Category: ڈیرہ غازی خان

ڈیرہ غازی خان (باغی ٹی وی، نیوز رپورٹر شاہد خان)ڈپٹی کمشنر ڈیرہ غازی خان محمد عثمان خالد کی ہدایت پر اسسٹنٹ کمشنر صدر تیمور عثمان نے شہر کے مختلف تعلیمی اداروں اور پارکس کا تفصیلی دورہ کیا۔ اس دوران انہوں نے گورنمنٹ ایم سی بوائز پرائمری سکول اور گورنمنٹ پرائمری سکول چورہٹہ نمبر 2 میں تدریسی معیار، اساتذہ و طلبہ کی حاضری، صفائی ستھرائی اور بنیادی سہولیات کا جائزہ لیا۔

اسسٹنٹ کمشنر نے سکولوں کی دیواروں کی مرمت، ترقیاتی کاموں اور کمزور انتظامی پہلوؤں کی نشاندہی کرتے ہوئے محکمہ تعلیم کو فوری اقدامات کی ہدایت جاری کی۔ انہوں نے کہا کہ تعلیم حکومتِ پنجاب کی اولین ترجیحات میں شامل ہے اور ضلعی انتظامیہ بچوں کو محفوظ، معیاری اور بہتر تعلیمی ماحول فراہم کرنے کے لیے ہر ممکن اقدامات کر رہی ہے۔

بعد ازاں اسسٹنٹ کمشنر تیمور عثمان نے غازی پارک اور کھوسہ پارک کا بھی دورہ کیا، جہاں انہوں نے صفائی کی صورتحال، روشنیوں، واک ویز، شجرکاری اور عوامی سہولیات کا معائنہ کیا۔ انہوں نے متعلقہ محکموں کو بنچز، لائٹس اور گرین ایریاز کی بحالی کے لیے فوری اقدامات کی ہدایت دی۔

تیمور عثمان نے کہا کہ عوامی تفریحی مقامات کی خوبصورتی اور سہولیات میں بہتری ضلعی انتظامیہ کی ترجیحات میں شامل ہے۔ انہوں نے شہریوں سے اپیل کی کہ وہ پارکوں کی صفائی اور دیکھ بھال میں انتظامیہ کا بھرپور ساتھ دیں تاکہ شہر کو صاف، سرسبز اور خوبصورت بنایا جا سکے۔

ڈیرہ غازی خان(باغی ٹی وی رپورٹ)الیکشن کمیشن آف پاکستان نے قومی اسمبلی کے حلقہ این اے-185 ڈیرہ غازی خان دوم میں ضمنی انتخاب کے شیڈول کا اعلان کر دیا ہے۔ نوٹیفکیشن کے مطابق یہ اعلان پشاور ہائی کورٹ کے 11 ستمبر 2025 کے حکم کے تحت جاری کیا گیا، جس کے بعد حلقے میں انتخابی عمل دوبارہ شروع کر دیا گیا ہے۔

الیکشن کمیشن کے جاری کردہ نوٹیفکیشن نمبر F.8(7)/2025-Coord-Vol-I(3) کے مطابق امیدواروں کے لیے کاغذاتِ نامزدگی جمع کرانے کی تاریخیں 9 سے 11 اکتوبر 2025 مقرر کی گئی ہیں، جب کہ نامزد امیدواروں کی فہرست 13 اکتوبر 2025 کو شائع کی جائے گی۔

کاغذاتِ نامزدگی کی جانچ پڑتال (Scrutiny) کی آخری تاریخ 20 اکتوبر 2025 مقرر کی گئی ہے، جبکہ ریٹرننگ آفیسر کے فیصلوں کے خلاف اپیلیں دائر کرنے کی آخری تاریخ 24 اکتوبر 2025 ہو گی۔ اپیلٹ ٹربیونل کی جانب سے ان اپیلوں پر فیصلے 31 اکتوبر 2025 تک سنائے جائیں گے۔

ریٹرننگ آفیسر کی جانب سے امیدواروں کی نظرِ ثانی شدہ فہرست یکم نومبر 2025 کو جاری کی جائے گی، اور امیدواروں کے لیے اپنی نامزدگی واپس لینے کی آخری تاریخ 3 نومبر 2025 مقرر کی گئی ہے۔ اس کے ساتھ ہی اس روز امیدواروں کی حتمی فہرست بھی شائع کی جائے گی۔

