Category: ڈیرہ غازی خان

ڈیرہ غازی خان (سٹی رپورٹرجواداکبر)ممکنہ سیلاب کے خدشے کے پیش نظر ضلعی انتظامیہ نے متاثرین کی امداد کے لیے غیر سرکاری تنظیموں (این جی اوز) سے تعاون طلب کر لیا ہے۔ اس حوالے سے ایڈیشنل ڈپٹی کمشنر جنرل قدسیہ ناز کی زیر صدارت اجلاس منعقد ہوا، جس میں مختلف این جی اوز اور متعلقہ اداروں کے افسران نے شرکت کی۔

اجلاس سے خطاب کرتے ہوئے قدسیہ ناز نے کہا کہ ڈیرہ غازی خان میں تین طرح کے سیلاب کا خطرہ موجود رہتا ہے: دریائے سندھ میں طغیانی، رود کوہیوں میں سیلابی ریلے اور شہری علاقوں میں اربن فلڈنگ۔ ان خدشات کے پیش نظر مربوط حکمتِ عملی اور مؤثر اقدامات ناگزیر ہیں۔

ایڈیشنل ڈپٹی کمشنر نے زور دیا کہ این جی اوز متاثرین کو راشن بیگز اور دیگر اشیائے ضروریہ ضلعی انتظامیہ کی مشاورت سے فراہم کریں تاکہ شفافیت برقرار رہے اور ہر مستحق تک امداد پہنچ سکے۔

ڈپٹی ڈائریکٹر سوشل ویلفیئر ذکاء الدین بزدار نے اجلاس کے دوران این جی اوز کا تعارف کرایا اور حکومتی پالیسیوں سے شرکاء کو آگاہ کیا۔ اجلاس میں موجود دیگر محکموں کے افسران نے بھی اپنی تیاریوں اور دستیاب وسائل پر بریفنگ دی۔

اجلاس کے اختتام پر فیصلہ کیا گیا کہ ضلعی انتظامیہ اور این جی اوز باہمی تعاون سے مشترکہ لائحہ عمل تیار کریں گے تاکہ ہنگامی صورتحال میں فوری ردعمل یقینی بنایا جا سکے۔

ڈیرہ غازی خان (سٹی رپورٹرجواد اکبر): ڈیرہ غازی خان کے علاقے بلاک 53 عباسیہ مسجد نظام آباد میں ناقص سیوریج سسٹم نے شہریوں کی زندگی مشکل بنا دی ہے۔ مقامی افراد کا کہنا ہے کہ جب سے علاقے میں ٹف ٹائلز بچھائی گئی ہیں، سیوریج کا گندا پانی مسلسل جمع ہو رہا ہے، جس سے گلیاں جوہڑ کا منظر پیش کر رہی ہیں اور پانی گھروں میں بھی داخل ہو رہا ہے۔

مکینوں کو روزانہ کی بنیاد پر شدید مشکلات کا سامنا ہے۔ خاص طور پر بزرگ، بچے اور خواتین اس صورتحال سے متاثر ہیں۔ نمازیوں کو بھی شدید اذیت سے دوچار ہونا پڑ رہا ہے کیونکہ مسجد جانے کے لیے انہیں اسی آلودہ اور ناپاک پانی سے گزرنا پڑتا ہے۔

شہریوں نے بتایا کہ کئی مرتبہ شکایت کرنے کے باوجود ابھی تک کوئی عملی کارروائی نہیں کی گئی ہے۔ انہوں نے کمشنر اور ڈپٹی کمشنر ڈیرہ غازی خان سے فوری نوٹس لینے اور اس سنگین مسئلے کا مستقل حل نکالنے کا مطالبہ کیا ہے۔

ڈیرہ غازی خان (سٹی رپورٹرجواداکبر)ضلع ڈیرہ غازی خان میں جشن عید میلادالنبی صلی اللہ علیہ وآلہ وسلم انتہائی شان و شوکت سے منانے کا فیصلہ کیا گیا ہے۔ اس سلسلے میں بجلی کی بلا تعطل فراہمی اور سرکاری و نجی عمارتوں پر جشنِ آزادی سے بڑھ کر چراغاں اور سجاوٹ کے احکامات جاری کر دیے گئے ہیں۔

