فیصل آباد(عثمان صادق) فیصل آباد چیمبر آف کامرس اینڈ انڈسٹریز کے وفد نے ڈائریکٹر جنرل پارکس اینڈ ہارٹیکلچر اتھارٹی عاصمہ اعجاز چیمہ سے پی ایچ اے کے مرکزی دفتر میں ملاقات کی اور شہر کی سر سبز و شادابی و خوبصورتی کے حوالے سے مختلف اقدامات پر تفصیلی تبادلہ خیال کیا۔چیمبر آف کامرس کے وفد کی طرف سے پارکس اینڈ ہارٹیکلچر اتھارٹی کے جاری کاموں کوسراہا اور مستقبل میں ادارے کی معاونت کی یقین دہانی کرائی گئی۔ڈی جی نے وفد کو شہر کی خوبصورتی کے حوالے سے بنائے گئے ماسٹر پلان کی تفصیلات سے آگاہ کرتے ہوئے بتایا کہ ارفع کریم رندھاوا،نصرت فتح علی کی خدمات کو خراج عقیدت پیش کرنے کے لئے ان سے منسوب مونومینٹس کو شہر کی مختلف شاہراؤں اور چوراہوں پر نصب کرانے کا پلان ہے۔انہوں نے بتایا کہ انڈسٹریل اور کاروباری شخصیات کی نمائندہ تنظیم ہونے کے ناطے چیمبر کو شہر کی تعمیر اور ترقی کے حوالے سیآئندہ بھی بھرپور کردار ادا کرنا چاہیے تاکہ شہر کو کلین اینڈ گرین بنایا جا سکے۔
Category: فیصل آباد
-
ساتھی خاتون کو گولی مارنے کا معاملہ: لڑکی 2-3 ماہ سے بنک مینجرکو بلیک میل کر رہی تھی پنجاب بنک کے اندرونی ذرائع کا انکشاف
فیصل آباد : برانچ منیجر کا ساتھی خاتون کو گولی مارنے کا معاملہ ، برانچ کے اندرونی ذرائع نے انکشاف کیا ہے کہ لڑکی برانچ مینجر کو شادی کرنے پر مجبور کر رہی تھی-
باغی ٹی وی : تفصیلات کے مطابق بنک آف پنجاب کے کچھ اندرونی ذرائع کا کہنا ہے کہ لڑکی کی عمر 18-19 سال ہے اور وہ بی ایم کو شادی کے لیے مجبور کر رہی تھی اور جب وہ برانچ سے باہر نکلا تو اس نے گارڈ سے پستول لے مقتولہ کو گولی مار دی-
بنک کے اندرونی ذرائع کا کہنا ہے کہ وہ تعلقات میں رہے ہیں اور تین ماہ قبل ان کی تقرری ہوئی تھی لڑکی 2-3 ماہ سے بنک مینجر کو بلیک میل کر رہی تھی۔
برانچ کے گارڈ کے مطابق تین دن سے ان دونوں کے درمیان جھگڑا چل رہا تھا جبکہ برانچ منیجر کو گزشتہ شام بھی معطل کر دیا گیا تھا۔
فیصل آباد میں برانچ منیجر نے شادی سے انکار پر ساتھی ملازمہ کو گولی مار دی پولیس نے موقع پر پہنچ کر کاروائی شروع کر دی اور وقعے کا مقدمہ درج کر لیا-
مقدمہ متاثر خاتون کے بھائی یوسف جاوید کی مدعیت میں درج کیا گیا ایف آئی آر میں کہا گیا کہ فیصل آباد کی رہائشی خاتون عالیہ جاوید پنجاب بنک برانچ اڈا سدھار میں بطور کسٹمر سروسز آفیسر ملازمت کر رہی تھی 7 اکتوبر کو شام 6 بجے اس کا بھائی اپنی ہمشیرہ کو لینے بنک پہنچا تو جب مقتولہ پنجاب بنک کے مین گیٹ سے باہر آئی تو پنجاب بنکاڈا سدھار کا آپریشن مینجر منصور علی بھی گیٹ سے باہر نکلا جس کے ہاتھ میں پسٹل تھا –