انتخابی نشانات کی الاٹمنٹ 4 نومبر 2025 کو کی جائے گی، جبکہ ضمنی انتخاب کے لیے پولنگ ڈے 23 نومبر 2025 مقرر کیا گیا ہے۔

یاد رہے کہ یہ نشست پاکستان تحریکِ انصاف (پی ٹی آئی) کی رکنِ قومی اسمبلی زرتاج گل کی نااہلی کے باعث خالی ہوئی تھی۔ زرتاج گل پر مئی 2023 کے احتجاجی واقعات کے حوالے سے چلنے والے مقدمات میں سزا سنائے جانے کے بعد الیکشن کمیشن نے انہیں آئین کی متعلقہ شق کے تحت نااہل قرار دیا تھا۔

زرتاج گل نے اس فیصلے کو عدالت میں چیلنج کیا تھا اور اسی درخواست پر پشاور ہائی کورٹ نے عارضی طور پر الیکشن کمیشن کو ضمنی انتخاب کرانے سے روک دیا تھا۔ اب پشاور ہائی کورٹ کے احکامات اور قانونی تقاضوں کو مدِ نظر رکھتے ہوئے الیکشن کمیشن نے نوٹیفکیشن جاری کر کے انتخابی شیڈول جاری کردیا ہے

ڈیرہ غازی خان (باغی ٹی وی رپورٹ)کارڈیالوجی انسٹیٹیوٹ میں بے ضابطگیاں، گارڈ کی ECG ویڈیو وائرل، وزیراعلیٰ پنجاب سے نوٹس کا مطالبہ،
غیر تربیت یافتہ عملہ، جعلی بھرتیاں، مالی کرپشن اور مریضوں سے بدسلوکی کے انکشافات —مبینہ طور پر معاملہ دبانے کیلئے ایم ایس نے انکوائری کمیٹی قائم کر دی

ڈیرہ غازی خان میں سردار فتح محمد خان بزدار انسٹی ٹیوٹ آف کارڈیالوجی سنگین بے ضابطگیوں، کرپشن اور غیر تربیت یافتہ عملے کی وجہ سے ایک بڑے اسکینڈل کی زد میں آ گیا ہے۔
ذرائع کے مطابق ہسپتال میں سینئر اور مستند کارڈیالوجسٹ تعینات نہیں، بلکہ صرف نئے میڈیکل آفیسرز اور ہاؤس جاب ڈاکٹرز ہی دل کے مریضوں کا علاج کر رہے ہیں۔ دل کے حساس علاج میں غیر تجربہ کار عملے کی تعیناتی انسانی جانوں سے کھیلنے کے مترادف قرار دی جا رہی ہے۔

رپورٹ کے مطابق جنرل الیکشن 2024 سے چند ماہ قبل، اکتوبر 2023 میں، حکومتی پابندی کے باوجود 96 کے بجائے 123 افراد کو سفارش اور مبینہ مالی لین دین کے ذریعے بھرتی کیا گیا۔ ذرائع کے مطابق ان بھرتیوں میں فی سکیل دو لاکھ روپے تک وصول کیے گئے۔

ہسپتال میں صفائی ستھرائی کے ناقص انتظامات، ڈاکٹرز اور سٹاف کے غیر ذمہ دارانہ رویے نے صورتحال کو مزید سنگین بنا دیا ہے۔ بائی پاس کے مریضوں کو چار سے پانچ ماہ بعد کی تاریخیں دی جا رہی ہیں، جبکہ کئی مریض آپریشن کے لیے ملتان اور لاہور جانے پر مجبور ہیں۔

سوشل میڈیا پر وائرل ہونے والی ایک ویڈیو نے پورے شہر میں ہلچل مچا دی، جس میں ہسپتال کا سیکیورٹی گارڈ مریض کی ECG کرتا نظر آ رہا ہے۔
اسی طرح صفائی پر مامور خاکروب اور وارڈ بوائے بھی بلڈ پریشر چیک کرنے پر مامور پائے گئے۔ شہریوں نے اسے مریضوں کی زندگیوں سے کھلواڑ قرار دیتے ہوئے شدید احتجاج کیا ہے۔

عوامی، سماجی اور شہری حلقوں نے وزیراعلیٰ پنجاب مریم نواز شریف سے مطالبہ کیا ہے کہ وائرل ویڈیو، غیر قانونی بھرتیوں اور مبینہ کرپشن کے معاملات کی اعلیٰ سطح پر انکوائری کرائی جائے اور ذمہ داران کو قرار واقعی سزا دی جائے۔

