Category: ڈیرہ غازی خان

ڈیرہ غازی خان (باغی ٹی وی نیوز رپورٹر شاہد خان) غازی یونیورسٹی ڈیرہ غازی خان میں شعبہ کمپیوٹر سائنس اور انٹرنیٹ سوسائٹی کے اشتراک سے ’’مصنوعی ذہانت‘‘ کے موضوع پر دو روزہ تربیتی ورکشاپ کا انعقاد کیا گیا۔ افتتاحی سیشن کے مہمان خصوصی وائس چانسلر پروفیسر ڈاکٹر اشفاق احمد تھے، جبکہ پروفیسر ڈاکٹر ارشد منیر، پروفیسر ڈاکٹر سعد اللہ لغاری، ڈاکٹر محمد ابو بکر، ڈاکٹر محمد علی تارڑ، ڈاکٹر جاوید اقبال، ڈاکٹر وسیم عباس گل، ڈاکٹر عنصر علی، کرنل اشفاق احمد، انجینئر عدیل نیئر سمیت دیگر اساتذہ کرام اور طلبہ و طالبات کی کثیر تعداد شریک ہوئی۔

ورکشاپ کے اغراض و مقاصد پر روشنی ڈالتے ہوئے ڈاکٹر حافظ گلفام احمد عمر نے کہا کہ اس پروگرام کا مقصد تحقیق، ترقی اور تعیناتی کے لیے ایک متحرک ماحولیاتی نظام کو فروغ دینا ہے تاکہ معاشرے کی علمی و تحقیقی ضروریات کو جدید تقاضوں سے ہم آہنگ کیا جا سکے۔ انہوں نے کہا کہ ٹولز، وسائل اور تربیت تک جامع رسائی فراہم کر کے ڈیجیٹل اور اختراعی تقسیم کو ختم کیا جائے گا، جبکہ مختلف شعبہ جات کے درمیان اشتراک عمل کو فروغ دے کر حقیقی دنیا کے مسائل کا عملی حل تلاش کیا جائے گا۔ ان کا کہنا تھا کہ مصنوعی ذہانت کو ذمہ دارانہ اور اخلاقی خطوط پر استوار کرنا وقت کی اہم ضرورت ہے تاکہ یہ انسانی حقوق، شفافیت اور معاشرتی اقدار کے مطابق فروغ پا سکے۔

وائس چانسلر پروفیسر ڈاکٹر اشفاق احمد نے خطاب کرتے ہوئے کہا کہ موجودہ اور آنے والا دور بلاشبہ مصنوعی ذہانت کا دور ہے۔ ہماری روزمرہ زندگی میں اس کی اہمیت بڑھتی جا رہی ہے اور مستقبل میں یہ زندگی کے ہر شعبے پر اثر انداز ہوگی۔ انہوں نے کہا کہ جامعات میں تدریس و تحقیق کو جدید تقاضوں سے ہم آہنگ کرنے کے لیے مصنوعی ذہانت بنیادی حیثیت اختیار کر چکی ہے، جو طلبہ کی سیکھنے کی صلاحیت بہتر بنانے اور اساتذہ کو تدریسی و تحقیقی سرگرمیوں میں سہولت فراہم کرنے کا موثر ذریعہ ہے۔

پروفیسر ڈاکٹر اشفاق احمد نے اس بات پر زور دیا کہ جامعات کو چاہیے کہ وہ مصنوعی ذہانت کے استعمال کو فروغ دیں اور طلبہ کو اس میدان میں مہارت حاصل کرنے کے مواقع فراہم کریں تاکہ وہ مستقبل کی ضروریات کے مطابق ایک باصلاحیت اور جدید علم سے آراستہ افرادی قوت کے طور پر سامنے آئیں۔

ڈیرہ غازیخان( باغی ٹی وی، سٹی رپورٹر جواد اکبر) ڈیرہ غازی خان میں رحم کے کینسر سے بچاؤ کی 12 روزہ مہم 15 ستمبر سے 27 ستمبر تک جاری رہے گی۔ اس دوران 9 سے 14 سال کی تقریباً 13 ہزار بچیوں کو ایچ پی وی سے بچاؤ کی ویکسین مفت فراہم کی جائے گی۔ حکام کے مطابق مارکیٹ میں اس ویکسین کی قیمت آٹھ ہزار روپے تک ہے، مگر حکومت اسے بالکل مفت فراہم کر رہی ہے۔

