Category: بہاولپور

اوچ شریف،باغی ٹی وی (نامہ نگار حبیب خان) اوچ شریف میں کئی مقامات پر ٹرانسپورٹ کے غیر قانونی اڈے، ٹرانسپورٹ مافیا کی اجاہ داری، متعلقہ اداروں کی چشم پوشی کے باعث اوچ شریف کا اکلوتا جنرل بس اسٹینڈ ویران ہو کر رہ گیا۔

تفصیلات کے مطابق اوچ شریف میں ٹرانسپورٹ مافیا نے علی پور روڈ، غوث الاعظم چوک، کے ایل پی روڈ، خیر پور ڈاہا روڈ پر جگہ جگہ غیر قانونی اڈے قائم کر دیے ہیں جو قومی خزانے کو سالانہ لاکھوں روپے کا نقصان دینے کے علاوہ سیکیورٹی مسائل اور ٹریفک جام کرنے کا باعث بن رہے ہیں،

مذکورہ غیر قانونی ٹرانسپورٹ اڈوں پر راولپنڈی، اسلام آباد، لاہور اور کراچی جانے والی بسوں کے مسافروں سے کرائے کے علاوہ فی سواری 200 روپیہ کمیشن وصول کیا جاتا ہے، ان غیر قانونی اڈوں پر نہ ہی کوئی واش روم ہوتا ہے اور نہ ہی پینے کے لیے ٹھنڈے پانی کا کوئی انتظام، سڑک کنارے ایک چھوٹا کاؤنٹر اور ایک کرسی رکھ کر عوام کو دونوں ہاتھوں سے لوٹا جاتا ہے۔

سجادہ نشین درگاہ قادریہ غوثیہ عالیہ و بلدیہ اوچ شریف کے پہلے منتخب چیئرمین مخدوم الملک مخدوم سید حامد محمد شمس الدین گیلانی نے عوام کی فلاح و بہبود اور پبلک ٹرانسپورٹ کے حوالے سے درپیش مشکلات کو مدنظر رکھتے ہوئے 13 اکتوبر 1976ء کو احمد پور شرقیہ روڈ پر واقع اپنی زیر ملکیت 15 کنال 19 مرلے قیمتی اراضی جنرل بس اسٹینڈ کے لیے وقف کی تھی،

1980ء کی دہائی میں حکومت کی طرف سے لاکھوں روپے مالیت سے جنرل بس اسٹینڈ کی خوبصورت عمارت تعمیر کرائی گئی تھی، تاہم دیکھ بھال نہ ہونے کی وجہ سے آج یہ خوبصورت عمارت تاریخ کے کوڑے دان میں دفن ہو گئی ہے،

ماضی میں سالانہ لاکھوں روپے آمدنی دینے والا جنرل بس اسٹینڈ جگہ جگہ غیر قانونی ٹرانسپورٹ اڈوں، ٹرانسپورٹ مافیا کی اجاہ داری اورڈسٹرکٹ ریجنل ٹرانسپورٹ اتھارٹی کی چشم پوشی و مقامی انتظامیہ کی غفلت کے سبب ویران ہو کر رہ گیا ہے۔ دیکھ بھال ننہ ہونے کی وجہ سے عمارت کی کھڑکیاں اور دروازے لوگ اکھاڑ کر لے گئے، چار دیواری منہدم ہونے کی وجہ سے قریبی آبادیوں کے لوگوں نے اسٹینڈ سے راستے بنا لیے ہیں،

عوامی وسماجی حلقوں نے ڈپٹی کمشنر بہاول پور اور سیکرٹری ڈسٹرکٹ ریجنل ٹرانسپورٹ اتھارٹی بہاول پور سے جنرل بس اسٹینڈ اوچ شریف کی دوبارہ بحالی کر کے اس کو جدید سہولیات سے آراستہ کرنے اور شہر میں غیر قانونی ٹرانسپورٹ اڈے ختم کرانے کا مطالبہ کیا ہے۔

اوچ شریف ،باغی ٹی وی( نامہ نگار حبیب خان)اوچ شریف ابو ظہبی نہر میں 16 سالہ لڑکانہاتے ہوئے ڈوب گیا ،24 گھنٹے گزر جانے کے باوجود نعش نہ مل سکی ریسکیو آپریشن جاری

تفصیلات کے مطابق اوچ شریف کے محلہ شمس کالونی کے رہائشی محمد امین کا 16سالہ بیٹا محمد جمیل گھر کے نزدیک ابو ظہبی نہر میں نہاتے ہوئے ڈوب گیا