ایم ایس انسٹی ٹیوٹ ڈاکٹر محمد رمضان سومرا کے مطابق وائرل ویڈیو کا نوٹس لے لیا گیا ہے اور ایک تین رکنی انکوائری کمیٹی تشکیل دے دی گئی ہے جو معاملے کی تحقیقات کر رہی ہے۔ رپورٹ آنے کے بعد متعلقہ افراد کے خلاف کارروائی عمل میں لائی جائے گی۔

ڈیرہ غازی خان (باغی ٹی وی، سٹی رپورٹر جواد اکبر بھٹی)کمشنر ڈیرہ غازی خان ڈویژن اشفاق احمد چوہدری نے گورنمنٹ گرلز ہائی سکول ملا قائد شاہ جدید کا دورہ کیا اور سکول کی نئی تعمیر شدہ عمارت کا باقاعدہ افتتاح کیا۔ اس موقع پر انہوں نے اساتذہ اور طالبات سے ملاقات کی اور تعلیمی ماحول کو بہتر بنانے کے عزم کا اظہار کیا۔

افتتاحی تقریب میں سی ای او ایجوکیشن محمود الحسن شیخ، ڈائریکٹر ڈویلپمنٹ وسیم خان جتوئی، ڈپٹی ڈائریکٹر امیر مسلم، ڈپٹی ڈسٹرکٹ ایجوکیشن آفیسر وجاہت خان مستوئی، پرنسپل اسماء بتول، اساتذہ، طالبات اور مقامی معززین کی بڑی تعداد نے شرکت کی۔

کمشنر اشفاق احمد چوہدری نے تقریب سے خطاب کرتے ہوئے کہا کہ وزیراعلیٰ پنجاب مریم نواز شریف کے وژن کے مطابق صوبے بھر میں تعلیمی اداروں کی اپ گریڈیشن اور سہولیات کی فراہمی کے منصوبے تیزی سے جاری ہیں۔ حکومت پنجاب کا مقصد یہ ہے کہ ہر بچے کو بہتر، محفوظ اور معیاری تعلیمی ماحول فراہم کیا جا سکے۔

انہوں نے کہا کہ ملک و قوم کی ترقی میں اساتذہ کا کردار بنیادی حیثیت رکھتا ہے۔ اساتذہ وہ معمار ہیں جو آنے والی نسلوں کی سمت متعین کرتے ہیں۔ علامہ اقبال کے قول ’’ہر فرد ہے ملت کے مقدر کا ستارہ‘‘ کا حوالہ دیتے ہوئے انہوں نے کہا کہ ہر استاد اور ہر طالب علم قوم کے مستقبل کا روشن ستارہ ہے۔

کمشنر اشفاق احمد چوہدری نے مزید کہا کہ تعلیم کسی بھی معاشرے کی ریڑھ کی ہڈی ہے اور حکومت پنجاب اس مقصد کے لیے تمام وسائل بروئے کار لا رہی ہے تاکہ طلبہ کو جدید تعلیمی سہولیات، سازگار ماحول اور بہترین تربیت فراہم کی جا سکے۔

انہوں نے انتظامیہ اور اساتذہ کی کاوشوں کو سراہتے ہوئے کہا کہ اساتذہ علم کی روشنی پھیلانے والے مشعل بردار ہیں، جن کی محنت اور لگن قوم کے تابناک مستقبل کی ضمانت ہے۔ تقریب کے اختتام پر کمشنر نے قابل اور محنتی اساتذہ کو انعامات اور تعریفی اسناد سے نوازا، جب کہ نمایاں کارکردگی دکھانے والی طالبات کو بھی سراہا گیا۔ بعد ازاں کمشنر نے نئی عمارت، کلاس رومز اور دیگر سہولیات کا معائنہ کیا اور انتظامیہ کو مزید بہتری کی ہدایات جاری کیں۔

