Category: ڈیرہ غازی خان

ڈیرہ غازیخان(تنویر احمد) وزیراعلی ہاؤس ڈیرہ کے سامنے پولیس سیکیورٹی گارڈ کی گولی لگنے سے زخمی ہونے والا بزرگ شہری خدابخش زیر علاج رہنے کے بعد جاں بحق ہو گیا نمازہ جنازہ دریشک ٹاؤن میں ادا کی گئی، جنازہ میں کثیر تعداد میں شہریوں کی شرکت، نماز جنازہ کے بعد میت سرکاری ایمبولینس میں آبائی علاقہ تونسہ روانہ تفصیلات کیمطابق کچھ روز قبل وزیر اعلی پنجاب سردارعثمان بزدار کی ڈیرہ غازیخان کے دریشک ٹاؤن میں واقع رہائش گاہ کیسامنے قائم سیکیورٹی چیک پوسٹ پر تعینات سکیورٹی گارڈ کی غلطی کی وجہ سے فائر لگنے سے دریشک ٹاؤن کا رہائشی بزرگ خدابخش زخمی ہو گیا تھا جوکہ ٹیچنگ ہسپتال کے ٹراما سنٹر میں زیر علاج تھا گزشتہ روز زخمی خدابخش زخموں کی تاب نہ لاتے ہو ئے جاں بحق ہو گیا مرحوم کی نمازہ جنازہ دریشک ٹاؤن میں ادا کی گئی جس میں کثیر تعداد میں شہریوں نے شرکت کی اور وزیراعلی پنجاب سے مرحوم کے ورثاء کے لیے امداد کے اعلان کا بھی مطالبہ کیا نماز جنازہ کے بعد خدا بخش کی میت کو سرکاری ایمبولینس کے ذریعے ان کے آبائی علاقہ تونسہ منگروٹھہ میں روانہ کر دیا گیا جہاں آبائی قبرستان میں سپرد خاک کر دیا گیا

ڈیرہ غازیخان(تنویر احمد)بیوی کا نان نفقہ کا دعویٰ، سنگدل شوہر نے کم سن بیٹے کو مبینہ طور پر زہردے دیا، مبینہ طور پربروقت طبی امداد نہ ملنے کی وجہ سے بچہ جاں بحق،ورثاء کا ٹیچنگ ہسپتال کے باہر احتجاجی مظاہرہ، بیٹے کی نعش دیکھ کرماں پر غشی کے دورے،نعش پوسٹ مارٹم کے بعد ورثاء کے حوالے،صدر پولیس نے ملزم گرفتار کرکے کاروائی شروع کردی،تفصیلات کے مطابق تھانہ صدر کے علاقے شمس آباد کالونی کی رہائشی سحرش فاطمہ نے پولیس کو بیان دیا کہ 2 سال قبل میری شادی زوہیب حُسین آرائیں سے ہوئی،گھریلو ناچاقی کی وجہ سے میرے خاوند نے مجھے گھر سے نکال دیا اور بچے کا خرچہ بھی نہ دیتا تھاجس کا میں نے فیملی کورٹ میں دعویٰ دائر کر رکھا تھا،جس کا زوہیب کو رنج تھا، گزشتہ روز میرا شوہر راشد آرائیں کے ہمراہ میرے گھر آیا اور کہا کہ حجت حُسین کا چچا جمشید سعودی عرب جارہا ہے اس نے اپنے بھتیجے کو ملنا ہے اس کو پھر گھر چھوڑ جائیں گے وہ بچے کو لیکر چلے گئے اور کچھ دیر کے بعد اسے بے ہوشی کی حالت میں گھر میں پھینک کر چلے گئے بچے کے منہ سے جھاگ نکل رہی تھی جسے فوری طور پر ٹیچنگ ہسپتال منتقل کیا گیا ڈاکٹروں کی مبینہ طور پر عدم توجہ اور بروقت طبی امداد نہ ملنے کی وجہ سے ڈیڑھ سالہ حجت حُسین دم توڑ گیا،جس کے خلاف ٹیچنگ ہسپتال کے گیٹ پر احتجاجی مظاہرہ بھی کیا گیا،تھانہ صدرپولیس نے مقدمہ نمبر 590/19 کے تحت درج کرکے ملزم زوہیب کو گرفتار کرلیا جبکہ نعش پوسٹ مارٹم کے بعد ورثاء کے حوالے کردی۔

