Category: بہاولپور

اوچ شریف ،باغی ٹی وی (نامہ نگار حبیب خان) اوچ شریف کے نجی بنک منیجر نے چیک پر جعلی انگوٹھے لگا کر سادہ لوح صارف کو بیس ہزار روپے سے محروم کر دیا، شکایت کرنے پر عملے نے دھکے دے کر بنک سے باہر نکال دیا،

تفصیلات کے مطابق محلہ شمس کالونی اوچ شریف کے غریب محنت کش عبدالمجید ولد غازی خان بلوچ نے میڈیا کو بتایا کہ میں ریڑھی وغیرہ لگا کر اپنا اور اپنے اہل و عیال کا پیٹ پالتا ہوں، میرا اکاؤنٹ نمبری 0010119583540011 ABPAالائیڈ بنک اوچ گیلانی برانچ میں موجود ہے،

عبدالمجید نے کہا کہ ان پڑھ ہونے کی وجہ سے سائل کا فوٹو اکاؤنٹ تھا اور بنک منیجر کے روبرو چیک پر انگوٹھا ثبت کرتا تھا، جس پر منیجر چیک تحریر کرتے، انہوں نے کہا کہ یکم نومبر 2023ء کو سائل نے جمع پونجی کر کے اپنے اکاؤنٹ میں ایک لاکھ روپے جمع کروائے تھے، اور اپنے علاج معالجہ کے لیے مختلف اوقات میں صرف 80 ہزار روپے کیش کروائے لیکن جب بنک سے پتہ کیا تو معلوم ہوا کہ میرے اکاؤنٹ سے ایک لاکھ روپے نکلوائے جا چکے ہیں، میرے ساتھ بنک والوں نے دھوکا کیا ہے،

انہوں نے کہا کہ 14 فروری کو میں پانچ ہزار روپے کا چیک کیش کرانے کے لیے بنک گیا تو مجھے کہا گیا کہ اکاؤنٹ خالی ہے، انہوں نے کہا کہ میرے شور و واویلہ پر بنک منیجر نے مجھے چیک بک لے کر آنے کا کہا، اور اسی وقت چیک بک کی دو خالی رسیدوں پر سرخ پنسل سے 15 دسمبر 2023 کو 15 ہزار اور 6 فروری 2024 کو پانچ ہزار روپے لکھ کر مجھے دھکے دے کر بنک سے نکال دیا، عبدالمجید نے اعلیٰ حکام سے نوٹس لینے کا مطالبہ کیا ہے

اوچ شریف ،باغی ٹی وی( نامہ نگار حبیب خان)تحصیل ہیڈ کوارٹر اسپتال احمد پور شرقیہ میں خاکروب کی جانب سے ہارٹ پیشنٹ کی ای سی جی کرنے کی وائرل ویڈیو اور خبر پر سیکرٹری ہیلتھ پنجاب کا سخت نوٹس خاکروب اور ڈیوٹی نرس کو فارغ کردیا اور ساتھ ہی ڈاکٹر رانا ارشد کو انکوائری آفیسر مقرر کر دیا اور تحقیقاتی رپورٹ کی روشنی میں غفلت کے مرتکب ڈاکٹرز کے خلاف کارروائی عمل میں لائی جائے گی۔ دوسری جانب ڈپٹی کمشنر بہاول پور ظہیر انور جپہ نے بھی خبر کا نوٹس لے لیا، سی ای او ہیلتھ بہاول پور اور ایم ایس تحصیل ہیڈ کوارٹر ہسپتال ڈاکٹر عارف غوری کو بہاول پور طلب کرلیا

تفصیل کے مطابق تحصیل ہیڈ کوارٹر اسپتال احمد پور شرقیہ میں خاکروب کی جانب سے ہارٹ پیشنٹ کی ای سی جی کرنے کی وائرل ویڈیواور خبر پرسکریٹری ہیلتھ پنجاب نے سخت نوٹس لے لیا اور خاکروب سمیت ڈیوٹی نرس کو فارغ کردیا اور ساتھ ہی سینئر ڈاکٹر رانا ارشد کو اس معاملےکا انکوائری آفیسر مقرر کر دیا جن کی تحقیقاتی رپورٹ کی روشنی میں فرائض میں غفلت کے مرتکب ڈاکٹرز کے خلاف کارروائی عمل میں لائی جائے گی۔