ڈیرہ غازی خان (سٹی رپورٹر جواد اکبر بھٹی) وزیراعلیٰ پنجاب مریم نواز شریف کے ڈیرہ غازی خان دورے کے موقع پر الیکٹرو بس پراجیکٹ کی افتتاحی تقریب منعقد ہوئی جہاں وزیراعلیٰ نے جنوبی پنجاب کے لیے بڑے اعلانات کیے اور ضلعی انتظامیہ کی کارکردگی کو سراہا گیا۔ تقریب میں وزیراعلیٰ نے اعلان کیا کہ ڈیرہ غازی خان ڈویژن کے لیے 101 الیکٹرو بسیں فراہم کی جائیں گی اور راجن پور، لیہ، مظفرگڑھ، تونسہ سمیت ہر ضلع میں الیکٹرک بس سروس نافذ کی جائے گی، ساتھ ہی انہوں نے کہا کہ جنوبی پنجاب میں ہر ماہ ایک سیکرٹریٹ قائم کیا جائے گا تاکہ عوامی مسائل کے تدارک میں بہتری لائی جا سکے۔

وزیراعلیٰ نے سرائیکی زبان سے خطاب کا آغاز کیا جس پر مقامی لوگوں نے عزت و محبت کا اظہار کیا اور انہوں نے واضح کیا کہ ان کے لیے ساؤتھ، سینٹرل اور اپر پنجاب میں کوئی امتیاز نہیں، سب کے ساتھ یکساں سلوک ہوگا۔ انہوں نے کہا کہ الیکٹرک بسز جیسے عوامی منصوبوں کو نقصان پہنچانا عوام کو نقصان دینے کے مترادف ہے اور وینڈیلیزم کرنے والوں کو عبرت ناک سزا دی جائے گی۔ سیلاب زدگان کے حوالے سے مریم نواز نے کہا کہ بی آئی ایس پی کے معمولی امدادی رقم سے بڑے نقصانات پورے نہیں ہوتے، متاثرین کے گھروں، مویشیوں اور فصلوں کے نقصان کا ازالہ ان کی ترجیح ہے اور وہ عوامی وسائل اپنے ہی وسائل سے عوام پر خرچ کریں گی، امداد کے لیے ہاتھ پھیلانے کی بات انہیں منظور نہیں۔ وزیرِ اعلیٰ نے مزید کہا کہ پنجاب کی ٹیکس کلیکشن کا معیار بہتر ہے اور صوبے کی آبادی و خدمات کے تناظر میں وسائل کی فراہمی یقینی بنائی جائے گی۔

اسی موقع پر ڈپٹی کمشنر ڈیرہ غازی خان محمد عثمان خالد نے ڈویژنل و ضلعی افسران اور ملازمین کی محنت و لگن کو سراہا اور کہا کہ نائب قاصد سے لے کر اعلیٰ افسر تک ہر نے ٹیم ورک کے تحت کام کیا جس کی بدولت یہ اہم پروفائل دورہ کامیابی سے ممکن ہوا۔ ڈپٹی کمشنر نے افسران اور عملے کو ہدایت کی کہ عوامی خدمت، گڈ گورننس اور سروسز کی بہتری کے لیے اسی جذبے کے ساتھ کام جاری رکھا جائے تاکہ منصوبوں کی بروقت تکمیل اور عوام کو سہولیات فراہم کی جا سکیں۔ دورے اور منصوبہ بندی کے دوران عوامی مفاد کو اولین ترجیح دینے اور خدمات کی فراہمی میں کسی بھی قسم کی رعایت نہ برتنے کی تلقین کی گئی۔

ڈیرہ غازی خان (باغی ٹی وی نیوز رپورٹر شاہد خان) ڈپٹی کمشنر محمد عثمان خالد نے وزیراعلیٰ پنجاب مریم نواز شریف کے کامیاب دورۂ ڈیرہ غازی خان پر ڈویژنل و ضلعی افسران اور ملازمین کی محنت و لگن کو سراہتے ہوئے خراجِ تحسین پیش کیا ہے۔

اپنے پیغام میں انہوں نے کہا کہ نائب قاصد سے لے کر اعلیٰ افسر تک ہر ملازم نے ٹیم ورک کے تحت کام کیا، جس کی بدولت اس اہم پروفائل دورے کو کامیابی سے ممکن بنایا گیا۔ ڈپٹی کمشنر نے کہا کہ آئندہ بھی اسی جذبے کے ساتھ عوامی مسائل کے حل، گڈ گورننس، سروسز کی بہتری اور ضلع کی ترقی کے لیے کام جاری رکھا جائے گا۔

