Category: ڈیرہ غازی خان

کوٹ چھٹہ،باغی ٹی وی (تحصیل رپورٹرمریدٹالپور)چوٹی زیریں میں منشیات فروش اور ناجائز اسلحہ رکھنے والے 3 ملزمان گرفتار

چوٹی زیریں پولیس کی جانب سے جرائم پیشہ عناصر کے خلاف کارروائیاں جاری ہیں۔ دوران گشت مخبر کی اطلاع پر ایس ایچ او ملک حمید اللہ کھلنگ نے کارروائی کرتے ہوئے تین ملزمان کو گرفتار کر لیا۔ ایک ملزم کو 110 لیٹر شراب سمیت گرفتار کیا گیا جبکہ دو افراد کو غیر قانونی اسلحہ رکھنے پر حراست میں لیا گیا۔

ملزمان کے خلاف مقدمات درج کر لیے گئے ہیں اور انہیں مزید قانونی کارروائی کے لیے متعلقہ حکام کے حوالے کر دیا گیا ہے۔ ایس ایچ او ملک حمید اللہ کھلنگ نے اس عزم کا اظہار کیا کہ منشیات فروشوں اور جرائم پیشہ افراد کے خلاف کریک ڈاؤن جاری رکھا جائے گا۔

علاقے کے مکینوں نے پولیس کی کارروائی کو سراہتے ہوئے امید ظاہر کی ہے کہ اس طرح کی کارروائیاں امن و امان کے قیام میں مددگار ثابت ہوں گی۔ پولیس نے عوام سے اپیل کی ہے کہ وہ جرائم کے خاتمے کے لیے تعاون کریں اور کسی بھی مشتبہ سرگرمی کی اطلاع فوری طور پر فراہم کریں۔

ڈیرہ غازی خان (باغی ٹی وی، سٹی رپورٹر جوا اکبر)رکشہ اور شہزور کا تصادم، 2 افراد زخمی، ایک جاں بحق

تفصیل کے مطابق ڈیرہ غازی خان (باغی ٹی وی، سٹی رپورٹر جوا اکبر): ملتان روڈ پر مصطفیٰ چوک کے قریب رکشہ اور شہزور کے درمیان تصادم ہوگیا جس میں تین افراد زخمی ہو گئے، جن میں سے ایک شخص کی موقع پر ہی موت واقع ہوگئی۔ یہ حادثہ رکشہ کے غلط ٹرن لینے کے باعث پیش آیا۔

ریسکیو 1122 کو ایمرجنسی کال موصول ہوئی جس میں بتایا گیا کہ رکشہ اور شہزور آپس میں ٹکرا گئے ہیں اور تین افراد زخمی ہیں۔ فوراً ریسکیو کی دو ایمبولنسز موقع پر روانہ کر دی گئیں اور پولیس کو بھی اطلاع دی گئی۔ حادثہ رکشہ کے غلط ٹرن لینے کی وجہ سے پیش آیا جس کے باعث دونوں گاڑیاں آپس میں ٹکرا گئیں۔

جب ریسکیو کا عملہ موقع پر پہنچا تو انہوں نے دو زخمی افراد کو فوری طور پر طبی امداد فراہم کی اور انہیں علامہ اقبال ٹیچنگ ہسپتال منتقل کر دیا۔ ایک شخص ابو بکر جو 20 سال کا تھا موقع پر ہی دم توڑ چکا تھا۔ اس کی لاش بھی ہسپتال منتقل کی گئی۔

زخمی افراد کی شناخت آصف ولد صادق (32 سال) سکنہ بستی پنوار، ڈیرہ غازی خان اور یوسف ولد غلام عباس (32 سال) سکنہ نورنگ شاہ ڈیرہ غازی خان کے طور پر ہوئی۔ جاں بحق ہونے والا شخص ابو بکر ولد عاشق تھا جو کہ مہتر کالونی کا رہائشی تھا۔

کوٹ چھٹہ(باغی ٹی وی،تحصیل رپورٹرمریدٹالپور)کوٹ کے نواحی علاقے جھوک اترا میں 14 سالہ لڑکے سے زیادتی کا واقعہ پیش آیا ہے۔ متاثرہ لڑکے کی والدہ نے پولیس میں مقدمہ درج کرایا ہے۔

