Category: بہاولپور

اوچ شریف (باغی ٹی وی،نامہ نگارحبیب خان ) تاریخی شہر اوچ شریف میں واقع میزان بینک کی برانچ میں نصب اے ٹی ایم کا سکیورٹی دروازہ گزشتہ کئی ہفتوں سے غائب ہے۔ اس صورتحال نے بینک کے صارفین کو شدید تشویش میں مبتلا کر رکھا ہے۔

دن رات اے ٹی ایم کا استعمال کرنے والے افراد اپنی رقوم نکلوانے اور ٹرانزیکشن کرنے میں بے حد ہچکچاہٹ محسوس کر رہے ہیں۔ شہر میں چوری کی وارداتوں میں اضافے کے باعث صارفین مزید خوفزدہ ہیں۔

باغی ٹی وی کے نامہ نگار حبیب خان کے مطابق، متعدد صارفین نے بتایا کہ انہوں نے بینک کے عملے کو اس مسئلے سے آگاہ کیا ہے لیکن کوئی ٹھوس اقدام نہیں اٹھایا گیا۔ بینک عملہ صرف زبانی جمع خرچ کرتا رہا ہے۔

صارفین نے اسٹیٹ بینک اور میزان بینک کے حکام سے فوری طور پر سکیورٹی دروازہ لگانے کا مطالبہ کیا ہے۔ ان کا کہنا ہے کہ جب تک سکیورٹی کا مناسب انتظام نہیں کیا جاتا، وہ اے ٹی ایم کا استعمال کرنے سے گریز کریں گے۔

اوچ شریف (باغی ٹی وی ،نامہ نگارحبیب خان) چار دیواری سے محروم قبرستان آوارہ کتوں کی آماجگاہ بن گئے

تفصیل کے مطابق اوچ شریف میں درجنوں قبرستان چار دیواری سے محروم ہونے کی وجہ سے آوارہ کتوں کی آماجگاہ بن چکے ہیں۔ یہ کتے قبروں کو کھودتے ہیں، ان پر پیشاب پاخانہ کرتے ہیں اوریہیں پر کھاتےپیتے ہیں۔ اس سے نہ صرف مردوں کی بے حرمتی ہو رہی ہے بلکہ قبرستانوں کی صفائی ستھرائی بھی متاثر ہو رہی ہے۔

مقامی لوگوں اور سماجی تنظیموں کا کہنا ہے کہ قبرستانوں میں آوارہ کتوں کی پھیلائی گندگی سے بدبو اورتعفن پھیل رہا ہے۔ قبروں پر لکھی ہوئی قرآنی آیات اور ناموں پر بھی گندگی پائی جاتی ہے۔

شہریوں نے خدشہ ظاہر کیا ہے کہ اگر جلد ہی اس مسئلے کا حل نہ نکالا گیا تو آوارہ کتے قبروں کو کھود کر مردوں کی بھی بے حرمتی کریں گے۔ انہوں نے انتظامیہ سے مطالبہ کیا ہے کہ وہ آوارہ کتوں کو تلف کرکے اس مسئلے کا حل نکالیں اور قبرستانوں کی چاردیواریاں بنوائی جائیں تاکہ قبرستان کاتقدس پامال نہ ہو.

اوچ شریف باغی ٹی وی (نامہ نگار حبیب خان): اوچ شریف میں غوث الاعظم چوک پر فلائی اوورز نہ ہونے کی وجہ سے ٹریفک حادثات میں روزانہ جانوں کا نقصان ہو رہا ہے۔ اس چوک پر قومی شاہراہ اور شہر کی داخلی سڑکیں ملتی ہیں، جس کی وجہ سے یہاں ہمیشہ ٹریفک کا رش رہتا ہے۔

شہریوں کو سڑک عبور کرنے کے لیے پل نہ ہونے کی وجہ سے وہ اکثر موٹر گاڑیوں کی زد میں آ جاتے ہیں۔ گزشتہ چند سالوں میں درجنوں افراد حادثات میں اپنی جان سے ہاتھ دھو بیٹھے ہیں، سینکڑوں زخمی ہوئے ہیں، اور کئی تو معذور تک ہو گئے ہیں۔

مقامی نمائندے اقتدار میں ہوتے ہوئے بھی اس مسئلے پر کوئی توجہ نہیں دے رہے۔ شہریوں کا مطالبہ ہے کہ ارباب اختیار فوری طور پر غوث الاعظم چوک پر فلائی اوورز کی تعمیر کا کام شروع کریں تاکہ قیمتی انسانی جانوں کو بچایا جا سکے۔

