Category: ڈیرہ غازی خان

ڈیرہ غازی خان (تنویر احمد) پولیس ملازمان کے ڈسپلن اور ٹرن آؤٹ کو بہتر بنانے کے لیے پولیس لائن میں جنرل پریڈ کا انعقاد کیا گیا جس میں ضلع بھر سے پولیس افسران و ملازمان،ایلیٹ فورس،ڈولفن فورس، ٹریفک پولیس کے اہلکاروں نے شرکت کی آر پی او عمران احمر اور ڈی پی او اسد سرفراز نے پریڈ کا معائنہ کیا آر پی او پولیس لائن میں سرکاری گاڑیوں کا معائنہ بھی کیا اس موقع پر آر پی او عمران احمر نے جوانوں سے خطاب کرتے ہوئے کہا کہ پولیس افسران وملازمان کی ویلفیئر کے لیے تمام ممکن اقدامات کو یقینی بنایا جارہا ہے.پولیس آفیسران واہلکاران اپنے فرائض منصبی دیانتداری اور خدمت خلق سمجھ کر سر انجام دیں کیونکہ پولیس کا کام سکیورٹی کی صورتحال پر نظر رکھنا، شہر میں امن وامان قائم رکھنا اور شہریوں کی قانونی تحفظ کی بروقت فراہمی ہے ڈی پی او اسد سرفراز نے کہا کہ جرائم پیشہ عناصر معاشرے کاناسور ہوتے ہیں اور کسی قسم کی رعایت کے مستحق نہیں ان کا بہادری اور جرات سے مقابلہ کرنا اور انہیں کیفر کردار تک پہنچانا ہر پولیس آفیسر کی ڈیوٹی ہے اپنے فرائض احسن طریقے سے سرانجام دیں اور فرائض میں غفلت کی صورت سخت محکمانہ کاروائی ہو گی۔

ڈیرہ غازی خان(تنویر احمد)وزیر اعلی پنجاب اور مشیر صحت کے شہر ڈی جی خان میں ڈسٹرکٹ اینڈ ٹیچنگ ہسپتال میں زخمیوں کا علاج ڈاکٹر مار پیٹ سے کر نے لگے تفصیل کے مطابق ڈیرہ غازی خان وزیر اعلی پنجاب اور مشیر صحت کے شہر میں واقع اکلوتے ٹیچنگ ہسپتال میں سرجن کراٹے کے داؤ پیچ سے مریضوں اور ان کے لواحقین کا علاج کرنے میں مصروف عمل ہوگئے زخمی کے علاج میں عدم توجہی پر ویڈیو بنانے کی کوشش کرنیوالے شہری پرایک ڈاکٹرنے تشدد شروع کیا تو وہاں پر موجود کئی دیگر ڈاکٹر وں سمیت متعدد نے تشدد شروع کردیا علاج نہ ہونے پر شہری نے ویڈیو بنانا شروع کی تو ویڈیو بنتی دیکھ کر ڈاکٹرز غصے میں آگئے ایک ینگ ڈاکٹر نے ویڈیو بناتے شہری پر تشدد شروع کیا پھر کئی ڈاکٹرز تشدد مارپیٹ کرنے لگے اور ٹراما سنٹر میدان جنگ بن گیانہ صرف یہ بلکہ ڈاکٹرز نے شہری کو محبوس بنا لیا مزید تشدد کرکے زبردستی ویڈیو ڈیلیٹ کرائی گئی اپنی غلطی اور تشدد کے مناظر کو چھپانے کیلیے ڈاکٹرز رہنما سی سی ٹی وی فوٹیج ڈیلیٹ کرانے کے لیے ایک دوسرے کو میسیج کرتے رہے اس واقعہ کی سی سی ٹی ویڈیو اور واٹس ایپ صحافیوں نے حاصل کرلیے ڈسٹرکٹ اینڈ ٹیچنگ ہسپتال میں یہ واقعات آئے روز کا معمول ہیں بجائے اپنی اصلاح کرنے کے ڈاکٹرز اور ہسپتال انتظامیہ نے اپنی نااہلی اور تشدد چھپانے کیلیے میڈیا پر خود ساختہ پابندی عائد کرتے ہوئے ہسپتال میں صحافیوں کے بلااجازت کوریج کرنے پر پابندی کے باقاعدہ بورڈز لگا دئیے ہیں اور سیکیورٹی گارڈ کو ہدایت کی گئی ہے کہ میڈیا اور کیمرہ مینوں کو کسی صورت ٹیچنگ ہسپتال میں داخل نہ ہو نے دیا جا ئے بورڈز پر بلا اجازت کوریج پر صحافیوں کے خلاف کاروائی کا بھی لکھا گیا ہے اس سلسلہ میں موقف جاننے کے لئے ایم ایس ٹیچنگ ہسپتال ڈاکٹر شاہد حسین مگسی سے رابطہ کیا گیا تو انہو ں نے کو ئی فون اٹینڈ نہیں کیا جبکہ میڈیا فوکل پرسن ڈاکٹر خالد تحسین نے بتایا کہ حالیہ دنوں میں اس طرح کا کو ئی واقعہ نہیں ہوا یہ کو ئی پرانی فوٹیج ہو سکتی ہے جس کی ہم تحقیقات کرائیں گے یہ صرف ٹیچنگ ہسپتال انتظامیہ کو بدنام کر نے کی کوشش ہے۔