تفصیلات کے مطابق متاثرہ لڑکا محمد فیضان جو اڈا ہزارہ پر درزی کے کام سے وابستہ ہے نے اپنی والدہ تاج بی بی کے ساتھ تھانے میں تحریری درخواست جمع کرائی۔

متاثرہ کی والدہ کے مطابق مورخہ 2 دسمبر 2024 کو محمد اسلم ولد پیر بخش اور مزمل ولد اعجاز حسین نے محمد فیضان کو بہانے سے اپنی دکان کے عقب میں لے جا کر زیادتی کی۔ محمد اسلم نے مبینہ طور پر پہلے بدفعلی کی جبکہ مزمل اس دوران ویڈیو بناتا رہا۔ بعد ازاں مزمل نے بھی زیادتی کی۔ ملزمان نے متاثرہ کو دھمکایا کہ اگر کسی کو اس واقعے کے بارے میں بتایا تو سنگین نتائج بھگتنا ہوں گے۔

تھانہ جھوک اتر ا پولیس نے متاثرہ کی شکایت پر کارروائی کرتے ہوئے مقدمہ درج کر لیا ہے۔ متاثرہ کو میڈیکل معائنے کے لیے کوٹ چھٹہ کے تحصیل ہیڈکوارٹر اسپتال بھیجا گیا۔ مقدمہ تعزیرات پاکستان کی دفعات 292 اور 375 اےکے تحت درج کیا گیا ہے اور معاملے کی تفتیش شروع کر دی گئی ہے۔

پولیس کا کہنا ہے کہ واقعے کی مکمل چھان بین کی جا رہی ہے اور ملزمان کو جلد قانون کے کٹہرے میں لایا جائے گا۔

ڈیرہ غازی خان (نامہ نگار) ڈیرہ غازی خان میونسپل کارپوریشن کی مبینہ نااہلی کے خلاف عدالتی حکم کی خلاف ورزی پر توہین عدالت کی درخواست دائر کر دی گئی ہے۔ سول جج یعقوب علیانی نے درخواست سماعت کے لیے منظور کرتے ہوئے فریقین کو نوٹس جاری کر دیے ہیں۔

صدر پریس کلب ڈیرہ غازی خان شیر افگن بزدار کی جانب سے دائر درخواست میں مؤقف اپنایا گیا کہ میٹروپولیٹن کارپوریشن نے عدالتی حکم کے باوجود پریس کلب کو ڈی سیل نہیں کیا بلکہ اس پر تین شفٹوں میں پولیس کا پہرہ لگا دیا گیا ہے جو عدالت کے حکم کی واضح توہین ہے۔ درخواست میں عدالت سے استدعا کی گئی ہے کہ عدالتی بیلف کے ذریعے پریس کلب کو فوری طور پر ڈی سیل کیا جائے۔

صدر پریس کلب اور صدر انجمن صحافیان غلام مصطفی لاشاری نے اس معاملے پر گہری تشویش کا اظہار کرتے ہوئے کہا کہ پریس کلب صحافیوں کا مرکز اور مظلوم طبقے کی آواز ہے۔ پریس کلب کی بندش سے نہ صرف صحافتی سرگرمیاں متاثر ہو رہی ہیں بلکہ ڈیرہ غازی خان کی انتظامیہ کی ہٹ دھرمی سے ملک بھر میں ایک منفی تاثر بھی پیدا ہو رہا ہے۔

انہوں نے میونسپل کارپوریشن اور انتظامیہ سے اپیل کی کہ وہ عدالتی حکم پر عمل کرتے ہوئے پریس کلب کو فوری طور پر کھولنے کے اقدامات کریں تاکہ صحافی اپنی ذمہ داریاں بہتر طریقے سے ادا کر سکیں۔