ریسکیو ٹیم کو اطلاع ملنے پر ریسکیو ٹیم نے آپریشن جاری کر دیا چوبیس گھنٹے گزر جانے کے بعد بھی لاش نہ مل سکی والدین غم سے نڈھال ریسکیو ٹیم کا کہنا ہے کہ جب تک لاش نہیں مل جاتی ریسکیو آپریشن جاری رہے گا

اوچ شریف،باغی ٹی وی (نامہ نگارحبیب خان) مہنگی بجلی نے عوام کی چیخیں نکلوا دیں، بڑی عید پر بجلی کے بلوں میں ہوشربا بڑا اضافہ، مبینہ اضافی سر چارج اور فیول ایڈجسٹمنٹ کے نام پر لوٹ مار بند کی جائے شہریوں کا حکومت سے مطالبہ،

تفصیل کے مطابق شہریوں نے بجلی کے بلوں میں لگنے والے ظالمانہ ٹیکس کو مسترد کرتے ہوئے میڈیا کو بتایا ہے کہ آئی ایم ایف کو خوش کرنے کے لئے حکومت ملکی معیشت اور تاجر برادری سمیت عام آدمی کو تباہ و برباد کرنے میں کوئی کسر نہیں چھوڑ رہی ہے ہزاروں روپے سیلز ٹیکس ماہوار لگانا گھریلو صارفین و دکانداروں پر ظلم ہے، روزگار نہ ہونے کی وجہ سے عام شہری اور تاجر برادری پہلے ہی بے حال ہے اوپر سے حکومت بجلی کے بلوں میں سیلز ٹیکس عائد کرکے معاشی قتل کر رہی ہے،

شہریوں کا کہنا تھا کہ غریب عوام پہلے مہنگائی کی وجہ سے پریشان ہے آج ان بدترین حالات معاشی بدحالی، مہنگائی، بیروزگاری اور کاروبار پر جمود کی اصل وجہ یہ غیر مقبول ٹیکسز کا نظام ہی ہے حکومت نے آئی ایم ایف کے سامنے گھٹنے ٹیک کر تاجروں اور عوام کو ٹیکسوں کی دلدل میں دھکیل دیا ہے ان کا مزید کہنا تھا کہ آئی ایم ایف بھی وڈیروں اور جاگیرداروں پر ٹیکس لگانے کو نہیں کہتا صرف عوام کا خون نچوڑنے کے احکامات دیتا ہے

حکمران بھی عوام پر مختلف قسم کے ٹیکس لگاتے ہیں،فیول پرائس ایڈجسمنٹ کا جو ٹیکس بجلی کے بل میں آتا ہے وہ اس قدر زیادہ ہے کہ بجلی کی رقم اصل بل سے بھی زیادہ فیول ایڈجسٹمنٹ پرائس کی رقم ہوتی ہے شہری اس ظالمانہ ٹیکس کے خلاف غریب عوام اور تاجربرداری کے ساتھ ہے اور احتجاج کا حق محفوظ رکھتی ہے انہوں نے مطالبہ کیا کہ یہ نئے ٹیکس فوری واپس لیے جائیں تاکہ عوام اور تاجر سکھ کا سانس لے سکیں

شہریوں نے اس زیادتی پر شدید تنقید کا حکومت کو نشانہ بناتے ہوئے مطالبہ کیا کہ لوگوں کو زندہ رہنے کا حق دیا جائے اور فیول ایڈجسٹمنٹ چارجز کا خاتمہ کیا جائے پہلے ہی عوام دو وقت کی روٹی کا بندوبست نہیں کر پا رہے کیونکہ بڑھتی مہنگائی نے لوگوں کی زندگی اجیرن بنا رکھی ہے،

بجلی صارفین نے میڈیا سے گفتگو کرتے ہوئے کہا کہ حکومت بلوں میں عوام سے جبراً وہ ٹیکسز بھی وصول کررہی ہے جن کے بارے میں انہیں علم ہی نہیں کہ وہ کس مد میں یہ ٹیکسز ادا کر رہے ہیں۔نیپرا کی جانب سے بجلی کے نرخوں میں ایک ماہ کیلئے اضافہ کرنا درحقیقت عوام کو دیوار سے لگانے سے مترادف ہے جبکہ بجلی کے نرخوں میں جو اضافہ ایک ماہ کیلئے کیا جاتا ہے‘ وہ ایک ماہ بعد واپس لیا جاتا ہے یا نہیں‘ اس کا بھی عوام کو کچھ پتہ نہیں ہوتا کیونکہ جو بل موصول ہوتے ہیں وہ اس قدر پیچیدہ ہوتے ہیں کہ عام آدمی انہیں پڑھنے سے قاصر نظر آتا ہے کہ کونسے اضافی چارجز وہ ادا کر رہا ہے اور کونسے چارجز واپس لئے گئے ہیں۔