دوسری جانب ڈپٹی کمشنر بہاول پور ظہیر انور جپہ نے بھی خبر کا نوٹس لے لیا، سی ای او ہیلتھ بہاول پور اور ایم ایس تحصیل ہیڈ کوارٹر اسپتال ڈاکٹر عارف غوری کو فوری طور پر بہاول پور طلب کرلیا ۔

اوچ شریفباغی ٹی وی ( نامہ نگار حبیب خان) میونسپل کمیٹی اوچ شریف کا تجاوزات کے خلاف کریک ڈاؤن، درجنوں ریڑھی بانوں کو بھاری جرمانے، تجاوزات مافیا کی ریڑھیاں قبضے میں کر لی گئیں، درجنوں ریڑھیوں کے ٹائروں پر ”فنر آری” چل گئی،

تفصیل کے مطابق ایڈمنسٹریٹر میونسپل کمیٹی اوچ شریف کے زیرنگرانی میونسپلٹی عملے محمد سجاد جھلن، خواجہ وکل، احمد نے الشمس چوک، مین بازار، خیر پور ڈاہا روڈ اور عباسیہ روڈ پر تجاوزات کے خلاف آپریشن کرتے ہوئے دکان داروں پر بھاری جرمانے عائد کیے اور برلب سڑک پر موجود سامان بھی تحویل میں لے لیا،

آپریشن کے دوران ٹریفک کی روانی اور خریداری کے لیے بازار آنے والی خواتین و دیگر راہگیروں کے پیدل چلنے میں رکاوٹ اور پریشانی کا سبب بننے والے درجنوں ریڑھیوں کو بھی قبضے میں لے لیا گیا، اس موقع پر میونسپل کمیٹی کی طرف سے بار بار وارننگ دینے اور تجاوزات ختم نہ کرنے والے عادی ” مجرموں ” ریڑھی بانوں کی ریڑھیوں کے ٹائرز ٹیوب "فنر آری” سے کاٹ کر ناکارہ بنا دیے گئے،

اس حوالے سے میڈیا سے بات چیت کرتے ہوئے میونسپل کمیٹی کے کلرک محمد سجاد جھلن نے کہا کہ انسداد تجاوزات کے حوالے سے ریڑھی بانوں اور دکان داروں کو ریلیف فراہم کرنے اور ہر بار وارننگ دینے کے ساتھ ساتھ متعدد بار تجاوزات ختم کرنے اور سامان دکانوں کے اندر رکھنے کا کہا گیا ہے لیکن ریڑھی بان اور دکان دار حضرات قانون کی مسلسل خلاف ورزی کر رہے ہیں جو کسی صورت برداشت نہیں کریں گے،

انہوں نے کہا کہ تاریخی شہر اوچ شریف سے تجاوزات کا خاتمہ کر کے ٹریفک کی آمدورفت کو یقینی بنانے اور شہر کی اصل خوبصورتی کو ہر صورت بحال کریں گے۔

دریں اثناء ریڑھی بانوں نے اپنے موقف میں بتایا کہ ہم غریب لوگ روزانہ کرائے پر ریڑھیاں لے کر شدید گرمی میں محنت مزدوری کرکے اپنے بچوں کا پیٹ پالتے ہیں، پہلے بھی کئی بار جرمانے ادا کر چکے ہیں اور اپنے کنڈے بھی ضبط کرا چکے ہیں۔ دھوپ میں پڑے پڑے سارا سامان خراب ہو جاتا ہے، ٹائروں کو ناکارہ کر دینے سے ہم ریڑھی مالکان کو معاوضہ کہاں سے اور کیسے ادا کریں گے؟

اوچ شریف،باغی ٹی وی (نامہ نگارحبیب خان )باغی ٹی وی کی خبر پر ایکشن ،ہسپتال روڈ پر سیوریج کے کھڑے پانی اور ڈیڈ باڈی لوڈر رکشہ پر لے جانے کی خبر پر ڈپٹی کمشنر بہاول پور ظہیر انور جپہ کا نے نوٹس لے لیا ، میونسپل کمیٹی کےسیور مین،سکر مشین وہیکل کے ہمراہ ہسپتال روڈ پرپہنچ گئے،سیوریج کاگندہ پانی نکال دیا گیا اور سڑک پر کیچڑ اور گڑھوں پرسب بیس ڈال کر راستہ ہموارکردیا گیا ۔ڈپٹی کمشنر بہاول ظہیر انور جپہ کے حکمپر اسسٹنٹ کمشنر فیصل احمد موقع پر پہنچ گئے ، ہسپتال روڈ پر ناکارہ گٹروں کی فوری تعمیر اور روڈ پر ہنگامی بنیادوں پر سولنگ/ ٹف ٹائلز لگانے کی ہدایت
شہریوں کاباغی ٹی وی اور اس کی ٹیم کوخراج تحسین