ایڈیشنل ڈپٹی کمشنر ریونیو عثمان بخاری کی زیر صدارت اجلاس میں مہم کے انتظامات کا جائزہ لیا گیا، جس میں سی ای او ہیلتھ، عالمی ادارہ صحت اور دیگر محکموں کے نمائندے شریک ہوئے۔ اجلاس میں بتایا گیا کہ سرکاری و نجی تعلیمی اداروں میں ویکسی نیشن کی جائے گی، جبکہ غیر حاضر بچیوں کے لیے عارضی ویکسی نیشن سنٹرز بھی قائم ہوں گے۔

ایڈیشنل ڈپٹی کمشنر ریونیو نے کہا کہ سرویکل کینسر ایک خاموش مگر جان لیوا مرض ہے، اس کا واحد حل بروقت ویکسی نیشن ہے۔ انہوں نے والدین سے اپیل کی کہ وہ اپنی بچیوں کے محفوظ مستقبل کے لیے اس مہم میں محکمہ صحت کے ساتھ تعاون کریں۔

علی پور(باغی ٹی وی رپورٹ)وزیراعلیٰ پنجاب مریم نواز شریف کی ہدایت پر چیف سیکرٹری پنجاب زاہد اختر زمان نے تحصیل علی پور کے سیلاب متاثرہ علاقوں کا دورہ کیا۔ چیف سیکرٹری نے متاثرین کے مسائل سنے اور مکمل مدد فراہم کرنے کی یقین دہانی کراتے ہوئے کہا کہ مشکل کی اس گھڑی میں آپ کو تنہا نہیں چھوڑیں گے، آپ کے دکھوں کا مداوا کرنے کی ہر ممکن کوشش کریں گے۔ ان کا کہنا تھا کہ امداد اور بحالی کے کام میں وسائل کی کمی نہیں آنے دی جائے گی، انتظامیہ فلڈ ریلیف کیمپس میں سہولیات بڑھائے اور مزید کیمپس قائم کیے جائیں۔

چیف سیکرٹری کو سیلاب زدہ علاقوں میں جاری ریسکیو و ریلیف آپریشن پر بریفنگ دی گئی، بریفنگ میں بتایا گیا کہ ریلیف کیمپس میں متاثرین کے لیے خوراک، طبی سہولیات اور ضروری سامان فراہم کیا جا رہا ہے۔ چیف سیکرٹری نے ریلیف کیمپوں میں طبی سہولیات کا بھی جائزہ لیا اور ریسکیو 1122، پاک فوج اور ضلعی انتظامیہ کی کاوشوں کو سراہا۔ انہوں نے ہیڈ پنجند کا بھی دورہ کیا جہاں انہیں پانی کے بہاؤ اور اخراج کے حوالے سے بریفنگ دی گئی۔ حکام نے بتایا کہ نشیبی علاقوں سے آبادیوں کو محفوظ مقامات پر منتقل کرنے کا عمل جاری ہے۔

دوسری جانب مظفرگڑھ میں وزیراعلیٰ پنجاب کی خصوصی ہدایت پر پی ڈی ایم اے نے سیلاب متاثرین کے لیے ایک ہزار نئے ٹینٹ فراہم کر دیے۔ کمشنر ڈی جی خان اشفاق احمد چوہدری نے بتایا کہ متاثرہ خاندانوں کو فوری طور پر یہ ٹینٹ تقسیم کیے جا رہے ہیں تاکہ انہیں محفوظ رہائش دی جا سکے۔ انہوں نے کہا کہ بحالی تک حکومت چین سے نہیں بیٹھے گی اور متاثرین کے دکھ کو اپنا دکھ سمجھتی ہے۔