ڈیرہ غازی خان (جواد اکبر بھٹی) ممبر پنجاب بار کونسل کے انتخابات قریب آتے ہی وکلاء برادری میں مشاورتی سرگرمیاں تیز ہو گئیں۔ اسی سلسلے میں 21 ستمبر 2025 کو ملک رشید احمد بھٹی ایڈووکیٹ کے دولت خانہ ملک ہاؤس میں ایک اہم اجلاس منعقد ہوا جس میں وکلاء اور معزز شخصیات کی بڑی تعداد نے شرکت کی۔

ملک رشید احمد بھٹی ایڈووکیٹ نے مہمانوں کا پرتپاک استقبال کیا اور پرتکلف ظہرانے کا اہتمام کیا۔ اجلاس میں بھٹی لائرز گروپ اور ہم خیال دوستوں کی اکثریت نے متفقہ طور پر فیصلہ کیا کہ ممبر پنجاب بار کونسل ڈیرہ غازی خان کی نشست کے لیے عظمت اسلام غلزئی ایڈووکیٹ کی مکمل حمایت اور ووٹ دینے کا اعلان کیا جائے۔

اجلاس میں محمد سلیم ملک ایڈووکیٹ سپریم کورٹ (سابق صدر و ممبر پنجاب بار کونسل)، عبدالغنی خان کھوسہ صدر بار ایسوسی ایشن ڈیرہ غازی خان، ملک رشید احمد بھٹی ایڈووکیٹ، خالد اقبال بھٹی ایڈووکیٹ،میاں عامر محمود بھٹی ایڈووکیٹ، ملک ایاز بھمبھانی، سردار محمود خان کھتران، عرفان اشرف بھٹی، اعجاز احمد خان کلاچی (سابق سیکرٹری بار)، محمد حنیف بھٹی، مظہر حسین بھٹی اور جواد اکبر بھٹی شریک ہوئے۔

شرکاء نے کہا کہ اجلاس میں شریک نہ ہو سکنے والے وکلاء اور دوستوں کو بھی فیصلے پر اعتماد میں لے لیا گیا ہے۔ اختتام پر دعا کی گئی کہ اللہ تعالیٰ عظمت اسلام غلزئی ایڈووکیٹ کو کامیابی عطا فرمائے اور دوستوں کو صحت و تندرستی کے ساتھ لمبی زندگی دے۔

ڈیرہ غازی خان (سٹی رپورٹر جواد اکبر بھٹی) غازی یونیورسٹی میں محکمہ بہبود آبادی کے اشتراک سے ’’بااختیار نوجوان، متوازن خاندان، ترقی کی راہ پر گامزن‘‘ کے عنوان سے یوتھ کانفرنس منعقد ہوئی۔ تقریب میں اسسٹنٹ کمشنر نذر حسین کو رائی، ضلعی آفیسر بہبود آبادی ہما مہدی لغاری، سی ای او ہیلتھ ڈاکٹر عتیق الرحمن، راؤ راشد حفیظ، محمد فیاض ڈھول، ڈاکٹر محمد عابد، عبد القدوس، محمد صدیق، پروفیسر ڈاکٹر ارشد منیر لغاری، پروفیسر ڈاکٹر سعد اللہ لغاری، ڈاکٹر محمد علی تارڑ اور دیگر اساتذہ شریک ہوئے۔ نظامت کے فرائض ڈاکٹر سمیرا بانو نے انجام دیے۔

مقررین نے نوجوانوں کو بااختیار بنانے کی ضرورت اور ان کے مثبت کردار پر روشنی ڈالتے ہوئے کہا کہ نوجوان ہی مستقبل کے معمار ہیں۔ ان کا کہنا تھا کہ معیاری تعلیم، صحت کی سہولیات، رہنمائی اور بہتر مواقع فراہم کرکے نوجوان نسل کو اپنی زندگیوں میں مثبت تبدیلی لانے کے قابل بنایا جا سکتا ہے، تاکہ وہ ایک متوازن، خوشحال اور ترقی یافتہ معاشرے کے قیام میں مؤثر کردار ادا کریں۔

مقررین نے مزید کہا کہ متوازن خاندان ہی معاشرتی استحکام کی بنیاد ہے اور نوجوانوں کو چاہیے کہ وہ علم، برداشت اور تعاون کو اپنی زندگی کا حصہ بنائیں۔ نوجوان جب بااختیار ہوتے ہیں تو درست فیصلے کرنے اور آنے والی نسلوں کے لیے بہترین مثال قائم کرنے کی صلاحیت پیدا کرتے ہیں۔

تقریب کے اختتام پر معزز مہمانوں کو شیلڈز بھی پیش کی گئیں۔