Category: ڈیرہ غازی خان

ڈیرہ غازیخان،باغی ٹی وی(سٹی رپورٹرجواداکبر)ملک بھر میں سرد موسم کا راج ہے اور آنے والے دنوں میں سردی کی شدت میں مزید اضافے کی توقع ہے۔ محکمہ موسمیات کے مطابق آج منگل کو ملک کے بیشتر علاقوں میں موسم سرد اور خشک رہے گا جبکہ پہاڑی علاقوں میں رات اور صبح کے اوقات میں شدید سردی پڑنے کا امکان ہے۔

اسلام آباد، خیبر پختونخوا اور بالائی پنجاب کے میدانی علاقوں میں صبح کے اوقات میں کُہرا پڑنے کی پیش گوئی کی گئی ہے۔ جبکہ جنوبی پنجاب اور بالائی سندھ میں بعض مقامات پر صبح اور رات کے اوقات میں ہلکی دُھند چھائے رہنے کی توقع ہے۔

دوسری جانب محکمہ موسمیات نے رواں موسم سرما میں معمول سے کم بارشیں ہونے کی پیش گوئی کی ہے۔ چیف میٹرولوجسٹ سردار سرفراز نے نجی ٹی وی سے گفتگو کرتے ہوئے بتایا کہ ملک میں رواں موسم سرما کے دوران مجموعی طور پر معمول سے کم بارشیں ہوں گی۔ انہوں نے کہا کہ بلوچستان میں ماہ دسمبر کے دوران خشک سردی رہے گی اور صوبے میں رواں ماہ بارش کا کوئی امکان نہیں ہے۔

سردار سرفراز کا کہنا تھا کہ جنوری کے اوائل میں بارش کا سسٹم بنے گا جس سے صوبے کے شمالی علاقوں میں بارش اور برف ہوسکتی ہے تاہم جنوری میں بھی معمول سے کم بارشوں ہوں گی۔

محکمہ موسمیات نے شہریوں کو سرد موسم کے دوران احتیاطی تدابیر اختیار کرنے کی ہدایت کی ہے۔

کوٹ مبارک،باغی ٹی وی (نامہ نگارامداد اللہ تھہیم)کوہِ سلیمان سے روزانہ کروڑوں کمانے والی ڈی جی سیمنٹ فیکٹری اپنی سڑک کی پختہ بحالی میں ناکام رہی ہے۔ 25 کلومیٹر طویل سڑک جو ڈی جی سیمنٹ فیکٹری سے انڈس ہائی وے تک جاتی ہے، شدید خستہ حالی کا شکار ہے اور گزشتہ 23 سالوں سے مرمت اور بحالی کی منتظر ہے۔ سڑک کی خستہ حالت کی وجہ سے گہرے گڑھے اور ٹوٹ پھوٹ روزمرہ حادثات کا باعث بن رہے ہیں۔

فیکٹری سے لے کر کوٹ مبارک تک سڑک کے مختلف حصوں پر مرمت کی بجائے صرف ریت اور بجری ڈال کر مسئلہ عارضی طور پر حل کیا گیا، جبکہ ریلوے سٹیشن سے انڈس ہائی وے تک کام روک دیا گیا۔ روزانہ ہزاروں ٹن مال کی نقل و حمل کے باوجود سڑک پر آنے والی گاڑیاں اور فیکٹری کی مشینری مسلسل گرد و غبار اور ماحولیاتی آلودگی کا باعث بن رہی ہیں، جس سے مقامی شہریوں کی صحت بری طرح متاثر ہو رہی ہے۔

ڈی جی سیمنٹ فیکٹری سے حاصل ہونے والی بھاری آمدنی کے باوجود نہ سڑک کی پختہ تعمیر کی گئی ہے نہ ہی مقامی آبادی کو صحت، تعلیم یا صاف پانی جیسی بنیادی سہولیات فراہم کی گئیں۔ علاقے میں فضائی آلودگی، زہریلے دھوئیں، اور غیرمعیاری فضلے کو جلانے کی وجہ سے سانس اور کینسر جیسی موذی امراض کے کیسز میں اضافہ ہو رہا ہے۔

مقامی شہریوں نے مطالبہ کیا ہے کہ ڈی جی سیمنٹ فیکٹری فوری طور پر سڑک کی مکمل بحالی کے ساتھ ساتھ مقامی آبادی کے لیے بنیادی سہولیات فراہم کرے۔ بصورت دیگر فیکٹری انتظامیہ کے خلاف احتجاج کی دھمکی دی گئی ہے۔