بجلی کے نرخوں میں اضافہ در اضافہ حکومت بالخصوص مسلم لیگ (ن) کیلئے لمحہ فکریہ ہے جو اپنی انتخابی مہم میں عوام کو 300 یونٹ تک بجلی فری دینے کے دعوے کرتی رہی ہے۔ اگر ماہانہ بنیادوں پر فیول ایڈجسٹمنٹ کے نام پر بجلی کے نرخوں میں اسی طرح اضافہ کیا جاتا رہا تو عوام کے صبر کا پیمانہ لبریز ہو سکتا ہے جو ردعمل کے طور پر سڑکوں پر نکل کر حکومت کیلئے مشکلات پیدا کر سکتے ہیں، شہریوں نے چیف جسٹس سپریم کورٹ سے مطالبہ کیا کہ واپڈا کی لوٹ مار کا از خود نوٹس لیکر شہریوں کو بچایا جائے.

اوچ شریف ،باغی ٹی وی ( حبیب خان نامہ نگار)عید قربان،ٹماٹرٹرپل اور پیازڈبل سینچری کے قریب ،لہسن ،ادرک کے درمیان بھی مقابلہ جاری اورسبز مرچ کو پر لگ گئے، مقامی و تحصیل انتظامیہ منظر سے غائب، گرانفروشوں کو کھلی چھٹی، سبزی مافیاء عام آدمی کی کھال اتارنے میں مصروف

تفصیلات کے مطابق اوچ شریف شہر و گردونواح میں گرانفروشی اپنے عروج پر پہنچ چکی ہے، عید سے قبل اشیاء خوردونوش کی قیمتوں میں خودساختہ اضافہ کردیا گیا ہے اس حوالہ سے ضلعی کی پرائس کمیٹی اور ضلعی انتظامیہ خاموش تماشائی نظر آرہی ہے، عید قریب آتے ہی گھروں میں استعمال ہونے والے خشک مصالحہ جات اور پیاز، ٹماٹر، ادرک، لہسن، سبز مرچ ودیگر اشیاء کی قیمتیں بھی بڑھ گئیں جبکہ جیسے جیسے بکرا عید قریب آرہی ہے ویسے ہی قیمتوں میں بھی اضافہ جاری ہے،

مہنگائی سے ستائے شہریوں محمد یاسر، احمد علی، محمد بخش، اللہ وسایا، الٰہی بخش و دیگر نے میڈیا سے گفتگو کرتے ہوئے کہا کہ مہنگائی پہلے ہی اتنی ہے کہ ہم پریشان ہیں اور اب گرانفروش مافیاء نے غریب عوام کو عید سے پہلے ذبح کرنا شروع کردیا ہے،ٹماٹر300 روپے فی کلو ،پیاز150 روپے فی کلو لہسن ادرک بھی قوت خرید سےباہر ہوگئے

اسی طرح مختلف اقسام کے مصالحہ جات کی قیمتوں میں بھی غیر معمولی اضافہ دیکھنے میں آرہا ہے۔اس حوالے سے شہریوں کا کہنا ہے کہ عید قربان کے قریب آتے ہی دکانداروں نے خود ساختہ مہنگائی کا طوفان برپا کرکے رکھ دیا ہے، جس کیوجہ سے متوسط اور مزدورطبقے سے تعلق رکھنے والے افراد شدید پریشانی کا شکار ہیں۔

پرائس کنٹرول مجسٹریٹس ائیر کنڈیشنڈ کمروں میں بیٹھ کر مہنگائی سے بلبلاتے شہریوں کی آہ و بکا پر خاموش تماشائی بنے ہوئے ہیں اور ہر دکاندار کے اپنے اپنے نرخ ہیں کہیں بھی حکومتی رٹ قائم ہوتی نظر نہیں آرہی،شہریوں نے تاجران کی مبینہ خود ساختہ گرانفروشی پر شدید احتجاج کرتے ہوئے ضلعی و تحصیل انتظامیہ سے مطالبہ کیا ہے کہ فوری طور پر اس کا نوٹس لیتے ہوئے قانونی کارروائی عمل میں لائی جائے.