Category: ڈیرہ غازی خان

دراہمہ (باغی ٹی وی،خبرنگار) وزیر اعلیٰ پنجاب کا نعرہ "سڑکیں بحال، پنجاب خوشحال” کھوکھلا ثابت ہوا، گیدڑ والا تا دری میرو روڈ علاقہ مکینوں کے لیے عذاب بن گیا۔ جگہ جگہ گہرے گڑھوں کے باعث چند منٹ کا سفر گھنٹوں میں طے ہونے لگا، مریضوں، مزدوروں، طلبہ و ملازمین کو شدید مشکلات کا سامنا۔ قیمتی گاڑیوں کے انجن ناکارہ ہونے کا خدشہ، آئے روز حادثات معمول بن گئے۔

تفصیلات کے مطابق ڈیرہ غازیخان میں گیدڑوالا سے دری میرو تک یہ سڑک وسیم اکرم پلس کے دور میں تعمیر ہوئی، مگر ناقص مٹیریل کے باعث ان کی حکمرانی ختم ہوتے ہی ٹوٹ پھوٹ کا شکار ہوگئی۔ سڑک کی خستہ حالی اور ریسکیو سہولیات کے فقدان کے باعث مریضوں کو ہسپتال پہنچانا مشکل ہوگیا ہے، جب کہ سکول جانے والے بچے، ملازمین اور مزدور تاخیر سے اپنی منزل پر پہنچنے پر مجبور ہیں۔

علاقہ مکینوں نے وزیر اعلیٰ پنجاب سے مطالبہ کیا ہے کہ گیدڑ والا تا دری میرو روڈ کو ازسر نو کارپٹڈ کیا جائے تاکہ اس سڑک پر سفر کرنے والے شہری سکھ کا سانس لے سکیں۔

کوٹ چھٹہ،باغی ٹی وی(تحصیل رپورٹرمریدٹالپور) فاروق احمد خان تالپور کی قرآن خوانی بستی تالپور کی جامع مسجد انوار مدینہ میں منعقد کی گئی، جس میں علاقے کے معززین نے کثیر تعداد میں شرکت کی۔

محفل کا آغاز تلاوتِ کلامِ پاک سے کیا گیا، نعت رسول مقبول ﷺ بھی پیش کی گئی۔ محفل میں قاری عبدالرحمن صاحب نے موت کی حقیقت پر تفصیلی گفتگو کی جبکہ پروفیسر عطاءالمصطفی مدنی نے خصوصی بیان دیا۔

تقریب میں سیاسی و سماجی شخصیات، بشمول سردار انعام اللہ خان تالپور، سابق مشیر وزیراعلیٰ پنجاب میر مرزا خان تالپور کے بڑے صاحبزادے میر شاہجہان خان تالپور، میر یاسر عرفات، شاہد رشید خان چانڈیہ، اور دیگر اہم شخصیات نے شرکت کی۔

قرآن خوانی کے اختتام پر مرحوم کی مغفرت کے لیے اجتماعی دعا کی گئی اور ان کے بیٹوں کی دستار بندی کی رسم پروفیسر عطاءالمصطفی مدنی اور دیگر معززین نے انجام دی۔

اہلِ علاقہ نے مرحوم کی مغفرت کے لیے خصوصی دعائیں کیں اور ان کے اہل خانہ سے دلی ہمدردی کا اظہار کیا۔

ڈیرہ غازی خان (باغی ٹی وی، نیوز رپورٹر شاہد خان) وزیر اعلیٰ پنجاب مریم نواز شریف کی ہدایت پر ڈیرہ غازی خان میں تجاوزات کے خاتمے کے لیے بھرپور مہم شروع کر دی گئی ہے۔ تاجروں کو از خود تجاوزات ہٹانے کے لیے وارننگ دی گئی ہے، جبکہ شاہراہوں اور مرکزی بازاروں میں موجود پختہ تجاوزات کو مسمار کرنے کا فیصلہ کیا گیا ہے۔

ڈپٹی کمشنر محمد عثمان خالد کی زیر صدارت اجلاس میں ان اقدامات کا فیصلہ کیا گیا، جس میں ایڈیشنل ڈپٹی کمشنر قدسیہ ناز، اسسٹنٹ کمشنرز تیمور عثمان، جنید خان، اور انفورسمنٹ ٹیموں کے سربراہان نے شرکت کی۔

ڈپٹی کمشنر نے کہا کہ وزیر اعلیٰ مریم نواز شریف اور چیف سیکرٹری زاہد اختر زمان تجاوزات کے خاتمے کے آپریشن کی خود نگرانی کر رہے ہیں۔ انہوں نے ہدایت دی کہ تجاوزات کے خاتمے سے قبل شاہراہوں اور بازاروں کا سروے کیا جائے اور قبل و بعد کی تصاویر شیئر کی جائیں۔