کوٹ مبارک،باغی ٹی وی(نامہ نگار امداداللہ تھہیم)ڈی جی کینال جو جنوبی پنجاب کی ایک بڑی نہر ہے اور لاکھوں ایکڑ زرعی زمین کو سیراب کرتی ہے، کئی سالوں سے مکمل بھل صفائی سے محروم ہے، جس کی وجہ سے یہ نہر جنگلات کا منظر پیش کر رہی ہے۔ صفائی نہ ہونے کی وجہ سے نہر کی چوڑائی اور گہرائی متاثر ہو رہی ہے، جس سے پانی کے بہاؤ کی گنجائش کم ہو چکی ہے اور نہر مختلف مقامات پر ٹوٹ پھوٹ کا شکار ہے۔

ڈی جی کینال کے کناروں پر بارشوں کی وجہ سے مغربی پٹڑی سے مٹی اور ریت مسلسل نہر میں گرتی رہتی ہے، جس سے نہر کے بہاؤ کا رخ تبدیل ہو کر مشرقی پٹڑی اور سڑکوں کو نقصان پہنچا رہا ہے۔ محکمہ آبپاشی نے کئی جگہوں پر عارضی مرمت کرتے ہوئے پتھر ڈال کر کٹاؤ کو روکنے کی کوشش کی ہے، لیکن یہ اقدامات ناکافی ثابت ہوئے ہیں، اور نہر کے ساتھ ساتھ سڑکیں بھی متاثر ہو رہی ہیں۔

یہ نہر جو اصل میں دس ہزار کیوسک پانی کے بہاؤ کے لیے بنائی گئی تھی، اب بمشکل چھ ہزار کیوسک پانی فراہم کر پا رہی ہے۔ صفائی کی عدم موجودگی اور گہرائی و چوڑائی کم ہونے کی وجہ سے اضافی پانی کے بہاؤ پر نہر اکثر ٹوٹ جاتی ہے۔ کسانوں کو پانی کی کمی کی وجہ سے اپنی فصلوں کا نقصان برداشت کرنا پڑتا ہے، خاص طور پر ضلع راجن پور کے کسان ہر سال پانی کی ناکافی فراہمی پر احتجاج کرتے ہیں۔

محکمہ آبپاشی نے بارہا سروے کیے، لیکن ان کی کارروائیاں صرف کاغذی کارروائیوں تک محدود رہیں۔ مرمت کے نام پر معمولی خانہ پری کی جاتی ہے، اور بھل صفائی کو مسلسل نظرانداز کیا جا رہا ہے۔ نتیجتاً، نہر کا وجود خطرے میں پڑ چکا ہے، اور اس کی کارکردگی شدید متاثر ہو رہی ہے۔

کسانوں کا مطالبہ ہے کہ نہر کی مکمل بھل صفائی کی جائے تاکہ پانی کی مکمل فراہمی ممکن ہو سکے اور زرعی زمین کو نقصان سے بچایا جا سکے۔ اگر فوری اقدامات نہ کیے گئے تو جنوبی پنجاب کے لاکھوں کسانوں کی معیشت مزید متاثر ہو سکتی ہے، اور یہ نہر اپنے وجود کو مکمل طور پر کھو سکتی ہے۔

ڈیرہ غازیخان،باغی ٹی وی (سٹی رپورٹرجواداکبر) انٹرنیشنل انٹی کرپشن ڈے پر ریلی اور سیمینار

ڈیرہ غازیخان میں عالمی یوم انسداد رشوت ستانی کے موقع پر ضلعی انتظامیہ نے سیمینارز اور ریلیوں کا اہتمام کیا۔ کمانڈنٹ اسد چانڈیہ نے قیادت کی، جبکہ ڈویژنل اور ضلعی افسران، چیمبر آف کامرس کے عہدیدار، تاجر برادری، اساتذہ، طلباء، اور مختلف شعبہ زندگی سے تعلق رکھنے والے افراد نے بھرپور شرکت کی۔

ڈپٹی کمشنر آفس سے کچہری چوک تک نکالی جانے والی مرکزی ریلی کی قیادت پولیٹیکل اسسٹنٹ کوہ سلیمان محمد اسد چانڈیہ نے کی۔ ریلی میں شریک افراد نے کرپشن کے خلاف مختلف نعرے درج پینا فلیکس اور بینرز اٹھا رکھے تھے۔

اس موقع پر خطاب کرتے ہوئے اسد چانڈیہ نے کہا کہ کرپشن ملک کی ترقی کی راہ میں سب سے بڑی رکاوٹ ہے۔ انہوں نے کہا کہ کرپشن کے خاتمے کے لیے تمام افراد کو مل کر کام کرنا ہوگا تاکہ انصاف اور میرٹ کو یقینی بنایا جا سکے۔

مقررین نے کرپشن کے خاتمے کے عزم کا اعادہ کرتے ہوئے ملک کی خوشحالی اور استحکام کے لیے خصوصی دعائیں بھی کیں۔