اس حوالے سے ڈپٹی کمشنر محمد عثمان خالد کی زیر صدارت ضلعی امن کمیٹی اور اتحاد بین المسلمین کا ایک اہم اجلاس منعقد ہوا۔ اجلاس میں حضور اکرم ﷺ کے یومِ ولادت کے موقع پر کیے جانے والے انتظامات اور سکیورٹی امور کا تفصیلی جائزہ لیا گیا۔

اجلاس میں ڈسٹرکٹ پولیس آفیسر طارق ولایت، ضلعی افسران، صدر میلاد کمیٹی صاحبزادہ انور حسن قریشی، سید ندیم حیدر نقوی، مولانا اقبال رشید، حافظ احمد حسن ایڈووکیٹ سمیت تمام مکاتب فکر کے علماء، مذہبی و سماجی رہنماؤں اور امن کمیٹی کے اراکین نے شرکت کی۔

ڈپٹی کمشنر محمد عثمان خالد نے کہا کہ جشنِ عید میلادالنبی ﷺ کے موقع پر بھائی چارے، رواداری اور مذہبی ہم آہنگی کا عملی مظاہرہ کرنا ہم سب کی مشترکہ ذمہ داری ہے۔ انہوں نے متعلقہ محکموں کو ہدایت کی کہ جلوسوں کے راستوں کی صفائی، تجاوزات کا خاتمہ، روشنی اور سکیورٹی کے فول پروف انتظامات یقینی بنائیں۔

انہوں نے اس بات پر بھی زور دیا کہ بجلی کی بلا تعطل فراہمی کو یقینی بنایا جائے تاکہ میلاد النبی ﷺ کی تقریبات اور جلوسوں میں کوئی رکاوٹ نہ آئے۔ انہوں نے کہا کہ جشنِ میلاد النبی ﷺ کے پیغام کو عام کرنے کے لیے سرکاری اور نجی عمارتوں، بازاروں اور چوکوں کو جشنِ آزادی سے بھی زیادہ خوبصورتی سے سجایا جائے۔

تمام محکموں کو ہدایت دی گئی کہ وہ جلوسوں کے منتظمین کے ساتھ مسلسل رابطے میں رہیں اور سکیورٹی پلان پر سختی سے عمل کریں۔ اسسٹنٹ کمشنرز کو تحصیل سطح پر بھی اجلاس منعقد کرنے اور عوام کے ساتھ قریبی رابطے میں رہ کر انتظامات کو حتمی شکل دینے کی ہدایت دی گئی۔ اجلاس کے اختتام پر علماء اور شرکاء نے ضلعی انتظامیہ کی کوششوں کو سراہا اور مکمل تعاون کی یقین دہانی کروائی۔ ملک و قوم کی سلامتی اور ترقی کے لیے خصوصی دعا بھی کی گئی۔

ڈیرہ غازی خان (سٹی رپورٹرجواداکبر): پنجاب بار (مظفرگڑھ سیٹ) کے امیدوار ارشد حسین بھٹی ایڈوکیٹ کی حمایت میں ڈیرہ غازی خان کے وکلاء نے پرزور تائید کا اظہار کیا ہے۔ اس سلسلے میں شہر کے نامور سماجی و کاروباری رہنما ملک رشید احمد بھٹی ایڈوکیٹ نے ایک پروقار ظہرانے کا اہتمام کیا، جس میں ڈسٹرکٹ بار کے سینئر اور نامور وکلاء کی بڑی تعداد نے شرکت کی۔

تقریب میں شریک تمام وکلاء نے متفقہ طور پر ملک رشید احمد بھٹی کے اعلانِ حمایت کی تائید کی۔ اس موقع پر موجود وکلاء میں خالد اقبال بھٹی، میاں عامر محمود بھٹی، میاں بشیر حجبانی، ملک الطاف حسین، ملک منور ثاقب،شکیل الحسنین بھٹی، محمد شان لنگاہ، مظہر حسین بھٹی، عرفان سیال، جواد اکبر بھٹی، عبد القیوم خان، طارق عزیز، ملک کامران کوریہ، میر اعجاز رند، محمد حنیف خان اور سلمان خان سمیت دیگر معزز وکلاء شامل تھے۔