ضبط شدہ سامان تاجروں کو جرمانے اور آئندہ تجاوزات نہ کرنے کی یقین دہانی کے بعد واپس کیا جائے گا۔ انہوں نے مزید کہا کہ آپریشن بلا امتیاز اور مستقل بنیادوں پر جاری رہے گا۔ تجاوزات کے خلاف آپریشن کے لیے ضروری مشینری فراہم کی جائے گی، اور وہ خود اس مہم کی نگرانی کریں گے۔

اسسٹنٹ کمشنرز کو ہدایت دی گئی کہ وہ انجمن تاجران کے ساتھ رابطے میں رہیں اور تاجروں کو رضاکارانہ طور پر تجاوزات ہٹانے کے لیے آمادہ کریں۔ شہری حلقوں نے ان اقدامات کو سراہا ہے اور امید ظاہر کی ہے کہ یہ مہم ڈیرہ غازی خان میں ٹریفک کے مسائل حل کرنے میں معاون ثابت ہوگی۔

لاہور (باغی ٹی وی انویسٹی گیشن سیل)ڈیرہ غازی خان، ٹیچنگ ہسپتال ،کرپشن کیس تحقیقات کی فائلیں چمک کی وجہ سے گم ہوگئیں

تفصیلات کے مطابق ڈیرہ غازی خان میں قومی احتساب بیورو (نیب) ملتان کی جانب سے ٹیچنگ ہسپتال میں بدعنوانی اور مالی بے ضابطگیوں کے الزامات پر کی گئی تحقیقات ایک بار پھر متعلقہ حکام کی غفلت اور کرپٹ مافیا کی چالاکیوں کی بھینٹ چڑھ گئی۔22 فروری 2024 کو نیب ملتان نے ایک لیٹرنمبر No NABM20211101256069) چیف سیکرٹری پنجاب کو ارسال کیا، جس میں ٹیچنگ ہسپتال و میڈیکل کالج ڈی جی خان میں الیکٹرو میڈیکل آلات کی خریداری کے دوران ہونے والی بے ضابطگیوں کی تفصیلات فراہم کی گئیں۔ نیب نے اپنی رپورٹ مزید کارروائی کے لیے محکمہ صحت پنجاب کو بھیج دی۔

نیب کی تحقیقات کے مطابق لیٹر آف کریڈٹ (ایل سی)کی میچورٹی کے وقت ایکسچینج ریٹ کی تبدیلی کے باعث وینڈرز کو 30 کروڑ روپے زائد ادائیگی کی گئی۔ فرنیچر کی خریداری میں جی ایس ٹی کی کٹوتی نہیں کی گئی، حالانکہ یہ ٹیکس لازمی تھا۔ خریدے گئے آلات کی اصل ماخذ کی تصدیق بھی نہیں کی گئی، جس سے شفافیت پر سوالیہ نشان اٹھتا ہے۔

نیب ملتان کی سفارشات پر پنجاب حکومت کے اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ نے 12 مارچ 2024 کو ایک تحقیقاتی کمیٹی تشکیل دی۔ یہ کمیٹی محکمے کے سینئر افسران پر مشتمل تھی اور اسے سات دن کے اندر اپنی سفارشات پیش کرنے کی ہدایت دی گئی تھی۔
حیران کن طور پر سات دن میں مکمل ہونے والی تحقیقات آج تک منظرِ عام پر نہ آسکیں۔

اطلاعات کے مطابق کرپٹ عناصر نے تحقیقات کو دبانے کی کوشش کی اور متعلقہ فائلیں ہی غائب کر دی گئیں۔ اس عمل نے نہ صرف انصاف کی فراہمی میں رکاوٹ ڈالی بلکہ حکومتی نظام کی شفافیت پر بھی سوال کھڑے کیے۔

عوامی اور سماجی حلقے اس معاملے میں حکومت سے فوری ایکشن لینے کا مطالبہ کر رہے ہیں۔ ان کا کہنا ہے کہ نیب کی کاوشوں کو نظرانداز کرنا عوام کے اعتماد کو ٹھیس پہنچانے کے مترادف ہے۔حکومت اور متعلقہ اداروں کو فوری طور پر اس معاملے کی شفاف تحقیقات کر کے ذمہ داروں کے خلاف کارروائی کرنی چاہیے تاکہ عوام کا اعتماد بحال ہو اور مستقبل میں ایسے واقعات کی روک تھام ممکن ہو۔