ڈیرہ غازی خان (باغی ٹی وی رپورٹ) اتوار کے روز چلنے والی تیز اور سرد ہوا کی وجہ سے سردی کی شدت میں غیر معمولی اضافہ ہوگیا ہے۔ دن بھر سرد اور تیز ہوا کے ساتھ گرد و غبار نے شہر میں ماحول کو مزید سرد اور خشک کر دیا۔ اس اچانک تبدیلی نے خاص طور پر غریب عوام اور دیہاڑی دار مزدوروں کی زندگی کو مشکل بنا دیا ہے جو سردی کے اس موسم میں گرم کپڑے خریدنے کی استطاعت نہیں رکھتے۔

لنڈے بازار میں گرم کپڑوں کی قیمتوں میں بے تحاشا اضافہ ہوگیا ہے۔ جو غریب عوام پہلے ان کپڑوں کو مناسب قیمت پر خرید سکتے تھے، اب وہ بھی بلند قیمتوں کی وجہ سے انہیں خریدنے سے قاصر ہیں۔ لنڈا بازار کے تاجروں کا کہنا ہے کہ ٹیکسوں کی بھرمار اور کرایوں میں اضافہ کی وجہ سے قیمتیں بڑھ گئی ہیں۔ ان کا مطالبہ ہے کہ حکومت لنڈے کے سامان اور کپڑوں پر ٹیکس ختم کرے تاکہ مہنگائی پر قابو پایا جا سکے اور غریب عوام کی قوت خرید میں اضافہ ہو۔

اس کے علاوہ سردی کی شدت میں اضافے کے ساتھ ہی صحت کے مسائل بھی بڑھ گئے ہیں اور بیماریوں کا پھیلاؤ شروع ہوگیا ہے۔ شہریوں کا کہنا ہے کہ حکومت کو اس مسئلے کا فوری نوٹس لینا چاہیے اور غریب عوام کے لئے سستی اور معیاری گرم پوشاک فراہم کرنے کے لیے اقدامات کرنا چاہیے تاکہ وہ اس شدید سرد موسم میں اپنی صحت اور حفاظت کا خیال رکھ سکیں۔

یہ صورتحال غریب طبقے کے لیے سنگین ہے جو پہلے ہی مشکلات کا شکار ہیں۔ ان کی زندگی کے لیے سرد موسم میں کام کرنا اور اضافی اخراجات برداشت کرنا مشکل ہو چکا ہے۔ شہریوں اور سماجی حلقوں نے حکومت سے درخواست کی ہے کہ وہ اس معاملے میں ہمدردانہ غور کرے جس سے غریب اور دیہاڑی دار طبقے کی مشکلات میں کمی واقع ہوسکے.

ڈیرہ غازی خان(باغی ٹی وی ،سٹی رپورٹرجواداکبر)بلوچ لیوی کےحوالدار اللّٰہ بخش قیصرانی کی ریٹائرمنٹ پر پروقار الوداعی تقریب

تفصیل کے مطابق ڈیرہ غازی خان میں بلوچ لیوی فورس کے حوالدار اللّٰہ بخش قیصرانی بلوچ کی ریٹائرمنٹ کے موقع پر ایک پروقار الوداعی تقریب منعقد کی گئی۔ یہ تقریب بلوچ لیوی لائن صدر میں ہوئی، جہاں ضلع کے تین اعلیٰ افسران نے شرکت کی۔ ان میں سینئر کمانڈنٹ بلوچ لیوی فورس اور ڈپٹی کمشنر ڈیرہ غازی خان محمد عثمان خالد، کمانڈنٹ بلوچ لیوی فورس محمد اسد چانڈیہ اور ایڈیشنل ڈپٹی کمشنر ریونیو نعمان فاروق شامل تھے۔ انچارج صوبیدار میجر بلوچ لیوی ملک محمد سلیم خان اور دیگر اہلکار بھی تقریب کا حصہ بنے۔

تقریب میں حوالدار اللّٰہ بخش قیصرانی بلوچ کی خدمات کو سراہا گیا۔ افسران نے ان کی محنت اور دیانت کو خراج تحسین پیش کرتے ہوئے ان کی پیشہ ورانہ زندگی میں نمایاں کردار پر تعریف کی۔ اہلکاروں اور افسران نے ان کے ساتھ اپنی یادوں کا تذکرہ کیا، جس سے تقریب جذباتی لمحات میں تبدیل ہو گئی۔

اختتام پر تمام شرکاء نے دعا کی، جس میں حوالدار اللّٰہ بخش کے لیے نیک خواہشات اور کامیابی کی دعائیں کی گئیں۔ یہ تقریب نہ صرف حوالدار اللہ بخش کے لیے یادگار رہی بلکہ بلوچ لیوی فورس کے دیگر اہلکاروں کے لیے بھی ایک مثال بنی۔