Category: ڈیرہ غازی خان

ڈیرہ غازیخان،باغی ٹی وی (سٹی رپورٹرجواد اکبر)انسدادِ پولیو مہم,8 لاکھ سے زائد بچوں کو حفاظتی قطرے پلائے جائیں گے

تفصیل کے مطابق ڈیرہ غازیخان میں انسدادِ پولیو مہم 16تا20دسمبر تک جاری رہیگی جس میں ضلع بھر کے پانچ سال سے کم عمر
8لاکھ سے زائد بچوں کو پولیو سے بچاؤ کےحفاظتی قطرے پلائے جائیں گے۔

ڈپٹی کمشنر محمد عثمان خالد کی زیرصدارت انسداد پولیو مہم کے انتظامات بارے جائزہ اجلاس کمیٹی روم میں منعقد ہوا۔ڈپٹی کمشنر محمد عثمان خالد نے خطاب کرتے ہوئے کہا کہ وزیراعلی پنجاب مریم نواز کےاحکامات کےتحت پولیو کا خاتمہ یقینی بنایا جائے،پچھلی مہمات کی کمی و کوتاہیوں کو دہرایا نہ جائے،قوم کے نونہالوں کو حفاظتی قطرے پلانا ہماری ذمہ داری ہے،مائیکرو پلان پر عمل کیاجائے،مہم میں پولیو ورکرز اور ویکسینیٹروں کو ہر شہریوں کے گھروں تک جانا ہوگا،کوئی بچہ مس نہیں ہونا چاہیے۔

ڈپٹی کمشنر نے کہا میں خود فیلڈ میں مہم کی مانیٹرنگ کرونگا،دلجمعی سے کام کیا جائے،روزانہ کا ٹارگٹ روزانہ ہی حاصل کیا جائے،کسی بھی ایشو کو فوری ہمارے نوٹس میں لایا جائے،ہر کوئی انسداد پولیو مہم کو سنجیدہ لے،تھریٹ بیسڈ یونین کونسلوں میں خصوصی اقدامات کو یقینی بنایا جائے گا۔

اجلاس میں سی ای او ہیلتھ ڈاکٹر ادریس لغاری نے پولیو مہم کے انتظامات بارے بریفنگ دی۔ایڈیشنل ڈپٹی کمشنر قدسیہ ناز،ڈاکٹر اطہر سکھانی،ڈاکٹر
علی ہاشم،ہما مہدی لغاری،محمد زبیر،قاری جمال عبدالناصر،ڈاکٹر علی شیر،عمر فاروقی،راشد اقبال،ڈاکٹر تحسین احمد سمیت ڈبلیو ایچ او،یونیسیف کے نمائندے بھی اجلاس میں موجود تھے۔

ڈیرہ غازی خان(باغی ٹی وی رپورٹ) گلف ممالک سے آنے والوں کی وجہ سے ایڈز کا پھیلاؤ! کیسز میں خطرناک اضافہ

ڈیرہ غازی خان میں گلف کنٹریز سے واپس آنے والوں کے سبب ایڈز کے کیسز میں تشویشناک اضافہ ہو گیا ہے۔ غیر محفوظ جنسی تعلقات اور آگاہی کی کمی کی وجہ سے ایچ آئی وی کا پھیلاؤ بڑھ رہا ہے، جس سے علاقے میں صحت کے بحران کا سامنا ہے۔

ڈیرہ غازی خان ڈویژن میں ایچ آئی وی (ایڈز) کے کیسز میں حیران کن اضافہ دیکھنے کو مل رہا ہے۔ حالیہ اعداد و شمار کے مطابق ڈیرہ غازیخان میں علامہ اقبال ٹیچنگ ہسپتال میں رجسٹرڈ مریضوں کی تعداد 4760 تک پہنچ چکی ہے، جبکہ ڈاکٹروں کا کہنا ہے کہ بہت سے مریض سماجی بدنامی کی وجہ سے ایچ آئی وی کے علاج کے مراکز سے دور رہتے ہیں، جس کی بنا پر متاثرہ افراد کی اصل تعداد 10,000سے بھی تجاوز کرسکتی ہے۔