اوچ شریف باغی ٹی وی (نامہ نگار حبیب خان): پنجاب پولیس کے شہید اے ایس آئی ارشاد بڈانی کو ان کے یوم شہادت پر خراج عقیدت پیش کیا گیا۔ شہید کی آخری آرام گاہ پر چاق و چوبند پولیس دستے نے سلامی پیش کی اور ڈی ایس پی چوہدری فرخ جاوید سمیت دیگر عہدیداروں نے پھول چڑھا کر فاتحہ خوانی کی۔

شہید ارشاد بڈانی نے کم عمری میں ہی عوام کی خدمت میں اپنی جان کا نذرانہ دے دیا تھا۔ ان کی شجاعت اور قربانی کو کبھی فراموش نہیں کیا جا سکتا۔ اس موقع پر ڈی ایس پی چوہدری فرخ جاوید نے کہا کہ شہید کی موت قوم کی حیات ہے اور ان کی قربانی نے ہمیں فخر سے سر بلند کیا ہے۔

شہید کے آبائی علاقے چک کہل میں منعقدہ اس تقریب میں شہید کے اہل خانہ اور عزیز و اقارب نے بھی شرکت کی۔ عوام نے بھی شہید کو خراج عقیدت پیش کیا اور ان کی مغفرت کے لیے دعا کی۔

اوچ شریف(باغی ٹی وی نامہ نگار حبیب خان) اوچ شریف کے نواحی علاقے سرور آباد کی بستی مہیسر میں ایک دل دہلا دینے والا واقعہ پیش آیا ہے۔ جس میں 10 سالہ بچہ حاجی محمد ریاض مہسر کا بیٹا محمد احمد پیڈسٹل فین سے کرنٹ لگنے سے جاں بحق ہو گیا۔

بتایا جاتا ہے کہ صبح سویرے گھر والے گھریلو کام میں مصروف تھے اور گھر میں پیڈسٹل فین صحن میں کھڑا تھا اور بچہ پید سٹل فین سے کچھ فاصلے پر مردہ حالت میں پڑا تھا جس کی موت بجلی کا کرنٹ لگنے کی وجہ بنی ہے اس حادثے سے گھر میں سنسناہٹ کی فضا قائم ہو گئی اور والدین کو شدید صدمہ پہنچا۔
اس المناک واقعے نے ایک بار پھر بجلی کے خطرات کی طرف توجہ مبذول کرائی ہے۔ ماہرین کا کہنا ہے کہ گھروں میں بجلی کے آلات کے استعمال کے دوران احتیاطی تدابیر نہ برتنے سے ایسے حادثات رونما ہوتے ہیں۔

اوچ شریف (باغی ٹی وی،نامہ نگارحبیب خان)گندگی نے عباسیہ کینال کو زہریلا بنا دیا،چولستانی عوام کی زندگیوں کو خطرے سے دوچار کردیا

تفصیل کے مطابق عباسیہ لنک کینال شدید آلودگی کا شکار ہو چکی ہے، جس سے چولستان کے علاقے میں رہنے والے لاکھوں افراد کی صحت کو شدید خطرات لاحق ہو گئے ہیں۔ مقامی لوگوں کے مطابق، کینال کے کنارے گوالوں نے اپنے جانوروں کا گوبر پھینک کر اور قریبی رہائشیوں کی جانب سے فضلہ پھینکنے کی وجہ سے پانی انتہائی آلودہ ہو چکا ہے۔

اس آلودگی کی وجہ سے نہ صرف کینال کا پانی بدبودار ہو چکا ہے بلکہ اس میں زہریلے مادے بھی شامل ہو گئے ہیں۔ یہ پانی نہ صرف چولستان کی ہزاروں ایکڑ زمین کو سیراب کرتا ہے بلکہ وہاں کے مکین اور مال مویشی بھی اسی پانی کا استعمال کرتے ہیں۔ اس سے ہیپاٹائٹس بی اور سی سمیت دیگر خطرناک بیماریوں کے پھیلنے کا اندیشہ ہے۔

اس سنجیدہ مسئلے کے باوجود مقامی انتظامیہ اور متعلقہ محکمے ابھی تک اس معاملے پر کوئی خاطر خواہ اقدامات اٹھانے میں ناکام رہے ہیں۔ عوام کا کہنا ہے کہ اگر جلد از جلد اس مسئلے کا حل نہ نکالا گیا تو اس سے چولستان کے علاقے میں وبائی امراض پھیلنے کا خطرہ ہے۔

مقامی لوگوں نے حکومت اور متعلقہ حکام سے فوری طور پر اس مسئلے کا نوٹس لیتے ہوئے آلودہ پانی کو صاف کرنے اور مستقبل میں اس طرح کی آلودگی کو روکنے کے لیے سخت اقدامات اٹھانے کا مطالبہ کیا ہے۔