ایف آئی آر کے مطابق ملزم منصور نے اونچی آواز میں عالیہ کو کہا کہ اگر تم میرے سے شادی نہیں کر سکتیں تو میں کسی اور سے بھی تمہاری شادی نہیں ہونے دوں گا اس کے ساتھ ہی یکے بعد دیگرے عالیہ پر چار فائر کیے اور خاتون موقع پر ہی جاں بحق ہو گئی جبکہ ملزم یہ کہتے ہوئے کہ میرا مقصد پورا ہو گیا ہے دوبارہ بنک کے اندر چلا گیا اور اندر سے دروازہ لاک کر لیا-ایف آئی آر کے مطابق منصور علی کافی عرصہ سے خاتون کو زبردستی شادی کرنے پر مجبور کر رہا تھا جبکہ وہ پہلے سے شادی شدہ ہے اور اس کے تین بچے ہیں جس کی وجہ سے مقتولہ نے ملزم سے شادی کرنے سے صاف انکار کر دیا تھا جس کی وجہ سے وہ خاتون کو کافی عرصہ سے حراساں کر رہا تھا اور اپنی انا کہ تسکین کے لیے ملزم نے آتشیں پسٹل سے جان لیوا فائرنگ کر کے عالیہ جاوید کو ناحق قتل کر کے بڑی زیادتی کی ہے-
-
ڈپٹی کمشنر علی شہزاد کا چک 442 گ۔ب کے بنیادی مرکز صحت کا ہنگامی دورہ
فیصل آباد (عثمان صادق) ڈپٹی کمشنر علی شہزادطبی امور کا جائزہ لینے کے لئے اچانک چک 442 گ۔ب تاندلیانوالہ سمندری بائی پاس کے بنیادی مرکز صحت پہنچ گئے اور مختلف شعبوں کا دورہ کرکے مریضوں کو فراہم کی جانے والی طبی سہولیات کو مانیٹر کیا۔انہوں نے مشینری کی ورکنگ حالت،صفائی ستھرائی،حاضری اور دیگر دستیاب سہولیات کو چیک کرتے ہوئے بچوں کو حفاظتی ٹیکہ جات لگانے کاریکارڈ بھی دیکھا۔انہوں نے کہا کہ صحت کے شعبہ میں حکومتی اقدامات کے ثمرات عام مریضوں تک پہنچانے میں کوئی کمی نہیں ہونی چاہیے اور مرکز صحت کا رخ کرنے والوں کو علاج کی معیاری سہولیات تیز رفتاری سے فراہم کی جائیں تاکہ انہیں معمولی سی بھی شکایت نہ ہو۔ڈپٹی کمشنر نے واضح کیا کہ رورل ہیلتھ سنٹرز اور بنیادی مراکز صحت کی اچانک انسپکشنز کا عمل جاری رہے گا اور کسی قسم کی غفلت یا کوتاہی پر محکمانہ ایکشن سے گریز نہیں کیا جائے گا لہذا انتظامی وطبی امور کو ہمہ وقت چوکس رکھا جائے۔
-
آرپی اوفیصل آبادعمران محمود کی ڈسٹرکٹ فیصل آباد کے پولیس افسران سے کرائم میٹنگ۔
آرپی اوفیصل آبادعمران محمود کی ڈسٹرکٹ فیصل آباد کے پولیس افسران سے کرائم میٹنگ۔ کرائم کا تقابلی جائزہ۔کارکردگی بہتر بنانے کیلئے ہدایات جاری۔
تفصیلات:
(شان رسول نُماٸندہ باغی ٹی وی )
امروز آرپی او فیصل آباد عمران محمودنے کرائم کا جائزہ لینے کے حوالہ سے پولیس کمپلیکس فیصل آباد میں پولیس افسران سے کرائم میٹنگ کی۔میٹنگ میں CPOفیصل آباد ڈاکٹر محمد عابد خان،ایس ایس پی آپریشز،جملہ ڈویژنل ایس پیز، حلقہ افسران ضلع ہذانے شرکت کی۔
