Category: ڈیرہ غازی خان

ڈیرہ غازی خان(سٹی رپورٹرجواداکبر)حالیہ بارشوں کے باعث کوہ سلیمان میں رود کوہیوں میں پیدا ہونے والی سیلابی صورتحال سے نمٹنے کے لیے ضلعی انتظامیہ پوری طرح متحرک ہو چکی ہے۔

ڈپٹی کمشنر ڈیرہ غازی خان محمد عثمان خالد نے ڈی پی او طارق ولایت اور دیگر افسران کے ہمراہ سخی سرور کا دورہ کیا۔ اس موقع پر انہوں نے رود کوہی سخی سرور میں پانی کی صورتحال کا تفصیلی جائزہ لیا اور مقامی لوگوں سے بھی ملاقات کی۔

ڈپٹی کمشنر نے میڈیا سے بات کرتے ہوئے کہا کہ کسی بھی ہنگامی صورتحال سے نمٹنے کے لیے بھاری مشینری اور دیگر ضروری سہولیات موقع پر فراہم کر دی گئی ہیں اور انتظامیہ مکمل طور پر الرٹ ہے۔ انہوں نے بتایا کہ اس وقت پانی کی صورتحال بتدریج کم ہو رہی ہے۔

محمد عثمان خالد نے مزید کہا کہ ضلعی انتظامیہ تمام دستیاب وسائل بروئے کار لا رہی ہے تاکہ شہریوں کو کسی بھی قسم کی مشکل کا سامنا نہ کرنا پڑے اور انہیں ہر ممکن سہولت فراہم کی جا سکے۔

ڈیرہ غازی خان (سٹی رپورٹر جواد اکبر) ڈپٹی کمشنر ڈیرہ غازی خان محمد عثمان خالد نے ڈی پی او طارق ولایت اور دیگر افسران کے ہمراہ فلڈ ریلیف کیمپ سرور والی، غازی گھاٹ اور مختلف زیر آب علاقوں کا دورہ کیا۔ اس موقع پر اے سی صدر تیمور عثمان، چیف آفیسر ضلع کونسل جواد الحسن گوندل، ڈسٹرکٹ ایمرجنسی آفیسر انجینئر احمد کمال اور دیگر افسران بھی ہمراہ تھے۔

ڈپٹی کمشنر نے متاثرہ دیہات کے عوام سے ملاقاتیں کیں اور ان کے مسائل سنے۔ گفتگو کرتے ہوئے انہوں نے کہا کہ وزیر اعلیٰ پنجاب مریم نواز شریف کی ہدایت پر اہل علاقہ کو کسی صورت تنہا نہیں چھوڑا جائے گا۔ عوام کے جان و مال کے تحفظ کے لیے ہر ممکن اقدامات کیے جا رہے ہیں اور شہری ضلعی انتظامیہ کے ساتھ بھرپور تعاون کریں۔

ڈپٹی کمشنر نے فلڈ ریلیف کیمپس کے علاوہ صحت، ریسکیو 1122 اور دیگر اداروں کے لگائے گئے کیمپس کا بھی معائنہ کیا اور ریسکیو آپریشن و تیاریوں سے متعلق تفصیلی بریفنگ لی۔

ڈیرہ غازی خان (سٹی رپورٹرجواداکبر)ممکنہ سیلاب کے خدشے کے پیش نظر ضلعی انتظامیہ نے متاثرین کی امداد کے لیے غیر سرکاری تنظیموں (این جی اوز) سے تعاون طلب کر لیا ہے۔ اس حوالے سے ایڈیشنل ڈپٹی کمشنر جنرل قدسیہ ناز کی زیر صدارت اجلاس منعقد ہوا، جس میں مختلف این جی اوز اور متعلقہ اداروں کے افسران نے شرکت کی۔

اجلاس سے خطاب کرتے ہوئے قدسیہ ناز نے کہا کہ ڈیرہ غازی خان میں تین طرح کے سیلاب کا خطرہ موجود رہتا ہے: دریائے سندھ میں طغیانی، رود کوہیوں میں سیلابی ریلے اور شہری علاقوں میں اربن فلڈنگ۔ ان خدشات کے پیش نظر مربوط حکمتِ عملی اور مؤثر اقدامات ناگزیر ہیں۔

ایڈیشنل ڈپٹی کمشنر نے زور دیا کہ این جی اوز متاثرین کو راشن بیگز اور دیگر اشیائے ضروریہ ضلعی انتظامیہ کی مشاورت سے فراہم کریں تاکہ شفافیت برقرار رہے اور ہر مستحق تک امداد پہنچ سکے۔

ڈپٹی ڈائریکٹر سوشل ویلفیئر ذکاء الدین بزدار نے اجلاس کے دوران این جی اوز کا تعارف کرایا اور حکومتی پالیسیوں سے شرکاء کو آگاہ کیا۔ اجلاس میں موجود دیگر محکموں کے افسران نے بھی اپنی تیاریوں اور دستیاب وسائل پر بریفنگ دی۔