ڈیرہ غازی خان (سٹی رپورٹر جواد اکبر)وزیر اعلیٰ پنجاب مریم نواز کی آمد،ہر طرف ناکہ بندی ،عوام کو مشکلات کا سامنا،انتظامیہ ناکا،

وزیر اعلیٰ پنجاب مریم نواز شریف کی شہر آمد کے موقع پر انتظامات کے دوران عوام کو شدید مشکلات کا سامنا کرنا پڑا۔ پاکستان چوک اور دیگر اہم مقامات پر گاڑیوں کی لمبی قطاریں لگ گئیں، جس کی وجہ سے شہریوں کی آمدورفت متاثر ہوئی۔ خاص طور پر بلوچستان جانے والے افراد اور کاروباری لوگ پریشانی کا شکار ہوئے، جب کہ مریض بھی گاڑیوں میں روکے گئے۔

یہ صورتحال اس بات کی عکاسی کرتی ہے کہ وزیر اعلیٰ کی آمد کے دوران عوامی سہولت کے لئے مکمل انتظامات نہ کیے گئے، جس کی وجہ سے شہریوں کو شدید مشکلات کا سامنا کرنا پڑا۔ عوام کا کہنا ہے کہ حکومت کے اعلیٰ عہدیداران کی آمد کے دوران ان کے وعدے پورے نہیں ہوتے اور اس طرح کی ناکہ بندیوں کی وجہ سے ان کی روزمرہ زندگی متاثر ہوتی ہے۔

ڈیرہ غازی خان(باغی ٹی وی رپورٹ) وزیراعلیٰ پنجاب مریم نواز نے کہا ہے کہ ہم 9 مئی والے نہیں، بلکہ 28 مئی والے ہیں، ہم پاکستان کے عزت کے رکھوالے ہیں۔

ڈیرہ غازی خان میں اسکالر شپ پروگرام کی تقریب سے خطاب کرتے ہوئے انہوں نے کہا کہ آج اسکالر شپس کی تقسیم کا آخری دن ہے، بہت جلد لیپ ٹاپس اور ای بائیکس لے کر طلبہ کے پاس آؤں گی تاکہ وہ بہتر سفری سہولیات کے ساتھ تعلیم حاصل کرسکیں۔

انہوں نے کہا کہ مخالفین نے ہمیشہ جھوٹ کا سہارا لیا، مگر عوام کے دلوں میں ہمارے لیے جو محبت ہے، اسے کوئی مٹانہیں سکتا۔ مریم نواز نے یقین دہانی کرائی کہ ہر اسکالر شپ میرٹ پر دی گئی ہے اور کسی قسم کی سفارش پر کوئی اسکالر شپ نہیں دیا گیا۔

انہوں نے طلبہ کو ملک کا مستقبل قرار دیتے ہوئے کہا کہ اگلے چند سالوں میں یہی نوجوان پاکستان کا جھنڈا تھامیں گے اور ملک کی ترقی میں کردار ادا کریں گے۔ وزیراعلیٰ نے مزید کہا کہ اس سال 30 ہزار اسکالر شپس دی جا رہی ہیں، جنہیں اگلے سال 50 ہزار تک بڑھا دیا جائے گا، اور خیبرپختونخوا اور بلوچستان کے طلبہ کے لیے بھی منصوبے زیر غور ہیں۔

تحریک انصاف پر تنقید کرتے ہوئے انہوں نے کہا کہ جنہوں نے بچوں کے ہاتھوں میں لیپ ٹاپ دینے کے بجائے جھوٹ اور پروپیگنڈا کو فروغ دیا، وہ آج نوجوانوں کے مستقبل کے دشمن بنے ہوئے ہیں۔ مریم نواز نے کہا کہ پاکستان ہماری ریڈ لائن ہے، اور ہماری فورسز ہماری حفاظت کے لیے اپنی جانوں کا نذرانہ پیش کرتی ہیں۔

انہوں نے کہا کہ نواز شریف نے ملک میں موٹرویز کا جال بچھا کر عوام کو سہولت فراہم کی، مگر مخالفین صرف تخریب کاری میں مصروف رہے۔ جیلوں میں موجود بچوں کے والدین سے بات کرتے ہوئے انہوں نے کہا کہ نوجوانوں کو کسی کے بہکاوے میں نہیں آنا چاہیے، کیوں کہ ورغلانے والے تو سکون سے بیٹھے ہیں اور نقصان عام لوگوں کا ہو رہا ہے۔

آخر میں انہوں نے کہا کہ ہم 9 مئی والے نہیں، 28 مئی والے ہیں۔ ہم تدریس اور ترقی کی زبان بولتے ہیں اور علم کے علمبردار ہیں، ڈنڈا بردار نہیں۔