دوران میٹنگ سنگین مقدمات کے چالان، نامکمل چالان،زیر تفتیش امثلاجات کے متعلق تفصیلی بحث کی گئی۔
آر پی او فیصل آبادعمران محمودنے ڈویژنل افسران کو ہدایات جاری کرتے ہوئے کہا کہ وہ زیر تفتیش مقدمات کو یکسو کرنے کیلئے اپنا مثبت کردار ادا کریں۔
تفتیشی افسران مقدمات کو یکسو یا خارج کرنے کیلئے انصاف اور میرٹ کو ترجیح دیں۔ اپنی پیشہ ورانہ مہارت کو بروئے کار لاتے ہوئے جدید خطوط پر تفتیش مکمل کی جائے تاکہ جرائم کے خاتمہ میں مدد ملے۔
روائتی سستی اور تسا ہل پسندی کسی صورت قبول نہ ہے۔جملہ حلقہ افسران اور SHO,s چوری،ڈکیتی، راہزنی کی روک تھام کیلئے پولیس پٹرولنگ نظام کو بہتر بنائیں۔
بنک اوقات کے دوران موٹر سائیکل اور موبائل گشت کو SDPO,sوقتاً فوقتاً چیک کرتے ہوئے انہیں الرٹ رکھیں۔ جرائم پیشہ افراد اور ریکارڈ یافتہ گان کی پڑتال عمل میں لائی جائے۔
علاوہ ازیں دوران میٹنگ پولیس کو درپیش مسائل اور چیلنجز بھی زیر بحث آئے۔آر پی او فیصل آباد نے اس عزم کا اظہار کیا کہ پولیس افسران/ ماتحتان کی فلاح و بہبود کیلئے تمام ممکن اقدام کیے جائیں گے۔انہوں نے مزید کہا کہ بہتر کارگردگی دکھانے والے ایماندار اور فرض شناس پولیس افسران/ ماتحتان کی ہر سطح پر حوصلہ افزائی کی جائے گی۔
-
پیشنٹ ویلفیئر سوسائٹی کی طرف سے الائیڈ ہسپتال کو عطیہ
فیصل آباد (عثمان صادق) الائیڈ ہسپتال کے ایمرجنسی وارڈ کو پیشنٹ ویلفیئر سوسائٹی کی طرف سے سٹریچرز اور وہیل چیئرز عطیہ کئے گئے۔صدر پیشنٹ ویلفیئرسوسائٹی ڈاکٹر جعفر حسن مبارک نے پانچ لاکھ روپے مالیت کے 35 سٹریچرز اور 12 وہیل چیئرز میڈیکل سپرنٹنڈنٹ ڈاکٹر ارشد چیمہ کے حوالے کئے۔اے ایم ایس سروسز اعجاز،ڈی ایم ایس سروسز ڈاکٹر عماد ایوب،سینئر نائب صدر پیشنٹ ویلفیئر سوسائٹی رانا ضیاء احمد خاں اور دیگر بھی موجود تھے۔میڈیکل سپرنٹنڈنٹ نے پیشنٹ ویلفیئر سوسائٹی کا شکریہ ادا کرتے ہوئے کہا کہ علاج معالجہ کی سہولتوں میں وسعت کے لئے پیشنٹ ویلفیئر سوسائٹی کی گرانقدر کاوشیں لائق تحسین ہیں۔ڈاکٹر جعفر حسن مبارک نے اپنے عزم کو دہراتے ہوئے کہا کہ مستحق مریضوں کی فلاح وبہبود کے لئے اقدامات جاری رکھے جائیں گے۔
-
اوپن ڈور پالیسی کے تحت شہریوں کے مسائل کی ڈپٹی کمشنر کے سامنے شنوائی