ڈیرہ غازیخان(تنویر احمد)وفاقی وزیر مملکت زرتاج گل وزیر نے کہا ہے کہ وزیر اعلی پنجاب سردار عثمان احمد خان بزدار نے حلقہ انتخاب نہ ہو نے کے باوجود ڈیرہ غازیخان شہر کیلئے اربوں روپے کے فنڈز دیئے. میونسپل کارپوریشن ڈیرہ غازیخان کیلئے مشینری کی خریداری کا عمل شروع کردیاگیاہے. ملتان، لاہور، فیصل آباد کی واسا ٹیموں نے ڈیرہ غازیخان شہر میں سیوریج لائنوں کی صفائی شروع کی تو پتہ چلا کہ شرپسند عناصر عوام کو مسائل میں دھکیلتے رہے ہیں. سیوریج پائپ لائن میں پتھروں سے بھری بوریاں سیل کر کے پھینکی گئیں اور بارہ مقاما ت سے بوریاں برآمد کی گئیں. انہو ں نے کہاکہ کمشنر کی ہدایت پر بوریاں ڈالنے والوں کے خلاف دہشت گردی دفعات کے تحت مقدمات درج کرائے جائیں گے اور شرپسند عناصر کی ثبوت کے ساتھ نشاندہی کرنے والو ں کو پچاس ہزار روپے تک نقد انعام دینے کا بھی اعلان کیا گیا ہے. وفاقی وزیرمملکت نے کہاکہ وزیر اعلی پنجاب نے ڈیرہ غازیخان شہر کیلئے دو ارب ستر کروڑ روپے کے فنڈز کی منظوری دے دی ہے اور مرحلہ وار کام شروع کر د یا جائے گا. سالڈ و یسٹ منیجمنٹ کمپنی ڈیرہ غازیخان کیلئے پچاس کروڑ روپے کے فنڈز منظو رکیے گئے اور بارہ کروڑ روپے کے فنڈز وصول ہو گئے ہیں تین ماہ کے اندر سالڈ ویسٹ منیجمنٹ کمپنی ڈیرہ غازیخ ان کام شروع کر دے گی. انہوں نے کہاکہ میونسپل کارپوریشن نے دباؤکے باوجود نادہندگان اور غیر قانونی تعمیرات کے خلاف کریک ڈاون شروع کیا اور غیر قانونی 96تعمیرات سیل کر دی گئیں. انہو ں نے بتایا کہ میونسپل کارپوریشن کی دکانوں کے کرایہ کی مد میں 27کروڑ روپے کے فنڈز نادہندگان کے ذمہ واجب الادا ہیں جن کی ریکوری کیلئے ہر ممکن کوشش کی جائے گی. وفاقی وزیر مملکت نے کہاکہ کارپوریشن کے پاس وسائل اور افرادی قوت کی کمی ہے جس کی معاونت کیلئے وزیر اعلی پنجا ب نے دیگر شہروں سے مشینری، سنیٹری ورکرز او رآفیسربھیجے. ڈیرہ شہر میں صفائی اور سیوریج لائن کھولنے کا عمل جاری ہے. بہت جلد صورتحال بہتر نظر آنا شروع ہو جائے گی. اس موقع پر ایڈیشنل کمشنر کوآرڈینیشن اظفرضیاء، چیف آفیسر اقبال فرید، چیئرمین پنجاب لینڈ ریکارڈ اتھارٹی سردار احمد علی دریشک، ضلعی صدرپاکستان تحریک انصاف ملک اقبال ثاقب و دیگر موجود تھے. اس موقع پر وزیر اعلی کی طرف سے فراہم کردہ مشینری میڈیا کے سامنے پیش کی گئی.

ڈیرہ غازیخان(تنویر احمد)کمشنر ڈیرہ غازیخان ڈویژن مدثر ر یاض ملک اور وفاقی وزیر مملکت زرتاج گل وزیر کی زیر قیادت میونسپل کارپوریشن کیلئے فراہم کی گئی ٹریکٹر ٹرالی، رکشے اور دیگر مشینری کا فلیگ مارچ کیاگیا. جو سرکٹ ہاوس سے ریلوے پلی، ہسپتال چوک، ٹریفک چوک اور شہر کے مختلف راستوں سے ہوتا ہوا بلدیہ ہال پر اختتام پذیر ہوا.

