمات کو جاری رکھا جائے گا تاکہ شہریوں کو ایک صاف ستھرا اور منظم ماحول فراہم کیا جا سکے۔