فیصل آباد(عثمان صادق) ڈپٹی کمشنر علی شہزاد روزانہ کی بنیاد پراپنے دفتر میں اوپن ڈور پالیسی کے تحت شہریوں کے مختلف نوعیت کے مسائل سن کر ان کے حل کے لئے متعلقہ افسران کو موقع پر ہی ہدایات جاری کررہے ہیں۔انہوں نے ضلعی محکموں کے سربراہان کو ہدایت کی کہ عوامی مسائل کے حل میں تاخیری حربوں سے گریز کریں۔ڈپٹی کمشنر نے کہا کہ عوامی مسائل پر کان نہ دھرنے والے افسران کیخلاف محکمانہ کارروائی سے گریز نہیں کیا جائے گا لہذا وہ عوامی ریلیف کے سلسلے میں محکمانہ کارکردگی کے معیار میں اضافہ کریں۔انہوں نے کہا کہ سائلین کی بات خندہ پیشانی سے سنتے ہوئے حل طلب امور کو فوری نمٹائیں۔انہوں نے بزرگوں،مردوخواتین کے مسائل سنتے ہوئے انہیں یقین دلایا کہ ان کی شکایات ومسائل کے فوری حل کے لئے ضلعی انتظامیہ سرگرم ہے اور سائلین کو ہر ممکن ریلیف فراہم کیا جارہا ہے۔
-
تمام مکاتب فکر کے علماء کرام اورمذہبی رہنما رواداری،پیارومحبت اور باہمی تعاون کو مزید تقویت دینے میں اپنا کردار ادا کریں۔ ڈپٹی کمشنر
فیصل آباد (عثمان صادق) ڈپٹی کمشنر علی شہزادنے ڈی سی آفس میں پاکستان علماء کونسل واتحادی جماعتوں کے وفد سے ملاقات کی۔ مرکزی ڈپٹی جنرل سیکرٹری پاکستان علماء کونسل وممبر اتحاد بین المسلمین کمیٹی پنجاب علامہ طاہر الحسن نے وفد کی قیادت کی۔اجلاس کے آغاز میں خطاب کرتے ہوئے علامہ طاہر الحسن نے کہاکہ پاکستان علماء کونسل ہمیشہ پاکستان کی سلامتی اور پائیدار امن کیلئے مصروف عمل ہے اورپیار،محبت،بھائی چارہ اور امن کا درس دیتا ہے اور تمام مکاتب فکر نے ہمیشہ فرقہ واریت کے خاتمہ کیلئے اہم کردار ادا کیا جس کا تسلسل آئندہ بھی جاری رہے گا۔وفد میں مولانا رفیق جامی،مولانا عبیداللہ گورمانی، مولانا حبیب الرحمن عابد،میاں ارشاد مجاہد، مولانا امین الحق،مولانا اظہار الحق، صاحبزادہ حمزہ طاہر الحسن،مولانا غلام اللہ خان،مولانا طاہر رضوی، سید حسنین شیرازی، وقار الحسن جعفری،مولانا عمر وقاص بیگ ودیگر علماء کرام موجود تھے۔ڈپٹی کمشنر نے علماء کرام کا خیرمقدم کرتے ہوئے ان کے مثبت رویوں اورمخلصانہ کاوشوں کو خراج تحسین پیش کیا اور کہا کہ چہلم محرم الحرام کے موقع پر بھی اتحاد ویگانگت اور فرقہ وارانہ ہم آہنگی کو برقرار رکھنا وقت کا شدید ترین تقاضا ہے لہذا تمام مکاتب فکر کے علماء کرام اورمذہبی رہنما رواداری،پیارومحبت اور باہمی تعاون کی فضاء کو مزید تقویت دینے میں اپنا کردار ادا کریں تاکہ کسی شرپسند یا تخریب کارکومذہبی کشیدگی پھیلانے کاموقع نہ ملے۔انہوں نے کہا کہ علماء کرام معاشرے کا ممتاز اور اہم ترین طبقہ ہیں جن کی رہنمائی سے لوگوں کی اصلاح ہوتی ہے لہذا وہ بھائی چارے،صبروتحمل اوربرداشت کی ترغیب دینے کا درس جاری رکھیں۔