ڈیرہ غازی خان کے علاقے میں ایچ آئی وی کے پھیلاؤ کی بڑی وجہ غیر محفوظ جنسی تعلقات اور آگاہی کی کمی ہے۔ حکام کا کہنا ہے کہ 70 فیصد کیسز غیر محفوظ جنسی تعلقات اور غیر اہل طبی عملے اورحجاموں کی وجہ سے پھیل رہےہیں جو دیہی علاقوں میں زیادہ عام ہے۔ ان سرگرمیوں کے نتیجے میں ایچ آئی وی کا پھیلاؤ ایک سنگین مسئلہ بن چکا ہے۔

ایک اور اہم وجہ گلف کنٹریز سے واپس آنے والے افراد ہیں جن کی اکثریت غیر محفوظ جنسی تعلقات کی شکار ہوتی ہے، جس کے نتیجے میں ایڈز جیسی موذی بیماری پھیلتی ہے۔ جب یہ افراد اپنے علاقوں میں واپس آتے ہیں تو ایڈز ان خواتین میں منتقل ہو جاتا ہے جنہوں نے ان سے جنسی تعلقات قائم کیے ہوتے ہیں۔ اس صورتحال نے علاقے میں ایڈز کے پھیلاؤ کو مزید بڑھا دیا ہے جو ایک سنگین خطرے کی علامت ہے۔

حکومت سے یہ مطالبہ کیا جا رہا ہے کہ وہ ایڈز کی روک تھام کے لئے فوری اور مؤثر اقدامات کرے۔ ایڈز کی سکریننگ کے لئے ائرپورٹس پر کاؤنٹرز قائم کیے جائیں تاکہ گلف کنٹریز سے آنے والے افراد کا ایچ آئی وی کا فوری طور پر پتہ چل سکے اور انہیں علاج کی سہولت فراہم کی جا سکے۔ مزید یہ کہ ایڈز کی آگاہی مہموں کو فروغ دیا جائے تاکہ عوام کو اس مرض سے بچاؤ کے طریقوں کے بارے میں آگاہ کیا جا سکے۔

ٹیچنگ ہسپتال میں ہر ماہ تقریباََ 30 نئے کیسز رجسٹر ہورہے ہیں۔ہسپتال میں رجسٹرڈ مریضوں میں 3500 سے زائد مرد، 600 خواتین، بچے اور ٹرانسجینڈر افراد شامل ہیں۔ کوٹ مبارک سب سے زیادہ متاثرہ علاقہ ہے جہاں 200 سے زائد ایڈز کے مریض رجسٹرڈ ہیں اوراسی علاقہ میں ایڈز کے باعث 20 اموات ہو چکی ہیں۔ دیگر متاثرہ علاقوں میں کوٹ چھٹہ، چوٹی، سخی سرور، جھوک اُترا اور تونسہ شامل ہیں۔

سماجی و مذہبی شخصیات کا کہنا ہے کہ حالات کی سنگینی کے پیش نظر ایچ آئی وی کے پھیلاؤ کو روکنے کے لئے فوری طور پر اقدامات کی ضرورت ہے۔ ایچ آئی وی کے کیسز میں اضافے کو روکنے کے لئے حکومت کو مزید موثر اقدامات اٹھانے ہوں گے جن میں ایڈز سکریننگ، آگاہی مہموں کا آغاز اور دیہی علاقوں میں صحت کی سہولتوں کی فراہمی شامل ہیں۔

ڈیرہ غازی خان،باغی ٹی وی (نیوز رپورٹرشاہدخان) پروڈیوسر محمد سجاد کھوکھر عمرہ کی سعادت کے لیے روانہ

معروف پروڈیوسر اور آرٹسٹ محمد سجاد کھوکھر گزشتہ روز عمرہ کی سعادت حاصل کرنے کے لیے سعودی عرب روانہ ہوگئے۔ روانگی سے قبل اپنے پیغام میں انہوں نے دعا کی کہ اللہ تعالیٰ تمام مسلمانوں کو حج اور عمرہ کی سعادت عطا فرمائے اور پاکستان کو ترقی و خوشحالی سے نوازے۔

