Category: فیصل آباد

فیصل آباد(باغی ٹی وی رپورٹ) قادیانی شہری کی عید قرباں پر قربانی، توہین رسالت کی دفعہ 298-C کے تحت مقدمہ درج،ملزم گرفتار

تھانہ ترکھانی پولیس نے فیصل آباد کے نواحی گاؤں چک نمبر 215 گ ب میں ایک قادیانی شہری کے خلاف عید الاضحی کے روز قربانی کرنے پر توہین رسالت کی دفعہ 298-C کے تحت مقدمہ درج کر کے اُسے گرفتار کر لیا ہے۔ مقدمے کے اندراج کی بنیاد مقامی شخص ڈاکٹر محمد طاہر جمیل کی جانب سے جمع کرائی گئی تحریری درخواست بنی۔

درخواست گزار کے مطابق، وہ عید کی نماز کے بعد مسجد سے اپنے گھر واپس جا رہے تھے کہ انہوں نے دیکھا کہ مجاہد علی نامی ایک شخص، جو کہ قادیانی عقیدے سے تعلق رکھتا ہے اور عید کے موقع پر اپنے آبائی گاؤں آیا ہوا تھا، اپنے گھر کے باہر قربانی کا جانور ذبح کر رہا تھا۔ ڈاکٹر طاہر کے مطابق یہ عمل اسلام کے شعائر کی صریح خلاف ورزی ہے کیونکہ قربانی صرف مسلمانوں کا مذہبی فریضہ ہے، اور قادیانی نہ تو مسلمان ہیں اور نہ ہی انہیں ایسے افعال کی اجازت ہے جن سے وہ خود کو مسلمان ظاہر کریں۔

درخواست میں کہا گیا ہے کہ جب طاہر جمیل نے مجاہد علی کو قربانی سے باز رکھنے کی کوشش کی تو وہ باز نہ آیا اور بکرے کو ذبح کر دیا۔ شور و غل پر گاؤں کے متعدد افراد، جن میں مزمل سعید اور شعیب اعجاز بطور گواہ نامزد ہیں، موقع پر جمع ہو گئے اور وقوعے کو اپنی آنکھوں سے دیکھا۔ درخواست گزار کے مطابق، اس عمل سے نہ صرف مقامی مسلمانوں کے مذہبی جذبات کو شدید ٹھیس پہنچی بلکہ مجاہد علی نے خود کو مسلمان ظاہر کر کے قانون کی سنگین خلاف ورزی کی۔

واقعے کی اطلاع ملنے پر SI خرم سجاد بمعہ پولیس اہلکاران موقع پر پہنچے اور موقع سے مجاہد علی کو گرفتار کر کے تھانے منتقل کیا۔ پولیس کے مطابق ابتدائی تحقیقات اور شواہد کی روشنی میں زیر دفعہ 298-C تعزیرات پاکستان مقدمہ نمبر 307/25 درج کر لیا گیا ہے۔ تھانہ ترکھانی کی ابتدائی رپورٹ میں یہ بھی درج ہے کہ مجاہد علی کے خلاف جرم کی نوعیت "توہین رسالت” کے زمرے میں آتی ہے اور مقدمے کی مزید تفتیش جاری ہے۔

یہ امر قابل ذکر ہے کہ دفعہ 298-C کے تحت کسی قادیانی کو اسلام کے مخصوص شعائر اختیار کرنے یا خود کو مسلمان ظاہر کرنے کی اجازت نہیں، بصورت دیگر اس پر فوجداری کارروائی عمل میں لائی جا سکتی ہے۔

فیصل آباد(باغی ٹی وی رپورٹ) ٹریکٹر ٹرالی سے ٹکرانے کے باعث شالیمار ایکسپریس حادثے کا شکار، متعدد بوگیاں پٹری سے اتر گئیں، ریلوے ٹریفک معطل

فیصل آباد کے نواحی علاقے چک جھمرہ کے گاؤں چھوٹی گھرتل کے قریب شالیمار ایکسپریس خوفناک حادثے کا شکار ہو گئی، جب ٹرین ایک کچے ریلوے پھاٹک پر کھڑی اینٹوں سے لدی ٹریکٹر ٹرالی سے ٹکرا گئی۔ حادثہ اس وقت پیش آیا جب کراچی سے لاہور جانے والی مسافر ٹرین ٹریک پر موجود رکاوٹ سے ٹکرا گئی، جس کے باعث انجن سمیت 12 سے زائد بوگیاں پٹری سے اتر گئیں اور ٹرین تقریباً ایک کلومیٹر تک الٹتی چلی گئی۔

ریلوے حکام کے مطابق حادثے کے نتیجے میں ٹرین کے ڈرائیور اور اسسٹنٹ ڈرائیور سمیت کم از کم 5 افراد زخمی ہوئے ہیں، جب کہ متعدد مسافروں کو بھی معمولی چوٹیں آئی ہیں۔

عینی شاہدین کا کہنا ہے کہ حادثے سے چند لمحے قبل ٹریکٹر ٹرالی ریلوے لائن پر پھنس گئی تھی۔ جب ڈرائیور نے دور سے آتی ٹرین کو دیکھا تو اس نے عجلت میں ٹریکٹر کو ٹرالی سے الگ کر کے فرار ہو گیا، تاہم تیزی سے آتی ہوئی ٹرین اینٹوں سے بھری ٹرالی سے ٹکرا گئی، جس کے نتیجے میں خوفناک تباہی ہوئی۔

حادثے کے بعد ریسکیو ٹیموں نے فوری امدادی کارروائیاں شروع کر دیں اور متاثرہ مسافروں کو امدادی ٹرین کے ذریعے روانہ کر دیا گیا۔

ریلوے حکام کا کہنا ہے کہ حادثے کی بنیادی وجہ ٹریکٹر ٹرالی میں آئل ختم ہونا بنی، جس کے باعث وہ پھاٹک پر رک گئی تھی۔ ڈرائیور حادثے کے فوراً بعد موقع سے فرار ہو گیا۔

حادثے کے باعث ساہیانوالہ سے سالار والا تک ریلوے ٹریک کو شدید نقصان پہنچا ہے، جس کے سبب فیصل آباد سے لاہور اور وزیرآباد کے درمیان ٹرینوں کی آمد و رفت مکمل طور پر بند کر دی گئی ہے۔

حکام کا کہنا ہے کہ متاثرہ ٹریک کی بحالی میں کم از کم چھ گھنٹے لگیں گے، جب کہ حادثے کی مکمل تحقیقات کے لیے انکوائری کا آغاز کر دیا گیا ہے۔