انہوں نے کہا کہ چہلم محرم الحرام کے موقع پرضلع بھر میں سیکورٹی کے ٹھوس اقدامات کئے گئے ہیں تاہم انہیں کامیاب بنانے میں تمام مکاتب فکر کے علماء کابھرپور تعاون ناگزیر ہے۔ڈپٹی کمشنر نے کہا کہ قانون کی پاسداری کو یقینی بنانا ترجیح ہے اس ضمن میں علماء کرام کے تعاون اور تجاویزکا خیر مقدم کریں گے۔انہوں نے شہریوں کو کورونا سے بچاؤ کے لئے ویکسین لگوانے اور احتیاطی تدابیر کا پیغام عام کرنے کی بھی اپیل کی اور ضلعی انتظامیہ کی طرف سے ہرممکن تعاون کی یقین دہانی کرائی۔آخر میں امن وامان کے قیام کے لئے خصوصی دعا کی گئی۔
-
تبدیلی سرکارنے ملک وقوم کاتماشابنادیاہے. میاں ضیاء الرحمان
فیصل آباد(عثمان صادق) جنرل سیکرٹری پاکستان مسلم لیگ ن فیصل آبادسٹی میاں ضیاء الرحمان نے کہاہے کہ تبدیلی سرکارنے ملک وقوم کاتماشابنادیاہے ،یوٹرن خان ہوش کے ناخن لیں پاکستان کوتجربہ گاہ نہ بنائیں ۔ناقص پالیسیوں کی وجہ سے معیشت اپاہج ہوچکی ہے جبکہ ادارے دن بدن کمزورہورہے ہیں ،الیکشن کمیشن کے خلاف محاذ کھول کرحکومت نے ثابت کردیاکہ وہ آئندہ انتخابات سے قبل ہی گھبراہٹ کاشکارہے ۔انہوںنے کہاکہ تحریک انصاف نے عوام کومایوس کردیاہے ،عوام انتخابات میں ووٹ کی طاقت سے سلیکٹڈ حکمرانوںکوشکست فاش دیکرسلیکٹرکوبھی باورکرادیں گے کہ عوام ہی طاقت کامحورہیں ۔انہوںنے کہاکہ مسلم لیگ ن کے کامیاب ورکرز کنونشن سے کارکنوں میں نیاجوش وولولہ پیداہواہے جوکہ حکومتی ٹولے کوہضم نہیں ہورہا۔انتخابات آج ہوں یاکل عوام نے طے کرلیاہے کہ نوازشریف کوچوتھی باروزیراعظم بناناہے ۔عمران خان نے تین سالوںمیں ملک وقوم کاجوحشرنشرکردیاہے عوام اس کابدلہ ووٹ کی طاقت سے لیکررہیں گے ۔انہوںنے کہاکہ سلیکٹڈ وزیراعظم کی تین سالہ کارکردگی ،دعوئوں ،نعروں اوردھمکیوں پرمحیط ہیں ،عوام جاگ چکے ہیں مزید سلیکٹڈ کی باتوں میں نہیں آئیں گے ۔
-
شکایات ومسائل کے فوری حل کے لئے محکمانہ کارروائی میں تاخیر نہیں ہوگی۔ ڈپٹی کمشنر علی شہزاد
فیصل آباد (عثمان صادق) ڈپٹی کمشنر علی شہزاد نے ضلعی محکموں کے سربراہان کو ہدایت کی ہے کہ شکایت کنندگان کی اطمینان بخش طریقے سے دادرسی کی جائے اور عوامی مسائل سے پہلو تہی،بے جااور بلاجواز تاخیر سے درخواست گزاروں کو خوار کرنے کی روش ترک کردیں۔انہوں نے یہ بات اپنے دفتر میں شہریوں کے مسائل سنتے ہوئے کہی۔ڈپٹی کمشنر نے کہا کہ عوامی مسائل پر کان نہ دھرنے والے افسران کیخلاف محکمانہ کارروائی سے گریز نہیں کیا جائے گا لہذا وہ عوامی ریلیف کے سلسلے میں محکمانہ کارکردگی کے معیار میں اضافہ کریں۔