محمد سجاد کھوکھر ڈیرہ غازی خان کی تاریخ اور شوبز سے وابستہ افراد کی زندگیوں کے بارے میں گہرے علم کے حامل ہیں۔ وہ ایک اسٹیج ڈرامہ اور فلم بطور مصنف لکھ چکے ہیں جو جلد منظر عام پر آئیں گے۔

محمد سجاد کھوکھر نے مزید کہا کہ وہ اپنی فلم اور اسٹیج ڈرامے کی ہدایت کاری خود کریں گے اور کسی دوسرے ڈائریکٹر کو اس کا اختیار نہیں دیں گے۔ ان کا کہنا تھا کہ کئی دوست اسکرپٹ لینے آئے لیکن انہوں نے انکار کر دیا۔

ڈیرہ غازی خان،باغی ٹی وی (سٹی رپورٹر جواد اکبر) محکمہ پبلک ہیلتھ انجینئرنگ کے تحت 2021-2022 کے واٹر فلٹریشن پلانٹس کے منصوبے بدعنوانی کی بھینٹ چڑھ گئے۔ گدائی غربی کھوہ بیگے والا کی سینکڑوں گھروں پر مشتمل آبادی 45 لاکھ روپے مالیت کے فلٹریشن پلانٹ کے باوجود کڑوا پانی پینے پر مجبور ہے۔

علاقہ مکینوں نے میڈیا ٹیم کو بتایا کہ فلٹریشن پلانٹ پر نصب سولر پلیٹیں محکمہ پبلک ہیلتھ کے افسران اپنے گھروں میں منتقل کر چکے ہیں۔ یہ منصوبہ صرف دو سے تین ماہ تک چل سکا، جسے تحریک انصاف کے دور میں ایم پی اے احمد علی دریشک کے خصوصی فنڈز سے مکمل کیا گیا تھا۔

اہل علاقہ نے ایم پی اے سردار محمود قادر خان لغاری سے مطالبہ کیا ہے کہ علاقے کی بڑی آبادی کو صاف پانی کی فراہمی یقینی بنانے کے لیے فوری اقدامات کیے جائیں۔ شہریوں نے وزیراعلیٰ پنجاب مریم نواز، چیف سیکرٹری پنجاب، اور دیگر اعلیٰ حکام سے فلٹریشن پلانٹ کی بحالی کا مطالبہ کیا ہے۔

مقامی افراد نے ڈائریکٹر جنرل اینٹی کرپشن پنجاب سہیل ظفر چٹھہ اور ڈیرہ غازی خان ریجنل ڈائریکٹر ضیاء الحق سے اپیل کی کہ فلٹریشن پلانٹ کی اسکیموں میں ہونے والی کرپشن کا حساب لیا جائے، ٹھیکیداروں اور افسران سے لوٹی گئی رقم واپس لے کر منصوبے بحال کیے جائیں اور سولر پلیٹیں دوبارہ نصب کروا کر عوام کو ریلیف فراہم کیا جائے۔

ڈیرہ غازیخان،باغی ٹی وی(سٹی رپورٹرجواداکبر)ملک بھر میں سرد موسم کا راج ہے اور آنے والے دنوں میں سردی کی شدت میں مزید اضافے کی توقع ہے۔ محکمہ موسمیات کے مطابق آج منگل کو ملک کے بیشتر علاقوں میں موسم سرد اور خشک رہے گا جبکہ پہاڑی علاقوں میں رات اور صبح کے اوقات میں شدید سردی پڑنے کا امکان ہے۔

اسلام آباد، خیبر پختونخوا اور بالائی پنجاب کے میدانی علاقوں میں صبح کے اوقات میں کُہرا پڑنے کی پیش گوئی کی گئی ہے۔ جبکہ جنوبی پنجاب اور بالائی سندھ میں بعض مقامات پر صبح اور رات کے اوقات میں ہلکی دُھند چھائے رہنے کی توقع ہے۔