تٍفصیل کے مطابق گذشتہ روز باغی ٹی وی پرایک شائع ہوئی کہ اوچ شریف کےسرکاری ہسپتال روڈ پرسیوریج کاپانی ٹھاٹھیں مارنے لگا ہے ،راستہ نہ ہونے پرفوت ہوجانے والے شخص کی لاش کیلئے ورثاء لوڈررکشہ کااستعمال کرنا پڑنا، کیونکہ یہاں سے ایمبولینس نہیں گذرسکتی تھی جس کی بنا پر انہوں نے اپنے پیارے کی ڈیڈ باڈی گندے پانی سے عبور کرنے کے لیے لوڈر رکشہ کا استعمال کیا ، ڈیڈ باڈی گندے پانی سے عبور ہونے کی ویڈیوز وائرل ہونے پر انتظامیہ کی بے حسی پر عوام نے غم و غصّے کا اظہار کیا ،

یہ بھی پڑھیں
اوچ شریف:سرکاری ہسپتال روڈ پرسیوریج کاپانی ٹھاٹھیں مارنے لگا،راستہ نہ ہونے پرلاش کیلئے لوڈررکشہ کااستعمال

باغی ٹی وی کی اس خبر پر ڈپٹی کمشنر بہاول پور ظہیر انور جپہ نے فوری نوٹس لیتے ہوئے اسسٹنٹ کمشنر احمدپورشرقیہ فیصل احمد فوری موقع پر پہنچنے کاحکم دیا ،ڈپٹی کمشنر بہاول ظہیر انور جپہ کے حکم پر اسسٹنٹ کمشنر فیصل احمد میونسپل کمیٹی کےسیور مین،سکر مشین وہیکل کے ہمراہ ہسپتال روڈ پرپہنچ گئے،سیوریج کاگندہ پانی سکرمشین کے ذریعے روڈ پر سے نکال دیا گیا اور سڑک پر کیچڑ اور گڑھوں پرخاکہ ریت ڈال کر راستہ ہموارکردیا گیاہے ۔

ڈپٹی کمشنر بہاول پور ظہیر انور جپہ نے ہسپتال روڈ پر ناکارہ گٹروں کی فوری تعمیر اور روڈ پر ہنگامی بنیادوں پر سولنگ/ ٹف ٹائلز لگانے کی ہدایت کردی ہے،شہریوں نے دیرینہ مسئلہ اجاگرنے باغی ٹی وی کی خبرپر ڈپٹی کمشنر بہاول پور ظہیر انور جپہ فوری نوٹس لینےپرباغی ٹی وی اور اس کی ٹیم کوخراج تحسین پیش کیا ہے.

اوچ شریف،باغی ٹی وی (نامہ نگار حبیب خان)سرکاری ہسپتال روڈ دریا میں تبدیل،سیوریج کاپانی ٹھاٹھیں مارنے لگا،اوچ شریف اکلوتے سرکاری ہسپتال کو جانے والا روڈ سیوریج لائن بند ہونے سے،گٹر ابل پڑےگندے پانی سے ایمرجنسی ایمبولینس اور مریضوں کا گزرنا دشوار ہو گیا جسکی بنا پر لواحقین اپنے پیارے کی ڈیڈ باڈی سیوریج کے پانی سے عبور کرنے کے لیے لوڈر رکشہ کا استعمال کرتے ہوئے ویڈیو سوشل میڈیا پر وائرل ہو گئی شہریوں کا ڈپٹی کمشنر بہاولپور سے اصلاح احوال کا مطالبہ