ڈیرہ غازیخان(تنویر احمد)ڈپٹی کمشنر ڈیرہ غازیخان وقاص رشید نے چڑیا گھر کا اچانک دورہ کیا ناقص صفائی پر سخت ناراضگی کا اظہار کرتے ہوئے صورتحال بہتر کرنے کی ہدایات جاری کیں ڈپٹی کمشنر نے چڑیاگھرمیں شترمرغ کی ہلاکت کی اطلاع پر کمیٹی تشکیل دینے اور دو روز کے اندر وجوہات اور ذمہ داروں کا تعین کر کے رپورٹ پیش کرنے کی ہدایت کی۔ ڈپٹی کمشنرنے کہا کہ چڑیا گھر کے معاملات بہتر کیے جائیں۔انہوں نے کہا کہ وہ اچانک معائنہ کا سلسلہ جاری رکھیں گے صورتحال بہتر نہ ہونے پر سخت کارروائی عمل میں لائی جائے گی۔انہوں نے کہا کہ چڑیا گھربچوں کیلئے تفریح گاہ ہے۔ سکیورٹی اور دیگر انتظامات بہتر کیے جائیں ڈپٹی کمشنر نے چڑیا گھرکے مختلف حصوں کا معائنہ کیا اور ہدایات جاری کیں اور ڈسٹرکٹ آفیسر وائلڈ لائف سے چڑیا گھر کے مختلف معاملات پر فوری بہتری لانے کی ہدایات جار ی کیں ذرائع کے مطابق چڑیا گھر میں ہلاک ہو نے شتر مرغ کو لاہور سے تونسہ کے زیر تعمیر چڑیا گھر میں چھوڑنے کے لئے لایا گیا تھا جو مناسب نگہداشت نہ ہو نے کی جہ سے جان کی بازی ہار گیا یہ امر قابل ذکر ہے کہ اس سہ ماہی میں شیر کے نوزائیدہ بچے بھی ڈیرہ غازی خان چڑیا گھر میں جان کی بازی ہار گئے تھے اس سلسلہ میں رابطہ کر نے پر ڈسٹرکٹ آفیسر وائلڈ لائف،انچارج چڑیا گھر ڈیرہ غازی خان میاں احمد نے بتایا کہ مذکورہ شتر مرغ تونسہ کے زیر تعمیر چریا گھر کے لئے لایا گیا تھا جس کی اچانک قدرتی طور پر موت واقع ہو گئی جس کی وجوہات کا تعین پوسٹمارٹم رپورٹ آنے پر ہو گا جبکہ صفائی کے اوردیگر معاملات پر انہوں نے کہا کہ محکمہ کی طرف سے دستیاب وسائل کو ہر ممکن طریقہ سے استعمال میں لاکر چڑیا گھر کو عوام کے لئے پر کشش بنانے کی کوشش کی جا رہی ہے۔

ڈیرہ غازی خان(تنویر احمد) ڈیرہ شہر میں تالہ توڑ چوروں کا گروہ سرگرم، علی الصبح کالج چوک پر کار سوار چور تین دوکانوں کے تالے توڑ کر دوکان میں موجود لاکھوں کا کیش لے اڑے، مزاحمت پر گارڈ پر تشدد ،بیکری کی دکان میں بند کر دیا ،سول لائن پولیس نے موقع پر پہنچ کر کاروائی شروع کر دی تفصیلات کے مطابق ڈیرہ غازیخان شہر میں تالہ توڑ چوروں کا گروہ ایک مرتبہ پھر سرگرم ہوگیا ہے نامعلوم چوروں نے علی الصبح تین دکانوں جس میں بیک اینڈ ایٹ بیکرز سمیت وزیر آٹوز اور شیروانی ایلومینیم گلاس سنٹر کے تالے توڑے کر لاکھوں روپے کا سامان چوری کر لیا بیکری کے چوکیدار حفیظ کی مزاحمت پر چوروں نے اس پر تشدد کا نشانہ بنایا اور جاتے ہوئے چوکیدار حفیظ کو بیکری کی دوکان میں بند کر کے چلے گئے پولیس تھانہ سول لائن نے جائے وارداتوں پر پہنچ کر جائزہ لیتے ہوئے قانونی کاروائی شروع کر دی ہے۔

ڈیرہ غازیخان(تنویر احمد) پولیس ملازمین کے ڈسپلن اور ٹرن آؤٹ کو بہتر بنانے کے لیے پولیس لائن میں جنرل پریڈ کا انعقاد، ضلع بھر سے پولیس افسران و ملازمان،ڈولفن فورس، ایلیٹ فورس،ٹریفک پولیس اور لیڈیز اہلکاروں کی شرکت ڈی پی او اسد سرفراز نے پریڈ کا معائنہ کیاتفصیلات کے مطابق پولیس لائن ڈیرہ غازیخان میں پولیس آفیسران اور اہلکاروں کے ڈسپلن اور ٹرن آؤٹ کو چیک کرنے کے لئے جنرل پریڈ کا انعقاد کیا گیا جس میں ضلع بھر سے پولیس افسران و ملازمان،ڈولفن فورس، ایلیٹ فورس،ٹریفک پولیس اور لیڈیز پولیس اہلکاروں نے شرکت کی اور سلامی دی ڈی پی او اسد سرفراز نے پریڈ اور پولیس لائن میں گاڑیوں کا بھی معائنہ کیا اور ہدایات جاری کیں اس موقع پر ڈی پی او اسد سرفراز نے خطاب کرتے ہوئے کہا کہ پولیس افسران وملازمان کی ویلفیئر کے لیے تمام ممکن اقدامات کو یقینی بنائیں گے پولس فورس عوام کی خدمت کو نصب العین بنائیں اور قانون اور انصاف کی بالا دستی کو مقدم رکھا جائے۔