ڈیرہ غازیخان(تنویر احمد) ڈسٹرکٹ پولیس ڈیرہ غازیخان کے جوانوں نے عوامی خدمت کو اپنا شعار بنا لیاگزشتہ روز موٹر سائیکل پر جاتی ہوئی ایک فیملی کا دوپٹہ موٹر سائیکل کی چین میں پھنس گیااس موقع پر گشت کرتی ایلیٹ پولیس کی ٹیم نے فوری طور پر مشکل میں مبتلا مذکورہ فیملی کی مدد کی اور عورت کا پھنسا ہوا ڈوپٹہ نکال دیا اور انہیں پانی پلانے کے بعد اپنی منزل کی طرف رخصت کیا اسی طرح تھانہ ریتڑہ کے علاقہ میں ایک نوجوان کی موٹر سائیکل کی چین اتر گئی جس کی بھی گشت کرنے والے پولیس اہلکاروں نے مدد کی اس موقع پر پولیس اہلکاروں کا کہنا تھا کہ ڈی پی او اسد سرفراز کے حکم پر خدمت کے مشن کو فرائض منصبی میں شامل کر لیا ہے ہمارا مذہب ہمیں انسانیت کا درس دیتا ہے کسی کی مدد کرنا، کسی کے دکھ کو اپنا دکھ سمجھنا ہمارے مذہب اسلام کی بنیادی تعلیمات میں سے ہیں۔

ڈیرہ غازیخان(تنویر احمد)ڈی جی خان میں کشمیریوں سے اظہار یکجہتی کے لیے بمبے چوک پر ریلی نکالی گئی۔ریلی میں ضلعی انتظامیہ،ایجوکیشن،ہیلتھ،ریسکیو سمیت سکولز کے طلباء اور شہریوں نے شرکت کی. ریلی میں ایم پی اے شاہینہ نجیب کھوسہ، اے ڈی سی آر سمیع اللہ فاروق،اے سی صدر عثمان جلیس سمیت دیگر بھی موجود تھے. ریلی کے شرکاء نے کشمیر بنے گا پاکستان اور پاکستان زندہ باد کے نعرے لگائے گئے اور کشمیریوں پر بھارتی جارحیت کی پر زور مزمت کی گئی. ایم پی اے ڈاکٹر شاہینہ نجیب کھوسہ نے کہاکہ کشمیریوں پر ظلم کرنے والے ظالموں کو منہ کی کھانا پڑے گی. اے ڈی سی آر سمیع اللہ فاروق نے کہاکہ ہم کسی صورت کشمیریوں کا ساتھ نہیں چھوڑیں گے۔

ڈیرہ غازیخان(تنویر احم) ڈی پی او اسد سرفراز نے پولیس لائن میں پولیس دربار لگایا اس موقع پر پولیس دربار سے خطاب کرتے ہوئے ڈی پی او اسد سرفراز نے کہا کہ کسی بھی محکمہ کی بنیاد جذبہ ہوتا ہے اپنے فرائض منصبی بھر پور طریقے سے ادا کریں ضلع بھر میں پنجاب پولیس اور ٹریفک پولیس کی غیر ضروری ناکہ بندی کی ہرگز اجازت نہیں عوام کا پولیس پر اعتماد برقرار رکھنے کے لئے پیدا ہونے والے خلا کو ختم کیا جائے۔تھانہ میں آنے والے ہر خاص و عام شہری کی فوراً دارسی کرتے ہوئے فوری مقدمات کا اندراج کیا جائے عوام کے ساتھ بہترین رویہ اپناتے ہوئے فوری طور پر انصاف مہیا کرنے کی پالیسی پر من و عن عمل درآمد کیا جائے۔ضلع میں کہیں بھی غیر ضروری ناکہ بندی پوائنٹ قائم نہیں کئے جائیں گے عوام کے جان و مال عزت و آبرو کے تحفظ کے لئے اپنی تمام تر قوتوں کو بروئے کار لایا جائے انہوں نے کہا کہ عوام کی پریشانیوں کا بروقت ازالہ کرکے نیکیوں کے انبار اکٹھے کیے جا سکتے ہیں اور میں امید کرتا ہوں کہ یہ انبار اکٹھے کرنے میں آپ اپنی تمام کاوشیں بروئے کار لانے میں کوئی بھی کسر روا نہیں رکھیں گے دربار کے آخر میں ڈی پی او اسد سرفراز نے ملازمین کے مسائل دریافت کئے اور انکے حل کے لئے انہیں یقین دہانی کرائی۔

