فیصل آباد(04مئی 2021ء)وزیر مملکت برائے اطلاعات ونشریات میاں فرخ حبیب اور ڈپٹی کمشنر محمد علی نے مختلف علاقوں کے سستے رمضان بازاروں کا معائنہ کیا۔
تفصیلات
اسسٹنٹ کمشنرز سٹی وصدر سید ایوب بخاری،عمر مقبول بھی موجود تھے۔وزیر مملکت اور ڈپٹی کمشنر سرسید ٹاؤن اور دیگر علاقوں کے رمضان بازاروں میں گئے اور اشیائے ضروریہ کی دستیابی،معیار اور قیمتوں کا تفصیلی جائزہ لیا۔انہوں نے مختلف سٹالز پر اشیاء کو چیک کرتے ہوئے ہدایت کی کہ ماہ صیام میں صارفین کو معیاری اشیائے ضروریہ کی فراہمی یقینی اور بہترین انتظامات برقرار رہنے چاہیں۔
انہوں نے سستی چینی اور سستے آٹے کی فروخت کے ریکارڈ کا جائزہ لیا اور کہا کہ سٹالز پر نظم وضبط برقرار رکھا جائے۔انہوں نے خریداری کے لئے موجود مرد وخواتین سے رمضان بازاروں میں فروخت کی جانے والی اشیاء کے معیار اور قیمتوں کے بارے میں بھی دریافت کیا۔انہوں نے مختلف سٹالز پرپھلوں وسبزیوں کی کوالٹی کو بھی چیک کیا اور اشیاء کے معیاری ہونے پر اطمینان کا اظہار کیا۔وزیر مملکت نے کہاکہ رمضان بازاروں سے خریداروں کا بڑی تعداد میں خریداری کرنا ان بازاروں کی کامیابی کی دلیل ہے۔انہوں نے ضلع کے رمضان بازاروں میں سپلائی میکنزم پر ذمہ دارانہ عملدرآمد پر ضلعی انتظامیہ کی کاوشوں کو سراہا اور کہا کہ ماہ صیام کے آخری ایام میں بھی صارفین کو ہر ممکن ریلیف فراہم کیا جائے۔ڈپٹی کمشنر نے بتایا کہ مسلسل مانیٹرنگ سے ضلع کے سستے رمضان بازاروں میں صارفین کو معیاری اشیاء عام مارکیٹ کے سرکاری نرخوں سے 60روپے کم قیمت پر فروخت ہورہی ہیں اور خریداروں کی طرف سے موصولہ بعض شکایات کا بھی موقع پر ازالہ کیا جا رہا ہے۔انہوں نے کہا کہ ماہ مبارک کے اختتام تک انسپکشنز کا سلسلہ جاری رہے گا۔