اجلاس کے اختتام پر فیصلہ کیا گیا کہ ضلعی انتظامیہ اور این جی اوز باہمی تعاون سے مشترکہ لائحہ عمل تیار کریں گے تاکہ ہنگامی صورتحال میں فوری ردعمل یقینی بنایا جا سکے۔

ڈیرہ غازی خان (سٹی رپورٹرجواد اکبر): ڈیرہ غازی خان کے علاقے بلاک 53 عباسیہ مسجد نظام آباد میں ناقص سیوریج سسٹم نے شہریوں کی زندگی مشکل بنا دی ہے۔ مقامی افراد کا کہنا ہے کہ جب سے علاقے میں ٹف ٹائلز بچھائی گئی ہیں، سیوریج کا گندا پانی مسلسل جمع ہو رہا ہے، جس سے گلیاں جوہڑ کا منظر پیش کر رہی ہیں اور پانی گھروں میں بھی داخل ہو رہا ہے۔

مکینوں کو روزانہ کی بنیاد پر شدید مشکلات کا سامنا ہے۔ خاص طور پر بزرگ، بچے اور خواتین اس صورتحال سے متاثر ہیں۔ نمازیوں کو بھی شدید اذیت سے دوچار ہونا پڑ رہا ہے کیونکہ مسجد جانے کے لیے انہیں اسی آلودہ اور ناپاک پانی سے گزرنا پڑتا ہے۔

شہریوں نے بتایا کہ کئی مرتبہ شکایت کرنے کے باوجود ابھی تک کوئی عملی کارروائی نہیں کی گئی ہے۔ انہوں نے کمشنر اور ڈپٹی کمشنر ڈیرہ غازی خان سے فوری نوٹس لینے اور اس سنگین مسئلے کا مستقل حل نکالنے کا مطالبہ کیا ہے۔

ڈیرہ غازی خان (سٹی رپورٹرجواداکبر)ضلع ڈیرہ غازی خان میں جشن عید میلادالنبی صلی اللہ علیہ وآلہ وسلم انتہائی شان و شوکت سے منانے کا فیصلہ کیا گیا ہے۔ اس سلسلے میں بجلی کی بلا تعطل فراہمی اور سرکاری و نجی عمارتوں پر جشنِ آزادی سے بڑھ کر چراغاں اور سجاوٹ کے احکامات جاری کر دیے گئے ہیں۔

اس حوالے سے ڈپٹی کمشنر محمد عثمان خالد کی زیر صدارت ضلعی امن کمیٹی اور اتحاد بین المسلمین کا ایک اہم اجلاس منعقد ہوا۔ اجلاس میں حضور اکرم ﷺ کے یومِ ولادت کے موقع پر کیے جانے والے انتظامات اور سکیورٹی امور کا تفصیلی جائزہ لیا گیا۔

اجلاس میں ڈسٹرکٹ پولیس آفیسر طارق ولایت، ضلعی افسران، صدر میلاد کمیٹی صاحبزادہ انور حسن قریشی، سید ندیم حیدر نقوی، مولانا اقبال رشید، حافظ احمد حسن ایڈووکیٹ سمیت تمام مکاتب فکر کے علماء، مذہبی و سماجی رہنماؤں اور امن کمیٹی کے اراکین نے شرکت کی۔

ڈپٹی کمشنر محمد عثمان خالد نے کہا کہ جشنِ عید میلادالنبی ﷺ کے موقع پر بھائی چارے، رواداری اور مذہبی ہم آہنگی کا عملی مظاہرہ کرنا ہم سب کی مشترکہ ذمہ داری ہے۔ انہوں نے متعلقہ محکموں کو ہدایت کی کہ جلوسوں کے راستوں کی صفائی، تجاوزات کا خاتمہ، روشنی اور سکیورٹی کے فول پروف انتظامات یقینی بنائیں۔

انہوں نے اس بات پر بھی زور دیا کہ بجلی کی بلا تعطل فراہمی کو یقینی بنایا جائے تاکہ میلاد النبی ﷺ کی تقریبات اور جلوسوں میں کوئی رکاوٹ نہ آئے۔ انہوں نے کہا کہ جشنِ میلاد النبی ﷺ کے پیغام کو عام کرنے کے لیے سرکاری اور نجی عمارتوں، بازاروں اور چوکوں کو جشنِ آزادی سے بھی زیادہ خوبصورتی سے سجایا جائے۔

تمام محکموں کو ہدایت دی گئی کہ وہ جلوسوں کے منتظمین کے ساتھ مسلسل رابطے میں رہیں اور سکیورٹی پلان پر سختی سے عمل کریں۔ اسسٹنٹ کمشنرز کو تحصیل سطح پر بھی اجلاس منعقد کرنے اور عوام کے ساتھ قریبی رابطے میں رہ کر انتظامات کو حتمی شکل دینے کی ہدایت دی گئی۔ اجلاس کے اختتام پر علماء اور شرکاء نے ضلعی انتظامیہ کی کوششوں کو سراہا اور مکمل تعاون کی یقین دہانی کروائی۔ ملک و قوم کی سلامتی اور ترقی کے لیے خصوصی دعا بھی کی گئی۔