ڈیرہ غازی خان(باغی ٹی وی،سٹی رپورٹرجواداکبر ) مون سون بارشوں کے دسویں اسپیل کے دوران پنجاب بھر میں شدید بارشوں اور فلیش فلڈنگ کا خدشہ ہے۔ پی ڈی ایم اے پنجاب نے 6 سے 9 ستمبر تک مختلف اضلاع میں طوفانی بارشوں کی پیشگوئی کے بعد صوبہ بھر کے ڈویژنل اور ضلعی افسران کو ہائی الرٹ کر دیا ہے۔
ترجمان پی ڈی ایم اے کے مطابق راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں شدید بارشیں متوقع ہیں۔ اسی طرح نارووال، حافظ آباد، منڈی بہاالدین، اوکاڑہ، ساہیوال، قصور، جھنگ، سرگودھا اور میانوالی میں بھی بارشوں کا امکان ظاہر کیا گیا ہے۔
دریائے چناب، راوی اور ستلج میں پہلے ہی اونچے درجے کا سیلاب ریکارڈ کیا جا رہا ہے جبکہ ڈیرہ غازی خان، ملتان اور راجن پور میں 7 سے 9 ستمبر کے دوران رودکوہیوں میں فلیش فلڈنگ کا خدشہ ہے۔ پی ڈی ایم اے کے مطابق بڑے شہروں میں ندی نالوں کے بپھرنے کا امکان بھی موجود ہے۔
ڈی جی پی ڈی ایم اے عرفان علی کاٹھیا نے کہا کہ تمام کمشنرز اور ڈپٹی کمشنرز کو الرٹ رہنے کی ہدایات جاری کر دی گئی ہیں، جبکہ محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی ہنگامی صورتحال کے پیش نظر تیار رہنے کا حکم دیا گیا ہے۔
انہوں نے شہریوں سے اپیل کی کہ دریاؤں اور برساتی نالوں کے قریب جانے سے گریز کریں، آندھی اور طوفان کی صورتحال میں محفوظ مقامات پر رہیں اور غیر ضروری سفر نہ کریں۔ کسی بھی ہنگامی صورتحال میں پی ڈی ایم اے ہیلپ لائن 1129 پر فوری رابطہ کیا جا سکتا ہے۔