ڈیرہ غازی خان (باغی ٹی وی، سٹی رپورٹر جواد اکبر) پولیس نے خواتین پر مشتمل ایک بین الصوبائی چوری اور فراڈ کرنے والے گینگ کی تین اہم رکن خواتین کو گرفتار کر لیا ہے۔ یہ خواتین بازار، ہسپتال، اور اڈوں پر رکشہ میں سفر کرنے والی خواتین کو نشانہ بناتی تھیں اور ان کے سامان، نقدی، اور زیورات چرا لیتی تھیں۔

کل شام چار بجے کے قریب تھانہ گدائی کی چوکی لاری اڈا پولیس نے شہریوں کی مدد سے پل پیارے والی کے قریب کارروائی کرتے ہوئے ان خواتین کو گرفتار کیا۔ یہ کارروائی 21 نومبر کو ہونے والے ایک واقعے کے بعد کی گئی، جس میں ان خواتین نے پل ڈاٹ سے کالج کے درمیان سفر کے دوران ایک رکشہ میں سوار خواتین کے پرس سے 70 ہزار روپے نقدی، دو موبائل فونز، اور سونے کی بالیاں چرائی تھیں۔

پولیس نے رکشہ ڈرائیوروں کی نشاندہی پر ان خواتین کو حراست میں لیا اور مزید تفتیش کے لیے انہیں تھانہ سول لائن کے حوالے کر دیا گیا ہے۔ پولیس کے مطابق یہ خواتین ایک منظم گینگ کا حصہ ہیں، جو مختلف شہروں میں اسی نوعیت کے جرائم میں ملوث رہی ہیں۔

شہریوں نے پولیس کی اس کارروائی کو سراہتے ہوئے امید ظاہر کی ہے کہ ان گرفتاریوں کے بعد خواتین کے ساتھ ہونے والے چوری اور فراڈ کے واقعات میں کمی آئے گی۔ پولیس نے عوام سے اپیل کی ہے کہ وہ مشکوک سرگرمیوں کی فوری اطلاع دیں تاکہ ایسے جرائم کا سدباب کیا جا سکے۔

ڈیرہ غازیخان (باغی ٹی وی ،سٹی رپورٹر جواد اکبر)پنجاب پولیس نے خوارجی دہشت گردوں کا حملہ ناکام بنا دیا، بھاری نقصان کے بعد دہشت گرد فرار

ڈیرہ غازی خان میں سرحدی چوکی لکھانی پر 25 سے 30 خوارجی دہشت گردوں نے حملہ کیا جسے پولیس نے ناکام بناتے ہوئے دہشت گردوں کو فرار ہونے پر مجبور کردیا۔

پولیس ترجمان کے مطابق ڈیرہ غازی خان کے تھانہ وہوا کی سرحدی چوکی لکھانی پر خوارجی دہشت گردوں نے رات گئے اچانک حملہ کردیا۔

25 سے 30 خوارجی دہشت گرد چیک پوسٹ پر چاروں طرف سے حملہ آور ہوئے اور راکٹ، دستی بموں سمیت بھاری اسلحے کا استعمال کیا۔

پولیس نے تھرمل امیج کیمروں کی مدد سے خوارجی دہشت گردوں کی نشاندہی کی۔ پولیس، ایلیٹ فورس، رینجرز اور سی ٹی ڈی اہلکاروں نے مل کر خوارجی دہشت گردوں کا مقابلہ کیا۔

پولیس کے جانبازوں نے مشین اور مارٹر گنز سے فائرنگ کرکے فوری جوابی کارروائی کی۔ پولیس کی بھرپور جوابی کارروائی نے خوارجی دہشت گردوں کو فرار پر مجبور کر دیا۔

ترجمان پنجاب پولیس کے مطابق موثر جوابی کارروائی کے نتیجے میں دہشت گرد بھاری جانی نقصان اٹھا کر فرار ہوگئے۔

انہوں نے کہا کہ خیبرپختونخوا بارڈر پر تمام چیک پوسٹس پہلے سے ہائی الرٹ تھیں، جس کے باعث یہ حملہ ناکام بنایا گیا۔

وفاقی وزیر داخلہ محسن نقوی اور آئی جی پنجاب ڈاکٹر عثمان انور نے دہشت گردوں کا حملہ پسپا کرنے پر ڈیرہ غازی خان پولیس کو شاباش دی۔