ڈیرہ غازی خان میں الیکٹرک بس سروس کا آغاز، وزیر اعلیٰ مریم نواز اگلے ہفتے افتتاح کریں گی،وزیر اعلیٰ کے حکم پر ٹرانسپورٹ اینڈ ماس ٹرانزٹ ڈیپارٹمنٹ کی جانب سے بسیں فراہم

ڈیرہ غازی خان (باغی ٹی وی رپورٹ) پنجاب ٹرانسپورٹ کمپنی نے ڈیرہ غازی خان اور گردونواح کے شہریوں کے لیے جدید الیکٹرک بس سروس شروع کرنے کا اعلان کیا ہے۔ اس منصوبے کا باقاعدہ افتتاح وزیر اعلیٰ پنجاب مریم نواز شریف اگلے ہفتے کریں گی۔ اس سلسلے میں انتظامات مکمل کیے جا رہے ہیں جبکہ ایم پی اے حنیف پتافی کے مطابق وزیر اعلیٰ کا ڈیرہ غازی خان کا دورہ گیارہ ستمبر کو متوقع ہے۔

تفصیلات کے مطابق نئی بس سروس چھ مختلف روٹس پر چلائی جائے گی، جن میں ڈیرہ غازی خان سے شاہ صدر دین، سخی سرور، چوٹی زیریں (ماموری و قائم والا کے راستے)، چوٹی زیریں (کوٹ چھٹہ کے راستے)، جنرل بس اسٹینڈ سٹی روٹ، اور جنرل بس اسٹینڈ بذریعہ انڈس ہائی وے شامل ہیں۔ ان روٹس کی لمبائی 20 سے 36 کلومیٹر کے درمیان ہوگی جبکہ ہر روٹ پر 6 سے 15 بس اسٹاپ قائم کیے گئے ہیں۔

کمپنی کے مطابق ابتدائی طور پر ہر روٹ پر 8 بسیں چلائی جائیں گی، تاہم چوٹی زیریں (معموری و قائم والا) روٹ پر بسوں کی تعداد 4 رکھی گئی ہے۔ مسافروں کی اوسط یومیہ تعداد 200 سے 600 کے درمیان متوقع ہے جبکہ سب سے زیادہ رش ڈیرہ غازی خان تا چوٹی زیریں (کوٹ چھٹہ روٹ) پر ریکارڈ ہونے کی توقع ہے۔ ایک بس کے بعد دوسری بس کے آنے کا وقفہ 38 سے 55 منٹ کے درمیان ہوگا۔

پنجاب ٹرانسپورٹ کمپنی کے حکام کا کہنا ہے کہ یہ سروس ماحولیاتی لحاظ سے ماحول دوست ہوگی کیونکہ یہ تمام بسیں الیکٹرک ہیں۔ یہ بسیں TRANSPORT & MASSTRANSIT DEPARTMENT کی جانب سے وزیر اعلیٰ پنجاب کے حکم پر ڈیرہ غازی خان کو فراہم کی گئی ہیں۔ تمام روٹس 25 فٹ سے زائد چوڑائی والی سڑکوں پر قائم ہیں جبکہ زیادہ تر راستے ڈوئل کیرج وے پر مشتمل ہیں۔

شہریوں نے اس منصوبے کو خوش آئند قرار دیتے ہوئے کہا کہ اگر یہ بس سروس بروقت شروع ہو جائے تو نہ صرف ہزاروں افراد کو روزانہ کی بنیاد پر معیاری اور سستی سفری سہولت میسر آئے گی بلکہ ڈیزل کے استعمال میں کمی اور فضائی آلودگی کے مسائل بھی کم ہوں گے۔ عوامی حلقوں نے امید ظاہر کی ہے کہ وزیر اعلیٰ پنجاب کے اعلان کے مطابق یہ منصوبہ عملی طور پر شروع ہو کر خطے میں سفری سہولتوں کا نیا باب ثابت ہوگا۔