مقررین نے اپنے خطاب میں کہا کہ ارشد حسین بھٹی ایک باصلاحیت اور قابلِ اعتماد امیدوار ہیں، اور ان کی کامیابی سے وکلاء برادری اور بار کو بہت فائدہ ہوگا۔ انہوں نے امید ظاہر کی کہ ارشد حسین بھٹی اپنی صلاحیتوں کو وکلاء کے حقوق کے تحفظ اور بار کی فلاح و بہبود کے لیے استعمال کریں گے۔

ڈیرہ غازی خان (سٹی رپورٹرجواداکبر) پراونشل ایمرجنسی آپریشنز سینٹر (PEOC) کی کور ٹیم نے کوآرڈینیٹر رانا عدیل کی قیادت میں ڈیرہ غازی خان کا دورہ کیا، جس کا مقصد ضلع میں پولیو کے خاتمے، ماحولیاتی چیلنجز اور ویکسینیشن کی صورتحال کا جائزہ لینا تھا۔

ٹیم نے ڈپٹی کمشنر محمد عثمان خالد سے ملاقات کی اور حالیہ مثبت ماحولیاتی نمونوں، ضلعی سطح پر درپیش مسائل اور ان کے حل پر تفصیلی بات چیت کی۔ ڈپٹی کمشنر نے پولیو کے خاتمے کے لیے جاری کوششوں، ٹیموں کی نگرانی اور والدین میں شعور بیدار کرنے کے اقدامات سے آگاہ کیا۔

پی ای او سی ٹیم نے ضلعی انتظامیہ کی کارکردگی کو سراہا اور کہا کہ فیلڈ اسٹاف کی تربیت اور بہتر نگرانی کے ذریعے ڈیرہ غازی خان کو پولیو سے پاک بنانے کی کوششیں مزید کامیاب ہوں گی۔

آئندہ مہمات پر مشاورت
اجلاس میں ستمبر 2025 میں متوقع ایچ پی وی (HPV) ویکسینیشن مہم کی تیاریوں پر بھی لائحہ عمل تیار کیا گیا۔ اس موقع پر بچوں کو مہلک بیماریوں سے بچانے کے لیے ویکسینیشن کے عمل کو ہر سطح پر بہتر بنانے پر زور دیا گیا۔ اجلاس میں چیف ایگزیکٹو آفیسر ہیلتھ ڈاکٹر عتیق الرحمٰن اور عالمی ادارہ صحت سمیت دیگر متعلقہ اداروں کے نمائندوں نے بھی شرکت کی۔

ڈیرہ غازی خان (سٹی رپورٹر،جواد اکبر) ڈپٹی کمشنر عثمان خالد کی ہدایات پر اسسٹنٹ کمشنر تیمور عثمان نے دریائے سندھ کے نشیبی علاقوں کا دورہ کیا اور سیلاب کے ممکنہ اثرات سے نمٹنے کی تیاریوں کا جائزہ لیا۔

اسسٹنٹ کمشنر نے رند اڈا کے علاوہ فلڈ ریلیف کیمپس اور بنیادی مراکز صحت سرور والی اور سمینہ کا بھی دورہ کیا، جہاں سیلاب سے بچاؤ کے اقدامات کا بغور معائنہ کیا گیا۔ انہوں نے متعلقہ فیلڈ ٹیموں کو ہنگامی صورتحال کے لیے مکمل طور پر متحرک رہنے کی ہدایات جاری کیں۔

تیمور عثمان نے بتایا کہ نشیبی علاقوں میں موجود عوام کو محفوظ مقامات پر منتقل کیا جا رہا ہے تاکہ کسی بھی قسم کے نقصان سے بچا جا سکے۔ انہوں نے مزید کہا کہ وزیر اعلیٰ پنجاب کے حکم کے مطابق تمام محکمے، ضلعی انتظامیہ اور پی ڈی ایم اے سیلاب کی صورتحال سے نمٹنے کے لیے مکمل طور پر تیار ہیں۔