دوسری جانب محکمہ موسمیات نے رواں موسم سرما میں معمول سے کم بارشیں ہونے کی پیش گوئی کی ہے۔ چیف میٹرولوجسٹ سردار سرفراز نے نجی ٹی وی سے گفتگو کرتے ہوئے بتایا کہ ملک میں رواں موسم سرما کے دوران مجموعی طور پر معمول سے کم بارشیں ہوں گی۔ انہوں نے کہا کہ بلوچستان میں ماہ دسمبر کے دوران خشک سردی رہے گی اور صوبے میں رواں ماہ بارش کا کوئی امکان نہیں ہے۔

سردار سرفراز کا کہنا تھا کہ جنوری کے اوائل میں بارش کا سسٹم بنے گا جس سے صوبے کے شمالی علاقوں میں بارش اور برف ہوسکتی ہے تاہم جنوری میں بھی معمول سے کم بارشوں ہوں گی۔

محکمہ موسمیات نے شہریوں کو سرد موسم کے دوران احتیاطی تدابیر اختیار کرنے کی ہدایت کی ہے۔

کوٹ مبارک،باغی ٹی وی (نامہ نگارامداد اللہ تھہیم)کوہِ سلیمان سے روزانہ کروڑوں کمانے والی ڈی جی سیمنٹ فیکٹری اپنی سڑک کی پختہ بحالی میں ناکام رہی ہے۔ 25 کلومیٹر طویل سڑک جو ڈی جی سیمنٹ فیکٹری سے انڈس ہائی وے تک جاتی ہے، شدید خستہ حالی کا شکار ہے اور گزشتہ 23 سالوں سے مرمت اور بحالی کی منتظر ہے۔ سڑک کی خستہ حالت کی وجہ سے گہرے گڑھے اور ٹوٹ پھوٹ روزمرہ حادثات کا باعث بن رہے ہیں۔

فیکٹری سے لے کر کوٹ مبارک تک سڑک کے مختلف حصوں پر مرمت کی بجائے صرف ریت اور بجری ڈال کر مسئلہ عارضی طور پر حل کیا گیا، جبکہ ریلوے سٹیشن سے انڈس ہائی وے تک کام روک دیا گیا۔ روزانہ ہزاروں ٹن مال کی نقل و حمل کے باوجود سڑک پر آنے والی گاڑیاں اور فیکٹری کی مشینری مسلسل گرد و غبار اور ماحولیاتی آلودگی کا باعث بن رہی ہیں، جس سے مقامی شہریوں کی صحت بری طرح متاثر ہو رہی ہے۔

ڈی جی سیمنٹ فیکٹری سے حاصل ہونے والی بھاری آمدنی کے باوجود نہ سڑک کی پختہ تعمیر کی گئی ہے نہ ہی مقامی آبادی کو صحت، تعلیم یا صاف پانی جیسی بنیادی سہولیات فراہم کی گئیں۔ علاقے میں فضائی آلودگی، زہریلے دھوئیں، اور غیرمعیاری فضلے کو جلانے کی وجہ سے سانس اور کینسر جیسی موذی امراض کے کیسز میں اضافہ ہو رہا ہے۔

مقامی شہریوں نے مطالبہ کیا ہے کہ ڈی جی سیمنٹ فیکٹری فوری طور پر سڑک کی مکمل بحالی کے ساتھ ساتھ مقامی آبادی کے لیے بنیادی سہولیات فراہم کرے۔ بصورت دیگر فیکٹری انتظامیہ کے خلاف احتجاج کی دھمکی دی گئی ہے۔

کوٹ مبارک،باغی ٹی وی(نامہ نگار امداداللہ تھہیم)ڈی جی کینال جو جنوبی پنجاب کی ایک بڑی نہر ہے اور لاکھوں ایکڑ زرعی زمین کو سیراب کرتی ہے، کئی سالوں سے مکمل بھل صفائی سے محروم ہے، جس کی وجہ سے یہ نہر جنگلات کا منظر پیش کر رہی ہے۔ صفائی نہ ہونے کی وجہ سے نہر کی چوڑائی اور گہرائی متاثر ہو رہی ہے، جس سے پانی کے بہاؤ کی گنجائش کم ہو چکی ہے اور نہر مختلف مقامات پر ٹوٹ پھوٹ کا شکار ہے۔