ڈیرہ غازی خان (باغی ٹی وی، نیوز رپورٹرشاہد خان)تحصیل آفس ڈیرہ غازی خان میں سیرت النبی ﷺ کانفرنس کا انعقاد کیا گیا، جس میں ڈپٹی کمشنر محمد عثمان خالد نے مہمان خصوصی کے طور پر شرکت کی۔ تقریب میں ایڈیشنل ڈپٹی کمشنر ریونیو عثمان بخاری، اسسٹنٹ کمشنر صدر تیمور عثمان اور چیف آفیسر ضلع کونسل جواد الحسن گوندل بھی موجود تھے۔

کانفرنس میں علماء و مشائخ، ضلعی امن کمیٹی کے اراکین اور دیگر شعبہ ہائے زندگی سے تعلق رکھنے والے افراد نے بڑی تعداد میں شرکت کی۔

اپنے خطاب میں ڈپٹی کمشنر محمد عثمان خالد نے کہا کہ حضور نبی کریم ﷺ تمام جہانوں کے لیے رحمت بن کر تشریف لائے۔ انہوں نے زور دیا کہ آپ ﷺ کی تعلیمات امن، اخوت اور بھائی چارے کا درس دیتی ہیں۔

تقریب کے اختتام پر ملک و قوم کی سلامتی اور ترقی کے لیے خصوصی دعا کی گئی۔

ڈیرہ غازی خان (سٹی رپورٹر، جواد اکبر) غازی یونیورسٹی ڈیرہ غازی خان میں "جشن ولادت باسعادت مبارک” کے موقع پر نظامتِ امورِ طلباء اور شعبہ اسلامیات کے زیرِ اہتمام ایک پروقار محفلِ میلاد النبی ﷺ کا انعقاد کیا گیا۔ اس بابرکت تقریب میں وائس چانسلر پروفیسر ڈاکٹر اشفاق احمد نے خصوصی شرکت کی، جبکہ اساتذہ، طلباء اور طالبات کی بڑی تعداد بھی موجود تھی۔

محفل کا آغاز تلاوتِ کلامِ پاک سے ہوا، جس کے بعد آقائے دو جہاں ﷺ کی بارگاہ میں عقیدت کے پھول نچھاور کرتے ہوئے نعتیہ کلام پیش کیا گیا۔ سابقہ مقابلوں کے پوزیشن ہولڈرز نے اپنی بہترین کارکردگی کا دوبارہ مظاہرہ کیا۔ عزیر خالد نے روح پرور اذان پیش کی جبکہ حسنین ریاض نے ہدیہ نعت رسول مقبول ﷺ پیش کیا۔ حافظ حمزہ ابراہیم نے انگریزی زبان میں سیرت النبی ﷺ کے پہلوؤں کو مؤثر انداز میں بیان کیا۔

مہمان خصوصی مولانا فہد عزیز نے اپنی تقریر میں کہا کہ نبی اکرم ﷺ کی سیرت انسانیت کے لیے ایک کامل نمونہ ہے۔ آپ ﷺ نے امن، محبت اور اخوت کا درس دیا، اور آپ ﷺ کی حیات طیبہ عدل و انصاف اور رحم دلی سے بھرپور ہے۔ انہوں نے مزید کہا کہ دنیا و آخرت کی کامیابی کا راز آپ ﷺ کی تعلیمات پر عمل پیرا ہونے میں ہے۔

پروگرام کے اختتام پر وائس چانسلر پروفیسر ڈاکٹر اشفاق احمد نے اپنے خیالات کا اظہار کرتے ہوئے کہا کہ نبی کریم ﷺ کی تعلیمات آج کے دور میں ہماری انفرادی اور اجتماعی زندگیوں کے لیے بہترین رہنمائی کا ذریعہ ہیں۔ انہوں نے طلبہ کو نصیحت کرتے ہوئے کہا کہ وہ سیرتِ رسول ﷺ سے سبق حاصل کریں، علم کو اپنی ترجیح بنائیں، سچائی اور محنت کو اپنا شعار بنائیں اور خدمتِ انسانیت کو اپنی زندگی کا مقصد بنائیں۔ ان کا کہنا تھا کہ یہی کامیابی اور عزت کا اصل راستہ ہے۔ محفل میں پروفیسر ڈاکٹر محمد کامران، پروفیسر ڈاکٹر ارشد منیر اور دیگر اساتذہ بھی موجود تھے۔