ڈیرہ غازی خان(تنویر احمد) کشمیریوں سے اظہار یکجہتی کے لیے نابینا افراد کی ریلی، ریلی پریس کلب سے گولائی کمیٹی تک نکالی گئی۔ریلی میں شریک نابینا افراد کی جانب سے کشمیر بنے گا پاکستان فلگ شگاف نعرے بلند کیے گئے تفصیلات کے مطابق مقبوضہ کشمیر کے بھائیوں کے ساتھ اظہار یکجہتی کرتے ہوئے نابینا افراد افراد نے پریس کلب سے گولائی کمیٹی تک ریلی نکالی ریلی کے شرکاء نے پاکستانی اور کشمیری پرچم ہاتھوں میں اٹھا رکھے تھے اس موقع پر نابینا افراد کاکہنا تھا کہ کشمیر پاکستان کی شہ رگ ہے بھارت کشمیریوں پر کیے جانے والے مظالم بند کرے اور اقوام متحدہ کی قراردادوں کے مطابق کشمیر کا مسئلہ حل کیا جائے۔مودی سرکار مقبوضہ کشمیر میں کرفیو ختم کرے اور انہیں حق خوداریت دیا جائے۔ نابینا افراد نے پلے کارڈز اور بینرز بھی تھامے ہوئے تھے اور کشمیر بنے گا پاکستان کے نعرے لگاتے رہے۔

ڈیرہ غازیخان(تنویر احمد) ڈی پی او اسد سرفراز نے تھیلیسیمیا کے مرض میں مبتلا حماد کی ایس ایس پی بننے کی خواہش پوری کر دی، پروٹوکول کے ساتھ پورے شہر کا چکر لگوایا،پولیس لائن میں چاق وچوبند دستے کی سلامی،یادگا شہداء پر حاضری دی اور دعا مانگی،ڈی پی او کی سیٹ پر بیٹھ کر میڈیا سے گفتگو بھی کی تفصیلات کے مطابق طاہر ٹاؤ ن کے رہائشی تھیلسیمیا کا مریض حماد رضا ایس ایس پی بن گیا پولیس نے حماد کو ایس ایس پی کے رینک لگا گھر سے پورے شہر کا چکر لگوایا جبکہ کلمہ چوک پر شہریوں کی طرف سے پھولوں کی پتیاں بھی نچھاور کی گئیں اور پنجاب پولیس زندہ باد کے نعرے بھی لگائے گئے جہاں سے پھر حماد رضا کو پولیس لائن لایا گیا جہاں اسے پولیس کے چاق وچوبند دستے نے سلامی پیش کی اور یادگار شہداء پر لے جا کر دعا کرائی گئی پولیس لائن سے حماد رضا کو ڈی پی او آفس ڈی جی خان لایا گیا جہاں پر ڈی پی او اسد سرفراز نے اپنے اہلکاروں کے ہمراہ اسے خوش آمدید کہا اور اپنے آفس میں لے جا کر اپنی سیٹ پر بٹھا دیا میڈیا سے گفتگو کر تے ہو ئے حماد رضا نے کہا کہ آج میں بہت خوش ہوں کہ میں ڈی پی او بن گیا ہو ں اور اس شاندار استقبال پر ضلع پولیس کا شکر گزار ہوں حماد کے والد منظور حسین نے بتایا کہ اسکا بیٹا حماد جوکہ ایس ایس پی بنے کی خواہش رکھتا تھا ڈی پی او اسد سرفراز نے وہ پوری کر دی ہے جس پر میں اور میرا خاندان ڈی پی او اسد سرفراز سمیت پوری فورس کا مشکور ہے اس موقع پر ڈی پی او اسد سرفراز نے کہا کہ میرے لئے آج نہایت ہی خوشی کا دن ہے کہ میں حماد کی مسکراہٹ اور خوشی کاسبب بنا ہوں یہ آج میرے ساتھ رہے گا اور میں اس کے ایڈیشنل کے فرائض سرانجام دوں گا انہوں نے کہا کہ ہمیں پریشان حال لوگوں اور مریضوں کے لئے نیکی اور مسکراہٹ کا سبب بننا چاہیے اسلام بھی ہمیں اس کا بات کا حکم دیتا ہے دعا گو ہوں کہ حماد جلد صحت یاب ہو اور بڑا ہوکر پکا ایس ایس پی کے عہدے پر فائض ہو بعدازاں آفس ٹائم ختم ہو نے کے بعد ڈی پی او نے اسی پروٹوکول کے ساتھ حماد رضا اور اسکے والد کو گھر کے لئے روانہ کر دیا۔