ڈی جی کینال کے کناروں پر بارشوں کی وجہ سے مغربی پٹڑی سے مٹی اور ریت مسلسل نہر میں گرتی رہتی ہے، جس سے نہر کے بہاؤ کا رخ تبدیل ہو کر مشرقی پٹڑی اور سڑکوں کو نقصان پہنچا رہا ہے۔ محکمہ آبپاشی نے کئی جگہوں پر عارضی مرمت کرتے ہوئے پتھر ڈال کر کٹاؤ کو روکنے کی کوشش کی ہے، لیکن یہ اقدامات ناکافی ثابت ہوئے ہیں، اور نہر کے ساتھ ساتھ سڑکیں بھی متاثر ہو رہی ہیں۔

یہ نہر جو اصل میں دس ہزار کیوسک پانی کے بہاؤ کے لیے بنائی گئی تھی، اب بمشکل چھ ہزار کیوسک پانی فراہم کر پا رہی ہے۔ صفائی کی عدم موجودگی اور گہرائی و چوڑائی کم ہونے کی وجہ سے اضافی پانی کے بہاؤ پر نہر اکثر ٹوٹ جاتی ہے۔ کسانوں کو پانی کی کمی کی وجہ سے اپنی فصلوں کا نقصان برداشت کرنا پڑتا ہے، خاص طور پر ضلع راجن پور کے کسان ہر سال پانی کی ناکافی فراہمی پر احتجاج کرتے ہیں۔

محکمہ آبپاشی نے بارہا سروے کیے، لیکن ان کی کارروائیاں صرف کاغذی کارروائیوں تک محدود رہیں۔ مرمت کے نام پر معمولی خانہ پری کی جاتی ہے، اور بھل صفائی کو مسلسل نظرانداز کیا جا رہا ہے۔ نتیجتاً، نہر کا وجود خطرے میں پڑ چکا ہے، اور اس کی کارکردگی شدید متاثر ہو رہی ہے۔

کسانوں کا مطالبہ ہے کہ نہر کی مکمل بھل صفائی کی جائے تاکہ پانی کی مکمل فراہمی ممکن ہو سکے اور زرعی زمین کو نقصان سے بچایا جا سکے۔ اگر فوری اقدامات نہ کیے گئے تو جنوبی پنجاب کے لاکھوں کسانوں کی معیشت مزید متاثر ہو سکتی ہے، اور یہ نہر اپنے وجود کو مکمل طور پر کھو سکتی ہے۔

ڈیرہ غازیخان،باغی ٹی وی (سٹی رپورٹرجواداکبر) انٹرنیشنل انٹی کرپشن ڈے پر ریلی اور سیمینار

ڈیرہ غازیخان میں عالمی یوم انسداد رشوت ستانی کے موقع پر ضلعی انتظامیہ نے سیمینارز اور ریلیوں کا اہتمام کیا۔ کمانڈنٹ اسد چانڈیہ نے قیادت کی، جبکہ ڈویژنل اور ضلعی افسران، چیمبر آف کامرس کے عہدیدار، تاجر برادری، اساتذہ، طلباء، اور مختلف شعبہ زندگی سے تعلق رکھنے والے افراد نے بھرپور شرکت کی۔

ڈپٹی کمشنر آفس سے کچہری چوک تک نکالی جانے والی مرکزی ریلی کی قیادت پولیٹیکل اسسٹنٹ کوہ سلیمان محمد اسد چانڈیہ نے کی۔ ریلی میں شریک افراد نے کرپشن کے خلاف مختلف نعرے درج پینا فلیکس اور بینرز اٹھا رکھے تھے۔

اس موقع پر خطاب کرتے ہوئے اسد چانڈیہ نے کہا کہ کرپشن ملک کی ترقی کی راہ میں سب سے بڑی رکاوٹ ہے۔ انہوں نے کہا کہ کرپشن کے خاتمے کے لیے تمام افراد کو مل کر کام کرنا ہوگا تاکہ انصاف اور میرٹ کو یقینی بنایا جا سکے۔

مقررین نے کرپشن کے خاتمے کے عزم کا اعادہ کرتے ہوئے ملک کی خوشحالی اور استحکام کے لیے خصوصی دعائیں بھی کیں۔