ڈیرہ غازیخان(تنویر احمد) وزیراعلی ہاؤس ڈیرہ کے سامنے پولیس سیکیورٹی گارڈ کی گولی لگنے سے زخمی ہونے والا بزرگ شہری خدابخش زیر علاج رہنے کے بعد جاں بحق ہو گیا نمازہ جنازہ دریشک ٹاؤن میں ادا کی گئی، جنازہ میں کثیر تعداد میں شہریوں کی شرکت، نماز جنازہ کے بعد میت سرکاری ایمبولینس میں آبائی علاقہ تونسہ روانہ تفصیلات کیمطابق کچھ روز قبل وزیر اعلی پنجاب سردارعثمان بزدار کی ڈیرہ غازیخان کے دریشک ٹاؤن میں واقع رہائش گاہ کیسامنے قائم سیکیورٹی چیک پوسٹ پر تعینات سکیورٹی گارڈ کی غلطی کی وجہ سے فائر لگنے سے دریشک ٹاؤن کا رہائشی بزرگ خدابخش زخمی ہو گیا تھا جوکہ ٹیچنگ ہسپتال کے ٹراما سنٹر میں زیر علاج تھا گزشتہ روز زخمی خدابخش زخموں کی تاب نہ لاتے ہو ئے جاں بحق ہو گیا مرحوم کی نمازہ جنازہ دریشک ٹاؤن میں ادا کی گئی جس میں کثیر تعداد میں شہریوں نے شرکت کی اور وزیراعلی پنجاب سے مرحوم کے ورثاء کے لیے امداد کے اعلان کا بھی مطالبہ کیا نماز جنازہ کے بعد خدا بخش کی میت کو سرکاری ایمبولینس کے ذریعے ان کے آبائی علاقہ تونسہ منگروٹھہ میں روانہ کر دیا گیا جہاں آبائی قبرستان میں سپرد خاک کر دیا گیا

ڈیرہ غازیخان(تنویر احمد)بیوی کا نان نفقہ کا دعویٰ، سنگدل شوہر نے کم سن بیٹے کو مبینہ طور پر زہردے دیا، مبینہ طور پربروقت طبی امداد نہ ملنے کی وجہ سے بچہ جاں بحق،ورثاء کا ٹیچنگ ہسپتال کے باہر احتجاجی مظاہرہ، بیٹے کی نعش دیکھ کرماں پر غشی کے دورے،نعش پوسٹ مارٹم کے بعد ورثاء کے حوالے،صدر پولیس نے ملزم گرفتار کرکے کاروائی شروع کردی،تفصیلات کے مطابق تھانہ صدر کے علاقے شمس آباد کالونی کی رہائشی سحرش فاطمہ نے پولیس کو بیان دیا کہ 2 سال قبل میری شادی زوہیب حُسین آرائیں سے ہوئی،گھریلو ناچاقی کی وجہ سے میرے خاوند نے مجھے گھر سے نکال دیا اور بچے کا خرچہ بھی نہ دیتا تھاجس کا میں نے فیملی کورٹ میں دعویٰ دائر کر رکھا تھا،جس کا زوہیب کو رنج تھا، گزشتہ روز میرا شوہر راشد آرائیں کے ہمراہ میرے گھر آیا اور کہا کہ حجت حُسین کا چچا جمشید سعودی عرب جارہا ہے اس نے اپنے بھتیجے کو ملنا ہے اس کو پھر گھر چھوڑ جائیں گے وہ بچے کو لیکر چلے گئے اور کچھ دیر کے بعد اسے بے ہوشی کی حالت میں گھر میں پھینک کر چلے گئے بچے کے منہ سے جھاگ نکل رہی تھی جسے فوری طور پر ٹیچنگ ہسپتال منتقل کیا گیا ڈاکٹروں کی مبینہ طور پر عدم توجہ اور بروقت طبی امداد نہ ملنے کی وجہ سے ڈیڑھ سالہ حجت حُسین دم توڑ گیا،جس کے خلاف ٹیچنگ ہسپتال کے گیٹ پر احتجاجی مظاہرہ بھی کیا گیا،تھانہ صدرپولیس نے مقدمہ نمبر 590/19 کے تحت درج کرکے ملزم زوہیب کو گرفتار کرلیا جبکہ نعش پوسٹ مارٹم کے بعد ورثاء کے حوالے کردی۔