تفصیل کے مطابق ڈھائی لاکھ کی آبادی کو صحت کی سہولیات پہنچانے کیلئے قائم رورل ہیلتھ سینٹر اوچ شریف کی اکلوتی گزرگاہ پر گٹروں کا پانی جمع ، ہسپتال روڈ پر سیوریج لائن بند ہونےسے گندہ پانی سٹرک پر جمع ہونے کیوجہ میں شہریوں کو آنے جانے میں شدید مشکلات کا سامنا ہے ۔

گذشتہ روز ہسپتال میں فوت ہوجانے والےایک شخص کی لاش کو گھر لے جانے کیلئے لوڈررکشہ استعمال کرنا پڑا کیونکہ یہاں سے ایمبولینس نہیں گذرسکتی تھی جس کی بنا پر انہوں نے اپنے پیارے کی ڈیڈ باڈی گندے پانی سے عبور کرنے کے لیے لوڈر رکشہ کا استعمال کیا ، ڈیڈ باڈی گندے پانی سے عبور ہونے کی ویڈیوز وائرل ہونے پر انتظامیہ کی بے حسی پر عوام نے غم و غصّے کا اظہار کیا ،انہوں نے کہا کہ یہ واحد روڈ ہے جہاں ہم اپنے علاج معالجہ کے لیے جاتے ہیں جہاں شفا یاب ہونے کی بجائے گندے پانی کی وجہ سے مختلف وبائی امراض لے آتے ہیں

شہریوں کا کہناتھاکہ اس روڈ پر رورل ہیلتھ سنٹر اور ویٹرنری ہسپتال ،محکمہ زراعت(توسیع) اور تعلیمی ادارے بھی موجود ہیں،ان اداروں میں آنے جانے والوں کوشدید مشکلات کاسامنا کرناپڑرہاہے ، ایمرجنسی کیلئے مریضوں کو لانے اور لے جانے والی ایمبولینسوں کا راستہ مسدود ہو کر رہ گیا ہے

شہریوں نے بتایا کہ کئی ماہ سے میونسپل کمیٹی کے اہلکاروں کو بھی اس پریشانی سے آگاہ کیا جا رہا ہے لیکن کوئی عمل نہیں ہوا انہوں نے ڈپٹی کمشنر بہاولپور سے اصلاح احوال کا مطالبہ کیا ہے

اوچ شریف،باغی ٹی وی (نامہ نگارحبیب خان)اوچ شریف کے نواحی تھانہ دھوڑکوٹ کی حدود میں جاز کیشیر محمد اکبر ولد عبدالکریم سے نا معلوم افراد نے موٹر سائیکل اور موبائل چھین کر فائرنگ کرکے قتل کر دیا

تفصیلات کے مطابق اوچ شریف کے نواحی علاقے تھانہ دھوڑکوٹ کی حدود بستی آرائیں موضع وادھنور کے مقام پر جاز کیش کا کام کرنے والا محمد اکبر قوم چنڑ سکنہ احمد پور شرقیہ کرایہ پر موٹر سائیکل چلاتا ہے اور جائز کیش کا کام بھی کرتا ہے کو بوقت شام کسی نامعلوم شخص نے فائر مار کر قتل کر دیا ہے

مقامی پولیس تھانہ دھوڑکوٹ موقع پر موجود ہے اور مصروف بہ کارروائی ہے پولیس تھانہ دھوڑکوٹ کے مطابق موقع پر مقتول کا موٹر سائیکل و موبائل موجود نہ ہے مزید معلومات حاصل کی جا رہی ہیں،

اوچ شریف، باغی ٹی وی( نامہ نگار حبیب خان ) اوچ شریف کے نواحی علاقہ زندہ لال کے لوگوں نے قبرستان کو جانوروں کا باڑا بنا دیا قبریں مسمار ہونے لگی جانوروں کے فضلے سے تعفن پھیل گیا اہل علاقہ کا ڈپٹی کمشنر بہاولپور سے نوٹس لینے کا مطالبہ

تفصیلات کے مطابق اوچ شریف کے نواحی علاقہ زندہ لال قبرستان کا تقدس پامال لوگوں نے قبرستان کو جانوروں کا باڑا بنا دیا ہے قبرستان میں لوگوں نے پالتو جانور اور گدھے باندھ دیئے ہیں جس سے قبروں کے پاس گندگی کے ڈھیر لگے ہوئے ہیں