انہوں نے اسسٹنٹ کمشنرز سے کہا کی وہ مقامی سطح پر لوگوں کی شکایات اور مسائل ذمہ داری کے ساتھ حل کریں اور تحصیل دفاتر کی کارکردگی پر گہری نظر رکھیں تاکہ لوگوں کو اپنے معاملات کے سلسلے میں پریشانی کا سامنا نہ ہو۔انہوں نے کہا کہ سائلین کی بات خندہ پیشانی سے سنتے ہوئے فوری حل طلب امور کے سلسلے میں تاخیر نہ کی جائے۔انہوں نے شہریوں کے واسا،ویسٹ مینجمنٹ کمپنی،ریونیو ودیگر محکموں کے بارے میں مسائل سنتے ہوئے ان کے حل کے لئے متعلقہ افسران کو موقع پر ہی فون کالز کرکے ہدایات جاری کیں۔انہوں نے بزرگوں،مردوخواتین کے مسائل سنتے ہوئے انہیں یقین دلایا کہ ان کی شکایات ومسائل کے فوری حل کے لئے محکمانہ کارروائی میں تاخیر نہیں ہوگی۔
-
بیگم گورنر پنجاب مسز پروین سرور نے فیصل آباد میں سرور فاؤنڈیشن کے زیر اہتمام واٹر فلٹریشن کے منصوبوں کا افتتاح کردیا
فیصل آباد(عثمان صادق) بیگم گورنر پنجاب مسز پروین سرور نے فیصل آباد کا دورہ کیا اور اعوان والا اور ڈھڈی والا محلہ طارق پورہ میں سرور فاؤنڈیشن کے زیر اہتمام واٹر فلٹریشن کے منصوبوں کا افتتاح کیا۔چیئرمین پرائیویٹ سکولز ایسوسی ایشن خالد حیات کموکا اور سابق چیئرمین ریاض کموکابھی موجود تھے۔بیگم گورنر پنجاب نے کہا کہ اہلیان علاقہ کو پینے کا صاف پانی فراہم کرنے کے لئے واٹر فلٹریشن پلانٹس نصب کردیئے گئے ہیں۔انہوں نے کہا کہ اگرچہ پینے کے صاف پانی کے حوالے سے بہت سے مسائل ہیں لیکن آبادیوں میں مرحلہ وار واٹر فلٹریشن پلانٹس کی تنصیب سے لوگوں کو صاف پانی میسر آرہا ہے جو کہ کسی نعمت سے، کم نہیں۔انہوں نے کہا کہ پورے ملک کے لوگوں کو پینے کا صاف پانی فراہم کرنے کے لیے پرعزم ہیں۔بیگم گورنر نے کہا کہ گورنر پنجاب چوہدری محمد سرور نے اس علاقے میں 4 واٹر فلٹریشن پلانٹس لگانے کا اعلان کیا تھااورآج تیسرے پلانٹ کا افتتاح ہو چکا ہے۔دریں اثناء بیگم گورنر پنجاب مسز پروین سرور نے سسٹم فاونڈیشن کابھی دورہ کیا۔چیئرمین پاسبان ویلفیئرمیجر ریٹائرڈ شاہنواز بھی موجود تھے۔بیگم گورنر نے سسٹم فاونڈیشن کے مختلف شعبہ جات کا وزٹ کیااورخواجہ سراؤں کی فلاح وبہبود کے لئے قائم سینٹر کے قیام کو سراہا۔انہوں نے کہا کہ اس ادارہ میں ٹرانسجینڈرز کو نان فارمل تعلیم دی جارہی ہے جبکہ خواجہ سراؤں کو باعزت روزگارکمانے کے لیے مختلف ہنر بھی سکھائے جارہے ہیں۔انہوں نے کہا کہ رنگ،نسل،مذہب اور ذات سے بالاتر ہو کر انسانیت کی خدمت عظیم اقدام ہے۔