رات بھر گدھے اور دوسرے آوارہ جانور قبرستان کا تقدس پامال کرتے رہتے ہیں جس سے متعدد قبریں مسمار ہو چکی ہیں، قبرستان میں مردے دفنانے کی بجائے گدھے اور جانور باندھ کر قبرستان کی بے حرمتی کی جا رہی ہے، قبرستان کی مناسب دیکھ بھال اور نگرانی نہ ہونے کی وجہ سے آوارہ جانور اور نشیئوں کے اڈے بن گئے ہیں

گزشتہ روز باغی ٹی وی کے نمائندے نے اطلاعات پر قبرستان دربار حضرت زندہ لال کا سروے کیا تو وہاں پر جانور اور گدھے باندھے پائے گئے اور جانور قبرستان میں چر رہے تھےقبرستان کی حالت زار انتہائی درگوں ہے ہر طرف خود رو جھاڑیاں اگی ہوئی ہیں جو جانوروں کے چارے کا کام کرتی ہے

قبرستان میں روشنی کے انتظامات نہ ہونےکا فائدہ اٹھا کر نشئی لوگوں کا مسکن اور جانوروں کا باڑا بن چکا ہے ڈپٹی کمشنر بہاول پور ،چیئرمین بلدیہ معاملے کا فوری نوٹس لیتے ہوئے، فوری کارروائی کا حکم جاری کریں اور قبرستان کا تقدس بحال کروائیں

گدھے اور جانور باندھنے والے لوگوں کے خلاف تادیبی کارروائی عمل میں لائی جائے تاکہ آئندہ کوئی بھی دوبارہ ایسی مزموم حرکت نہ کر سکے.

اوچ شریف باغی ٹی وی( نامہ نگار حبیب خان) موسم گرما کی شدت اور حبس سے کپاس پر سفید مکھی اور تھرپس کا حملہ، محکمہ زراعت افسران ٹھنڈے کمروں تک محدود، کپاس کی فصل کو شدید نقصان ہونے کا اندیشہ، پیداواری اہداف میں کمی کے خطرات منڈلانے لگے، کاشت کاروں نے سر پکڑ لئے، حکومت فوری طور پر انتظامات کرے، کسان

تفصیل کے مطابق جنوبی پنجاب کے شہر اوچ شریف کے نواحی علاقوں ترنڈبشارت، سرور آباد ،بکھری ،بیٹ احمد ،بیٹ بختیاری، رسول پور، بنگلہ مستوئی، کوٹ خلیفہ، حلیم پور سمیت دیگر علاقوں میں بارشوں کے بعد شدید حبس سے کپاس کی فصل پر سفید مکھی اور تھرپس کا حملہ شدت اختیار کرتا جا رہا ہے،اس سے کپاس کی فصل متاثر ہونے کا خدشات بڑھ گئے ہیں

کاشتکاروں محمد عمران، محمد شاہد، نذیر خان، حبیب خان ،محمد عارف ،محمد جاوید،گل محمد، ارشد ودیگر کا کہنا ہے کہ سفید مکھی اور تھرپس کی بڑھتی ہوئی بیماریوں کی شدت کو کم کرنے کے لیے مختلف سپرے کرنا شروع کر دیئے ہیں تاہم اِن کا اثر نہ ہونے پر کاشتکاروں کی اکثریت پریشان ہے،حالات ایسے ہی رہے تو رواں سال کپاس کا مقرر کردہ ہدف پورا کرنا شاید ممکن نہ ہو۔

جبکہ دوسری طرف محکمہ زراعت کے ملازمین فیلڈ میں کسانوں کی رہنمائی کرنے کی بجائے اپنے دفاتر میں وقت گزار تے ہیں ،کاشتکاروں کا کہنا ہے کہ پنجاب حکومت جہاں صوبے کے کاشتکاروں کے لیے کسان کارڈ کے اجراء کے ساتھ ساتھ شعبہ زراعت کی بحالی کے لیے اقدامات کر رہی ہے وہیں اِسے جعلی زرعی ادویات کے غیر قانونی کاروبار میں ملوث فراد اور اُن کی پشت پناہی کرنے والے سرکاری افسروں کے خلاف بھی سخت قانونی کارروائی کرنی چاہئے تاکہ کاشتکاروں کا معاشی استحصال کرنے والے اپنے انجام کو پہنچیں اور زراعت کے شعبے سے مطلوبہ اہداف حاصل کیے جا سکیں